1. Etthu xeeni Martha aakupali awe wira yammukhumelela murokorawe? (Nwehe elatarato yoopacerya)

MARTHA, yoowo aari mpatthani ni mutthareli awe Yesu, aaninla mwaha wa okhwa wa murokora awe, Laazaro. Niireke yaahikhala etthu yaakhanle ommaaliha? Aayo, Yesu aahimuleiherya wira: “Murokor’inyu onohihimuwa”. Tthiri, moolumo ale yaahimulipiha Martha. Ti maana aya aahiroromela yooleiherya ya Yesu, ni aahihimya so: “Miyo kosuwela wira onohihimuwa nihiku nokiserya”. (Yohani 11:20-24) Martha aanikupali wira waamukhala ohihimuwa muhoolo. Masi moohipisa Yesu aahipaka mwiiriirya. Owo aahimuhihimuxa Laazaro nihiku nenle.

2. Moolikanasa ni Martha, xeeni munitthuneya anyu okupali wira onookhala ohihimuwa?

² Khaninlipelela wira Yesu aahiiso Tiithi awe olelo vaava animwaahihimuxa amusi ahu akhwiiye. Masi ntoko Martha, niireke munnikupali wira amusi anyu akhwiiye anoohihimuwa muhoolo? Woonasa wene mookhweliwa, aiyanyu, aahiiso amwaarinyu, apapinyu, amaminyu, atatinyu aahiiso mwaninyu mwamphenta anyu vanceene. Vano khamuniwerya-tho  omukupaarela, omulavuliha, ni otheya ni yena. Masi sintoko Martha, nyuwo mookhalana mathowa aniwiirihani ohimya so: ‘Miyo koosuwela wira amusi aka anoohihimuwa’. MaKristau otheene annireerela wuupuwelela mathowa anaakupaliha wira onookhala tthiri ohihimuwa.

3, 4. Miiriirya xeeni Yesu aapanke awe khalai ene ohinatthi omuhihimuxa Laazaro? Nave moota xeeni eyo yaalipinhe aya ororomela wa Martha?

³ Martha aakhala waattamela oYerusalemu, nto yena waaniheryasa khaamoonale Yesu omuhihimuxaka mwaana a naamukhweli waattamela oNayini, oGalileya. Masi woonasa wene aahiiwa yowiiraneya ele. Nave yena aahiiwa wira Yesu aahimuhihimuxa mwaana mwaamuthiyana a Jairo. Atthu otheene yaari wa Jairo “yahisuwela wira [mwaana ole] ahikhwa”. Masi nnaamwi aakhwiiye, Yesu aahinvarela ntata ni aahimwiirela wira: “Mwanamwane, nvenyé!” Okathi ene yoole, mwaana ole aahivenya. (Luka 7:11-17; 8:41, 42, 49-55) Martha ni muhima awe, Maria, yaanisuwela wira Yesu aaniwerya waapenuxa aretta. Awosa yaanikupali wira vaakhanle wira Yesu aari opuro ole, Laazaro khaakhwa. Nto okhala wira mooriipiha murima Laazaro aahookhwa, niireke Martha aahikhalana yoolipelela? Martha aahimmye wira Laazaro aamutthikela okhala mukumi muhoolo “nihiku nokiserya”. Exeeni yaamukupaliha? Nave exeeni enookupalihani wira muhoolo alipa ookhwa anoohihimuwa waahela muhina amusi anyu mwaaphenta anyu?

⁴ Aakhala mathowa manceene annikupaliha wira onookhala ohihimuwa. Vano ninrowa othokorerya mathowa awo. Waaniheryasa nyuwo mophwanya mBiibiliyani myaha sihinimakela anyu wuupuwela, masi sinilipiha waamini wanyu wira munimwaaweha-tho amusi anyu akhwiiye.

