1, 2. Etthu xeeni enaaxankiha arumeyi a Muluku olelo-va? (Nwehe ilatarato soopacerya.)

MAMEEDIKU ni manfurumeero manceene annaaloola atthu arina iretta sowaakuva oravihaniwa. Awo annaakhapelela aretta aya maana aniphavela waakhaliherya. Masi ahaana wiikhapelela wira ahirave eretta eyo aneererya aya oloola. Ntoko arumeyi a Yehova, makhalelo ahu anoolikana ni ale a mameediku ni manfurumeero. Anamunceene a hiyo ninvara muteko ni atthu arina miyuupuwelo ni mikhalelo soohiloka, seiyo sinivirikana ni mikhalelo sa Muluku. Tthiri owo muxankiho!

² Mahiku ala ookiserya anikhala ahu, atthu ahinimphenta Muluku annikhootta weettela malamulo awe. Murummwa Paulo aaahitthokiherya mikhalelo soohiloka sa atthu awo vaavo aamulepenle awe Timootheyo epaphelo. Paulo aahimmye wira mikhalelo iyo soohiloka saarowa otepaka, okathi wanikisa waarowa aya waattamelaka. (Mmusome 2 Timótheyo 3:1-5, 13.) Nnaamwi noonaka mikhalelo iyo okhala soohiloka, naahikhalane ephole pooti opaceryaka otakiha miyuupuwelo, ilavulelo,  ni mweettelo wa atthu awo. (Miruku 13:20) Mwaha ola, nnooweha moota mikhalelo iyo sinivirikana aya ni mikhalelo sa arumeyi a Muluku. Nnooweha-tho etthu ekhanle ahu oopaka wira nisyake orava mikhalelo iyo soohiloka, okathi nnaakhaliherya ahu atthu omusuwela Yehova.

3. Mikhalelo xeeni siniromoliwa yoolepa ya 2 Timótheyo 3:2-5?

³ Murummwa Paulo aahihimya wira mahiku ookiserya ‘yamphiya mahiku òxankiha’. Nuumala-vo aahiromola mikhalelo 19 soohiloka, seiyo saarowa wuulaana mahiku ala. Mikhalelo iyo sinlikana ni iye Paulo oromonle awe eliivuru ya aRoma 1:29-31, masi mikhalelo oromonle awe epaphelo ya Timootheyo khasiniphwanyaneya nipuro nikina mwa Soolempwa sa eGriki sa eKristau. Paulo aapacenrye oromola mikhalelo iyo ni moolumo ani: “atthu anrowa”. Nto moolumo ala anooniherya wira atthu otheene, alopwana ni athiyana pooti okhalana mikhalelo soohiloka. Masi eyo khentaphulela wira atthu otheene aakhalana mikhalelo soohiloka. MaKristau aakhalana mikhalelo soovirikana ni anamunceene.​—Mmusome Malakhiya 3:18.

4. Exeeni enitaphulela aya wiisoona?

⁴ Nuumala Paulo ohimya wira anamunceene yaarowa wisupuwelaka mmansaya pahi, anamilili, owo aahincererya oriki yaarowa wiittottopaka ni wiisoona. Atthu arina mikhalelo iyo anuupuwela wira toolokexa wala toosuwelexa itthu waavikana akina, mwaha wa ophwaneliwa waya, itthu anisuwela aya ovara, itthu arina aya wala makhalelo aya. Atthu awo aniphavela ovuwihiwa paahi. Voohimya sa atthu siiso, musomi mmosa olempe so: “Vamurimani vaya ookhala altari mwaamukhaani, vaavo onuurama aya enaikokhorela”. Atthu akina anihimya wira wiixinnuuha etthu yootepa onanara, hata atthu oowixinnuuha khivanaasivela waaweha akina yiixinnuwihaka.

5. Moota xeeni arumeyi oororomeleya a Yehova yaapacenrye aya wiisoona?

⁵ Yehova onninyokha wiisoona. Biibiliya onniromola “maitho òwisona”. (Miruku 6:16, 17) Mutthu owiixinnuuha wala owiisoona onnikhala nwanani a Muluku. (Esalimo 10:4) Wiixinnuwiha mukhalelo wa Diabo. (1 Timótheyo 3:6) Mooriihipiha murima hata arumeyi akina a Yehova anniixinnuuha. Mwa ntakiheryo, mwene Oziya a oYuda aahiroromeleya iyaakha sinceene. Masi Biibiliya onihimya so: “Mwaha w’owerya wawe, murim’awe wahisareya wisona, khumpwetexa. Tthiri Oziya ahatthekela Apwiya Muluku awe”. Owo aahikela mutemplo khupaha erupani, nnaamwi yaari etthu yootakhala. Muhoolo mwaya, mwene oororomeleya Ezekiya, aahikhala mutthu oowiixinnuuha, masi mwa okathi vakhaani.​—2 Wahala 26:16; 32:25, 26.

