1. Mixankiho xeeni sikina sinniphwanya, masi xeeni Yehova onisiveliwa awe ni arumeyi awe oororomeleya? (Nwehe ilatarato soopacerya.)

OLELO-VA, okumi ti wooxankiha vanceene. Mwa ntakiheryo, anamunceene a nyuwo anna oophentiwa, munnihaawa mwaha wa iretta suulupale. Anna akina oowunnuwa, annaakhapelela amusi aya oowuuluvala. Akina anniimananiha vanceene wira ekhaliherye etthoko aya. Nave noosuwela wira anamunceene a nyuwo khahiyo paahi aniphwanyiwa ni muxankiho mmosa paahi, masi sinceene okathi omosaru. Eyo ennikuxa okathi anyu, ikuru, ni musurukhu. Nyuwo moosuwela wira Yehova onimookhaliheryani. Munnisuwela wira muhoolo itthu sinooloka maana Muluku ooleiherya. Waamini wanyu onnimuhakalaliha Yehova!

2. Moota xeeni Yesaya 40:29 onnilipiha awe, masi etthu xeeni yoohiloka nikhanle ahu oopaka?

² Niireke wookhala okathi munoona anyu wira mixankiho sanyu ti soovila ovilela? Akhala wira ti siiso, tthiri khahiyo muri mekhinyu. Arumeyi akina a Muluku a khalai yoona siiso. (1 Mamwene 19:4; Yobi 7:7) Exeeni yaakhalihenrye ovilela?  Awo yaanimulipana Yehova wira aakhaliherye. Biibiliya onihimya wira Muluku ‘onninvaha ikuru mutthu okhulumunwe’. (Yesaya 40:29) Mooriipiha murima, arumeyi akina a Muluku anuupuwela wira enamuna yooloka ya ovilela mixankiho saya ori ohiya omurumeela Yehova. Awo anuupuwela wira omurumeela Yehova muritti woolemela, khuniphwanyiha mureerelo. Nto annihiya omusoma Biibiliya, orowa omuthukumanoni ni olaleerya. Tthiri eyo ti etthu Satana oniphavela awe wira yuupuweleke.

3. (a) Ninrowa wiikasoopa sai wira Satana ohinikhulumule? (b) Exeeni ninrowa ahu othokorerya mwaha ola?

³ Diabo khoniphavela oniweha nikhalaka oolipa. Nave owo onnisuwela wira ninnilipa naaluttuweliwaka ni miteko sa Yehova. Nto vaavo munikhulumuwa anyu mwerutthuni ni mmuupuweloni, muhimuhiye Yehova. Mmwaattameleke yena. Biibiliya onihimya wira: “Owo onimorerihani, onimolipihani”. (1 Pedru 5:10; Yakobo 4:8) Mwaha ola, ninrowa othokorerya yoolepa ya Yesaya 40:26-31, voohimya sa owerya Yehova orina awe wa onlipiha. Nave-tho ninrowa othokorerya itthu piili sikhanle oovukula oluttuweliwa wahu muteko nninvarela ahu Yehova, ni ninrowa-tho wiixutta moota ovarihela muteko malakiheryo a Biibiliya onnikhaliherya aya ovilela.

4. Exeeni onniixuttiha awe Yesaya 40:26?

⁴ Mmusome Yesaya 40:26. Khuuvo mutthu oniwerya okontari itheneeri sotheene siri wiirimu. Masientista anikupali wira, woonasa wene egalaxia ahu paahi, sookhala ibilyau 400 sa itheneeri. Hata vari siiso Yehova onnivaha nsina khula etheneeri. Nto eyo enniixuttiha exeeni voohimya sa Yehova? Akhala wira owo onnithokorerya itheneeri, eyo enooniherya wira tthiri onnoothokoreryani! Nyuwo munnimurumeela Yehova, ohiya mwaha wookhanyereriwa, masi mwaha womphenta. (Esalimo 19:2, 4, 15) Tiithi ihu oophenta onnoosuwelani oratteene. Biibiliya onihimya wira “hatá ikharari sa mmuruni mwanyu sihalikeliwa sothene” ni Yehova. (Matheyo 10:30) Yehova oniphavela wira nisuweleke wira owo “onniweha itthu sotheene sinaakhumelela anaxariya”. (Esalimo 37:18, Tradução do Novo Mundo) Tthiri, Yehova onnoona mixankiho sotheene sinoophwanyani, nave pooti woovahani ikuru wira nvilele mixankiho iyo.