5. Exeeni yaamukupaliha Martha wira Laazaro aarowa ohihimuwa?

⁵ Moone wira Martha khaahimmye wira: ‘Kinnilipelela wira murokoraka onoohihimuwa’. Owo aahimmye so: “Miyo kosuwela wira onohihimuwa”. Exeeni yaamukupaliha Martha? Waari mwaha wa osuwela wira khalai yaahikhala atthu yaahihimuxiwe. Waaniheryasa okathi aari awe mwaana, aahiixuttihiwa owannyawe aahiiso musinagoga voohimya sa myaha iyo. Vano nrowe nithokorerye sowiiraneya tthaaru sa atthu yaahihimuxiwe aniromoliwa mBiibiliyani.

6. Mwiiriirya xeeni wa ohihimuwa Martha aasuwela awe?

⁶ Mwiiriirya woopacerya wa ohihimuwa waakhumelenle okathi Muluku anvanhe awe profeta Eliya owerya woopaka miiriirya. Epantte enikela epheyo ya wIsarayeli, epooma ya oFeniisia, yaitthaniwa Sarefá, aahikhala naamukhweli aamakela onvaha opuro woorupa profeta a Muluku. Nto, Yehova aahipaka mwiiriirya wira naamukhweli owo ohikhwe. Yehova aahikhaliherya wira ephepa ni makhura a muthiyana ole ehimale. (1 Mamwene 17:8-16) Muhoolo mwaya, mwanawe naamukhweli ole aahiwereiwa ni aahikhwa. Masi Eliya aahimukhaliherya. Eliya aahimuteexa mmiravo ole ni aahilompa ohimyaka so: ‘Xontte, Yehova Muluku aka, mmwiirihe mwaana ola otthikele okhala mukumi-tho’. Tthiri eyo yaahiiraneya! Muluku aahiiwa nivekelo na Eliya, nto mwaana ole aahitthikela okhala mukumi. Ole waari mwiiriirya woopacerya wa ohihimuwa  oniromoliwa mBiibiliyani. (Mmusome 1 Mamwene 17:17-24.) Moohaaniherya Martha aanisuwela yowiiraneya ele.

7, 8. (a) Etthu xeeni Eliseyo aapanke awe wira ommaalihe muthiyana aakhweliwe mwanawe? (b) Mwiiriirya wa Eliseyo woonihenrye exeeni voohimya sa Yehova?

⁷ Mwiiriirya wanenli wa ohihimuwa oniromoliwa mBiibiliyani, waapakiwe ni profeta Eliseyo. Epooma ya Xunemi, aahikhala muthiyana mwIsarayeli ahaayara. Okhala wira muthiyana ole aanimukhaliherya profeta Eliseyo, Yehova aahimureeliha yena ni iyawe oowuuluvala, aavahaka mwaana mwaamulopwana. Nuuvira iyaakha vakhaani, mmiravo ole aahikhwa. Tthiri maama awe aahiriipiwa murima vanceene. Nto oriipiwa wawe murima waahimwiiriha weetta ikiloomo 30 orowaka okumana ni Eliseyo omwaako Karmelo. Eliya aahimuruma namakhaliherya awe, Gehazi ohoola orowaka oXunemi wira aamuhihimuxe mmiravo ole. Masi Gehazi khaawenrye omuhihimuxa. Nuumala-vo muthiyana ole aahitthikela owannyawe hoothe ni Eliseyo.​—2 Mamwene 4:8-31.

⁸ Eliseyo aahirowa opuro aataleliwe awe mmiravo ole ni aahivekela. Yehova aahaakhula nivekelo nawe, mwa mwiiriirya aahimuhihimuxa mmiravo ole. Nto maama awe aahihakalala vanceene! (Mmusome 2 Mamwene 4:32-37.) Woonasa wene, Martha aanuupuwelela moolumo a nivekelo na Ana. Ana khaayara, mpakha Yehova omureeliha onvahaka mwaana mwaamulopwana, Samuweli. Nuumala-vo, Ana aahimuttottopela Yehova ohimyaka so: ‘Apwiya annaroiha atthu omahiye, annakumiha’. (1 Samuweli 2:6) Mwaha wa omuhihimuxa mmiravo ole a oXunemi, Muluku aahooniherya wira ookhalana owerya wa waahihimuxa alipa-ookhwa.

