1. Mikhalelo xeeni Yehova aavanhe awe apinaatamu?

YEHOVA ohaapattuxa apinaatamu ni ohaavaha mikhalelo sa vameekhaaya. Owo oonivaha owerya wa wuupuwela, weiwo onnikhaliherya ophuka mixankiho sahu ni ompaka palano a muhoolo. (Miruku 2:11) Yehova oonivaha owerya, nto nnoowerya opaka ele elakenle ahu ni ophwanya soolukama sahu. (aFilipi 2:13) Nave oonivaha yowuupuxerya ya murima, niire so, etthu eri vamurimani ennikhaliherya othanla etthu yooloka ni yoohiloka. Yowuupuxerya ya murima ahu enninikhaliherya osyaka itampi ni olokiherya soovonya sahu.—aRoma 2:15.

2. Yehova oniphavela wira nirumeeleke sai mikhalelo sahu?

² Yehova oniphavela wira nirumeeleke mikhalelo sahu mwa enamuna yooloka. Nthowa xeeni? Okhala wira owo onniniphenta ni onnisuwela wira ninrowa ohakalala narumeela saana mikhalelo sinnivaha awe. Mwa ntakiheryo,  Soolempwa sa eHeeberi, ninsoma wira: “Ovara muteko n’utthokelela onnisarya nikuphi”, ni “sothene sinweryanyu wira ni matat’anyu, mwireke vorera n’ikuru sanyu sothene”. (Miruku 21:5; Musuweli 9:10) Soolempwa sa eGriki, ninsoma wira: “Okathi wothene ninweryahu, niwireleke sorera atthu othene” ni “khula mutthu àrumeleke akhw’awe, àkawelaka oreriwa ovahiwawe ni Muluku”. (aGalasia 6:10; 1 Pedru 4:10) Tthiri Yehova oniphavela wira nipakeke etthu ennikhaliherya ni enaakhaliherya atthu akina.

3. Itthu xeeni apinaatamu ahiniwerya aya?

³ Yehova oniphavela wira nirumeeleke owerya wahu, nave onnisuwela wira sookhala itthu sihiniwerya ahu. Mwa ntakiheryo, hiyo khaninwerya omaliha ohimalela wahu, etampi ni okhwa. (1 Mamwene 8:46) Nave-tho, khaninwerya opaka soothanla sa atthu akina, maana khula mutthu oovahiwa ehakhi ya opaka soothanla sawe. Hata nisuwelaka itthu sinceene aahiiso nrine ene sookumanana sinceene, khaninkhala-khala nlikanaka ni Yehova.—Yesaya 55:9.

4. Ninrowa othokorerya exeeni mwaha ola?

⁴ Okathi wotheene nihaana weemererya olakiheriwa ni Yehova, nroromelaka wira onoonikhaliherya opaka itthu sihaarowa ahu owerya opaka mekhihu. Masi, Yehova oniphavela wira nuupuweleke ele eniwerya ahu opaka wira niphuke mixankiho sahu ni waakhaliherya atthu akina. (Musome Esalimo 37:3.) Hiyo nihaana ‘waroromela Apwiya [Yehova ni]: wira sorera’. Nave nihaana okhala oororomeleya. Ninrowa owerya sai opaka eyo? Nrowe nithokorerye ntakiheryo na Nowe, Davidi ni arumeyi akina oororomeleya a Muluku, yaawo  yaamulipana Yehova. Ninrowa woona wira nnaamwi saakhanle itthu yahaawerya aya opaka, awo yaaniimananiha opaka itthu yaawerya aya.

5. Mutthokiherye itthu saamuxankiha Nowe.

⁵ Nowe aakhala elapo ‘yosareya owali’ ni orupihana woohiloka. (Maphattuwelo 6:4, 9-13) Nnaamwi aasuwela wira Yehova aarowa waapwetexa atthu ootakhala, Nowe aaninyoonyiwa ni itthu saapakiwa ni atthu awo. Nto okathi ole, Nowe aahisuwela wira saahikhala itthu ahaawerya awe opaka ni itthu aawerya awe opaka.

6, 7. (a) Itthu xeeni Nowe ahaawerya awe opaka? (b) Mwa enamuna xeeni ninlikana ahu ni Nowe?

