1, 2. Exeeni yaamwiiriha munna mmosa wuuliwa muru, ni exeeni aapanke awe?

ROBERTO obatiziwe ori ene mmiravo, masi owo khoona ekeekhai okhala etthu yootthuneya mookumini mwawe. Owo onihimya so: “Nkitonko opaka etampi, masi kaabatiziwe paahi mwaha wootakiha. Nto kuupuwela wira olipa mwa omunepani, orowa mithukumano sotheene, ni okhala pioneero ookhaliherya miyeeri vakhaani vamwaakhani. Masi yookhala etthu yahaalonke”.

² Roberto khaasuwela etthu yaamuhaleela mpakha othela. Okathi Roberto ni mwaarawe yaatthekula aya, yaanikohana itthu sa mBiibiliyani. Mwaarawe aanisuwela myaha sinceene sa mBiibiliyani ni aaniwerya waakhula makoho moohixanka. Masi Roberto khaasuwela waakhuliwa wa makoho awo ni aanuuliwa muru. Owo onihimya so: “Kaakhala wira nkaasuwela etthu. Nto kaahuupuwela so: ‘Okhala wira ka muhooleli oomunepani a mwaaraka, kihaana opaka etthu’.” Nto owo aahipaka eyo. Roberto onihimya-tho so: “Kaahimusoma Biibiliya ikwaha sinceene, ni kaahipacerya oweha moota myaha iye saavarihana aya. Kaahipacerya omwiiwexexa, nave yootepa otthuneya okhala wira waataana waka ni Yehova waahilipa”.

3. (a) Exeeni enniixuttiha aya yowiiraneya ya Roberto? (b) Makoho xeeni ootthuneya ninrowa ahu othokorerya?

 ³ Yowiiraneya ya Roberto enniniixuttiha etthu yootthuneya. Woonasa wene ninnisuwela sowiixuttiha sikina sa Biibiliya, khanincompela mithukumano ni muteko woolaleerya, masi itthu iyo khasinniiriha okhalana muupuwelo womunepani. Aahiiso hiyo pooti wiimananiha vanceene wira nikhalane muupuwelo womunepani, masi okathi nniivarerya ahu nnaweha wira yookhala etthu enreerela olokiherya. (aFilipi 3:16) Mwaha ola, ninrowa waakhula makoho mararu ootthuneya: (1) Exeeni enrowa onikhaliherya osuwela akhala wira nookhalana muupuwelo womunepani? (2)  Ninrowa okhala sai oolipa mwa omunepani? (3)  Moota xeeni olipa omunepani onnikhaliherya aya mookumini?

4. Miruku siri aÉfeso 4:23, 24 sinaahimya aani?

⁴ Okathi naapacenrye ahu omurumeela Muluku naahipaka marukunuxo yaaturunke itthu sotheene mookumini mwahu. Hata nuumala obatiziwa khinaamalenle vaavo. Biibiliya onninleela so: “Muhana wikhaliha atthu a nanano mmirukuni mwanyu ni murohoni mwanyu”. (aÉfeso 4:23, 24) Mwaha wookhala atthu oohimalela, nihaana ovikaniha opaka marukunuxo. Hata nipacenrye ene omurumeela Yehova khalai, nihaana ovikaniha olipiha wataana wahu nuuwo.​—aFilipi 3:12, 13.

5. Makoho xeeni anrowa onikhaliherya osuwela akhala wira ninninnuwa mwa omunepani?

⁵ Hata niri ene mmiravo aahiiso mutthu muulupale, nihaana wiivarerya. Niikoheke so: ‘Kiireke kinnisuwela akhala wira kookhalana muupuwelo womunepani? Kinnilikana ni Kristu? Mweettelo aka ori sai, exeeni kinipaka aka okathi wa mithukumano? Kiireke okathi woovaanela kinimakela paahi olavula itthu kiniphavela aka mookumini? Moota kimmusoma aka Biibiliya ni iliivuru sahu sikina, ikuwo saka, mawarelo aka, ni ele enipaka aka okathi kinivahiwa aya miruku, ennooniherya wira ka mutthu oomunepani? Kinoonela sai okathi kineehereriwa aka opaka etthu yoohiloka? Kiireke kinnisuwela itthu sinceene sa omunepani ni kinneettela?’ (aÉfeso 4:13) Makoho ala pooti onikhaliherya osuwela munnuwelo ahu womunepani.

