1. Xeeni obatizo ori aya nivalo nootthuneya? (Nwehe elatarato yoopacerya.)

KHULA mwaakha, atthu anceene animusoma Biibiliya annibatiziwa. Anamunceene anibatiziwa, amiravo, ni akina anamwane. Woonasa wene awo ahuuwale mwekeekhaini. Niireke nyuwo mwammiravo oobatiziwa? Akhala wira ti siiso, weeso moopaka etthu yootepa oreera. Makristau otheene ahaana obatiziwa. Nave obatiziwa ti wootthuneya wira mutthu oopowe ni aphwanye okumi woohimala.​—Matheyo 28:19, 20; 1 Pedru 3:21.

2. Xeeni vahinitthuneya anyu woovelela wiivahererya wa Yehova?

² Nuumala nyuwo obatiziwa, Yehova aahipacerya woovahani mareeliho manceene. Nave-tho mwaahipacerya okhalana muritti. Moota xeeni? Nihiku mwaabatiziwa anyu, munna aalavunle mwaha wa obatizo aahookohani oriki: “Orweela wa mukuttho wa Yesu Kristu, moottharuwa soottheka sanyu  ni muhiivahererya wa Yehova wira mpakeke yootthuna awe?” Nyuwo mwaahaakhula wira aayo. Mwaahileiherya omphenta Yehova ni opweha nipuro noopacerya mookumini mwanyu omukokhorela yena. Niireke muhaana othanana mwaha wa olaiherya eyo? Nnaari! Khamunkhala-khala muthananaka mwaha wa omuhiya Yehova oweettihakani. Ale ahinimusuwela Yehova, animukhaliherya Satana. Diabo owo khonimuthokorerya mutthu. Mwekeekhai, owo aamuhakalala vanceene woowehani mpweteiwale ene eparakha ya okumi woohimala mwaha woowi moomukhootta Yehova, nto khiyamurumeela Satana.

3. Yehova ooreelinheni sai mwaha wa wiivahererya wanyu wa yena?

³ Muupuweleke mareeliho mwaakhenle anyu mwaha wa wiivahererya wa Yehova ni obatiziwa. Nyuwo monvaha Yehova okumi anyu, tivo munoowerya ohimya wira: “Apwiya ankhala ni miyo: tivó vahinòvaka etthu. Atthu anwerya okìriha exeni?” (Esalimo 118:6) Khiivo etthu yootepa oreera enivikana omurumeela Yehova ni osuwela wira owo onnihakalala ni hiyo.

4, 5. (a) Xeeni vanihimya ahu wira obatizo muritti wa mutthu mmensawe? (b) Mixankiho xeeni maKristau otheene anikhalana aya?

⁴ Muhooneke wataana wanyu ni Yehova ntoko etthu anamuyari anyu akhanle aya owooliveryani. Hata nlelo mukhalaka ni anamuyari anyu, nyuwo murina muritti wa olipiha wataana wanyu ni Yehova. Xeeni vanitthuneya aya ohiliyala eyo? Khuuvo a hiyo onisuwela oratteene mixankiho sinrowa weeherereya waamini wahu muhoolo. Mwa ntakiheryo, pooti wira mbatiziwe nlelo muryeene mmiravo mwaamukhaani. Masi vano munnunwe anyu vakhaani, mooweha wira moopacerya okhalana mixankiho mwahaarina anyu khalai. Mwali mmosa ohimmye so: “Mwaana khonrowa ohiya okhala Namoona a Yehova mwaha woohivahiwa eboolu yootthapela iyaakha oxikola. Masi nuumala wunnuwa vakhaani, nto onapacerya ophavela orupihana, ohaana okhalana waamini woolipa wira owerye wiiwelela malamulo a Yehova”.

⁵ Khahiyo paahi amiravo anrowa okhalana mixankiho isya nuumala obatiziwa. Hata ale anibatiziwa yinnunwe ene annikhalana mixankiho yahaalipelela aya. Nikhale amiravo wala atthu aalupale, otheene ahu nihaana ovikaniha okhala oororomeleya wa Yehova mwa inamuna soovirikana.​—Yakobo 1:12-14.

6. (a) Ninrowa wooniherya sai wira natiri ommanenle ahu Yehova khonlipa ni mutthu mukina? (b) Exeeni enniixuttiha aya yoolepa ya 2 aKorinto 4:7?

