1-3. (a) Yowiixuttiha xeeni eniirela mpantta sookupali sahu sootepa otthuneya? (b) Xeeni yowiixuttiha eyo eri aya yootepa otthuneya? (Nwehe elatarato yoopacerya.)

MWAAVEKELIWE ohimya etthu yootepa otthuneya munaamini anyu, mwaarowa waakhula sai? Moohaaniherya mwaamuhimya wira munnaamini wira Yehova mpattuxa ni wira owo tonnivaha ekumi. Nave, mwaamuhimya wira munnimwaamini Yesu Kristu, yoowo okhwiiye wira owoopole atthu. Nave mwaamulavula voohimya sa eparayiisu valaponi, weiwo atthu a Muluku anrowa aya okhalaka mahiku otheene. Niireke mwaamuttittimiherya wira ohihimuwa onihela muhina sowiixuttiha sootepa otthuneya munaamini anyu?

² Ekeekhai wira ninnilipelela woopowa okathi wa maxakha maalupale ni okhala moohimala valaponi. Hata vari siiso, ninnikupali wira yowiixuttiha ya ohihimuwa ti yootepa otthuneya. Murummwa Paulo aahooniherya nthowa naya ohihimuwa ori aya wootthuneya vanceene. Owo aahimmye so: “Alipa-òkhwa yahihihimuweke, weso-tho Kristu khahihimuwale mokhwani”. Vaakhanle wira Yesu khohihimuxiwe, owo  khaarowa olamulela ntoko Mwene, nave muteko ahu woolaleerya waarowa okhala wa mahala. (Mmusome 1 aKorinto 15:12-19.) Masi, hiyo noosuwela wira Yesu oohihimuwa. Hiyo khaninlikana ni aSaduki, maana awo khiyaakupali wira alipa-okhwa yaamuhihimuwa. Hata atthu akina aniveehaka, waamini wahu wira Muluku onoowerya waahihimuxa alipa-ookhwa ti wekeekhai.​—Marko 12:18; Miteko 4:2, 3; 17:32; 23:6-8.

³ Paulo aahimmye wira yowiixuttiha ya “ohihimuwa w’alipa-òkhwa” yiirela mpantta “muxuttiho wopajerya w’oKristu”. (aHéberi 6:1, 2) Owo aahittittimiherya wira ohihimuwa onimwiiraneya tthiri. (Miteko 24:10, 15, 24, 25) Nnaamwi ohihimuwa wiirelaka mpantta sowiixuttiha soopacerya sa Nuulumo na Muluku, nihaana ovikaniha wiixutta voohimya sa mwaha owo. (aHéberi 5:12) Xeeni nintthuneya ahu opaka eyo?

4. Makoho xeeni nintthuneya ahu wiikoha voohimya sa ohihimuwa?

⁴ Okathi atthu anipacerya aya omusoma Biibiliya, ikwaha sikina annisoma sowiiraneya sa khalai sa ohihimuwa, sintoko ohihimuwa wa Laazaro. Nave anniixutta wira Yobi, ni Daniyeli, yaaniroromela wira muhoolo alipa-ookhwa yaamuhihimuwa. Nave, okhala wira yooleiherya ya ohihimuwa ti ya khalai, mwaarowa opaka exeeni mwaavekeliwe wooniherya mBiibiliyani nthowa naya nintthuneya ahu ororomela wira tthiri eyo enimwiiraneya? Niireke Biibiliya onnihimya okhathi ene waarowa aya okhala ohihimuwa? Waakhuliwa wa makoho ala onoolipiha waamini wahu.

5. Vano ninrowa opacerya othokorerya exeeni?

⁵ Ikwaha sikina ti vookhweya wuupuwela wira mutthu onoohihimuwa moohipisa nuumala okhwa. (Yohani 11:11; Miteko 20:9, 10) Niireke nnoowerya okupali wira ookhala mutthu aarowa ohihimuwa, muhoolo hata siviraka iyaakha sinceene? Ninrowa osuwela sai akhala wira yaamuhimya mutthu okhwiiye khalai aahiiso okhwiiye ninaano? Moohaanyiherya nyuwo munnikupali ohihimuwa okhumelenle nuuvira iyaakha sinceene nuumala oleiheriwa. Ohihimuwa xeeni? Nave eyo enivarihana sai ni yoolipelela anyu ya ohihimuwa wa muhoolo?