6. Exeeni enrowa onikhaliherya osuwela akhala wira nookhalana muupuwelo womunepani?

⁶ Ikwaha sikina ninnitthuneya okhaliheriwa ni atthu akina wira niwehe akhala wira nookhalana muupuwelo womunepani. Murummwa Paulo aahitthokiherya wira mutthu oneettihiwa ni erutthu awe aahiiso mutthu a werutthuni khonisuwela itthu sinimusivela Muluku. Masi mutthu orina muupuwelo womunepani onnisuwela moonelo wa Muluku. Owo onnisuwela wira Yehova onnikhoottiha osiveliwa ni itthu sa werutthuni. (1 aKorinto 2:14-16; 3:1-3) Axitokweene yaawo arina ankhili a Kristu moohipisa annisuwela vaavo munna onipacerya awe weettela erutthu awe ni annimananiha omukhaliherya. Akhala  wira axitokweene anninikhaliherya, niireke khivanreerela weemya nikhaliheryo naya ni opaka marukunuxo anitthuneya? Akhala wira, nnoopaka eyo, ninrowa wooniherya wira tthiri ninniphavela olipa mwa omunepani.​—Musuweli 7:5, 9.

7. Ninsuwela sai wira okhalana muupuwelo womunepani khahiyo paahi omusoma Biibiliya?

⁷ Wira nikhalane muupuwelo womunepani khoniphiyerya paahi osuwela sowiixuttiha sa Biibiliya. Mwene Salomoni aanisuwela itthu sinceene voohimya sa Yehova, ni moolumo makina a miruku sa Salomoni aalempwa mBiibiliyani. Masi nuuvira okathi, waataana wawe ni Yehova waahitteettheya, ni aahihiya ororomeleya. (1 Mamwene 4:29, 30; 11:4-6) Ohiya paahi osuwela malakiheryo a mBiibiliya etthu xeeni ekina nintthuneya ahu opaka? Nihaana ovikaniha olipiha waamini wahu. (aKolosi 2:6, 7) Ninrowa opaka sai eyo?

8, 9. (a) Exeeni enrowa onikhaliherya olipiha waamini wahu? (b) Okathi nimmusoma ahu Biibiliya ni wuupuwelela nikhalaneke yoolukama xeeni? (Nwehe elatarato yoopacerya.)

⁸ Eseekulu yoopacerya murummwa Paulo ahaatumererya maKristau ‘orowa vaholo’. (aHéberi 6:1) Ninrowa ovarihela sai muteko miruku iyo olelo-va? Enamuna emosa yootthuneya ti osoma eliivuru eni: Moota Woovikaniha Okhala Moophentani Mwa Muluku. Eyo enoonikhaliherya osuwela moota woovarihela muteko malakiheryo a Biibiliya mookumini mwahu. Akhala wira nootoko osoma eliivuru ela, sookhala iliivuru sikina sikhanle oolipiha waamini wahu. (aKolosi 1:23) Nave nihaana wuupuwelela itthu nniixutta ahu ni onvekela Yehova wira onikhaliherye osuwela moota woweettela malakiheryo awo.

⁹ Vaavo ninsoma ahu ni wuupuwelela, yoolukama ahu ekhaleke wunnuuherya yoolakela ya omusiveliha Yehova ni omwiiwelela. (Esalimo 40:8; 119:97) Nave nihaana wiixutta moota wookhootta khuta etthu ekhanle oonihiiha wunnuwa omunepani.​—Tito 2:11, 12.

10. Exeeni amiravo anitthuneya aya opaka wira ekhale atthu oolipa mwa omunepani?

¹⁰ Akhala wira mwa mmiravo, niireke mookhalana soolukama sa muhoolo? Munna mmosa onirumeela oBetheli, onimakela ovaanela ni amiravo anirowa obatiziwa okathi wa asembeleya a esirkwiitu, ni onnaakoha soolukama  saya sa omunepani. Owo onniweha wira anamunceene annuupuwelela ni ephoole voohimya sa moota anirowa aya omurumeela Yehova muhoolo. Akina annimpaka palano oomurumeela Yehova mmutekoni mwa okathi wotheene aahiiso othaamela mapuro oothowa anamalaleerya. Masi amiravo akina khanisuwela etthu yoohimya. Niireke eyo entaphulela wira awo anuupuwela wira khanitthuneya okhalana soolukama somunepani? Akhala wira mwa mmiravo, mwiikoheke so: ‘Kiireke kinrowa omuthukumanoni ni olaleerya paahi mwaha woophavela waasiveliha anamuyari aka? Wala kinniimananiha olipiha wataana waka ni Muluku?’ Otheene ahu hata niri ene amiravo wala atthu aalupale nihaana okhalana soolukama somunepani. Soolukama iyo sinoonikhaliherya okhala atthu oolipa omunepani.​—Musuweli 12:1, 13.