⁶ Wira mukhale oororomeleya, muhaana wuupuwelaka wira natiri ommanenle anyu Yehova khonlipa ni mutthu wala etthu ekina. Eyo enitaphulela wira nyuwo moomuleiherya Mukhulupale a Olumwenku wira munrowa omurumeelaka yena, hata apatthani anyu aahiiso anamuyari anyu ahiyaka omurumeela. (Esalimo 27:10) Wa khula muxankiho onoophwanyani, munvekeleke Yehova wira ookhaliheryeni opaka ele emuleihenrye anyu.​—Mmusome 2 aKorinto 4:7.

7. Onitaphulela exeeni ovarela muteko woopowa wanyu “n’umuttittimiha Muluku ni wova”?

⁷ Yehova oniphavela wira mukhale mpatthani awe. Masi mutthu ohaana wiilipiha wira okhale mpatthani a Muluku ni oopowe. AFilipi 2:12 onihimya wira: “Nvareleke  muteko wopowa wanyu n’umuttittimiha Muluku ni wova”. Nihaana wuupuwela oratteene etthu ekhanle ahu oopaka wira nlipihe wataana wahu ni Yehova ni ovikaniha okhala oororomeleya okathi wotheene. Nihuupuweleke wira nnoowerya opaka eyo nihiimananihale. Muupuweleke wira yaahikhala atthu akina yaamurumeela Yehova okhuma khalai, yahaavikaninhe okhala oororomeleya. Itthu xeeni sinrowa wookhaliheryani ovarela muteko woopowa wanyu?

8. Omusoma Biibiliya onihela muhina exeeni? Xeeni vari aya vootthuneya opaka eyo?

⁸ Wira nikhale mpatthani a Yehova nihaana onwiriyana ni olavulana. Enamuna emosa ya onwiriyana Yehova ti omusoma Biibiliya. Eyo enihela muhina omusoma Biibiliya ni iliivuru sinimutthokiherya Biibiliya ni wuupuwelela ele enisoma ahu. Masi omusoma Biibiliya khonlikana ni ohela mmuruni itthu, ntoko atthu aniira aya yaarowaka opaka eporova oxikola. Masi enlikana ni weetta mukwaha, mphavelasaka osuwela ni wiixutta itthu isya voohimya sa Yehova. Mwiira siiso, munoomwaattamela Muluku, nave owo onrowa owaattamelani.​—Yakobo 4:8.

9. Itthu xeeni sinookhaliheryani omusoma Biibiliya?

⁹ Mutthenkeso wa Yehova wookhalana ikaruma sinceene sinrowa wookhaliheryani omusoma Biibiliya. Mwa ntakiheryo, wookhala mpantta oni “Exercícios Bíblicos” oniphwanyaneya epantte ya jw.org eni “Adolescentes”. Mpantta owo onrowa wookhaliheryani moota woovarela muteko ele  eniixutta anyu ni sowiiraneya sa mBiibiliyani. Nave-tho pooti ophwanya mpantta oni Guias de Estudo sa eliivuru “Biibiliya Onniixuttiha Exeeni?” Epantte eyo enimookhaliheryani olipiha waamini wanyu ni owerya waatthokiherya saana akina sookupali sanyu. Nave pooti ophwanya malakiheryo makina muhina mwa myaha sa erevista Despertai! ya Abril 2009, mpantta oni: “Os Jovens Perguntam . . . Como tornar a leitura da Bíblia agradável?” Osoma ni wuupuwelela ti wootthuneya wira mphwanye woopowa wanyu.​—Musome Esalimo 119:105.

10. Xeeni vari aya vootthuneya ovekela?

¹⁰ Vaavo vanimusoma ahu Biibiliya, hiyo nninwiriyana Yehova, nto vaavo vanivekela ahu, ninlavula ni Yehova. Nihuupuweleke wira nivekelo, yoolema paahi aahiiso eri ntoko ‘ehirisi’ enuupuweliwa wira enniphwanyiha oreeriwa. Nivekelo ti enamuna ya olavula ni Mpattuxa ahu. Muupuwele ela: Yehova oniphavela owiriyana etthu erina anyu omuleela! (Mmusome aFilipi 4:6.) Nto akhala wira yookhala etthu enooxankihani vanceene, Biibiliya onihimya wira “mwareye Apwiya muritti anyu”. (Esalimo 55:23) Anna ni arokora anceene annikupali tthiri wira eyo ennaakhaliherya vanceene. Ni nyuwo-tho pooti wookhaliheryani!

