1. Xeeni okathi ninkhala ahu ori aya woovirikana ni okathi wa khalai?

OLELO-VA, ninkhala okathi wa marukunuxo manceene moolumwenkuni. Yehova onnithukumanya muttitthi muulupale wa atthu “a ilapo sothene ni a maloko othene ni a mahimo othene ni a malavulelo othene”, ntoko Biibiliya aahimmye awe khalai. Awo aniirela mpantta “nloko nowatta atthu” anivikana imilyau 8. Atthu awo toohakalala ni annivara miteko sa Muluku “othana n’uhiyu”. (Wisupulula 7: 9, 15; Yesaya 60:22) Vano aakhala atthu anceenexa animphenta Muluku ni anaaphenta anamakokhorela akhwaaya, ovikana khalai.

2. Muthinto xeeni wa niphento anooniherya aya atthu ahinimurumeela Muluku? (Nwehe elatarato yoopacerya.)

² Masi Biibiliya aahileiherya wira mahiku ahu ala, atthu ahinimusuwela Muluku yaamooniherya muthinto mmosa wa niphento, eyo piiyo ophenta wowiitthuna. Murummwa Paulo aahihimya wira mahiku ookiserya, atthu yaarowa “wiiphentaka mmansaya”, oophenta muhakhu, ‘oosiveliwa itthu sooreera sa vathi ohiya opatthana ni Muluku’. (2 Timótheyo 3:1-4, Waataana  wa Naanaano) Ophenta iwo wowiitthuna khonivarihana ni ophenta wa Muluku. Ophavela itthu mwa nrima khoniphwanyiha ohakalala, nnaamwi mutthu owo uupuwelaka wira onoophwanya. Ohiya-vo, onnootepa owiiriha atthu otepa okhala oowiitthuna ni wiiriha okumi okhala woovila.

3. Exeeni ninrowa ahu othokorerya mwaha ola? Ni nthowa xeeni?

³ Murummwa Paulo aanisuwela wira wiitthuna aahiiso wiisoona waamulaana ni yaarowa okhala etthu yowoopiha wa maKristau. Nto Paulo aahaalopola maKristau wira ‘ehettaneke atthu awo’, aahiiso ehaataaneke ni ale anooniherya ophenta woowiitthuna. (2 Timótheyo 3:5) Masi hiyo khaninwerya waasyaka atthu otheene oowiitthuna. Nto, exeeni nikhanle ahu oopaka wira nisyake mweettelo woohiloka wa atthu ni omuhakalaliha Yehova, Muluku a niphento? Nrowe niwehe ovirikana okhanle eriyari ya ophenta onimusivela Muluku ni ophenta oniromoliwa 2 Timótheyo 3:2-4. Nuumala-vo, nihaana oweha saana makhalelo ahu wira nisuwelexe muthinto wa ophenta onrowa oniphwanyiha ohakalala.

4. Xeeni vahikhanle aya vootthekeya?

⁴ Paulo aahimmye wira atthu yaarowa “wiiphentaka mmansaya”. Niireke eyo entaphulela wira ti vootthekeya wiiphenta? Nnaari, maana wiiphenta etthu yootthuneya. Nave-tho Yehova onipattunxe wira niweryeke wiiphenta. Yesu aahimmye so: “Mwaphenteke akhw’inyu ntoko sinìphentanyu”. (Marko 12:31) Moohaaniherya khaninwerya waaphenta akhwiihu nihiiphentaka mmansihu toko. Nave Biibiliya onnileela wira: “Ole othenle ohana omphenta mwar’awe ntoko erutthu awe. Ole onimphenta mwar’awe, onnìphenta mmansawe. Khavo mutthu oniphweliwa n’erutthu awe: ohiya vo, khula mutthu onnilyiha erutthu awe, oniphwanyiha sorera”. (aÉfeso 5:28, 29) Nto eyo enooniherya wira nihaana wiiphenta ntoko sinaaphenta ahu atthu akina.

5. Muniwoonela sai atthu yaale aniisuupuwela mmansaya paahi?

⁵ Enamuna ya wiiphenta onihimmwa ni 2 Timótheyo 3:2, khahiyo ophenta wooloka. Iwo wiitthuna. Akhala wira mutthu onniiphenta mootepana, owo oniixuupuwela mmansawe paahi ovikana vanreerela aya. (Mmusome aRoma 12:3.) Mutthu owo oniithokorerya mmansawe paahi ni khonaathokorerya akhwaawe. Masi okathi onikhumelela aya muxankiho onaavaha nthowa atthu akina. Musomi mmosa onitthokiherya myaha sa mBiibiliyani, ohimmye wira mutthu siiso onlikana ni naxinyiku oniisuupanya sintoko boola. Owo onniphwanya oviha orumeelaka manri awe a muhina, masi akina oniwooniherya paahi miiwa sawe soohoma. Atthu siiso khaniphwanya ohakalala wekeekhai.