6. Xeeni vanihimmwa aya wira Esalimo 118 yaamuhimya Yesu?

⁶ Nivarihelaka muteko Esalimo 118 nrowe nilavule voohimya sa ohihimuwa waahimmwale iyaakha sinceene vahinatthi. Esalimo eyo yookhalana moolumo anihimya so: “Xontte, Apwiya! Munòpole!” ni “Attottopeliwe owo onrwa ni nsina n’Apwiya [Yehova]”. Atthu yaahiromola eprofesia ele ya Mesiya okathi Yesu aakela awe oYerusalemu nihiku 9 na Nisani, ehalaka mahiku vakhaani wira okhwe. (Esalimo 118:25, 26; Matheyo 21:7-9) Masi moota xeeni Esalimo 118 eniromola aya ohihimuwa waarowa wiiraneya iyaakha sinceene muhoolo? Nave-tho Esalimo ela ennihimya so: “Nluku alipa-òteka empa narihalyaya nokhalihiwa nluku n’olipiha emp’eyo”.​—Esalimo 118:22.

7. AYuda yaamukhoottale sai Yesu?

⁷ “Alipa-òteka” yaamukhoottale Mesiya, yaari ahooleli aYuda. Awo yaahipaka itthu  sinceene ohiya paahi okhootta wira Yesu aari Kristu. Nave aYuda anceene yaahimukhootta yena vaavo yaanvekenle aya Pilato wira omwiive. (Luka 23:18-23) Tthiri atthu ale yaahikhalana nthowa mwaha wa okhwa wa Yesu.

8. Moota xeeni Yesu ori awe ‘nluku ninlipiha empa’?

⁸ Vakhalaka wira Yesu aahikhoottiwa ni aahiiviwa, xeeni ori awe ‘nluku n’olipiha empa’? Eyo yaarowa oweryaneya paahi akhala wira yena aamuhihimuwa. Yesu aahoniherya saana mwaha owo, okathi aahimmye awe nlikanyiho na mwaneene ematta yoowo aarumme arumeyi awe orowa okumana ni alimi yaalima imatta sawe. Alimi awo yaahaahasula arumeyi ale. Nuumala-vo, owo aahimuruma mwanawe amphentexa awe olipelelaka wira alimi ale yaamunwiriyana. Masi awo yaahimwiiva mwaana ole. Nuumala Yesu ohimya nlikanyiho nle, aahiromola eprofesia ya Esalimo 118:22. (Luka 20:9-17) Murummwa Pedru aahirumeela eveersu emosaru okathi aalavula awe ni ‘makhulupale àYuda ni mahumu n’awixuttihi a ikano yathukumanne oYerusalemu’. Owo aahilavula voohimya sa Yesu Kristu muNazarethi, yoowo awo yaamukhomenle aya vamwirini masi Muluku omuhihimuxa mookhwaani. Nuumala-vo Pedru aahihimya so: “‘Nluku alipa-òteka empa narihalyaya, nokhalihiwa nluku ninlipiha emp’eyo’.”​—Miteko 3:15; 4:5-11; 1 Pedru 2:5-7.

9. Yowiiraneya xeeni yaaleiheriwe ni Esalimo 118:22?

⁹ Eprofesia eri Esalimo 118:22 yaahooniherya wira ohihimuwa waarowa wiiraneya sivinre ene iyaakha sinceene. Mesiya aamukhoottiwa ni aamwiiviwa. Masi owo aamuhihimuwa ni aamukhala nluku ninlipiha empa. Nuumala ohihimuwa, Yesu aahikhala mutthu ootepa otthuneya yoowo atthu yaakhanle aya oowoopowa orweela wa nsina nawe.​—Miteko 4:12; aÉfeso 1:20.

