1, 2. Moota xeeni Yehova onnooniherya awe wira toovaha?

YEHOVA, ti Muluku oovaha. Itthu sotheene nirina ahu owo tonivanhe. Itthu sotheene sooreera siri valaponi ti sawawe, ni onnirumeela itthu iyo wira okhaliherye okumi wa soopattuxa sawe. (Esalimo 104:13-15; Hagayo 2:8) Biibiliya onnooniherya moota ikwaha sikina Yehova orumenle awe itthu iyo sootthuneya mwa mwiiriirya wira aakhaliherye atthu awe.

² Mwa ntakiheryo, Yehova aahirumeela emana ni maasi wira aakhapelele aIsarayeli okathi yaakhala aya moothakoni mwa iyaakha 40. (Okhuma 16:35) Nto atthu otheene yaanikhalana itthu sotheene saathowa. (Nehemiya 9:20, 21) Okathi mukina, Yehova aahinvaha profeta Eliseyo owerya wa opuhuwiha makhura a naamukhweli mmosa oothoiwa. Yoovaha eyo ya Muluku, yaahimukhaliherya muthiyana ole waaliva otheene yaamulokiha ni ohalana musurukhu mukina wira aikhapeleleke yena ni anaawe. (2 Mamwene 4:1-7) Okhaliheriwaka ni Yehova,  ikwaha sikina Yesu mwa mwiiriirya aanaavaha atthu yoolya wala musurukhu.​—Matheyo 15:35-38; 17:27.

3. Mwaha ola ninrowa othokorerya exeeni?

³ Yehova onoowerya orumeela khula etthu oniphavela awe wira aakhaliherye atthu aapattunxe awe. Nnaamwi vari siiso, owo onnaavekela arumeyi awe wira anvaheke ele arina aya wira akhaliherye muteko onivariwa ni mutthenkeso awe. (Okhuma 36:3-7; musome Miruku 3:9.) Xeeni Yehova oniphavela awe wira nirumeeleke mireerelo sahu nikhaliheryaka muteko awe? Khalai, arumeyi a Yehova yaakhaliherya sai muteko awe? Mutthenkeso wa Yehova onrumeela sai musurukhu onisonkheriwa? Mwaha ola onrowa waakhula makoho ala.

4. Okathi onikhaliherya ahu muteko wa Yehova, hiyo nimmooniherya exeeni?

⁴ Hiyo ninninvaha Yehova mireerelo sahu mwaha woowi ninnimphenta ni omuxukhurela. Okathi onuupuwelela ahu itthu sotheene Yehova onnipakela awe, hiyo ninniphavela omuxukhurela. Mwene Davidi uupuwela siiso vaavo aahimmye awe wira vaanitthuneya otekiwa etemplo. Owo aahimmye wira itthu sotheene nirina ahu sinikhuma wa Yehova ni itthu sotheene sininvaha ahu ti sawawe. Hiyo ninnikupali wira eyo ekeekhai.​—Mmusome 1 Wahala 29:11-14.

5. Biibiliya onooniherya sai wira ovaha oniirela mpantta okokhorela wekeekhai?

⁵ Ninninvaha mireerelo sahu Yehova mwaha woowi eyo enamuna emosa ya omukokhorela. Murummwa Yohani aahiwoona moolohani arumeyi a Yehova wiirimu ahimyaka so: “Pwiy’ahu ni Muluku ahu [Yehova]! Nyuwo mophwanela wakhela ovuwa ni nttittimiho n’uwerya. Tthiri ti nyuwo mpattunxe itthu sothene: mwaha wotthuna wanyu seiyo sinnikhala, khukhalana ekumi”. (Wisupulula 4:11) Okhala wira Yehova onniphwanelela tthiri ovuwa ni nttittimiho notheene, nto hiyo nimphavela onvaha itthu sahu sootthuneya. Yehova aahimuruma Moise waaleela aIsarayeli wira yahaana opaka ifesta tthaaru suulupale khula mwaakha. Etthu emosa yaavekeliwa aya opaka okathi owo, waari onvaha Yehova mireerelo saya. Awo yaahileeliwa wira “ehirowé wattittimiha Apwiya matataru”. (Otumererya 16:16) Nave-tho mahiku ala, ovaha oniirela mpantta okokhorela wahu. Opaka eyo onooniherya wira ninnivaha efaita ni ninniphavela okhaliherya muteko onivariwa ni mutthenkeso wa Yehova.