9. Mutthokiherye mwiiriirya wa neeraru wa ohihimuwa oniromoliwa mBiibiliyani.

⁹ Mwiiriirya mukina waakhumelenle nuumala Eliseyo okhwa. Eliseyo aahikhala profeta mwa iyaakha sinivikana 50. Nto muhoolo mwaya “ahiwereiwa” mpakha okhwa. Nuuvira okathi, yaahanle makhuva paahi. Nihiku nimosa, aIsarayeli yaahirowa onvitha mulopwana mmosa. Mootutuxerya awo yaahaaweha alavilavi erwaaka. Moohipisa aIsarayeli yaahirihela murutthu ole mmahiye mwa Eliseyo nto khutthyawa. Biibiliya onihimya wira okathi ‘murutthu awe waphiteryale aya makhuva a Eliseyo, mulopwana ole aahitthikela okhala mukumi, khuvenya, arowaka’. (2 Mamwene 13:14, 20, 21) Sowiiraneya iye saanimwiiriha Martha okupali wira Muluku onniwerya waahihimuxa alipa-ookhwa. Nave eyo ehaana wookupalihani wira Muluku ookhalana owerya ohinimala.

10. Exeeni murummwa Pedru aapanke awe nuumala Dorcas okhwa?

¹⁰ Nave-tho Soolempwa sa eKristau sa eGriki sinnaaromola atthu yaahihimuxiwe ni arumeyi oororomeleya a Muluku. Noolavula voohimya sa moota mwiiriirya wa ohihimuwa waapakiwe ni Yesu waattamela epooma  ya oNayini ni owannyawe Jairo. Muhoolo mwaya, murummwa Pedru aahimuhihimuxa Dorcas, aahiiso Tabitha. Pedru aahirowa okwaartu waataleliwe murutthu ni aahimulompa Muluku, nuumala-vo aahihimya so: “Tabithá nyu! Nvenyé!” Okathi ene yoole Tabithá aahikhunula maitho, nto Pedru aahinvarela ntata ni aahaavahererya maKristau yaari opuro ole. Yowiiraneya ele yookuxa murima, yaahiwiiriha atthu anceene a epooma ele ‘owaminí Apwiya’. Atthareli awo a niinaano yaanaalaleerya atthu akina ihapari sooreera voohimya sa Yesu, nave yaanilaleya voohimya sa owerya wa Yehova wa waahihimuxa alipa-ookhwa.​—Miteko 9:36-42.

11. Moovarihana ni Luka, exeeni yaamwiiranenle Eutiko? Nave yowiiraneya ele ennilipiha sai?

¹¹ Opuro ole yaahikhala atthu yiirenle onamoona ohihimuxiwa wa mutthu mukina. Okathi omosa, murummwa Paulo aahithukumana ni maKristau makina esaala ya vasulu, epooma ya oTrowade, weiwo olelo-va onsuweliwa okhala oTurquia. Paulo aahilavula mpakha ohiyu eriyari. Mmiravo mmosa aitthaniwa Eutiko aaninwiriyana, okilaathale ene vaxanelani. Masi ikhove saahinveliha ni aahimora empa yaneeraru yoosulu omorelaka vathi. Waaniheryasa Luka taapacenrye omuteexa Eutiko. Okhala wira aari meediko, aahiweha wira mmiravo ole aahookhwa. Nto Paulo ahikhuruwa orowaka empa ya vathi. Owo aahimukupaarela Eutiko ni aahihimya wira: “Muhituthuwé: ola mukumí”. Mwiiriirya ole waahaatikiniha atthu otheene yaari opuro ole. Osuwela wira mmiravo ole aahikhwa khuhihimuwa, ‘wahakurunuxa murima vanjene’.​—Miteko 20:7-12.