5. Itthu xeeni sinnikupaliha wira okathi wotheene Yehova onoowerya onivaha ikuru?

⁵ Mmusome Yesaya 40:28. Yehova, ti Muluku onivaha ikuru. Mwa ntakiheryo, nkuupuwelani mwaattelo wa oviha Muluku onivaha awe nsuwa. Mulipa-onilepa mwaha sa sientista oniitthaniwa David Bodanis, aahimmye wira khula esegundo nsuwa ninnikumiherya oviha aahiiso energia yinceene, enlikana ni oviha onikumiheriwa ni ophuwa wa ibilyau sinceene sa ibomba atômica. Yootokosa ekina ehimmye wira mwaattelo wa oviha onikumiheriwa ni nsuwa khula esegundo, pooti waphwanyiha oviha atthu a olumwenku wotheene iyaakha 200.000! Nto okhala wira Yehova tonivaha ikuru nsuwa, owo onoowerya  onivaha ikuru wira nivilele mixankiho sahu.

6. Mwa inamuna xeeni muritti wa Yesu ori aya wooveya, nave moota xeeni eyo ennilipiha aya?

⁶ Mmusome Yesaya 40:29. Omurumeela Yehova onniniphwanyiha ohakalala wunceene. Yesu aahaaleela atthareli awe wira: “Mwireye muritti aka”. Ni aahincererya oriki: “Munophwanya murettele murohoni mwanyu. Tthirí, muritti onoreyakani ti woveya: olemela onotexihakani ti wokhweya”. (Matheyo 11:28-30) Eyo ekeekhai! Ikwaha sikina, ninnikhulumuwa okathi ninrowa ahu omuthukumanoni aahiiso olaleerya. Masi ninkhala sai okathi mithukumano sinimala aya aahiiso nimpherya ahu olaleerya? Okathi owo ninniphwanya murettele mookumi mwahu, nto ninkhala oolipa wira nixintte mixankiho sahu. Vekeekhai muritti wa Yesu ti wooveya.

7. Muhimye yowiiraneya enooniherya wira moolumo ari Matheyo 11:28-30 tekeekhai.

⁷ Muthokorerye etthu yaamukhumelenle murokora mmosa. Owo onwereiwa oretta oniitthaniwa síndrome da fadiga crônica, oriipiwa murima, ni muru. Nto ikwaha sikina vannimuxankiha orowela mithukumano. Nihiku nimosa, nuumala orowa omuthukumanoni, owo aalempe so: “Mwaha wa atthu otheene waalavula voohimya sa okhulumuwa. Mwaha owo waalavuliwa mwa enamuna yoowoona othunku ni yoolipiha, nto eyo yaahikiiriha omoroxa maithori. Eyo yaahikuupuxerya wira mmuthukumanoni ti opuro onireerala aka okhala”. Murokora ole aahihakalala mwaha wa orowa omuthukumanoni!

8, 9. Antaphulela exeeni moolumo a Paulo oowi: “Kakhalaka òhilipa, vavo-nto kinlipaka”?

⁸ Mmusome Yesaya 40:30. Woonasa wene hiyo pooti osuwelaka opaka itthu sinceene, masi khaninwerya opaka itthu iyo nirumeelaka ikuru sahu paahi. Ela ti etthu otheene ahu nintthuneya ahu wiixutta. Murummwa Paulo aaniphavela opaka itthu sinceene, masi owo khaawerya opaka khula etthu aaphavela awe. Vaavo aamulenle awe Yehova muxankiho awe, Yehova aahimmye wira: “Owerya waka onitepaxa osuwanyeya mohilipani”. Paulo aahiiwexexa ele Yehova aamulenle awe. Ti maana aya Paulo aahimmye awe so: “Kakhalaka òhilipa, vavo-nto kinlipaka”. (2 aKorinto 12:7-10) Aatthuna ohimya exeeni ni masu ala?