6. Exeeni yaakhanle oomwiiriha Davidi wiisoona? Masi exeeni yaamukhalihenrye wiiyeviha?

⁶ Atthu akina anniixinnuuha mwaha wa oreera waya, ovuwa, osuwela wiipa, ikuru, ni ottittimihiwa ni atthu akina. Davidi aahikhalana itthu iyo sotheene, masi aahivikaniha okhala oowiiyeviha. Mwa ntakiheryo, nuumala Davidi omwiiva Goliyathi, mwene Sawuli aahimweemererya okhala mutthepa awe. Masi Davidi aakhunle so: “Miyo ka pani? Wala atthu ètthoko y’atithi t’apani, wira kiphwanele okhala mutthepa a mwené?” (1 Samuweli 18:18) Exeeni yaamukhalihenrye  Davidi okhala oowiiyeviha? Aanisuwela wira itthu sotheene aarina awe, ni aasuwela awe ovara, waari mwaha woowi Muluku towiiyeviha ni aahinvaha ni aanimoonela vatthu. (Esalimo 113:5-8) Davidi aanisuwela wira khula etthu yooloka aarina awe, yaakhuma wa Yehova.​—Mulikanyihe ni 1 aKorinto 4:7.

7. Exeeni enrowa onikhaliherya okhala oowiiyeviha?

⁷ Moolikanasa ni Davidi, olelo-va arumeyi a Yehova anneererya okhala oowiiyeviha. Tthiri ninnihakalala vanceene oweha wira hata Yehova, yoowo ori oovuwaxa, towiiyeviha. Nihaana otthara moolumo ala: “Mukuxe murima w’othunku, murima worera, wowoyeviha, womàla ni wovilela”. (aKolosi 3:12) Ninnisuwela wira ole omphenta “khanìvuwiha, khanìkuxererya”. (1 aKorinto 13:4) Vaavo akina anoona aya wira na atthu oowiiyeviha, nave awo pooti ophavelaka omusuwela Yehova. Ntoko sisaale mulopwana oothela vaniweryaneya awe wiixutta ekeekhai mwaha wa mweettelo wooloka wa mwaarawe muKristau, vamosaru, atthu pooti ophavelaka omurumeela Yehova mwaha wa wiiyeviha wa arumeyi awe.​—1 Pedru 3:1.

8. (a) Anamunceene olelo-va anoonela sai ohiwiiwelela anamuyari? (b) Biibiliya onihimya wira anamwane apakeke exeeni?

⁸ Paulo aahitthokiherya moota atthu yaarowa aya othokoreryanaka mahiku ookiserya. Owo aahilepa wira anamwane yaarowa okhala oohiwiiwelela anamuyari aya. Olelo-va, iliivuru, ifilme, iprograma sa TV sinnooniherya okhala etthu yookhalela anamwane ohiwiiwelela anamuyari aya. Masi nnaamwi ohiiwelela wooniwaka okhala etthu yooloka, onnihonona itthoko ni khonikumiherya wuuraana. Okhuma khalai, apinaatamu annisuwela eyo. Mwa ntakiheryo, oGresia wa khalai, mulopwana aamana apapawe aaniyeleela ihaakhi sawe mmuttettheni mwawe. Nlamulo na aRoma naahimya wira mutthu yoole aamana apapawe, aahaana ohukhummwa sintoko nawiive. Soolepa sa eHeeberi ni eGriki sinnaaruma anamwene waattittimiha anamuyari aya.​—Okhuma 20:12; aÉfeso 6:1-3.