6. Matakiheryo xeeni anooniherya wira Yehova oniphavela wira nivaheke? (Nwehe elatarato yoopacerya.)

⁶ Ti vooreera ovaha ni murima wotheene, ohiya paahi olipelela ovahiwa. (Musome Miteko 20:35.) Mwa ntakiheryo, mmuupuwele mwaana onivahiwa musurukhu vakhaani ni anamuyari awe, nto khiyahavula vakhaani wira aatthumele etthu anamuyari awe. Anamuyari awe yaarowa woonela sai yoovaha ele? Aahiiso mmuupuwele pioneero mmiravo onikhala ni anamuyari awe, nto onaavaha musurukhu vakhaani anamuyari awe wira aliverye empa anaalugari aya wala athume yoolya. Nnaamwi anamuyari awe ahilipelelaka  wira mwaana owo aavahe etthu, masi awo annaakhela yoovaha awe. Mwaha wa xeeni? Mwaha woowi eyo ti enamuna oonale awe wira aaxukhurele anamuyari awe itthu sotheene animwiirela aya. Vamosaru, Yehova onnoona oreerela hiyo ovaha mireerelo sahu.

7, 8. Ntakiheryo xeeni arummwa a Yehova a khalai avahale aya okathi yaakhaliherya aya (a) muteko mmosa waavariwa? (b) waakhaliherya ale yaahoolela muteko wa Muluku?

⁷ Biibiliya onnihimya wira atthu a Yehova yaanipaka misonkheryo wira ekhaliherye muteko awe. Ikwaha sikina awo yaanivaha wira akhaliherye muteko mmosa waavariwa. Mwa ntakiheryo, Moise aahaatumererya aIsarayeli ovaha mireerelo saya wira akhaliherye otekiwa etabernaakulu. Muhoolo mwaya, mwene Davidi aahipaka etthu emosaru okathi yaatekiwa aya etemplo. (Okhuma 35:5; 1 Wahala 29:5-9) Okathi Yowasi aari awe mwene, anamukuttho yaahilokiherya etemplo arumeelaka musurukhu atthu yaasonkherya aya. (2 Mamwene 12:4-6) Eseekulu yoopacerya, maKristau yaahileeliwa wira yaahikhumelela etala oYudeya, ni wira anna yaanitthuneya okhaliheriwa. Nto maKristau yaahiiwanana khula mutthu osonkhera sintoko vaawerya awe, wira yakhaliheriwe anna awo a oYudeya.​—Miteko 11:27-30.

⁸ Arumeyi a Yehova nave yanaakhaliherya ni musurukhu ale yaahoolela muteko wa Muluku. Mwa ntakiheryo, mwa Nlamulo na Moise, nloko na aLevi khinaavahiwe mathala ookhala ni oolima. Nto aIsarayeli akina yaahaana waavaha aLevi epantte ya namuloko ya mireerelo saya. Eyo yaanaakhaliherya aLevi okhalela nthiti muteko aya otabernaakulu. (Mothakoni 18:21) Vamosaru, athiyana oovahana yaanirumeela itthu yaarina aya wira amukhaliherye Yesu ni arummwa awe.—Luka 8:1-3.

9. Khalai, misonkheryo saakhuma woowi?

⁹ Misonkheryo iyo saakhuma mapuro oovirikana. Itthu sa faita aIsarayeli yaavaha aya wira ekhaliherye otekiwa etabernaakulu, woonasa wene yaaruuhale wEjiitu. (Okhuma 3:21, 22; 35:22-24) Eseekulu yoopacerya, makristau makina yaahitumiha mireerelo saya, ntoko inupa aahiiso imatta, nto musurukhu ene yahaavahererya arummwa. Arummwa yaanirumeela musurukhu owo wira yaakhaliherye anna ni arokora oothoiwa. (Miteko 4:34, 35) MaKristau makina yaanisuka musurukhu aya khula esumana wira asonkherye, aphavelaka okhaliherya muteko woolaleerya. (1 aKorinto 16:2) Tivonto, atthu otheene, athaaciri ni amasikhini, yaniwerya ovaha etthu.​—Luka 21:1-4.

10, 11. (a) Ninrowa waatakiha sai arumeyi a Muluku a khalai yaawo yaari oovaha? (b) Munoonela sai okhaliherya muteko wa Omwene?

¹⁰ Olelo-va, hiyo pooti ovekeliwa misonkheryo wira nikhaliherye muteko mmosa. Woonasa wene muloko anyu pooti ophavelaka olokiherya wala oteka Empa ya Omwene. Aahiiso vanitthuneya olokiheriwa efiliyaali anyu. Nave hiyo pooti okhaliherya oliverya itthu sinitthuneya okongresuni. Wala pooti  otthuneyaka waakhaliherya annihu aphwanyiwe ehasara ya ephattu. Misonkheryo sahu sinnaakhaliherya mamisionaario, mapioneero a vameekhaaya, axitokweene a esirkwiitu, vamosa ni anna anivara muteko obetheli ni oseedi wahu wa olumwenku wotheene. Nave-tho miloko sinniroiha misonkheryo ofiliyaali wira sikhaliherye muteko wooteka Inupa sa Omwene ni sa Asembeleeya ilapo sikina.