⁶ Itthu Nowe ahaawerya awe opaka: Moororomeleya, Nowe aahilaleya muhupi woolopola wa Yehova, masi khaawerya waakhanyererya atthu weemererya muhupi owo. Nave khaawerya waakuviha epula ya Mutaaseke. Masi Nowe aahaana ororomela wira Yehova aarowa waapwetexa atakhali ntoko aaleihenrye awe, okupaliki wira Muluku ampaka eyo okathi wooreerela.—Maphattuwelo 6:17.

⁷ Nave hiyo ninkhala olumwenku wootakhala, ni noosuwela wira Yehova onrowa opwetexa. (1 Yohani 2:17) Masi khaninwerya waakhanyererya atthu weemererya “ehapari yorera y’Omwene”. Hiyo khaninrowa opaka etthu yaarowa waakuviha opacerya “maxakha malupale”. (Matheyo 24:14, 21) Ntoko Nowe, nihaana okhalana waamini woolipa, nroromelaka wira moohipisa Muluku onrowa omaliha otakhala. (Esalimo 37:10, 11) Ninnikupali wira Yehova khonrowa weemererya olumwenku ola wootakhala  ovikaniha okhala mpakha ovira nihiku olakenle awe opwetexa.—Habakuki 2:3.

8. Itthu xeeni Nowe aapaka awe? (Nwehe elatarato yoopacerya.)

⁸ Itthu Nowe aawerya awe opaka: Ohiya okhulumuwa mwaha wa itthu ahaawerya awe opaka, Nowe aahivikaniha opaka iye aawerya awe. Moororomeleya, Nowe aahilaleya muhupi woolopola wa Yehova. (2 Pedru 2:5) Muteko woolaleerya, waahimukhaliherya ovikaniha olipiha waamini wawe. Ohiya olaleerya paahi, aahiteka ekalawa ottharaka malakiheryo a Yehova.—Mmusome aHéberi 11:7.

9. Ninrowa otthara sai ntakiheryo na Nowe?

⁹ Ntoko Nowe, ninniluttuweliwa “mmutekoni mw’Apwiya”. (1 aKorinto 15:58) Mwa ntakiheryo, hiyo pooti okhaliherya oteka aahiiso olokiherya Ipa sa Omwene ni sa Asembeleya, okhaliherya okathi wa asembeleya ni kongresu, obetheli aahiiso mapuro anitaphuleliwa iliivuru oottaivela oBetheli. Masi etthu yootepa otthuneya oluttuweliwa muteko woolaleerya, yoowo onlipiha nlipelelo nahu na muhoolo. Murokora mmosa oororomeleya onihimya wira okathi onaaleela awe atthu akina mareeliho a Omwene wa Muluku, onnoona wira atthu awo kharina nlipelelo ni anoona wira mixankiho saya khasinimala. Ntoko onihimya awe murokora ola, hiyo nookhalana nlipelelo ni ninnilipiha nlipelelo nno okathi nnaaleela ahu atthu akina. Nlipelelo nno ninninikhaliherya ovikaniha weetta ephiro ya okumi!—1 aKorinto 9:24.

10. Mutthokiherye itthu saamukhumelenle Davidi.

¹⁰ Mwene Davidi aari mulopwana oororomeleya, nto Yehova aanimphenta vanceene. (Miteko 13:22) Nnaamwi vari siiso, Davidi aahiraruwa ni Bathi-Xeba, nto eyo yaari etampi yuulupale. Ophavelaka wiipithiha etampi awe, Davidi aahipaka etthu yootepa otakhala, maana aahimpaka palano wira omwiivihe okhottoni Uriya, iyawe Bathi-Xeba. Nave Davidi aahinvaha Uriya ewarakha yaarina malakiheryo a moota aarowa awe wiiviwa! (2 Samuweli 11:1-21) Masi muhoolo mwaya, itampi sa Davidi saahisuweliwa. (Marko 4:22) Davidi oonenle sai nuumala eyo okhumelela?

11, 12. (a) Nuumala Davidi ottheka, etthu xeeni ahaawerya awe opaka? (b) Akhala wira ninnittharuwa itampi sahu, Yehova onrowa opaka exeeni?