10. (a)Yooleiherya xeeni eri Esalimo 16:10? (b) Exeeni ennikupaliha wira Esalimo 16:10 khenimuhimya Davidi?

¹⁰ Nrowe nithokorerye eveersu ekina enilavula sa ohihimuwa. Eyo yiiraneyale sivinre ene iyaakha sinceene. Eyo enninlipiherya wira ohihimuwa waarowa wiiraneya ovinre ene okathi munceene nuumala oleiheriwa. Esalimo 16, ninniphwanya moolumo a Davidi anihimya so: “Nyuwo khamunkihiya mmapuroni mw’alipa-òkhwa. Khamunihiya erutthu ya murumeyi anyu yinttaka mmahiye”. (Esalimo 16:10) Davidi khahiyo aaphavela ohimya wira  yena khaarowa okhwa ni ovithiwa mmahiye. Nuulumo na Muluku nnooniherya wira Davidi aahuuluvala, aahikhwa ni aahirowa “okumana n’axitithi awe: ahivithiwa mmuttettheni mwa Davidi”. (1 Mamwene 2:1, 10) Nto ti pani yaamuhimya aya Esalimo 16:10?

11. Okathi xeeni Pedru aatthokihenrye awe Esalimo 16:10?

¹¹ Sivinre ene iyaakha sinceene, nuumala Davidi olepa moolumo ale, murummwa Pedru aahihimya wira Esalimo 16:10 yaamuromola Yesu. Isumana vakhaani nuumala Yesu okhwa ni ohihimuxiwa, Pedru aahilavula ni aYuda ni atthu yahaakhanle aYuda. (Musome Miteko 2:29-32.) Pedru aahiwuupuxerya wira Davidi aahikhwa ni aahivithiwa. Biibiliya khonihimya wira ookhala anvaanyinhe Pedru nuumala ohimya wira Davidi “ahilaleya ohihimuwa” wa Mesiya.

12. Moota xeeni Esalimo 16:10 yiiraneyale aya, nave enivarihana sai ni yooleiherya ya ohihimuwa?

¹² Pedru aahiromola Esalimo 110:1 wira ooniherye wira aahimya ekeekhai. (Musome Miteko 2:33-36.) Pedru aahirumeela soolepa wira aakhaliherye atthu ale osuwela wira Yesu aahikhalihiwa “Pwiya ni Mopoli”. Atthu yanwiriyana Pedru yaahiweha wira Esalimo 16:10 yaahaakhwanihereya ni ohihimuwa wa Yesu. Muhoolo mwaya, murummwa Paulo aahirumeela yowiiraneya emosaru okathi aalavula awe ni aYuda a epooma ya wAntiyokiya a oPisidia. Sowiiraneya iyo saahaasivela atthu ale, nto awo yaahiphavela-tho onwiriyana. (Musome Miteko 13:32-37, 42.) Eyo ehaana onikupaliha wira iprofesia iye saalavula sa ohihimuwa wa muhoolo, saari soororomeleya nnaamwi siiraneyale sivinre ene iyaakha ikonto sinceene.

13. Makoho xeeni ninreerela ahu wiikoha voohimya sa ohihimuwa?

¹³ Ti voolipiha osuwela wira ohihimuwa onniweryaneya wiiraneya hata sivinreene iyaakha sinceene nuuma olaiheriwa. Hata vari siiso atthu akina pooti wiikohaka so: ‘Niireke eyo entaphulela wira kihaana olipelela okathi munceene wira kaawehe amusi aka akhwiiye?’ Ohihimuwa onrowa wiiraneya silini? Yesu aahaaleela arummwa awe wira saahikhala itthu yahaasuwela aya ni yahaakhanle aya oosuwela. Mwaha woowi sookhala itthu sintoko “okathi walá mahiku Atithi athanlalyaya votthuna vaya”. (Miteko 1:6, 7; Yohani 16:12) Masi, hiyo nookhalana soohimmwa sikina sinilavula sa okathi onrowa aya wiiraneya ohihimuwa.