12, 13. Voohimya sa sowiiraneya sa ohihimuwa nithokorenrye ahu, makoho xeeni anikhumelela?

¹² Moolikanasa ni Martha, sowiiraneya sa ohihimuwa nithokorenrye ahu sihaana olipiha waamini wanyu. Nihaana ororomela wira Muluku ahu, yoowo onivaha ekumi, onniwerya omuttikiherya okumi mutthu okhwiiye. Ti voohakalaliha osuwela wira Eliya, Eliseyo, Yesu, ni Pedru yaahirumeela owerya wa Muluku wira yaahihimuxe atthu yaakhwiiye. Nto eyo yaahiiraneya okathi  Yehova aavaha awe owerya arumeyi awe woopaka miiriirya. Nto ankhi voohimya sa atthu yaale akhwiiye khalai Yehova ohinatthi waavaha owerya arumeyi awe wira yaahihimuxe atthu? Niireke atthu awo yaanilipelela wira muhoolo waamukhala ohihimuwa? Moolikanasa ni Martha yoowo aahimmye wira, “Miyo kosuwela wira onohihimuwa nihiku nokiserya”, niireke nave awo yaaniroromela? Exeeni yaamukupaliha Martha wira muhoolo waamukhala ohihimuwa, nave exeeni enookupalihani?

¹³ Sowiiraneya sa ohihimuwa siri muNuulumoni na Muluku sinooniherya wira arumeyi a Muluku a khalai yaanisuwela wira waamukhala ohihimuwa muhoolo. Nrowe nithokorerye sowiiraneya sikina.

14. Yowiiraneya ya Abrahamu enniixuttiha exeeni voohimya sa ohihimuxiwa?

¹⁴ Okhuma khalai Abrahamu aaniphavela okhalana mwaana. Masi, Yehova aamuhimenrye so: “Mmukuxe Isakhi, mwan’inyu mmosene onimphentexanyu. Mmurowane elapo y’oMoriya, vamwako onrowaka wothonyeryani. Mwamuhite weiwo, mumpahe, mukivaherye mukuttho”. (Maphattuwelo 22:2) Nkuupuwelani moota Abrahamu aaxankale awe! Yehova aahileiherya wira mwaha wa osuulu wa Abrahamu, maloko otheene yaarowa oreelihiwa. (Maphattuwelo 13:14-16; 18:18; aRoma 4:17, 18) Nave, Yehova aahihimya wira mareeliho, yaarowa okhumelela mwaha wa “Isakhi”. (Maphattuwelo 21:12) Masi eyo yaarowa oweryaneya sai vaakhanle wira Abrahamu aahinvaha mwanawe sintoko mukuttho? Biibiliya onihimya wira Abrahamu aanikupali wira Muluku anwerya omuhihimuxa Isakhi. (Mmusome aHéberi 11:17-19.) Masi Biibiliya khonihimya wira Abrahamu aakupali wira Isakhi aamuhihimuwa okathi ene yoole, aahiiso nuuvira iwoora vakhaani, wala mahiku nnakhala, esumana. Abrahamu khaasuwela silini mwanawe aarowa awe ohihimuxiwa. Masi yena aaniroromela wira Yehova anwerya omuhihimuxa Isakhi.

15. Yoolipelela xeeni Yobi aarina awe?

¹⁵ Murumeyi oororomeleya Yobi, aanisuwela wira muhoolo, alipa okhwa yaamuhihimuwa.  Yena aanisuwela wira mwiri waikitthiwa, onniphuwa vasya ni wunnuwa ni otthikela okhala sintoko waari aya. Masi eyo kheniwiiranela atthu. (Yobi 14:7-12; 19:25-27) Mutthu okhwiiye khoniwerya wiihihimuxa. (2 Samuweli 12:23; Esalimo 89:48) Masi eyo khentaphulela wira Muluku khoniwerya omuhihimuxa mutthu. Tthiri, Yobi aanikupali wira Yehova anwerya omuupuwela yena. (Mmusome Yobi 14:13-15.) Yobi khaasuwela nihiku nene eyo yaarowa aya wiiraneya. Masi hata vari siiso, owo aaniroromela wira Mpattuxa a apinaatamu anwerya omuupuwela yena ni omuhihimuxa.