9. Exeeni enrowa waakhaliherya anamwane owiiwelela anamuyari aya?

⁹ Exeeni enrowa waakhaliherya anamwane owiiwelela anamuyari aya, nnaamwi anamwane akina ahiwiiwelelaka? Vaavo anamwane anuupuwelela aya itthu sinceene sooreera anamuyari aya aniwiirela aya, awo ahaana ophavelaka waaxukhurela ni owiiwelela. Anamwane ahaana osuwela wira Muluku, yoowo ori Tiithi a atthu otheene, onihimya wira anamwane ahaana owiiwelela anamuyari aya. Vaavo anamwane anaalavula aya saana anamuyari aya, nto annaakhaliherya akhwaaya waattittimiha anamuyari aya. Masi akhala wira anamuyari khanaaphenta anaaya, eyo pooti owiiriha anamwane woona ovila owiiwelela anamuyari awo. Masi akhala wira mwaana onnoona wira anamuyari awe annimphenta, eyo pooti  omukhaliherya mwaana owo woona okhweya owiiwelela anamuyari awe, hata okathi wooxankiha. Munna mmosa oniitthaniwa Agostinho ohimmye so: “Hata ikwaha sikina kaamananiha wiipithiha itthu kaapaka aka wira kihihukhummwe, anamuyari aka yaanikireerela murima, awo yaanikitthokiherya nthowa naya yaakivaha aya malamulo awo ni naanivikaniha ovaanela mootaphuwa. Nto eyo yookikhaliherya okhala oowiiwelela. Kaahiweha wira awo yaanikikhapelela, nave eyo yookiiriha ophavela waahakalaliha”.

10, 11. (a) Mikhalelo xeeni soohiloka sinooniherya wira atthu khaniphentana? (b) MaKristau eekeekhai anaathokorerya sai atthu akina?

¹⁰ Paulo aahiromola-tho mikhalelo saarowa wooniherya wira atthu khaniphentana. Nuumala ohimya wira atthu yaarowa okhala “òhiwìwelela anamuyari”, owo aahihimya-tho wira atthu yaarowa okhala oohixukhuru. Ntoko ninsuwela ahu, atthu oohixukhuru khanoona itthu sooloka sinivariwa ni akina. Paulo aahihimya-tho wira atthu yaarowa okhala oohiroromeleya. Atthu khiyaarowa wiiwananaka, niire so, khiyaarowa ophavelaka okumiherya murettele. Yaarowa okhala atthu aninveeha Muluku ni oohiroromeleya. Yaarowa ohimyaka itthu soothakhala, yaaveehaka atthu ni Muluku. Ni yaarowa okhala oowootherya akhwaaya, yaarowa ohimyaka itthu sowoothiwa wira ananarihe nsina na atthu akina. *​—Nwehe enoota.

¹¹ Arumeyi a Yehova toovirikana ni anamunceene mwaha woowi annaaphenta atthu ni murima wotheene. Awo annipaka eyo okhuma khalai. Yesu aahimmye wira yooruma ya nenli yuulupale ya Nlamulo na Moise yaari ya waaphenta akina. (Matheyo 22:38, 39) Nave-tho aahihimya wira maKristau eekeekhai yaarowa osuwanyeyaka mwaha wa ophentana waya. (Mmusome Yohani 13:34, 35.) MaKristau eekeekhai annaaphenta awanani aya.​—Matheyo 5:43, 44.

12. Yesu oonihenrye sai wira aanaaphenta atthu?

¹² Yesu aanaaphenta vanceene atthu. Eyo yaanooneya vaavo aarowa awe khula muttetthe waalaleerya atthu ihapari sooreera sa Omwene wa Muluku. Owo aahaavoniha alipa-oohoona, atthu oorakala, anamakuttula ni alipa-oohiiwa. Nave aahaahihimuxa alipa-ookhwa. (Luka 7:22) Yesu aahileva okumi awe wira owoopole apinaatamu, nnaamwi anamunceene yaamunyokha. Yesu aanitakiha moomalela ophenta wa Tiithi awe. Olumwenku wotheene, Anamoona a Yehova annimutakiha Yesu, yaaphentaka atthu.

13. Waaphenta akina onrowa waakhaliherya sai atthu awo omusuwela Yehova?

¹³ Waaphenta akina, pooti owiiriha atthu awo ophavela omurumeela Yehova. Mwa ntakiheryo, mulopwana mmosa oTailândia aahimurowela kongresu mmosa ni vaahimusivela vanceene oweha moota anna yaaphentana aya. Nuumala otthikela owaani, aahivekela omusoma Biibiliya ni Anamoona a Yehova, ikwaha piili khula esumana. Nuumala-vo aahaalaleerya amusi awe otheene. Nuuvira miyeeri 6 paahi, mulopwana ola aahikhalana epantte ya omusoma Biibiliya omuthukumanoni. Niireke nyuwo munnaaphenta atthu akina? Mwiikoheke so: ‘Kiireke kinniimananiha waakhaliherya amusi aka, anna a mmulokoni ni atthu anaaphwanya  ahu mmutekoni woolaleerya? Kinneererya waathokorerya atthu ntoko Yehova onaathokorerya awe?’

14, 15. Mikhalelo xeeni soohiloka anamunceene anooniherya aya? Marukunuxo xeeni atthu anceene apanke aya?

