1, 2. Muthukumano xeeni onrowa oniiraaniha mwaakha wa 2018? Mwaha wa xeeni? (Nwehe elatarato yoopacerya.)

NIHIKU 31 a Marso, 2018, atthu anceene anoorowela muthukumano mmosa oniiraneya ekwaha emosa va mwaakhani. Nuumala nsuwa okela, Anamoona a Yehova ni atthu akina anceene anoothukumana wira yuupuwelele mukuttho Yesu ovanhe awe wira onoopole. Khula mwaakha, muthukumano wa Wuupuwelela Okhwa wa Kristu onniwiiraaniha atthu mwa enamuna yuulupale, ovikana mithukumano sikina sinipakiwa olumwenku wotheene.

² Yehova ni Yesu annihakalala vanceene okathi anaaweha aya atthu anceenexa olumwenku wotheene arowelaka muthukumano owo, nuumala okela nsuwa. Biibiliya onniromola “muttitthi mulupalexa w’atthu”, yoowo ahaakhanle mutthu “awerya owalikela. [Atthu] awo yari a ilapo sothene ni a maloko othene ni a mahimo othene”. Awo yaanikhuwela ehimyaka so: “Wopola ti wa Muluku ahu, yowo okilanthe vehijeni, ni ti  wa mwapwittipwitthi”. (Wisupulula 7:9, 10) Tthiri ti voohakalaliha oweha khula mwaakha okathi wa Wuupuwelela Okhwa wa Yesu, atthu anceene anvuwihaka Yehova ni Yesu mwaha wa itthu suulupale annipakela aya!

3. Makoho xeeni anrowa waakhuliwa mwaha ola?

³ Mwaha ola onrowa waakhula makoho ala maxexe: (1) Kiilokiherye sai wira kattottele mureerelo muthukumano wa Wuupuwelela? (2) Mwa inamuna xeeni Wuupuwelela Okhwa wa Yesu onaakhaliherya aya arumeyi otheene a Muluku okhala oowiiraana? (3) Kipakeke exeeni wira kikumiherye wiiraana mmulokoni? (4) Wuupuwelela Okhwa wa Yesu onoomala? Akhala wira ti siiso, nto silini?

4. Xeeni vanitthuneya aya ohicompela Wuupuwelela Okhwa wa Yesu?

⁴ Xeeni vari aya vootthuneya ohicompela muthukumano wa Wuupuwelela? Nthowa nimosa okhala wira mithukumano sinninikhaliherya omukokhorela Yehova. Nikupaliki wira Yehova ni Yesu anniweha wiimananiha wa khula mutthu wira orowele muthukumano owo wootepa otthuneya onipakiwa khula eyaakha. Nimphavela wira Yehova ni Yesu ewehe wira nnoorowela muthukumano wa Wuupuwelela, vahikhanle wira ekhumelenle etthu yuulupale enrowa onooceeliha. Okathi miteko sahu sinooniherya aya wira ninnivaha efaita mithukumano sahu, ninninvaha mathowa manceene Yehova wira ohikumihe nsina nahu “mulivuruni” mwawe. Eliivuru eyo eniitthaniwa ‘elivuru ya ekumi’. Muliivuruni-mmo annilempwa masina a atthu Yehova onrowa awe waavaha okumi woohimala.​—Malakhiya 3:16; Wisupulula 20:15.

5. Isumana vakhaani ohinatthi muthukumano wa Wuupuwelela, munrowa opaka exeeni wira “mòneke mwari ni wamini”?

⁵ Sihalaka isumana vakhaani wira niphiye nihiku na Wuupuwelela, vannireerela wiivaha okathi wira nipake mavekelo ni wuupuwelela ni ephoole akhala wira waataana wahu ni Yehova ti woolipa (Mmusome 2 aKorinto 13:5.) Murummwa Paulo aahaaleela maKristau wira: “Mukoheke murim’anyu: mòneke mwari ni wamini”. Ninrowa opaka sai eyo? Nihaana wiikoha so: ‘Kinnikupali tthiri wira ola ti mutthenkeso mmosa paahi Yehova onirumeela awe wira opake yootthuna awe? Kiireke kinniimananiha olaleerya ni wiixuttiha ihapari sooreera? Miteko saka sinnooniherya wira kinnikupali wira ninkhala mahiku ookiserya ni wira olamulelo wa Satana ohanle omala? Kiireke omuroromela waka Yehova ni Yesu ti woolipa ntoko okathi kaapacerya aka omurumeela Yehova?’ (Matheyo 24:14; 2 Timótheyo 3:1; aHéberi 3:14) Wuupuwelela waakhuliwa wa makoho ala onoonikhaliherya ‘wiiweha mmansihu’ ni osuwela moota niri ahu.