¹¹ Ele Davidi ahaawerya awe opaka: Davidi khaawerya ottikiherya ottuli etampi aapanke awe. Nto aarowa ohaawaka mwaha wa etampi awe okumi awe wotheene. (2 Samuweli 12:10-12, 14) Tivonto ahaana waamini. Akhala wira aamuttharuwa ni murima wotheene ahaana ororomela wira Yehova ammulevelela ni omukhaliherya ovilela sookhumelela sa etampi awe.

¹² Okhala wira naatthu oohimalela, otheene ahu ninnittheka. Masi soovonya sikina pooti okhala suulupale, nave ikwaha sikina khaninwerya ottikiherya ottuli soovonya  sahu. Nave-tho, khaninwerya osyaka mixankiho sinikhumelela mwaha wa itampi sahu. (aGalasia 6:7) Masi Muluku ooleiherya wira, akhala wira nnoottharuwa, onoonikhaliherya okathi wa mixankiho, hata mixankiho seiye sinnikhumelela mwaha wa soovonya sahu.—Mmusome Yesaya 1:18, 19; Miteko 3:19.

13. Davidi aalokihenrye sai wataana wawe ni Yehova?

¹³ Ele Davidi aawerya awe opaka: Davidi aaniphavela olokiherya wataana wawe ni Yehova. Masi aarowa opaka sai eyo? Davidi aaheemererya okhaliheriwa ni Yehova. Mwa ntakiheryo, owo aheemererya olakiwa ni Natani, profeta a Yehova. (2 Samuweli 12:13) Davidi aahinvekela Yehova ni aahimuleela soottheka sawe, ooniheryaka wira aaniphavela otthikela wataana ni Yehova. (Esalimo 51:3-19) Davidi khaamakela wiivaha nthowa mwaha wa soovonya sawe, masi aahiixutta etthu ni soovonya sawe. Nave khaatthikenle opaka itampi iye suulupale. Muhoolo mwaya, Davidi aahikhwa moororomeleya, nto Yehova onimuupuwela ntoko mutthu oororomeleya.—aHéberi 11:32-34.

14. Exeeni nniixutta ahu ni ntakiheryo na Davidi?

¹⁴ Exeeni nniixutta ahu ni ntakiheryo na Davidi? Akhala wira noopaka etampi yuulupale, nihaana ottharuwa ni murima wotheene, omuleela Yehova yoottheka eyo ni onvekela wira onlevelele. (1 Yohani 1:9) Nave nihaana waaleela axitokweene maana anoowerya onikhaliherya olokiherya wataana wahu ni Yehova. (Mmusome Yakobo 5:14-16.) Akhala wira nnimweemererya nikhaliheryo na Yehova, nnimooniherya wira ninnikupali yooleiherya awe ya onilevelela. Nave nihaana wiixutta ni soovonya sahu ni ovikaniha omurumeela Yehova moororomeleya.—aHéberi 12:12, 13.

15. Ntakiheryo na Hanna ninniixuttiha exeeni?

¹⁵ Woonasa wene munniwuupuwela arumeyi akina oororomeleya a Yehova aniromoliwa mBiibiliyani, yaawo yoonihenrye omuroromela Yehova ni yaapaka ele yaawerya aya okathi wa mixankiho. Mwa ntakiheryo, waahikhala okathi Hanna aahaayara awe. Owo khaawerya oturuka mukhalelo awe. Masi aanikupali wira Yehova aarowa ommaaliha. Hanna aahivikaniha omukokhorela Muluku otabernaakulu ni aahinvekela Yehova omuleelaka moonelo awe. (1 Samuweli 1:9-11) Tthiri nla ntakiheryo nooloka otthara! Okathi onikhalana ahu mixankiho sa ekumi aahiiso mixankiho sihiniwerya ahu orukunuxa, nihaana ohela mmatatani mwa Yehova muxankiho ahu nikupaliki wira onninikhapelela. (1 Pedru 5:6, 7) Nave ninnipaka eniwerya ahu wira nittottele mureerelo mithukumano sa mmulokoni ni iprograma sikina sinikumiheriwa ni mutthenkeso wa Yehova.—aHéberi 10:24, 25.