6. Mireerelo xeeni nimphwanya ahu vaavo nnimphenta ahu Muluku?

⁶ Asomi akina animutokosa Biibiliya anihimya wira murummwa Paulo aapacenrye oromola wiiphenta mmansawe mwaha woowi mukhalelo ola woohiloka tonikumiherya mikhalelo soohiloka aaromonle awe moottharelana.  Moovirikana ni ophenta iwo, niphento Muluku onnivekela awe wira nooniheryeke ninniphwanyiha makhalelo ooloka, ntoko ohakalala, murettele, opixa murima, oreera murima, waamini, wiiyeviha ni wiihiiha. (aGalasia 5:22, 23) Nasaalimo aalempe so: “Noreriwa nloko Muluku aya akhanle Apwiya [Yehova]”. (Esalimo 144:15) Yehova Muluku oohakalala, ni atthu awe toohakalala. Moovirikana ni atthu yaale aniisuupuwela mmansaya paahi, aniphavela ovahiwa itthu paahi, arumeyi a Yehova atthu oohakalala mwaha woowi awo annaavaha akhwaaya.​—Miteko 20:35.

7. Makoho xeeni anrowa onikhaliherya ovarerya omphenta wahu Muluku?

⁷ Ninrowa osuwela sai akhala wira ninniiphenta vanceene ovikana omphenta wahu Muluku? Muthokorerye miruku iya sootthuneya: “Ehikhale etthu enìranyu mphavelaka oxinttana walá wittottopa: nto mwiyeviheke, khula mutthu awonelaka vatthu akhw’awe vowivikana mmansawe. Khula mutthu ahiphavelé sinimurerela yowo pahi, nto àphaveleleke-tho oreriwa akhw’awe”. (aFilipi 2:3, 4) Hiyo pooti wiikohaka so: ‘Kiireke kinnivarihela muteko miruku iya? Kinnivara itthu sinimusivela Muluku? Kinniimananiha waakhaliherya akina mmulokoni ni mmutekoni moolaleerya?’ Khivanikhweya oleva okathi ahu ni ikuru sahu. Mwaha woowi eyo pooti oniirihaka ovara muteko munceene ni oleva opaka itthu sikina sinnisivela. Masi khiivo etthu ekhanle ooniphwanyiha ohakalala ovikana osuwela wira ninnimuhakalaliha Mukhulupale a olumwenku wotheene!

8. Exeeni maKristau makina anipaka aya mwaha wa omphenta waya Muluku?

⁸ MaKristau makina mwaha wa omphenta Muluku ni ophavela omurumeela vanceene, annihiya miteko saarowa waakhaliha atthu oovuwa. Ericka yoowo ori meedika, aahithanla  okhala pioneera ohiya ovarexexa muteko ole wa omeediku. Owo ni iyawe, aawerya olaleerya ilapo sinceene. Owo onihimya so: “Sookumanana sinceene nirina ahu mwaha wookhaliherya muttetthe onilavuliwa nttaava na elapo ekina, vamosa ni apatthani animphenta Mululuku, wooniphwanyiha ohakalala wvaalupale”. Nlelo Ericka meedika, masi onnirumeela okathi munceene ni ikuru sawe owiixuttihaka atthu Nuulumo na Yehova ni waakhaliherya anna ni arokora. Owo onihimya wira eyo ennimphwantiha “ohakalala wekeekhai”.

9. Xeeni atthu yaale aniphenta musurukhu ahimphwanya aya ohakalala wekeekhai?

⁹ Paulo aalempe wira atthu yaarowa okhala “òsiveliwa muhakhu”. Iyaakha vakhaani sivinre, pioneero mmosa a wIrlanda aahivaanela ni mulopwana mmosa voohimya sa masu a Muluku. Mulopwana owo aahikumiha musurukhu mmurupani mwawe ni aahimooniherya ohimyaka so: “Ola tori muluku aka!” Nnaamwi anamunceene ahihimyaka eyo, masi anoonela siiso. Awo anniphenta musurukhu ni mihakhu. Masi Biibiliya onninlopola so: “Omphavelexa musurukhu, khanrowa ohimya wira: ‘Wokiphiyerya’. Omphavelexa mihakhu, khanihimya wira: ‘Kovona!’” (Musuweli 5:9) Mutthu oniphenta musurukhu khoniphiyeriwa. Okathi wotheene owo oniphavela musurukhu paahi ni onniimananiha wira ophwanye musurukhu. Eyo ennimuruuhela “masoso malupale”.​—1 Timótheyo 6:9, 10.