6. (a) Exeeni enrowa oniphwanyiha okumi woohimala? (b) Mutokweene mmosa oniilokiherya sai khula mwaakha okathi wa Wuupuwelela, ni ninrowa omutakiha sai?

⁶ Enamuna emosa mukhanle anyu oowiilokiherya  ti osoma ni wuupuwelela myaha sintthokiherya nthowa naya muthukumano owo ori aya wootepa otthuneya. (Mmusome Yohani 3:16; 17:3.) Enamuna emosa paahi ya ophwanya okumi woohimala ti omusuwela Yehova ni omwaamini Mwanawe, Yesu. Okathi onaattamela aya Wuupuwelela, hiyo pooti othanla othokorerya myaha sinrowa onikhaliherya otepa omwaattamela Yehova ni Yesu. Eyo ti etthu enipaka awe munna mmosa ori mutokweene okhuma khalai. Mwa iyaakha sinceene owo onnipweha irevista sa Owehaweha sinilavula sa Wuupuwelela Okhwa wa Yesu ni ophenta Yehova ni Yesu annooniherya aya. Isumana vakhaani nihinatthi nihiku na Wuupuwelela, owo onnisoma myaha iyo, ni onnuupuwelela saana nthowa naya muthukumano owo ori aya wootepa otthuneya. Ikwaha sikina onnincererya myaha sikina. Nave-tho onnisoma ni wuupuwelela ipantte sa Biibiliya sinisommwa okathi wa Wuupuwelela. Mutokweene owo onihimya wira mwaha woopaka eyo, khula mwaakha onniixutta itthu isya. Nave-tho opaka eyo onnimwiiriha otepa omphenta Yehova ni Yesu. Osoma moota owo, onimookhaliheryani omphentaka vanceene Yehova ni Yesu. Nave-tho munrowa otepaka oxukhurela etthu apanke aya, ni munoottottela mureerelo muthukumano wa Wuupuwelela.

7. (a) Etthu xeeni Yesu aavekenle awe ekwaha yoopacerya wiiriwa Yoolya ya Ohiyu ya Apwiya? (b) Exeeni enooniherya wira Yehova aahaakhula nivekelo na Yesu?

⁷ Nihiku na wuupuwelela Yoolya ya Ohiyu ya Apwiya yoopacerya, Yesu aahipaka nivekelo na vameekhaya. Owo aahivekela oromolaka wiiwanana wooloka aarina awe ni Tiithi awe. Nave Yesu aahivekela wira awiixutti awe otheene ekhale oowiiraana. (Mmusome Yohani 17:20, 21.) Yehova aahaakhula nivekelo na Mwanawe onimphentexa awe. Muthukumano wa Wuupuwelela onnooniherya saana wira Anamoona a Yehova atthu oowiiraana. Nihiku na Wuupuwelela, atthu a ilapo sotheene ni a makhuli oovirikana annithukumana wira yooniherye okupali waya wira Yehova oomuruma Mwanawe. Ilapo sikina atthu khalimalenle waaweha atthu a makhuli oovirikana athukumanaka hoothe okathi wa mithukumano sa etiini. Nave akhala wira awo annithukumana, atthu akina annuupuwela wira eyo etthu yoohiloka. Masi Yehova ni Yesu khanuupuwela siiso. Vannaasivela waaweha atthu athukumanaka mowiiraana nihiku nlo.

8. Muhupi xeeni Yehova anvahale awe Ezekiyeli?

⁸ Hiyo Anamoona a Yehova khanintikhina okhala atthu oowiiraana. Okathi Yehova aalavula awe ni profeta Ezekiyeli aahiihimya wira atthu awe yaarowa wiiraana. Muluku aahimuruma Ezekiyeli okuxa ikopo piili, emosa ya nihimo na “Yuda”, ekina ya nihimo na “Yosefe”, nto aahaana otakaaherya wira ekhale ekopo emosa paahi. (Mmusome Ezekiyeli 37:15-17.) Mwaha oni “Makoho Anikohiwa ni Ale Anisoma Irevista Sahu”, wa Owehaweha a Julyo 2016, waatthokihenrye so: “Omurumeelaka profeta Ezekiyeli, Yehova aahihimya vahinatthi wira atthu awe yaamuhokolowela Elapo Yooleiheriwa, ni yaamukhalihiwa-tho nloko nimosa nowiiraana. Eprofesia eyo yaahihimya-tho wira ale animurumeela Muluku mahiku ala ookiserya, yaarowa okhalihiwa nloko nimosaru”.

