ATTHU otheene anniphavela otteeliwa murima. Masi mahiku ala ookiserya, khula mutthu ookhalana mixankiho sawe. (2 Timótheyo 3:1) Anamunceene anniriipiwa murima mwaha woothokoreriwa moohixariya, owereiwa, woomoliwa muteko, wala okhweliwa. Akina anniriipiwa murima mwaha wa itthu sinaakhumelela ni siniwiiriha woova wala oxanka. Hata arumeyi a Yehova pooti oriipiwa murima ni vakhaani-vakhaani oyeleela otteeliwa waya murima. Eyo yookhumelelani, munrowa owerya sai otthikela okhala ootteeliwa murima?

Wira naakhule nikoho nla, nrowe nisuwele exeeni ekhanle otteeliwa murima ni moota atthu akina anivikaniha aya otteeliwa murima hata okathi wa mixankiho. Nuumala-vo, ninrowa oweha moota nikhanle ahu oovikaniha wuncererya otteeliwa wahu murima.

Otteeliwa murima ni otheya, itthu soovirikana. Nkuupuwelani ela: Mutthu owunrye eviinyu yinceene pooti otheya vanceene. Masi okathi eviinyu eyo enimuukuluwa aya, owo khoniwerya otheya ni onnoona wira mixankiho sawe khasimanle. Otheya wawe waari wa okathi vakhaani ni khahiyo waari wekeekhai.​—Miruku 14:13.

Otteeliwa murima, mukhalelo ninkhalana ahu vamurimani vahu okathi ninlipelela ahu etthu yooloka. Okhala mutthu ootteeliwa murima ontaphulela ohiriipiwa murima nnaamwi sikhumelaka itthu sooloka wala soohiloka. (1 aTesalonika 1:6) Tthiri hiyo pooti oxankiheyaka ni etthu masi nlelo okhala ootteeliwa murima. Mwa ntakiheryo, arummwa yaahimaniwa mwaha woolaleya ihapari voohimya sa Yesu. Masi, awo “yahikhuma mmuthukumanoni etteliwene murima, okhala wira Muluku ahaphwaneliha ohaxiwa mwaha wa nsina na Yesu”. (Miteko 5: 41) Etthu yaatteelinhe murima khahiyo waari omaniwa, masi waari ovikaniha okhala oororomeleya wa Muluku.

Otteeliwa murima khahiyo mukhalelo ninyaraniwa ahu wala onirwa mekhaya. Mwaha wa xeeni? Mwaha woowi otteeliwa murima wekeekhai, oniirela mpantta mikhalelo sa munepa wootteela wa Muluku. Munepa wa Muluku onninikhaliherya owara ‘omutthu musyá’, yoowo onihela muhina otteeliwa murima. (aÉfeso 4:24; aGalasia 5:22) Nave vaavo nintteeliwa ahu murima, vanninikhweela ovilela mixankiho sahu.

Yehova oniphavela wira mulaponi sikhumeleleke itthu sooreera ohiya itthu soonanara nnoona ahu olelo-va. Masi hata atthu anceene epakaka itthu soohiloka, Yehova nlelo onnitteeliwa murima. Biibiliya onihimya wira “otteliwa murima onrwa w’Apwiya [Yehova]”. (Nehemiya 8:10) Nave itthu sooloka arumeyi a Yehova anipaka aya sinnimwiiriha Yehova otteeliwa murima.​—Miruku 27:11.

Hiyo ninnimutakiha, wala omananiha okhala sintoko Yehova, vaavo ninvikaniha ahu otteeliwa murima hata itthu sihiiraneyaka sintoko naalipelela ahu. Ohikhanle woova, nihaana wuupuwelela itthu sooloka nirina ahu vano ni olipelela moopixa  murima wira muhoolo itthu sinookhala saana. *—Nwehe enoota.