¹¹ Otheene ahu nnoowerya ovaha etthu wira nikhaliherye muteko onivariwa ni mutthenkeso wa Yehova mahiku ala ookiserya. Ikwaha sinceene, atthu anivaha misonkheryo iyo khaniisuweliha. Okathi onrihela ahu musuruku mukaaxani mmulokoni mwahu, wala onivaha ahu nirumeelaka esaite ahu jw.org, hiyo khinnaaleela akina musurukhu ovahale ahu. Ikwaha sikina pooti wuupuwelaka wira musurukhu onivaha anyu khoniphiyerya etthu. Masi musuweleke wira misonkheryo sinceene mutthenkeso onaakhela aya sinkhala saamukhani. Ikwaha vakhaani paahi ti nnaakhela ahu musurukhu munceene onivahiwa ekwaha emosaru. Nto hata anna arina musurukhu vakhaani annaatakiha maKristau yaakhala oMacedonia khalai. Anna awo yaari ‘othoiwa’ vanceene, masi yaahixonttela wira yeemereriwe ovaha misonkheryo, nto nuumala weemereriwa, yaahivaha ni murima wotheene.​—2 aKorinto 8:1-4.

12. Muthenkeso wa Yehova onirumeela sai oratteene misonkheryo?

¹² Nikhuuru Noolamulela ninnirumeela misonkheryo mwa miruku. (Matheyo 24:45) Anna a Nikhuuru nlo, anipacerya ovekela ahinatthi othanla moota woorumeela musurukhu owo, ni annimpaka palano ooloka. (Luka 14:28) Khalai, alopwana oororomeleya yaakhapelela misonkheryo, yaanikhalana ephoole wira musurukhu owo orumeeliweke paahi wira okhaliherye muteko wa Yehova. Mwa ntakiheryo, okathi Eezira aahokolowela awe oYerusalemu aahikuxa misonkheryo saavahiwe ni mwene a oPersia, ntoko eweero, eparatha ni itthu sikina, seiyo olelo-va esisapo aya yaarowa ophiyerya imilyau 100 sa idoolare sa wAmerica. Eezira aanisuwela wira misonkheryo iye saari sa Yehova. Tivonto, aahivaha malakiheryo wira mihakhu iye sikhapeleliwe saana, okhala wira saarowa ovirihiwaka iphiro sowoopiha. (Ézira 8:24-34) Iyaakha sinceene muhoolo, murummwa Paulo aahithukumanya musurukhu wira aakhaliherye anna oYudeya. Owo aaphavela wira otheene yaale yaaroromeliwe okawa musurukhu, yahaana ‘ovara orattene muteko aya, khahiyó vamaithoniru va Muluku nave-tho vamaithoni v’atthu’. (Mmusome 2 aKorinto 8:18-21.) Olelo-va, Nikhuuru Noolamulela ninnimutakiha Eezira ni Paulo, mwa enamuna anirumeela aya musurukhu onisonkheriwa.

13. Xeeni mutthenkeso wa Yehova onipaka aya marukunuxo a moota woorumeela musurukhu?

¹³ Woonasa wene, etthoko pooti opaka marukunuxo wira ehihononeke musurukhu munceene ovikana ole anikhalana aya. Aahiiso pooti weererya okhweiherya okumi wira eweryeke okhaliherya vanceene muteko wa Yehova. Nave-tho mutthenkeso wa Yehova onnipaka etthu emosaru. Okhala wira khasireere miteko sintthuneya ovariwa, ikwaha sikina mutthenkeso ahu waanirumeela musurukhu munceene ovikana ole waasonkheriwa. Masi, ntoko siniiraneya aya vatthokoni, mutthenkeso ahu onniphavelasa inamuna sa orumeela saana musurukhu ni okhweiherya muteko, wira misonkheryo sinivaha anyu sirumeeliweke saana.

14-16. (a) Misonkheryo sanyu sinirumeeliwa sai? (b) Mireerelo xeeni munoona anyu mwaha wa miteko iyo sa oteka?

¹⁴ Olelo-va, atthu anceene animurumeela Yehova okhuma khalai anihimya wira vano mutthenkeso wa Yehova onnaavaha itthu sinceene ovikana khalai. Noovahiwa jw.org ni JW Broadcasting. Mattaava manceene aakhalana Tradução do Novo Mundo da Bíblia Sagrada. Mwaakha wa 2014/2015, muthukumano muulupale wa mahiku mararu waarina muru oni “Mpaceryeke Ophavela Omwene wa Muluku!”, waahipakiwa mapuro maalupale aniphiyerya 14, olumwenku wotheene. Otheene yaari mapuro awo yaahihakalala vanceene!