11. (a) Nipakeke exeeni wira nikhalane muupuwelo wa omunepani? (b) Ntakiheryo xeeni na mBiibiliyani ninreerela ahu otthara?

¹¹ Nuumala oweha itthu ninreerela ahu olokiherya, nihaana opacerya wuupuwela moota woopaka marukunuxo. Ti vootthuneya opaka eyo maana pooti oniphwanyiha mireerelo hata nikhalaka akumi wala nikhwaaka. (aRoma 8:6-8) Yehova onnisuwela wira naatthu oohimalela, nave onninivaha munepa awe wootteela wira onikhaliherye. Masi hata vari siiso, nihaana wiimananiha vanceene. Munna John Barr yoowo aari a Nikhuuru Noolamulela, aahitthokiherya yoolepa ya Luka 13:24 ni aahihimya so: “Atthu anceene khaniwerya okela mukhora owo mwaha woowi khaniimananiha vanceene wunnuwa mwa omunepani”. Nihaana olikanaka ni Yakobe yoowo aawanne ni nlaikha mpakha oreelihiwa. (Maphattuwelo  32:26-28) Nnaamwi omusoma Biibiliya eri ene etthu yoohakalaliha, nihuupuweleke wira Biibiliya onlikana ni matthekulelo ntoko ithale aahiiso ihantisi. Nihaana wiimananiha vanceene wira niphwanye ikeekhai sootthuneya sinrowa onikhaliherya.

12, 13. (a) Exeeni enrowa onikhaliherya orumeela yoolepa ya aFilipi 2:5? (b) Ntakiheryo na Pedru ni miruku sawe sinnikhaliherya sai? (c) Nipakeke exeeni wira nilipe mwa omunepani? (Nwehe ekaaxa eni: “Itthu Mukhanle Anyu Oopaka Wira Munnuwe Mwa Omunepani”.)

¹² Okathi nniimaananiha ahu wunnuwa mwa omunepani, munepa wootteela oninikhaliherya orukunuxa muupuwelo ahu. Vakhaani-vakhaani, nnoowerya okhalana muupuwelo sintoko wa Yesu. (aFilipi 2:5) Munepa wootteela pooti onikhaliherya okumiha vamurimani vahu mikhalelo soohiloka ni okhalana mikhalelo sinimusivela Muluku. (aGalasia 5:16, 22, 23) Akhala wira nnoona wira ninnivaha efaita mihakhu wala soophavela sa erutthu, nihikhulumuweke. Nihaana ovikaniha onvekela Yehova munepa awe wootteela wira onikhaliherye opaka itthu sooloka. (Luka 11:13) Mmuupuweleke murummwa Pedru. Waahikhala okathi ahaawerya awe wuupuwela sintoko Yesu. (Matheyo 16:22, 23; Luka 22:34, 54-62; aGalasia 2:11-14) Masi hata vari siiso owo khaahiya wiimananiha, nto Yehova aanimukhaliherya. Vakhaani-vakhaani, Pedru aahiixutta wuupuwela sintoko Yesu. Nave hiyo nnoowerya opaka eyo.

¹³ Muhoolo mwaya, Pedru aahiromola mikhalelo sooreera sinrowa onikhaliherya. (Mmusome 2 Pedru 1:5-8.) Nihaana wiimananiha vanceene wira nikhale atthu oowiihiiha, oovilela, waaphenta axinnihu, ni okhalana mikhalelo sikina sooreera. Khula nihiku, niikoheke so: ‘Mukhalelo xeeni kintthuneya aka olokiherya olelo onrowa okikhaliherya olipa omunepani?’

14. Moota xeeni okhalana muupuwelo wa omunepani onikhaliherya aya okumi ahu?

¹⁴ Okhalana muupuwelo sintoko wa Kristu onoonikhaliherya okhalana mweettelo wooloka omutekoni wahu, oxikola, malavulelo ahu, ni soothanla sahu sa khula nihiku. Soothanla sahu sinimooniherya akhala wira ninnimutakiha Kristu. Mwaha wookhalana muupuwelo wa omunepani, khaninphavela weemya wira etthu ekina ehonone waataana wahu ni Yehova. Okathi nneehereriwa ahu opaka etampi, mukhalelo ahu wa omunepani onoonikhaliherya okhootta yoweeha eyo. Nihinatthi opaka yoothanla nihaana wiikoha so: ‘Malakiheryo xeeni a mBiibiliyani anrowa okikhaliherya? Aari mwa Yesu aarowa, aarowa opaka exeeni? Exeeni enrowa omusivela Yehova?’ Nihaana okhalana yoolema ya wuupuwelela makoho ala nihinatthi opaka yoothanla. Nrowe nithokorerye itthu sikina sikhanle ookhumelela. Nto mwa khula mwaha, ninrowa oweha yoolepa ya Biibiliya ekhanle oonikhaliherya opaka yoothanla yooloka.