10. Exeeni enihimya awe Biibiliya voohimya sa othaaciri ni osikhini?

¹⁰ Ekeekhai wira otheene ahu ninniphavela musurukhu, maana owo onninikhaliherya. (Musuweli 7:12) Masi niireke nnoowerya ohakalala nrina ene itthu vakhaani sinnithowa? Aayo! (Mmusome Musuweli 5:11.) Aguri, mwana a Yaké aalempe so: “Muhikivahé othajiri nnákhala omasikhini: mukivahe siniphiyerya ekumi aka”. Ti vookhweya osuwela nthowa naya mulopwana ole ahaaphavela awe okhala ootepa ohaawa. Owo aahimmye wira khaaphavela okhala nawiiye, okhala wira opaka eyo yamuramusa nsina na Muluku. Masi xeeni ahaaphavela awe othaaciri? Owo aahimmye so: “Kavonne, kanwerya wokhottani, kihimyaka wira: ‘Apwiya ankitekela-ni?’” (Miruku 30:8, 9) Woonasa wene munnaasuwela atthu aniroromela mihakhu omuhiya Muluku.

11. Exeeni Yesu aalavunle awe voohimya sa musurukhu?

¹¹ Mutthu oniphenta musurukhu khivaniweryaneya omuhakalaliha Muluku. Yesu ahimmye so: “Khavo onwerya warumela mamwene manli: mana onomunyokha mmosá, amphenteke mukina pahi; walá onomurumela mmosá, mukina amuthanyeke. Khamuniwerya omurumela Muluku vamosá ni muhakhu”. Nave aahihimya wira: “Muhìthukumanyeryé mihakhu vathí-va: vava owexe ni mukwitha vanihononaya, vava anawiye vanipwexaya mukhora, khukuxa muhakh’uwo. Mwìthukumanyeryeke mihakhu wirimu: weiwo nnákhala owexe walá mukwitha, walá owexe ohinlyaya, weiwo ohikhanle-wo anawiye ankuxa muhakh’uwo”.​—Matheyo 6:19, 20, 24.

12. Moota xeeni okumi wohiisaattiherya itthu onnikhaliherya aya omurumeela Muluku? Nvahe ntakiheryo.

¹² Arumeyi anceene a Yehova annimananiha okhalana okumi woohiisaattiherya itthu. Awo anniweha wira opaka eyo onnaaphwanyiha okathi woomurumeela Yehova ni waahakalaliha. Jack, yoowo onikhala wEstados Unidos ootumiha empa awe yuulupale wira okele opioneero ni mwaarawe. Owo onihimya so:  “Khivaakhweyale ohiya enupa ahu ni opuro muulupale naarina ahu”. Masi mwa iyaakha sinceene owo aamakela otthika omutekoni oriipiwe ene murima mwaha wa muteko awe. Owo onihimya so: “Mwaaraka aari pioneera ookilaatheya nto aanihakalala vanceene. Owo aamakela ohimya so: ‘Kininvarela muteko patarau muulupale!’ Vano kiri aka pioneero, nto oowanli ahu nninvarela muteko Mutthu mmosaru, Yehova”.

13. Exeeni enrowa onikhaliherya ovarerya moonelo ahu musurukhu?

¹³ Okathi ninvarerya ahu moota onoonela ahu musurukhu, nihaana wiikohaka so: ‘Kiireke okumi aka onnooniherya wira kinnikupali ele Biibiliya onihimya awe voohimya sa musurukhu? Kiireke kinivaha efaita yuulupale musurukhu? Kiireke kinnitepa ovaha efaita mihakhu ovikana waataana waka ni Yehova vamosa ni atthu akina? Kinniroromela wira Yehova onookivaha itthu sinikithowa?’ Nikupaliki wira Muluku khonirowa waanyanyala ale animuroromela!​—Matheyo 6:33.

14. Tuuvi okhanle moonelo wooloka voohimya sa opuha?

¹⁴ Biibiliya aahihimya wira mahiku ookiserya, atthu yaarowa okhala “òphavela sopuha”. Ninnisuwela wira khahiyo vootthekeya okhalana moonelo wooloka voohimya hiyo aneene ni musurukhu. Nave ninnisuwela wira khahiyo vootthekeya opuha mwa enamuna yookhalela. Atthu akina anuupuwela wira ahaana osyaka itthu sotheene soohakalaliha, masi Muluku khahiyo yeeyo eniphavela awe. Biibiliya onnaatumererya arumeyi a Muluku wira: “Mulyeke solya sanyu n’utteliwa murima: nwuryeke evinyu anyu n’usiveliwa”.​—Musuweli 9:7.