9. Vaavo nnuupuwelela ahu okhwa wa Yesu khula eyaakha, ninweha sai wiiraana waahimmwale ni eprofesia ya Ezekiyeli?

 ⁹ Woopaceryani wa mwaakha wa 1919, Yehova aahipacerya vakhaani-vakhaani waalokiherya ni waathukumanya maKristau oothanliwa. Awo yaalikana ni ekopo ya nihimo na “Yuda”. Nto vakhaani-vakhaani, atthu arina nlipelelo na ekumi yoohimala valaponi yaahipacerya wiiraana ni maKristau oothanliwa. Yehova aahileiherya otakaaherya ikopo iye wira ekhale ekopo emosa paahi mmatatani mwawe. (Ezekiyeli 37:19) Owo ohaatakaaha maKristau oothanliwa ni ale a “ipwittipwitthi sikina” wira ekhale “nikoto nimosa”. (Yohani 10:16; Zakariya 8:23) Olelo-va, igrupu soopiili sootakaahiwa ni sinimurumeela Yehova hoothe. Awo aakhalana Mwene, Yesu Kristu, yoowo eprofesiya ya Ezekiyeli enimuhimya aya okhala “murumeyi aka Davidi”. (Ezekiyeli 37:24, 25) Khula eyaakha vaavo ninkumana ahu okathi wa Wuupuwelela Okhwa wa Yesu, ninniweha wiiraana wekeekhai wa igrupu piili saahimmwale ni Ezekiyeli. Exeeni nikhanle ahu oopaka wira nivikanihe okumiherya murettele eriyari ya atthu a Muluku?

10. Ninrowa okhaliha sai wiiraana mmulokoni?

¹⁰ Enamuna xeeni yoopacerya ya okumiherya wiiraana mmulokoni? Niimananihaka okhala oowiiyeviha. Okathi Yesu aari awe valaponi, aahiwiixuttiha atthareli awe  wiiyeviha. (Matheyo 23:12) Olelo-va, atthu anceene anniixoona okhala ootepa otthuneya waavikana akhwaaya. Masi akhala wira nnimwiiyeviha, nnoowerya waattittimiha ni owiiwelela axitokweene a mmulokoni. Opaka eyo onookumiherya wiiraana. Nto akhala wira nnimwiiyeviha, nnoomuhakalaliha Muluku mwaha woowi owo “onnakhotta atthu òwisona, masi onnavaha eparakha atthu òwiyeviha”.​—1 Pedru 5:5.

11. Wuupuwelela ephaawu ni eviinyu sinirumeeliwa okathi wa Wuupuwelela onnikhaliherya sai okhaliha wiiraana?

¹¹ Enamuna xeeni ya nenli ya okumiherya wiiraana mmulokoni? Ti wuupuwelela yootaphulela ya ephaawu ni eviinyu. Nihaana opaka eyo nihinatthi ophiya nihiku na Wuupuwelela, ni vanceenexa ohiyu ene yoole. (1 aKorinto 11:23-25) Ephaawu yoohiheliwa eferemento enithoonyerya erutthu yoohittheka Yesu aavahale awe ntoko mukuttho. Eviinyu yooxeerya enitaphulela ephome awe. Masi khivaniphiyerya paahi osuwela yootaphulela ya ithoonyeryo iyo. Nihaana wuupuwela wira mukuttho wa Yesu onooniherya ophenta wuulupale wa atthu anli, Yehova ni Yesu. Yehova onvaha Mwanawe wira onikhwele. Nave Yesu ooleva okumi awe mwaha wa hiyo. Wuupuwelela ophenta waya, onooniiriha waaphenta awo. Nave-tho omphenta wahu Yehova onoolipiha wiiraana wahu.

12. Nlikanyiho na mwene ni arumeyi awe, Yesu oonihenrye sai wira Yehova oniphavela wira naaleveleleke akhwiihu?

¹² Enamuna xeeni ya neeraru ya okumiherya wiiraana? Waalevelela akina ni murima wotheene. Opaka eyo onooniherya wira ninnimuxukhuru Yehova mwaha wa onilevelela itampi sahu, orumeelaka mukuttho wa Yesu. Wira ooniherye otthuneya waya olevelela, Yesu aahipaka nlikanyiho na mwene mmosa ni arumeyi awe. Xontte mmusome Matheyo 18:23-34, ni mwiikoheke so: ‘Kinnipaka itthu Yesu aixuttinhe awe? Kinniiwanana ni waapixerya murima anna ni arokora? Kiireke kinnaakuva waalevelela ale anikitthekela?’ Ekeekhai wira itampi sikina ti suulupale ovikana sikina. Nto ikwaha sikina pooti woonaka ovila olevelela. Masi nlikanyiho na Yesu ninniixuttiha ele Yehova oniphavela awe wira nipakeke. (Mmusome Matheyo 18:35.) Yesu aahooniherya wira Yehova khonrowa onilevelela akhala wira ninnikhootta waalevelela annihu anitthekenle, masi khuttharuwa. Khula mutthu ohaana wuupuwelela saana mwaha ola. Wira wiiraana wahu ohihononeye, nihaana waalevelela akina ntoko Yesu ohimmye awe.