15, 16. Moota xeeni wuupuwela sintoko Kristu onnikhaliherya aya opaka soothanla sooloka voohimya sa (a) omuthanla mutthu ooreerela othelana? (b)  waathanla apatthani?

¹⁵ Omuthanla mutthu ooreerela othelana. Yoolepa enivarihana ni mwaha ola ti 2 aKorinto 6:14, 15. (Mmusome.) Paulo aahihimya wira mutthu orina muupuwelo womunepani moonelo awe itthu onnivirikana ni mutthu oneettihiwa ni erutthu awe. Moota xeeni malakiheryo ala anrowa aya wookhaliheryani omuthanla mutthu ooreerela othelana?

¹⁶ Waathanla apatthani. Yoolepa enivarihana ni mwaha ola ti 1 aKorinto 15:33. (Mmusome.) Mutthu Onithokorerya itthu somunepani khompaka opatthani ni atthu  akhanle ootteettheiha waamini wawe. Muupuwele moota mukhanle anyu oorumeela malakiheryo wira mpake soothanla sikina. Mwa ntakiheryo, malakiheryo ala anrowa wookhaliheryani sai othanla voohimya sa waapaka apatthani mwinternetini? Anrowa wookhaliherya sai othanla vaareerelaka oweettaka axooku mwinternetini ni atthu muhinaasuwela anyu?

17-19. Moota xeeni okhalana muupuwelo womunepani onookhaliherya ayani (a) osyaka miteko soohiloka? (b) okhalana soolukama sooloka? (c) okathi onikhumelela aya ohiiwanana?

¹⁷ Itthu sinihonona mukhalelo ahu wa omunepani. Ninniphwanya yoolopola yootthuneya eri aHéberi 6:1. (Mmusome.) Miteko xeeni “s’okhwa” nintthuneya ahu osyaka? Miteko iyo sinihela muhina itthu sinceene soonanara sihinrowa onikhaliherya okhala oolipa omunepani. Soolopola iyo sinilavula sa miteko sinikumiherya okhwa pooti onikhaliherya waakhula makoho sintoko ala: ‘Kiireke miteko iya sinnikumiherya mireerelo wala sinoohaaxa? Kiireke vannireerela omwiira nakoso ola? Xeeni kihinitthuneya aka wiirela mpantta egrupu ya atthu animananiha orukunuxa itthu mulaponi?’

¹⁸ Soolukama soomunepani. Okathi Yesu aalavula awe mwaha awe vamwaako, aahivaha malakiheryo ootthuneya voohimya sa soolukama. (Matheyo 6:33) Mutthu onuupuwelela itthu soomunepani onnipaceriha Omwene mookumini mwawe. Malakiheryo ala anoonikhaliherya waakhula makoho sintoko ala: ‘Kiireke kihaana orowa osoma wUniversidade kammaliha nivel médio? Kihaana weemya miteko sotheene?’

¹⁹ Ohiiwanana wala onyoonyihana. Miruku murummwa Paulo aavanhe awe maKristau a oRoma pooti onikhaliherya okathi onikhumelela aya ohiiwanana. (aRoma 12:18) Okhala wira nimmutakiha Kristu, nihaana wiimananiha “wiwanana n’atthu othene”. Exeeni nimpaka ahu okathi enikhumelela aya etthu enikumiherya ohiiwanana? Niireke ninnoona ovila weemererya moonelo wa atthu akina? Wala ninnisuweliwa okhala mutthu oniimananiha okumiherya murettele?​—Yakobo 3:18.

20. Xeeni muniphavela anyu orowa vahoolo mwa mukhalelo wa omunepani?

²⁰ Matakiheryo ala annooniherya malakiheryo a mBiibiliyani annikhaliherya opaka soothanla seiyo sinooniherya wira nneettihiwa ni munepa wa Muluku. Akhala wira nnoovahaka efaita itthu sa omunepani nnookhalana ekumi yoohakalaliha ni yooloka. Roberto, nimuromonle ahu woopaceryani, ohimmye so: “Nuumala wunnuuherya opatthani aka ni Yehova, kaahikhala mulopwana ooloka ni paapa ooloka. Kaahihakalala vanceene”. Akhala wira otheene ahu nnoorowa vahoolo mwa mukhalelo womunepani, nnoophwanya mireerelo sinceene. Nnookhalana ekumi yooloka vano, ni muhoolo nnoophwanya “ekumi yekekhai”.​—1 Timótheyo 6:19.