⁹ Paulo aanisuwela wira khaawerya opaka itthu sotheene ni ikuru sawe paahi. Owo aanitthuneya okhaliheriwa ni mutthu orina ikuru sihinimala. Munepa wootteela wa Muluku waaninvaha ikuru Paulo okathi aakhulumuwa awe. Ikuru iyo saanimukhaliherya opaka itthu sinceene. Nave, munepa wa Muluku waaninvaha Paulo owerya wa omaleliha itthu ahaarowa awe owerya ni ikuru sawe paahi. Eyo pooti oniiraneela. Okathi Yehova onnivaha awe munepa awe wootteela, ninkhala oolipa!

10. Yehova aamukhalihenrye sai Davidi ovilela mixankiho sawe?

¹⁰ Nasaalimo Davidi ahoona moota munepa wootteela wa Muluku ikwaha sinceene waamukhalihenrye aya. Owo aahiipa so: “N’ikuru sawe kinnatuphela awanani aka: n’ukilipiha wawe kinnikuxa mittetthe saya”. (Esalimo 18:30) Moolikanasa ni ixiri soorekama, okathi mukina mixankiho sahu pooti okhala suulupale nihinwerya ahu oxintta ni ikuru sahu. Hiyo nihaana okhaliheriwa ni Yehova.

11. Munepa wootteela onnikhaliherya sai ovilela mixankiho sahu?

¹¹ Mmusome Yesaya 40:31. Murumaasi khonirumeela ikuru sawe paahi okathi onivava awe. Epheyo yooviha enikela mmeekuni tenimwiiriha murumasi ovava mmeekuni.  Eyo ennimukhaliherya ovava orowaka opuro woorakamela ikuru sawe sihimmalenle. Nto, mwakhalana muxankiho munoona anyu ovila ovilela, mmuupuweleke murumaasi. Munvekeleke Yehova wira oovaheeni ikuru sinceene omurumeelaka “mulipa-òkhaliherya”, eyo piiyo, munepa wootteela. (Yohani 14:26) Okathi wotheene hiyo pooti onvekela Yehova wira onivahe munepa awe. Tthiri ninniweha otthuneya waya onvekela Yehova nikhaliheryo okathi nihiniiwanana ahu ni munna aahiiso murokora a mmulokoni. Masi xeeni ohiiwanana iwo onikhumelela aya?

12, 13. (a) Xeeni okathi mukina maKristau ahiniiwanana aya? (b) Itthu saamukhumelenle Yosefe sinniixuttiha exeeni voohimya sa Yehova?

¹² Ohiiwanana onikhumelela mwaha woowi otheene ahu naatthu ohimalela. Nto okathi mukina ninninyoonyiheya mwaha wa etthu ehimmwale aahiiso epakiwe ni atthu akina. Nave hiyo ikwaha sikina pooti waanyoonyiha atthu akina. Eyo pooti okhala etthu yooxankiha vanceene. Masi, enninivaha eparakha yookhala oororomeleya wa Yehova. Moota xeeni? Niixuttaka ovara muteko hoothe ni anna ni arokora, mowiiwanana. Yehova onnaaphenta anna awo nnaamwi ari ene oohimalela, nave-tho hiyo nihaana waaphentaka.

¹³ Yehova khonikhoottiherya wira arumeyi awe yeehereriweke. Hiyo ninnisuwela ele yaamwiiranenle Yosefe. Okathi aari awe mmiravo, axuulupale awe yaanimukhalela nrima. Awo yaahimutumiha ntoko epottha ni aahiroihiwa wEjiitu. (Maphattuwelo 37:28) Yehova aahoona ele yaakhumelenle ni aahiriipiwa murima onweha mpatthani awe ni murumeyi awe oororomeleya, Yosefe othokoreriwaka moohixariya. Hata vaari siiso Yehova khaakhoottinhe muxankiho ole wira ohikhumelele. Muhoolo mwaya, nuumala Yosefe wootheriwa omutuphela mwaara a Potifari ni otthukeliwa mukhatteya, nlelo Yehova aahihiya itthu iye simukhumelelaka. Masi niireke Muluku aaroomunyanyala Yosefe? Nnaari. Biibiliya onihimya wira “Apwiya [Yehova] yanikhala ni Yosefe, khumureriha”.​—Maphattuwelo 39:21-23.