¹⁴ Mahiku ala ookiserya, atthu annooniherya mikhalelo soohiloka, seiyo ninreerela ahu osyaka. Mwa ntakiheryo, anamunceene khanimoriwa ikharari. Anninyokha itthu sa xariya. Atthu ntoko awo, khaniisuumaaliha ni toowali. Akina toosareya wiisoona. Awo annipaka itthu ehithokoreryaka sookhumelela sa itthu iyo, hata sirowaka waahaaxa atthu akina.

¹⁵ Atthu anceene yaarina mikhalelo ntoko sa inama soowali, annituruka mikhalelo iyo. Biibiliya aahiromola vahinatthi marukunuxo awo. (Mmusome Yesaya 11:6, 7.) Yoolepa ela enihimya wira inama soowali, ntoko miici ni ahavara, saarowa okhalaka ni murettele vamosa ni mihuwo sa vatthokoni, ntoko ipwittipwitthi ni axinyompe. Xeeni saarowa aya okhala ni murettele? Biibiliya onitthokiherya wira “atthu otheene a mulaponi anosareya osuwela w’Apwiya”. (Yesaya 11:9) Ninnisuwela wira inama khasiniwerya omusuwela Yehova, nto eprofesia yaathonyerya marukunuxo atthu anipaka aya mookumini mwaya.

16. Biibiliya onaakhaliherya sai atthu oturuka mikhalelo saya?

¹⁶ Anna anceene ni arokora, khalai yaari atthu ootakhala ntoko mwiici, masi vano awo atthu a murettele. Nyuwo pooti osoma  sowiiraneya sa mookumini, mpantta oni “Biibiliya Onnirukunuxa Mirima sa Atthu”, musaitini jw.org. Ale animurumeela Yehova khanlikana ni ale anooneya ntoko atthu owaamini, masi aheettelaka. Atthu awo anniihimya omukokhorela Muluku, masi mweettelo aya onnooniherya wira awo animootha. Masi, eriyari ya Anamoona a Yehova, aakhala atthu yaari ootakhala masi vano ‘awara omutthu musya, opattuxiwa alikanyihiwaka ni Muluku, okhalihiwa naxariya, orerihiwa murima n’ikekhai”. (aÉfeso 4:23, 24) Vaavo atthu animusuwela aya Muluku, awo annoona wira ahaana otthara malakiheryo awe. Eyo ennaakhaliherya oturuka itthu yaakupali aya, muupuwelo aya, ni soovara saya. Khivanikhweya opaka marukunuxo awo, masi munepa wootteela wa Muluku onoowerya waakhaliherya ale aniphavela omuhakalaliha.

17. Ninrowa osyaka sai otakiha mikhalelo soohiloka sa atthu ahinimurumeela Yehova?

¹⁷ Vano vannitepa okhweya oweha ovirikana okhanle eriyari ya ale animurumeela Muluku ni ale ahinimurumeela. Nihaana wiikasoopa wira nihitakiheke mikhalelo soohiloka sa atthu ahinimusuwela Muluku. Nto nihaana wiiwelela masu a Yehova nikhoottaka weetta ni atthu arina mikhalelo sinromoliwa ni 2 Timótheyo 3:2-5. Ekeekhai wira khaninwerya waasyaka moomalela atthu arina mikhalelo soohiloka, okhala wira nihaana ovara muteko vamosa ni awo, osomana exikola emosa aahiiso waattamana itthoko. Masi nihitakiheke mweettelo ni muupuwelo aya. Exeeni enrowa onikhaliherya? Olipiha ompatthani ahu ni Yehova, nimusomaka Biibiliya ni waataana ni ale animphenta Yehova paahi.

18. Mweettelo ahu ni moolumo ahu anrowa waakhaliherya sai atthu ophavela omusuwela Yehova?

¹⁸ Nihaana ophavela waakhaliherya atthu omusuwela Yehova. Niphaveleke inamuna sa waalaleerya atthu. Ninvekeleke Yehova wira onikhaliherye olavula moolumo ooreerela, okathi wooreerela. Nihaana waasuweliha akina wira na Anamoona a Yehova. Nto, eyo enrowa onvuwiha Yehova, ohiya wiivuwiha mmansihu. Yehova onniniixuttiha “okhotta makhalelo òtakhala n’uhiya itthu sintthunexiwa vathí-va, wira mahiku othene netteke ni wisumaliha n’ixariya n’omuttittimiha Muluku”. (Tito 2:11-14) Nto namutakiha Yehova, ni opaka ele onniruma awe, atthu akina anoowehaka eyo. Akina pooti ohimyaka so: “Nimphavela wottharani, mana nokupali wira Muluku ori ni nyuwo”.​—Zakariya 8:23.