14. Moota xeeni ohihimuwa wa Yesu ovirikanne aya ni wa atthu yahihimuxiwe khalai?

¹⁴ Ohihimuwa wootepa otthuneya oniromoliwa ni Biibiliya ti wa Yesu. Vaakhanle wira yena khaahihimuxiwe, khuuvo a hiyo aarowa okhalana yoolipelela ya otthikela owoona amusi awe akhwiiye. Atthu yaale yaahihimuxiwe ohinatthi Yesu ohihimuwa, sintoko atthu yaale yaahihimuxiwe ni Eliya ni Eliseyo khiyaakhanle mahiku otheene. Awo yaahitthikela okhwa ni othatuwa etthaya mmahiye. Masi, Yesu ‘ohihimuwa mokhwani’. Nave, “khankhwa-tho: okhwa khuninwerya-tho”. Wiirimu weiwo ori awe, owo onnikhala “vohimala-tho”.​—aRoma 6:9; Wisupulula 1:5, 18; aKolosi 1:18; 1 Pedru 3:18.

15. Xeeni Yesu onihimmwa awe okhala “mulipu”?

 ¹⁵ Ohihimuwa wa Yesu wira akhaleke wiirimu sintoko yoopattuxiwa ya omunepani, ti woopacerya ni wootepa otthuneya. (Miteko 26:23) Masi, aakhala atthu akina anirowa ohihimuxiwa wira yakhaleke wiirimu. Yesu aahileiherya wira arummwa awe oororomeleya yaarowa olamulelaka ni yena. (Luka 22:28-30) Masi awo anaakhela etthuvo eyo paahi nuumala okhwa. Moolikanasa ni Yesu, awo anihihimuwa ni erutthu yomunepani. Paulo olempe wira “Kristu òhihimuwa, ni ti mulipu w’ohihimuwa w’alipa-òkhwa”. Paulo aahihimya-tho wira yaamukhala atthu akina yaarowa ohihimuxiwa wira arowe wiirimu. Owo aalavunle so: “atthu anohihimuwa khula mutthu ntoko simphwanelawe: òpajerya ti Kristu; ottuli waya, ehihimuweke ale ari a Kristu” okathi wa olamulelo wawe ohinooneya.​—1 aKorinto 15:20, 23.

16. Exeeni ennikhaliherya osuwela okathi yaarowa aya opacerya ohihimuwa atthu anrowa wiirimu?

¹⁶ Masu a Paulo anninikhaliherya woona okathi waarowa aya wiraneya ohihimuxiwa wa ale anrowa wiirimu. Eyo yaarowa wiiraneya okathi wa olamulelo ohinooneya wa Kristu. Mwa iyaakha sinceene, Anamoona a Yehova emurumeelaka Biibiliya, aaweha wira “Olamulelo Ohinooneya wa Kristu” opacenrye eyaakha ya 1914. Olelo-va ninkhala okathi owo wa olamulelo ohinooneya, nave wanikisa wa olumwenku ola wootakhala ori vakhiviru.

17, 18. Exeeni eniwiiraneela maKristau makina oowoottihiwa okathi wa olamulelo wa Kristu?

¹⁷ Voohimya sa atthu awo Biibiliya ohimmye so: Hiyo ‘khinnitthuna wira mutikhine mwaha w’alipa-òkhwa . . . Hiyo ninnamini wira Yesu ohòkhwa, khuhihimuwa: siso-tho, ninnamini wira Muluku onimwahihimuxa vamosá ni Yesu atthu akhwiye . . . Hiyo nri akumi, nakhalá vale mpakha orwa w’Apwiya, khaninrowa waholela alipa-òkhwa. Vekekhai, enimwiwanyeya ethonyeryo evahiwe ni nsu . . . Vano atthu akhwiye yatannene ni Kristu anopajerya ohihimuwa. Numalá, hiyo nri akumi, nakhalaka mpakha orwa w’Apwiya, ninrowa okuxiwa n’othukumanyiwa ni yawo mmekuni, nrowaka okumana n’Apwiya osulú. Siso ninrowa okhalaka n’Apwiya mahiku othene’.​—1 aTesalonika 4:13-17.