14. Nimphwanya sai mureerelo okathi ninsyaka ahu onanariwa?

¹⁴ Ntakiheryo nikina ti na Davidi. Atthu anceene khatonto othokoreriwa moohiloka ntoko Davidi. Nto, mpatthani ole a Muluku  kheemerenrye okhala mutthu oonanariwa. Owo aalempe so: ‘Owali muhiyeke, esará murihe. Muhinanariwe: sinimorwelani itthu sonanara’. (Esalimo 37:8, Biblya Exirima) Nthowa nuulupale ninniiriha ‘ohiya’ onanariwa, aahiiso oviruwa, ori ophavela omutakiha Yehova. Owo “khannìrela hiyo siso simphwanelahu”, masi onninlevelela. (Esalimo 103:10) Sookhala mireerelo sinikhumela mwaha woohiya onanariwa. Mwa ntakiheryo, onanariwa pooti okumiherya mixankiho mphomeni ni ohimumula saana. Eyo pooti omuhonona hapa, pâncreas, ni pooti wiiriha nipwiipwi ohivara saana muteko. Nave okathi ninnanariwa ahu, khaninwerya wuupuwela saana. Hiyo pooti olavula aahiiso opaka itthu sikhanle oowaawereya akina, nto eyo pooti oniiriha oriipiwa murima okathi munceene. Nto ti vooloka okhala oomaaleleya. Biibiliya onihimya wira: “Murima womàla okumi w’erutthu”. (Miruku 14:30) Nto exeeni nikhanle ahu oopaka okathi atthu akina anninyoonyiha aya, nave-tho ninrowa okhalana sai murettele ni anna? Nihaana ovarihela muteko malakiheryo a Biibiliya.

15, 16. Nipakeke exeeni akhala wira noonyoonyihiwa?

¹⁵ Mmusome aÉfeso 4:26. Hiyo khanintikinihiwa naathokoreriwaka moohikhalela ni atthu ahinimurumeela Yehova. Masi okathi munna aahiiso murokora a mmulokoni wala mmusi onninyoonyiha awe, eyo enniniwereya vanceene. Nipakeke exeeni akhala wira khaninwerya oliyala etthu ekhumelenle? Niireke nnimweemererya ovikaniha onanariwa, hata siviraka iyaakha sinceene? Aahiiso, nnoovarihela muteko miruku sa Biibiliya, niphukaka mwaha owo moowaakuveya? Akhala wira onoovira okathi munceene nihiphunke mwaha ahu ni mutthu owo, vanoonivila okhalana murettele.

¹⁶ Ankhi akhala wira munna ohoonyoonyihani, muhinawerya oliyala mwaha owo? Munrowa opaka exeeni wira mukumiherye murettele? Yoopacerya, munvekele Yehova. Mmuxonttele yena wira ookhaliheryeni ophuka saana mwaha anyu ni munna owo. Muhiliyale wira munninyu nave mpatthani a Yehova. (Esalimo 25:14) Muluku onnimphenta yena. Yehova onnaareerela murima apatthani awe ni oniphavela wira hiyo nimutakiheke. (Miruku 15:23; Matheyo 7:12; aKolosi 4:6) Ya nenli, muupuwelele oratteene etthu munrowa anyu omuleela munninyu. Muhaakuvele wuupuwela wira oroolakela woonyoonyihani. Woonasa wene kholakenle aahiiso nyuwo muhiiwale saana mwaha owo. Mweemereryeke wira nyuwo woonasa wene mookhalana-tho nthowa. Nyuwo pooti opacerya olavula muhimyaka so: “Woonasa wene, miyo kinaakuva oveeheya, masi okathi mwakilavulinhe anyu nsana miyo . . . ”. Akhala wira eyo khenrowa wookhaliheryani okumiherya murettele, nvikaniheke omananiha. Munvekeleleke munninyu. Munvekeleke Yehova wira omureelihe yena ni ookhaliheryeni okhalana makhalelo ooloka. Mukupaliki wira Yehova onoosiveliwa ni wiimananiha wanyu opaka murettele ni munninyu, yoowo-tho ori mpatthani a Muluku.