15. Entaphulela exeeni ophenta “sopuha”?

¹⁵ Yoolepa ya 2 Timótheyo 3:4 ennaalavula atthu yaale aniphavela opuha paahi, khiyamuliyala Muluku. Nwehe wira eveersu ela khenihimya wira atthu yaarowa osiveliwaka soopuha onvikana Muluku. Okhala wira eyo yaarowa otaphulelaka wira atthu awo yanimphenta Muluku vakhaani. Masi enihimya wira “ómuhiya” Muluku. Musomi mmosa olempe wira “eveersu ela khentaphulela wira awo annimphenta Muluku vakhaani. Eyo entaphulela wira awo khanimphenta Muluku hata vakhaani”. Moolumo ala annaalopola vanceene atthu yaale aniphenta soopuha sa olumwenku ola. Biibiliya onihimya wira atthu aniphenta soopuha ‘annikuxiwa’, aahiiso ohapuxiwa ni opuha.​—Luka 8:14.

16, 17. Ntakiheryo xeeni Yesu ovanhe awe voohimya sa moota oonela awe soopuha?

¹⁶ Yesu oonooniherya yootaphulela ya okhalana moonelo woooka voohimya sa opuha. Owo aahirowela ‘nìra na othela’ ni efesta yaari “yolya yorera”. (Yohani 2:1-10; Luka 5:29) Nuumala-vo, eviinyu yaahimala, nto Yesu aahipaka mwiiriirya, aahitatuxa maasi khukhala eviinyu. Okathi mukina, vaavo atthu akina yaanveeha aya Yesu ehimyaka wira aanilya ni owurya ni atthu, owo aahooniherya saana wira atthu ale yaarina moonelo woohiloka.​—Luka 7:33-36.

 ¹⁷ Yesu khemyale wira soopuha sikhale opuro woopacerya mookumini mwawe. Owo aanimpweha Yehova opuro woopacerya ni aanipaka sotheene saawerya awe wira aakhaliherye atthu akina. Owo aahileva okumi awe ni aahiiviwa mootakhala mwamwirini wira owoopole atthu otheene. Yesu aahaaleela atthu yaamuttthara wira: “Nyuwo munoreriwa mwaruwaniwaka, mwalupatthiwaka ni motheriwaka sotakhala sothene mwaha wa miyo: mutthapeke, mutteliweke murima, okhala wira otthuveliwa wanyu wirimu onokhala wulupale. Tthiri ti siso salupatthiwaya maprofeta a khalayi muhinatthi nyuwo”.—Matheyo 5:11, 12.

18. Makoho xeeni anrowa onikhaliherya ovarerya akhala wira ninniphenta soopuha?

¹⁸ Exeeni enrowa onikhaliherya osuwela akhala wira ninnimphenta vanceene Muluku? Niikoheke so: ‘Niireke kinivaha efaita yuulupale otthekula ovikana mithukumano ni muteko woolaleerya? Kinniphavela oleva ovara itthu sikina wira kimuhakalalihe Muluku? Okathi kinithanla aka matthekulelo, kinnimuupuwela Yehova?’ Mwaha wa omphenta Muluku ni ophavela omuhakalaliha, nihaana osyaka ohiya paahi itthu nisuwenle ahu wira ti soohiloka, masi-tho nnuupuwela ahu wira sinoomunanara Muluku.​—Mmusome Matheyo 22:37, 38.

19. Atthu xeeni ahiniphwanya ohakalala wekeekhai?

¹⁹ Olumwenku wa Satana onnaahaaxa apinaatamu iyaakha sowiiraka 6.000. Mahiku ala ookiserya, anamunceene aniisuupuwela mmansaya paahi, aniphenta musurukhu ni soopuha. Awo anuupuwelela paahi soophavela saya sa mookumini. Masi atthu ntoko awo khaniphwanya ohakalala wekeekhai! Moovirikana, Biibiliya onihimya so: “Òreriwa t’ale anlipa ni Muluku a Yakobe: yale anaroromela Apwiya Muluku aya”.​—Esalimo 146:5.

20. Moota xeeni omphenta wanyu Muluku oniwiiriha ayani ohakalala?

²⁰ Arumeyi a Yehova annimphenta yena ovikana itthu sotheene. Khula eyaakha, atthu anceene akina nave annimusuwela ni omphenta Yehova. Eyo enooniherya wira Omwene wa Muluku onnilamulela, ni moohipisa onookumiherya mareeliho manceene! Vaavo nimmwiiwelela ahu Yehova, ninnimuhakalaliha, nto eyo enniniphwanyiha ohakalala wekeekhai. Atthu animphenta Yehova anoophwanya ohakalala ohinimala! Mwaha onitharelana ninrowa othokorerya mikhalelo sikina soohiloka sinikhumela mwaha wa mutthu wiisuupuwelaka mmansawe paahi. Nave ninrowa oweha moota mikhalelo iyo sivirikanne aya ni mikhalelo sooloka sa arumeyi a Yehova.