MBiibiliyani aakhala matakiheryo manceene aatthu yaavikaninhe otteeliwa murima hata yaarina mixankiho sinceene. Abrahamu aanitteeliwa murima hata okathi saamukhumelela aya itthu sowoopiha, ni atthu akina yaamukumiherya maxakha. (Maphattuwelo 12:10-20; 14:8-16; 16:4, 5; 20:1-18; 21:8, 9) Aawerya sai opaka eyo? Mwaha woowi aanuupuwelela yoolipelela awe ya okhala elapo esya okathi wa Olamulelo wa Mesiya. (Maphattuwelo 22:15-18; aHéberi 11:10) Yesu aahimmye so: “Abrahamu tith’ihu, ahitteliwa murima aroromelaka wona nihiku naka”. (Yohani 8:56) Hiyo ninnimutakiha Abrahamu vaavo ninvikaniha ahu wuupuwelela otteeliwa murima ninrowa ahu ophwanya muhoolo.​—aRoma 8:21.

Paulo ni Sila, nave yaahikhalana waamini woolipa ni yaahivikaniha otteeliwa murima nnaamwi saaphwanya mixankiho sinceene. Mwa ntakiheryo nuumala awosa omaniwa ni otthukweliwa, ‘yahilompa, wipa, emuttottopelaka Muluku”. (Miteko 16:23-25) Awo yaahiwerya ovilela ohaawa waya mwaha woowi yaahivikaniha wuupuwelela sooleiherya sa Yehova sa Muhoolo. Masi osuwela wira yaahaaxiwa mwaha wookhala atthareli a Kristu, waaniwiiriha otteeliwa murima. Ninnimutakiha Paulo ni Sila okathi nnuupuwelela ahu mareeliho nimphwanya ahu mwaha woororomeleya.​—aFilipi 1:12-14.

Olelo-va, nave aakhala matakiheryo manceene a anna ni arokora anivikaniha otteeliwa murima nnaamwi saaphwanyaka mixankiho. Mwa ntakiheryo, Novembro a 2013, munamukhaya muulupale aitthaniwa Haiyan aahihonona inupa sa Anamoona anivikana 1000, oFilipina. George, yoowo aayelenle empa awe epooma ya oTacloban, aahimmye so: “Nnaamwi ekhumelenle ela ehasara ele, anna nlelo annitteeliwa murima. Nkinwerya ohimya moota nitteeliwe ahu murima”. Nto nuupuwelela itthu sotheene sooreera Yehova onnipakela awe ni omuxukhurela vanceene, nnoovikaniha otteeliwa murima hata siniphwanyaka mixankiho sinceene. Itthu xeeni sikina Yehova onnivaha awe sinniiriha otteeliwa murima?

Etthu enniiriha otteeliwa murima vanceene ti wataana wahu ni Yehova. Hiyo noomusuwela Mwene a Olumwenku wotheene. Owo Tiithi ahu, Muluku ahu ni Mpatthani!​—Esalimo 71:17, 18.

Ninnimuxukhurela Yehova mwaha woonivaha ekumi. (Musuweli 3:12, 13) Mwaha woowi owo oonikhaliherya omwaattamela yena, ninniwerya osuwela etthu emwiirinhe onipattuxa ni moota woorumeela okumi ahu. (aKolosi 1:9, 10) Masi hata vari siiso atthu anceene khanisuwela etthu emwiirinhe Muluku onipattuxa. Wira ottittimiherye ovirikana iyo, murummwa Paulo, aalempe so: “Vano, sisale silempwaya, khavo otonko wona walá otonko wiwa, nnákhala wupuwela sorera Muluku àlokihenrye ale animphenta Nto hiyo Muluku ònoniherya itthu iya n’uwerya w’Eroho Yowarya. Tthirí Eroho eyo ennisuwela itthu sothene, hatá sotikiniha sa Muluku”. (1 aKorinto 2:9, 10) Osuwela yootthuna ya Yehova ni yoolakela awe onniniphwanyiha ohakalala.

Yehova oonipakela itthu sinceene. Owo oopaka mareheryo wira vaweryaneyeke oleveleliwa itampi. (1 Yohani 2:12) Owo oonivaha yoolipelela ya ekumi elapo esya, yeeyo enirwa moohipisa. (aRoma 12:12) Hata vano, Yehova oonivaha apatthani anceene ninkokhorela ahu hoothe. (Esalimo 133:1) Nave owo onninaakiherya Satana ni malaikha ootakhala. (Esalimo 91:11) Navikaniha wuupuwelela itthu iyo soohakalaliha Yehova onnivaha awe, nnootteeliwa murima vanceene.​—aFilipi 4:4.