13. Olevelela onikhaliherya sai wiiraana?

¹³ Olevelela onnikumiherya murettele ni anna ni arokora. Murummwa Paulo ohimmye wira nihaana wiimananiha vanceene wira nikhalihaneke ni murettele. (aÉfeso 4:3) Mahiku anaattamela nihiku na Wuupuwelela ni nihiku nene nenlo, nihaana wuupuwela saana moota nnaathokorerya ahu akina. Mwiikoheke so: ‘Kiireke kinnisuweliwa okhala mutthu ohinisuka vamurimani itthu soohiloka iireliwe awe? Atthu anniwerya oweha wira kinniimananiha okhaliha murettele ni wiiraana?’ Ala makoho maalupale anitthuneya wuupuwelela.

14. Ninrowa wooniherya sai wira ‘ninnaakhelana n’uphenta’?

¹⁴ Enamuna xeeni ya neexexe ninrowa ahu okumiherya wiiraana? Nitakihaka moota Yehova onooniherya awe ophenta. (1 Yohani 4:8) Khivanreerela wuupuwela so: “Kihaana waaphenta axinna, masi nkiniphavela wataana naawo”. Akhala wira nnuupuwela siiso, eyo enooniherya wira khaninvarihela  muteko miruku sa Paulo aahimmye awe wira “mwakhelaneke n’uphenta”. (aÉfeso 4:2) Niwehe wira Paulo khahiyo paahi aanitumerenrye ‘waakhelana’, masi-tho aahimmye wira nipakeke eyo “n’uphenta”. Tthiri khivanikhweya opaka eyo. Mmulokoni mwahu aakhala atthu a mahimo oovirikana, nto Yehova oowiiraaniha otheene aya. (Yohani 6:44) Owo oopaka eyo mwaha woowi ohaawehana atthu awo itthu sooloka. Akhala wira axinnihu ni arokora anniphwanela ophentiwa ni Muluku, niireke vannireelela nave hiyo okhootta waaphenta anna awo? Nihaana waaphenta mwa enamuna enimusivela Yehova.​—1 Yohani 4:20, 21.

15. Ninsuwela sai wira Wuupuwelela Okhwa wa Yesu onoomala?

¹⁵ Onoophiya okathi oniira aya omale Wuupuwelela Okhwa wa Yesu. Ninsuwela sai? Murummwa Paulo ahaahimeerya maKristau oothanliwa wira okathi anuupuwelela aya okhwa wa Yesu khula eyaakha, ‘mpakha vanrwawe Pwiya, anlaleya okhwa wawe.’ (1 aKorinto 11:26) Nave okathi Yesu aatthokiherya awe eprofesia enilavula sa omala wa olumwenku ola, aahilavula voohimya sa ‘orwa’ wawe. Voohimya sa maxakha maalupale anaattamela, Yesu aalavunle so: “Okathi uwo, nthonyeryo na Mwana a Mutthu nnokhumelela osulu: vano-nto atthu a maloko othene a vathí-va animwìkhupanyerya. Awo anomona Mwana a Mutthu arwaka mmekuni, n’uwerya wawe n’uvuwa wawe wulupale. N’uruma wa nlope nulupale, Muluku onoruma malaikh’awe, wira yathukumanye atthu àthanlalyawe, okhuma wopajeryani w’erimu ni elapo mpakha wokiseryani waya”. (Matheyo 24:29-31) Yesu onrowa ‘wathukumanya atthu àthanlalyawe’ vaavo onrowa awe waakuxa maKristau otheene oothanliwa, yaawo anrowa wiiraka eri ene valaponi. Eyo enrowa wiiraneya epacenrye ene maxakha maalupale, masi ehinatthi ekhotto ya Armagedoni. Okathi wa ekhotto eyo, Yesu ni malaikha otheene 144.000 anoowana ni mamwene a valaponi ni animwaaxintta. (Wisupulula 17:12-14) Muthukumano wookiserya wa Wuupuwelela ninrowa ahu okhalana ohinatthi Yesu orwa waathukumanya maKristau oothanliwa, onrowa okhala wookiserya.

16. Exeeni eniwiirihani ohiphavela ocompa muthukumano wa Wuupuwelela eyaakha ela?

¹⁶ Mumpake palano wira muhicompele muthukumano wa Wuupuwelela, nihiku 31 a Marso, 2018. Munvekeleke Yehova wira ookhaliheryeni wiimananiha wira arumeyi awe ekhaleke oowiiraana. (Musome Esalimo 133:1.) Onoophiya nihiku ninrowa ahu opaka muthukumano wookiserya wa Wuupuwelela. Nilipelelaka nihiku nlo, nrowe nooniherye wira na atthu oowiiraana khula eyaakha, nihicompelaka muthukumano wa Wupuwelela Okhwa wa Yesu.