11. Xeeni vanireerela aya omuxukhurela Yehova khula okathi?

¹¹ Masi nihivekeleke paahi okathi yoole nimphavela ahu wira Yehova onikhaliherye. Biibiliya onninuupuxerya wira: “Mukhale atthu òxukhuru”. (aKolosi 3:15) Ikwaha sikina ninnitepa oxankiheya ni mixankiho sahu, khiyaliyala itthu sotheene sooloka sirina ahu. Nto mweererye ela: Khula nihiku muupuweleke itthu tthaaru sooloka, nto mmuxukhureleke Yehova mwaha wa itthu iyo. Mwali mmosa oniitthaniwa Abigail, yoowo obatiziwe orina ene iyaakha 12 onihimya so: “Kinoona wira Yehova onniphwanelela omuxukhurela ovikana itthu sotheene sikhanle. Nihaana omuxukhuru Yehova khula okathi mwaha wa itthu sooloka onnivaha awe”. Ikwaha sikina Abigail onniipaka nikoho nla otonko awe wiiwa khalai: Mwaarowa okhala sai vakhanle wira mmeloni mwaya nuumala ovenya vaarupa anyu muniphwanya wira khiivo yooreera ekina yookhumelenleni, voohikhala seiye paahi nsana simuxukhurenle anyu Yehova? * (Nwehe enoota.)

12, 13. Nyuwo mmensinyu moonale sai oreera murima wa Yehova? Xeeni vanitthuneya aya wuupuwelela moota Yehova onookhaliherya aweni?

¹² Yehova aahimukhaliherya Davidi ovilela mixankiho sinceene. Nto Davidi aanisuwela etthu ene, okathi aahimmye awe so: “Mwererye, mone orera waya murima Apwiya: òreriwa t’ale anatthyawelela”. (Esalimo 34:9) Eversu ela enooniherya wira nihaana weererya oreera murima wa Yehova. Okathi  onimusoma anyu Biibiliya ni iliivuru sahu ni orowela mithukumano, nyuwo munniixutta moota Muluku onaakhaliherya awe akina okhala oororomeleya. Masi vaavo wataana wanyu ni Yehova oninnuwa aya, muhaana woona moota owo onookhaliherya aweni. Niireke nyuwo mootoko woona moota Yehova onooreerela aweni murima?

¹³ Khula muKristau ootoko woona moota Yehova ori awe ooreera murima. Owo oomulattula khula mmosa a hiyo wira nimusuwele yena ni Mwanawe. Yesu ahithanliwe so: “Khavo onwerya okirwela, ahithanliwe n’Atithi akirumme”. (Yohani 6:44) Nyuwo munnoona wira Yehova ohoothanlani wira mmusuwele? Aahiiso munuupuwela so: ‘Yehova aathanlale anamuyari aka, nto miyo kinootthara paahi’? Muupuweleke wira okathi mwaivaherenrye anyu wa Yehova khubatiziwa, nto nyuwo mmensinyu mwaahipaka opatthani ni Yehova. Biibiliya onihimya so: “Nto ole onimphenta Muluku, owo onnisuweliwa ni Muluku”. (1 aKorinto 8:3) Tivonto, khula okathi nvaheke efaita eparakha Yehova oovahale aweni mmutthenkesoni mwawe.

14, 15. Muteko woolaleerya onrowa wookhaliheryani sai okhalana waamini woolipa?

¹⁴ Nave-tho munnoona oreera murima wa Yehova vaavo onoovaha aweni olipa murima wira nweryeke waalaleerya akina ekeekhai, oxikola wala mmawaani. Waalaleerya ale anisomana anyu khivanikhweya. Mutthu pooti woova moota awo anrowa aya waakhela ekeekhai. Ikwaha sikina vannitepa woopiha waatthokiherya atthu anceene sookupali sanyu. Exeeni enrowa wookhaliheryani?

¹⁵ Muupuweleke nthowa naya munikupali anyu itthu iyo. Akhala wira malakiheryo musaitini jw.org anniphwanyaneya nttaava nanyu, xontte murumeele. Awo anoowerya wookhaliheryani wuupuwelela itthu munikupali anyu, nthowa naya, ni moota wowaatthokiherya akina sookupali sanyu. Akhala wira munnikupali tthiri itthu iyo, ni munniilokiherya saana, nto munoophavelaka waalaleerya akina voohimya sa Yehova.​—Yeremiya 20:8, 9.