16. Exeeni anamuyari aniixutta aya ni Samuweli?

¹⁶ Ankhi anamuyari oororomeleya arina  anamwane ahiyale omurumeela Yehova? Profeta Samuweli khaawerya waakhanyererya anaawe oowunnuwa ovikaniha ororomeleya wa Yehova. (1 Samuweli 8:1-3) Owo aahimuhiyerya mwaha owo Yehova. Masi, Samuweli aahipaka yaawerya awe wira ovikanihe ororomeleya wa Muluku ni omuhakalaliha Tiithi awe a wiirimu. (Miruku 27:11) Olelo-va, aakhala anamuyari maKristau arina anamwane ahiyale omurumeela Yehova. Awo annikupali wira ntoko tiithi a nlikanyiho na Yesu na mwaana aamuhiyale tiithi awe, okathi wotheene Yehova onniwaakhela ale anittharuwa itampi saya. (Luka 15:20) Nave, anamuyari awo anniimananiha ovikaniha ororomeleya wa Yehova, alipelelaka wira ntakiheryo naya nnimwaakhaliherya anaaya otthikela wa Yehova.

17. Xeeni ntakiheryo na naamukhweli oohaawa ninnilipiha aya?

¹⁷ Ntakiheryo nikina nooloka ti naamukhweli oohaawa aakhala mahiku a Yesu. (Mmusome Luka 21:1-4.) Naamukhweli ole khaawerya opaka etthu yaarowa omaliha makhwankwa mpaani mwa Muluku, ni khaawerya omaliha ohaawa wawe. (Matheyo 21:12, 13) Masi omuroromela Yehova waahimwiiriha okhaliherya okokhorela wekeekhai. Aari mulipa-oovaha, tivonto aavanhe awe musurukhu wotheene aarian awe, “inota pili”. Tthiri naamukhweli ole aanimuroromela Yehova ni murima wotheene. Owo aahisuwela wira apweha nipuro noopacerya Omwene wa Muluku, Yehova aarowa onvaha itthu saamuthowa. Mwa enamuna emosaru, ninnikupali wira napweha nipuro noopacerya Omwene wa Muluku, Yehova onoonivaha khula etthu ennithowa.—Matheyo 6:33.

18. Nvahe ntakiheryo na munna aarina moonelo wooloka.

¹⁸ Olelo-va, anna ni arokora anceene annimuroromela Yehova ntoko naamukhweli ole. Awo anniimananiha opaka ele eniwerya aya, ohiya okhulumuwa mwaha wa ele ahiniwerya aya. Nkahaya muthokorerye ntakiheryo na munna Malcolm, yoowo aavikaninhe ororomeleya mpakha okhwa wawe mwaakha wa 2015. Mwa iyaakha sotheene owo ni mwaarawe amurumenle aya Yehova, yaahikhalana okathi woohakalaliha ni wa mixankiho. Owo onihimya so: “Ikwaha sikina okumi onikhala wohisuwanyeya, wohiroromeleya ni wooxankiha. Masi Yehova onnaareeliha ale animuroromela”. Miruku xeeni Malcolm onnivaha awe? Owo ohimya so: “Munvekele Yehova wira ookhaliheryeni onvarela muteko wooloka vaniwerya anyu. Mukhaleleke nthiti ele eniwerya anyu ohiya wunlela ele ehiniwerya anyu”. *—Nwehe enoota.

19. (a) Xeeni yoolepa ya mwakha wa 2017 eryaaya yookhalela? (b) Munrowa ovarihela sai muteko mookumini mwanyu, yoolepa ya mwakha wa 2017?

¹⁹ Olumwenku ola wootakhala ‘onovira otepaka’ otakhala, nto ninnilipelela wira mixankiho sinrowa wuncerereyaka. (2 Timótheyo 3:1, 13) Tivonto nihikhala-khale neemereryaka mixankiho sahu sinikhulumulaka. Masi nihaana olipiha omuroromela wahu Yehova ni omananiha opaka ele eniwerya ahu. Moohaaniherya, yoolepa ya mwakha wa 2017 ti yookhalela, yeeyo eni: “Mwaroromele Apwiya [Yehova]: mwireke sorera”!—Esalimo 37:3.