17. Moota xeeni Yehova onnikhaliherya awe olokiherya wataana wahu ni yena okathi ninttheka ahu? Nave xeeni nintthuneya ahu weemya nikhaliheryo nlo?

¹⁷ Atthu akina anoona wira khaniphwanela omurumeela Yehova mwaha woowi aatoko opaka etampi yuulupale. Wiivaha nthowa, pooti oniiriha ohikhalana murettele,  ohakalala ni ikuru. Mwene Davidi aahikhalana muxankiho wa wiivaha nthowa. Nto owo aahimmye so: “Kakhuwaka sottheka saka, makhuv’aka annittèttheya, kìpulelaka n’ukhuwela mahiku othene. Othana n’uhiyu kanona onanariwa wanyu”. Moohakalaliha, Davidi aahipaka etthu Yehova oniphavela awe wira arumeyi awe apakeke. Davidi aalempe wira: “Vano kihohimeryani etampi aka . . . nyuwo mokilevelela itampi sìralyaka”. (Esalimo 32:3-5) Akhala wira mootoko opaka etampi yuulupale, musuweleke wira Yehova onniphavela woolevelelani. Owo oniphavela wookhaliheryani olokiherya wataana wanyu ni yena. Nto, muhaana weemya nikhaliheryo nawe orweela wa axitokweene a mmulokoni. (Miruku 24:16; Yakobo 5:13-15) Nto, muhimaale paahi! Opaka eyo onimoophwanyihani okumi woohimala. Ankhi vakhala wira nlelo munniivaha nthowa mwaha wa itampi muleveleliwe anyu, munrowa opaka exeeni?

18. Ntakiheryo na Paulo nnaakhaliherya sai atthu yaale anoona wira khanireerela omurumeela Yehova?

¹⁸ Waahikhala okathi murummwa Paulo aakhulumunwe awe mwaha wa itampi aapanke awe khalai. Owo aahimmye so: “Tthiri miyo kiri mwamukhanixa wavikana arummwa othene, kihiphwanelaka hatá wireliwa murummwa, okhala wira kahilupattha Ekereja ya Muluku”. Nave aahihimya-tho so: “Vano, mwaha w’eparakha ya Muluku kokhala eyo kinkhalaka”. (1 aKorinto 15:9, 10) Yehova aanisuwela wira Paulo aari oohimalela. Hata vari siiso, aahimweemererya Paulo okhala murumeyi awe, ni aaphavela wira Paulo osuweleke wira Yehova aanimphenta. Nto, akhala wira moonvekela Yehova musammaha mwaha wa etampi anyu ni moorowa waaleela axitokweene vaareerelaka, tthiri Yehova onimoolevelelani. Mukupaliki wira Yehova ohoolevelelani tthiri!​—Yesaya 55:6, 7.

19. Yoolepa ya mwaakha wa 2018 tiivi, ni xeeni eri aya yootthuneya?

¹⁹ Tthiri vaavo nnaattamela ahu wanikisa wa olumwenku ola, sinoonikhumelelaka mixankiho sinceene. Masi nihiliyale wira Yehova yoowo ‘oninvaha ekumi mutthu okhulumunwe ni oninjererya ikuru sa mutthu òhilipa’, pooti woovahani ikuru wira nvikanihe omurumeela yena moororomeleya. (Yesaya 40:29; Esalimo 55:23; 68:20) Eyaakha ya 2018 nnimuupuxeriwaka ekeekhai ela yootthuneya okathi wotheene ninrowela ahu mithukumano empa ya Omwene ni oweha moolumo a yoolepa ahu ya mwaakha, yaawo anihimya so: “Ale anlipa n’Apwiya [Yehova] ikuru saya sinninjerereya”.​—Yesaya 40:31.