16. Exeeni enrowa wookhaliheryani okhala oolipa murima ni waalela akina sookupali sanyu?

¹⁶ Hata mwiilokihenryene saana, ikwaha sikina nyuwo pooti wooxankihani otthokiherya sookupali sanyu. Murokora mmosa orina iyaakha 18, yoowo obatiziwe orina ene iyaakha 13, onihimya so: “Kinnisuwela sookupali saka, masi okathi mukina nkiniwerya olepa miyuupuwelo saka”. Nto owo onnimananiha olavula ekeekhai mohoovelela. Owo onihimya so: “Anaxikola anisomana aka animakela ohimya itthu anipaka aya mohoovelela. Nave miyo kihaana okhala ootaphuwa sintoko awo. Nto okathi anivaanela aya, kinnihimya etthu sintoko: ‘Nihiku nimosa, ookhala kaamwiixuttihaka Biibiliya, nto . . . ’ Nuumala-vo khiyavikaniha olavula mwaha ole. Nnaamwi wanipacerya wene kihilavulaka voohimya sa Biibiliya, atthu akina anniphavela osuwela itthu kimpaka aka okathi kiniwiixuttihaka atthu  Biibiliya. Okathi mukina awo annikikoha itthu sa mBiibiliyani. Orumeela enamuna eyo onnikikhaliherya ovaanela ni awo voohimya sa Biibiliya. Nuumala opaka eyo, kinnihakalala vanceene!”

17. Exeeni enrowa wookhaliheryani olavula ni atthu akina?

¹⁷ Okathi atthu akina aniweha aya wira munnaattittimiha, nave annipacerya woottittimihani vamosa ni sookupali sanyu. Olivia, yoowo orina iyaakha 17 ni obatiziwe ori ene mwaaruusi, ohimmye so: “Kaanoovelela omurumeela Biibiliya okathi woovaanela. Kuupuwela wira atthu awo yaarowa okoonaka ntoko mutthu onisiveliwa etiini mootepana”. Nuumala-vo, owo aahipacerya oweha itthu mwa enamuna ekina. Nnaamwi ahairoromela, owo onihimya so: “Amiravo anceene khiivo anisuwela aya voohimya sa Anamoona a Yehova. Awo khanaasuwela Anamoona akina. Nto mweettelo ahu pooti owiiriha weemya wala oheemya ekeekhai. Sai akhala wira ninnuuliwa muru, na atthu oowoova aahiiso vanninixankiha ohimya sookupali sahu? Awo pooti wuupuwelaka wira hiyo ninnuuleliwa muru itthu ninkupali ahu. Nave pooti onaakhulaka moohikhalela akhala wira ninlavula moohoverya. Masi akhala wira nimmakela olavulana voohimya sa sookupali sahu, awo pooti opacerya onittittimiha vanceene”.

18. Exeeni muntthuneya anyu opaka wira mphwanye woopowa wanyu?

¹⁸ Tthiri nihoona wira muritti muulupale wiimananiha wira mphwanye woopowa wanyu. Wira mpake eyo, muhaana osomaka ni wuupuwelela Nuulumo na Muluku, onvekela Yehova, ni wuupuwelela moota owo ookhalihenryaweni. Opaka itthu iyo, onimookhaliheryani vanceene okhala oororomela wira Yehova mpatthani anyu. Nave eyo enoowiirihani ophavela waaleela akina sookupali sanyu. Musome Esalimo 73:28.

19. Xeeni vanireerela aya wiimananiha vanceene wira mphwanye woopowa wanyu?

¹⁹ Yesu aahimmye so: “Akhalá mutthu ontthuna okitthara, aikhotte mwanene, akapatte” mwiri awe wa nihaaxeryo akitthareke. (Matheyo 16:24) Tthiri wira nimutthare Yesu, nihaana wiivahererya wa Yehova ni obatiziwa. Ale anipaka eyo anniphwanya mareeliho manceene vano, ni annilipelela ekumi yoohimala elapo esya ya Muluku. Nto mwiimananiheke opaka sotheene siniwerya anyu wira mphwanye woopowa wanyu!