16. Nlaikha naamulipinhe sai Daniyeli?

¹⁶ Mmuupuwele mulopwana mukina oowaamini, Daniyeli. Owo aari murumeyi oororomeleya a Yehova, nave Yehova aanimukhaliherya. Nihiku nimosa, nlaikha naahimuleela wira: “Nyuwo Daniyeli, Muluku onnophentani”.​—Daniyeli 9:22, 23; 10:11, 18, 19.

17, 18. Etthu xeeni Yehova aamuleihenrye awe Daniyeli?

¹⁷ Okathi Daniyeli aarina awe iyaakha 100, aahiiso ohalaka vakhaani okhwa, woonasa wene aaniikoha etthu yaarowa omukhumelela. Niireke Daniyeli aanilipelela otthikela okhala mukumi? Aayo! Ikapiitulu sookiserya sa eliivuru ya Daniyeli sinihimya so: “Nyuwo munimokhwa, masi munohihimuwa mokhwani mahiku òkiserya”. (Daniyeli 12:13) Daniyeli aanisuwela wira alipa-okhwa anoomumula ni wira “elapo y’alipa-òkhwa khuvo-vo muteko nnákhala osuwela” ni ti weiwo aatthuna awe orowa moohipisa. (Musuweli 9:10) Daniyeli aahikhalana yolipelela ya muhoolo. Yehova aahimuleiherya etthu yootepa ohakalaliha.

¹⁸ Nlaikha na Yehova naahimuleela Daniyeli wira: “Nyuwo munimokhwa, masi munohihimuwa mokhwani mahiku òkiserya”. Daniyeli khaasuwela saana okathi itthu iye saarowa aya wiiraneya. Masi hata vari siiso, aanikupali wira yena aamookhwa ni amphumurya. Masi okathi Daniyeli aiwale awe yooleiherya yoowi “munohihimuwa mokhwani mahiku òkiserya”, aahisuwela wira aamuhihimuxiwa muhoolo. Eyo yaarowa wiiraneya ovinre ene okathi munceene, nuumala owo okhwa aahiiso “mahiku òkiserya”.

19, 20. (a) Sowiiraneya xeeni niwenhe ahu seiyo saamwiirinhe Maria okupali moolumo a Yesu? (b) Exeeni ninrowa ahu othokorerya mwaha onittharelana?

¹⁹ Tthiri saahikhala sowiiraneya sinceene saamwiiriha Martha okupali wira Laazaro yoowo aari oororomeleya, ‘amuhihimuwa nihiku nokiserya’. Yooleiherya Yehova aamulenle awe Daniyeli yeeyo yaalipinhe waamini wa Martha wira muhoolo onookhala ohihimuwa, enninroromeliha vanceene olelo-va. Moohaaniherya onookhala ohihimuwa.

²⁰ Nihiixutta voohimya sa sowiiraneya sa ohihimuwa siiraneyale khalai. Sowiiraneya iye sinooniherya wira tthiri alipa-ookhwa anootthikela okhala akumi. Nave, nihiixutta voohimya sa alopwana ni athiyana yaamurumenle Muluku yaawo anlipelela ohihimuwa muhoolo. Masi niireke yookhala etthu ennikupaliha wira ohihimuwa pooti wiiraneya ovinre ene okathi munceene nuumala oleiheriwa? Akhala wira ti siiso, eyo enninroromeliha vanceene wira ohihimuwa wa alipa-ookhwa onrowa wiiraneya muhoolo. Nto onrowa okhala silini? Ninrowa othokorerya waakhuliwa wa makoho ala mwaha onittharelana.