¹⁵ Atthu anceene annihimya oxukhurela waya itthu anivahiwa aya ni mutthekeso wa Yehova. Mwa ntakiheryo, anamathelana amosa anirumeela wAsia yaalempe so: “Hiyo ninlaleerya epooma yaamukhaani. Nto ikwaha sikina onniniphwanya omeekha, khiyaliyala munnuwelo wa muteko wa Yehova. Masi nuumala oweha iprograma soovirikana sa JW Broadcasting, ninnuupuwela wira mutthenkeso ahu ti wa olumwenku wotheene ni nookhalana anna ilapo sinceene. Anna a epooma eri ahu annisiveliwa vanceene onweha JW Broadcasting. Ikwaha sinceene awo annihimya wira nuumala oweha eprograma ya mweeri, annitepa okhala vakhiviru ni anna a Nikhuuru Noolamulela. Vano annitepa osiveliwa wiirela mpantta mutthenkeso wa Muluku”.

¹⁶ Mpakha okathi ola, olumwenku wotheene, sinnitekiwa wala olokiheriwa Inupa sa Omwene siniphiyerya 2.500. Anna a muloko mmosa wa Honduras anihimya wira okhuma khalai yaahinlela okhalana Empa ya Omwene, masi vano eyo ehiiraneya. Awo alempe so: “Ninnihakalala vanceene wiirela mpantta mutthekeso wa Yehova ni okhalana annihu ni arokora olumwenku wotheene”. Anamunceene anoonela siiso okathi onimwaakhela aya Biibiliya wala iliivuru sikina sa nttaava naya, okathi anikhaliheriwa aya nuumala  wiiraneya ehasara aahiiso vaavo aniweha aya mireerelo sinikhumelela mwaha wa muteko woolaleerya onivariwa muttetthe aya sirumeeliwaka ikarinyu.

17. Ninsuwela sai wira Yehova onnikhaliherya mutthenkeso awe olelo-va?

¹⁷ Atthu anceene ahikhanle Anamoona a Yehova annitikinihiwa moota oniwerya ahu ovara miteko iyo sotheene nirumeelaka misonkheryo paahi. Xeefi a emperesa emosa aahirwa oweha maakina ahu animpirimiri iliivuru sahu. Owo aahitikinihiwa oweha muteko onivariwa ni atthu oowiivahererya, moota ninrumeela ahu saana misonkheryo sahu, ni ohipaka etthu niphavelaka ophwanya musurukhu. Owo aahimmye wira etthu nimpaka ahu kheniweryaneya. Ni hiyo ninnikupali eyo, maana vahaakhanle wira Yehova tonnikhaliherya, khinaarowa owerya.​—Yobi 42:2.

18. (a) Mareeliho xeeni anaakhela ahu vaavo ninvaha ahu mireerelo sahu wira nikhaliherye Omwene? (b) Ninrowa owiixuttiha sai ovaha aniihu ni ale apacenrye ninaano othukumana ni hiyo?

¹⁸ Yehova onninivaha eparakha ya okhaliherya muteko awe muulupale. Owo onninlipiherya wira namukhaliherya, yena onrowa onivaha mareeliho. (Malakhiya 3:10) Yehova onihimya wira naavahaka ni murima wotheene, owo onrowa onireeliha. (Musome Miruku 11:24, 25.) Nave-tho onnihimeerya wira nnootepa ohakalala akhala wira ninvaha ni murima wotheene, mwaha woowi ‘mulipa-òvaha onnireriwa onvikana mulipa-òvahiwa’. (Miteko 20:35) Moolumo ahu ni miteko sahu pooti waakhaliherya aniihu wala ale apacenrye ninaano othukumana ni hiyo, ophavela okhaliherya muteko ola avahaka itthu arina aya, wira yaakhele mareeliho manceene.

19. Mwaha ola wookhalihenryeni sai?

¹⁹ Itthu sotheene nirina ahu sinikhuma wa Yehova. Nto okathi oninvaha ahu, nnooniherya wira ninnimphenta ni omuxukhurela mwaha wa itthu sotheene onniirela awe. (1 Wahala 29:17) Okathi aIsarayeli yaavaha aya mireerelo saya wira akhaliherye otekiwa etemplo, awo “yahitteliwa murima vancene mwaha wa murerel’ola: tthiri yahavaha sothene Apwiya ni murima worera”. (1 Wahala 29:9) Ni hiyo-tho nihakalaleke vaavo vaninvaha ahu Yehova itthu onnivaha awe.