¹⁸ Ohihimuwa woopacerya waakhumelenle nuumala Yesu opacerya olamulela. MaKristau oowoottihiwa yaawo anrowa okhala akumi okathi wa maxakha maalupale anrowa “okuxiwa” eroihiwaka mmeekuni. Exeeni entaphulela aya? “Okuxiwa” iwo khahiyo onrowa okhala ‘orupa mookhwaani’, masi onithoonyerya wira awo khanirowa oviriha okathi munceene ekhwiiye ene. Okathi anirowa aya okhwa awo anrowa, “otatuxiwa: Etthu ila enokhumelela nananoru, ntoko otthukula maitho ni waphila, vanrowaya wompwa nlope nokiserya’.—1 aKorinto 15:51, 52, Matheyo 24:31.

19. Tuuvi ori “ohihimuwa wotepa orera”?

¹⁹ Olelo-va, maKristau manceene oororomeleya khoottihiwe ni khathanliwe wira yalamuleleke ni Yesu wiirimu. Masi hata vari siiso, awo annilipelela “nihiku na Apwiya [Yehova]” vaavo Owo onrowa awe omaliha otakhala mulaponi. Khuuvo onisuwela okathi enexa, masi sowiiraneya sinooniherya wira onnaattamela. (1 aTesalonika 5:1-3 Biblya Exirima) Elapo esya  ya Muluku, sinookhala inamuna sinceene sa ohihimuxiwa. Okathi owo, atthu yaale anrowa ohihimuwa wira ekhaleke valaponi anookhalana yoolipelela ya okhala atthu oomalela ni ohitthikela-tho okhwa. Iwo onrowa okhala “ohihimuwa wotepa orera” ovikana ohihimuwa wa atthu yaahihimuxiwe masi nuuvira okathi etthikela-tho okhwa.​—aHéberi 11:35.

20. Xeeni nintthuneya ahu ororomela wira ohihimuwa onrowa okhala wootthokiheya?

²⁰ Biibiliya onihimya wira yaale anirowa wiirimu anoohihimuwa “khula mutthu ntoko simphwanelawe”. (1 aKorinto 15:23) Nihaana ororomela wira ohihimuwa wa muhoolo onrowa okhala wootthokiheya. Waaniheryasa eyo pooti oniiriha wiikohaka so: Niireke atthu yaale akhwiiye niinaano, aanoohihimuwa ohalaka vakhaani opacerya Olamulelo wa Iyaakha Ekonto Emosa wa Kristu. Niireke arumeyi a Muluku oororomeleya a khalai yaari amahoolela oosuwela opaka itthu anrowa okhala oopacerya ohihimuxiwa wira yaakhaliheryeke atthu a muluku otthokiha itthu elapo esya? Exeeni enrowa waakhumelela atthu ahitonko omurumeela Yehova? Silini ni opuro xeeni awo anrowa aya ohihimuxiwa? Aakhala makoho manceene anireerela ahu wiikohaka. Masi khanintthuneya woova itthu iyo vano. Nihaana olipelela wira niwehe. Niroromeleke wira vanrowa okhala voohakalaliha oweha moota Yehova onrowa awe opaka itthu.

21. Yoolipelela anyu tiivi?

²¹ Nihaana olipiha omwaamini wahu Yehova. Yesu aahihimya wira alipa-ookhwa yaale anuupuweliwa ni Muluku, anootthikela okhala akumi. (Yohani 5:28, 29; 11:23) Tthiri Yehova onimwaahihimuxa alipa-ookhwa. Yesu aahimmye wira Abrahamu, Isakhi ni Yakobo, mwa moonelo wa Muluku nlelo akumi. (Luka 20:37, 38) Tthiri hiyo nookhalana mathowa manceene anniiriha olavula sintoko murummwa Paulo yoowo aahimmye so: “Miyo kinniroromela oholo wa Muluku, . . . wira atthu . . . anohihimuwa mokhwani”.​—Miteko 24:15.