Hiyo nuupuwela siiso khalai, mwaha wa aHéberi 12:16. Yoolepa ele enihimya wira Esawu ‘khattittiminhe itthu sa Muluku’ ni aahaakakhanya ni Yakobe “eyulupale awe y’opajeriwa oyariwa ni muhasa mmosá wa yolya”. Nto nuupuwela wira okathi Yakobe aakhenle awe “eyulupale awe y’opajeriwa oyariwa”, eyo yaahela muhina eparakha ya okhala muhavinre a Mesiya.​—Matheyo 1:2, 16; Luka 3:23, 34.

Masi nuumala omutokosa saana Biibiliya, nooweha wira khivatthuneya opaceriwa oyariwa wira mutthu okhale muhavinre a Mesiya. Nrowe nthokorerye soohimmwa kamosa-kamosa:

Mwaana oopacerya Yakobe aayareliwe awe ni Liya aari Rubeni, ni mwaana oopacerya aayareliwe awe ni Rakheli aari Yosefe. Nuumala Rubeni oraruwa, owo aahaakhiwa eparakha awe yookhala mwaana oopaceriwa oyariwa, ni aahivahiwa Yosefe. (Maphattuwelo 29:31-35; 30:22-25; 35:22-26; 49:22-26; 1 Wahala 5:1, 2) Hata vari siiso, Yosefe ni Rubeni khahiyo yaari amuhavinre a Mesiya. Muhavinre a Mesiya aari Yuda, yoowo aari mwaana a neexexe Yakobe aayareliwe awe ni Liya.​—Maphattuwelo 49:10.

Luka 3:32 onnaahimya-tho amuhavinre athanu a Mesiya, nto khula mmosa aari oopaceriwa oyariwa. Mwa ntakiheryo, Bowazi aari tiithi a Obedi, nave Obedi aari tiithi a Yese.​—Ruthi 4:17, 20-22; 1 Wahala 2:10-12.

Mwaana a Yese, Davidi, khahiyo aari oopaceriwa oyariwa. Owo aari etthyaako. Hata vari siiso, Mesiya aakhumme munlokoni mwa Davidi. (1 Samuweli 16:10, 11; 17:12; Matheyo 1:5, 6) Vamosaru, muhavinre mukina a Mesiya aari Salomoni, yoowo-tho ahaakhanle mwaana oopaceriwa oyariwa a Davidi.—2 Samuweli 3:2-5.

 Ela khentaphulela wira opacerya oyariwa khiwaarina efaita. Mwaana oopaceriwa oyariwa aanikhalana iparakha anamwane akina yahaarina aya. Ikwaha sinceene owo taahalana nsina na nloko, ni aanivahiwa vanli mireerelo sa emusi waavikana akina.​—Maphattuwelo 43:33; Otumererya 21:17; Yoxuwa 17:1.

Eparakha ya okhala oopacerya oyariwa yanaakakhaniwa. Okathi Abrahamu aamoomonle awe Iximayeli, Isakhi taahalanne eparakha ya okhala mwaana oopacerya oyariwa. (Maphattuwelo 21:14-21; 22:2) Nave-tho ntoko nisomme ahu, Yosefe aahihalana eparakha ya mwaana oopacerya oyariwa.

Nto exeeni murummwa Paulo aaphavela awe ohimya ni moolumo a aHéberi 12:16? Yoolepa eyo enihimya so: “Mpasopeke wira ahikhalé mutthu ònanara murima walá òhittittimiha itthu sa Muluku, ntoko sìralyawe Esawú okathi akakhannyawe eyulupale awe y’opajeriwa oyariwa ni muhasa mmosá wa yolya”.

Yoolepa ela khahiyo enaahimya amuhavinre a Mesiya. Paulo aalopola maKristau. Owo aahaaleela wira: “Mokolole iphiro sinviranyu” wira ohikhale onooceela ‘eparakha ya Muluku’. Nto orupihana woohiloka wammwiiriha mutthu wooceela iparakha iyo. (aHéberi 12:12-16) Mutthu aarowa opaka eyo aarowa olikanaka ni Esawu, yoowo ‘ahattittimiha itthu sa Muluku’, masi aaphavela wiihakaliha paahi.

Moovarihana ni soolema sa mahiku ale, woonasa wene Esawu aahikhalana eparakha ya onvaha mikuttho Yehova. (Maphattuwelo 8:20, 21; 12:7, 8; Yobi 1:4, 5) Masi Esawu uupuwela soophavela sawe paahi, nto aahileva iparakha sawe sa okhala oopacerya oyariwa, mwaha wa muhasa wa yoolya paahi. Woonasa wene Esawu khaaphavela ophwanya mixankiho seiyo Yehova aahimmye awe wira saarowa okhumelela nloko na Abrahamu. (Maphattuwelo 15:13) Nave-tho aahooniherya wira khaathokorerya itthu sa Muluku, vaavo aathenle awe athiyana anli yahaamukokhorela Yehova ni yaariipihale murima anamuyari awe. (Maphattuwelo 26:34, 35) Tthiri owo aahivirikana vanceene ni Yakobe, yoowo amphavenle muthiyana aamukokhorela Muluku a ekeekhai!​—Maphattuwelo 28:6, 7; 29:10-12, 18.

Soolepa iya sa mBiibiliyani sinniixuttiha exeeni voohimya sa amuhavinre a Mesiya? Sinooniherya wira amuhavinre akina yaari anamwane oopacerya oyariwa, masi akina nnaari. AYuda yaanisuwela eyo ni yaaneemererya wira ti siiso. Ninsuwela sai? Mwaha woowi awo yaanikupali wira Kristu aarowa okhala osuulu wa Davidi, etthyaako ya Yese.​—Matheyo 22:42.