Niireke mukristau ootteliwa murima pooti wuncererya otteeliwa wawe murima? Yesu aahimmye so: “Kihohimeryani itthu iya wira otteliwa waka  murima okhale-tho wawinyu, otteliwa wanyu murima omalele”. (Yohani 15:11) Eyo entaphulela wira vanniweryaneya okathi wotheene otteeliwa murima. Hiyo pooti olikanyiherya otteeliwa wahu ni mooro. Akhala wira nimphavela wira mooro owo ohittiphe, nihaana ohela ikhuni sinceene. Muupuwele ela: Munepa wootteela onoonikhaliherya otteeliwa murima. Wira nikhale otteeliwa murima vanceene, nihaana ovikaniha opaka mavekelo nivekaka munepa wootteela wa Muluku. Nave nihaana ovikaniha wuupuwelela malakiheryo a Biibiliya, yaawo akumiheriwe orweela wa munepa awe wootteela.​—Esalimo 1:1, 2; Luka 11:13.

Etthu ekina enrowa wuncererya otteeliwa wahu murima ti oluttuweliwa ni itthu sinimuhakalaliha Yehova. (Esalimo 35:27; 112:1) Mwaha wa xeeni? Biibiliya onihimya wira hiyo nipattuxiwe wira ‘nimoveke Muluku, nimwìwelelaka soruma sawe’. (Musuweli 12:13) Hiyo nipattuxiwe wira nipakeke yootthuna ya Muluku. Nto vaavo nimmurumeela ahu Yehova, nnootteeliwa murima vanceene mookumini mwahu. *​—Nwehe enoota.

Vaavo nnincererya ahu otteeliwa wahu murima, nnoophwanya mireerelo sikina sinceene. Mwa ntakiheryo, Yehova onootteeliwa-tho murima vanceene ni hiyo akhala wira nnoovikaniha omurumeela mootteeliwa murima hata okathi wa mixankiho. (oTumererya 16:15; 1 aTesalonika 5:16-18) Nave, mwaha wookhalana otteeliwa murima wekeekhai, hiyo khaninrowa wuupuwelaka wira okhalana mihakhu sinceene teri etthu yootepa otthuneya mookumini. Ohiya-vo, hiyo ninrowa wiimananihaka vanceene oleva itthu mookumini mwahu wira nikhaliherye Omwene wa Muluku. (Matheyo 13:44) Nave vaavo ninweha ahu itthu soohakalaliha sinikhuma wa Yehova ninrowa otepaka otteeliwa murima, wiivaha efaita ni waatteeliha murima atthu akina.​—Miteko 20:35; aFilipi 1:3-5.

Nave, waaniheryasa akhala wira nnootteeliwaka murima vanceene, nnookhalanaka ekumi yooloka. Biibiliya onihimya so: “Murima wottela [woohakalala] murettele wa erutthu”. (Miruku 17:22) Namatokosa mmosa onisoma miteko sa ekumi wUniversidade ya Nebraska, wEstados Unidos, aahihimya etthu enivarihana ni Biibiliya. Owo aahimmye so: “Akhala wira munootteeliwa murima ni ohakalala ni muteko ekumi anyu vano, muhoolo khamunrowa owereiwaka vanceene”.

Nto hata nisuwelaka wira ninkhala okathi wooxankiha, vanniweryaneya otteeliwa murima veekeekhai okathi ninvahiwa ahu munepa wootteela orweela wa mavekelo ahu, osoma Nuulumo na Muluku ni wuupuwelela. Nave nnootteeliwa murima vanceene wuupuwelela itthu sinceene sooloka Yehova onnivaha awe vano, akhala wira nnootakiha waamini wa arumeyi akina oororomeleya, ni omananiha opaka yootthuna ya Yehova. Nuumala-vo nnoophwanya mareeliho sintoko aromoliwe Esalimo 64:10 yeeyo enihimya so: “Anaxariya annittapela miteko s’Apwiya enaroromela”.