1. Xeeni ninhimya ahu wira itthu sotheene ti sa Yehova? (Nwehe efootu yoopacerya.)

ITTHU sotheene ti sa Yehova! Owo “ti mwanene wirimu worekamexa, ni ti mwanene vathí-va n’itthu sothene sinkhala-vo”. (Otumererya 10:14; Wisupulula 4:11) Nave, okhala wira taapattunxe apinaatamu, otheene ahu na atthu awe. (Esalimo 100:3) Okhuma khalai, Muluku onnaathanla atthu wira akhale awawe.

2. Moovarihana ni Biibiliya, tani ari atthu a Yehova mwa enamuna ya vameekhaaya?

² Mwa ntakiheryo, Esalimo 135 ennaahimya aIsarayeli okhala ‘awawe’, maana yaanimukokhorela Yehova moororomeleya. (Esalimo 135:4) Nave, Hoseya aahihimya vahinatthi wira atthu akina yahaakhanle aIsarayeli, yaamukhala atthu a Yehova. (Hoseya 2:25) Eprofesia ela yaahiiraneya okathi Yehova aapacenrye awe waathanla atthu yahaakhanle aIsarayeli wira yalamuleleke ni Kristu wiirimu. (Miteko 10:45;  aRoma 9:23-26) Atthu awo oothanliwa ni munepa wootteela aniihaniwa “nloko n’atthu òwarya”. Nave awo “nloko n’atthu a Muluku”. (1 Pedru 2:9, 10) Ankhi maKristau oororomeleya arina nlipelelo na okhalaka mahiku otheene valaponi? Nave Yehova onnaahimya okhala “atthu aka” oothanliwa.​—Yesaya 65:22.

3. (a) Olelo-va, tani arina wataana wa vameekhaaya ni Yehova? (b) Mwaha ola, ninrowa othokorerya exeeni?

³ Olelo-va, “nikoto namukhani” nenno nrina nlipelelo na orowa okhalaka wiirimu ni “ipwittipwitthi sikina” sirina nlipelelo na okhalaka mahiku otheene valaponi, annimukokhorela Yehova ntoko “nikoto nimosa”. (Luka 12:32; Yohani 10:16) Tthiri nihaana omooniherya Yehova wira ninnimuxukhurela mwaha wa okhalana wataana wa vameekhaaya ni yena. Mwaha ola, ninrowa othokorerya moota woomuxukhurela Yehova mwaha woonivaha eparakha eyo.

4. Ninrowa omuxukhurela sai Yehova mwaha woonivaha eparakha ya okhalana wataana wa vameekhaaya ni yena? Yesu aapanke sai etthu emosa-ru?

⁴ Vaavo nniivahererya ahu wa Yehova ni obatiziwa, ninnooniherya wira ninnimuxukhuru Yehova. Nto otheene annisuwela wira na atthu a Yehova ni nimphavela omwiiwelelaka ni murima ahu wotheene. (aHéberi 12:9) Yesu aahipaka etthu emosa-ru okathi aabatiziwe awe. Nnaamwi aari a nloko noothanliwa, Yesu aahiivahererya wa Yehova. Tthiri vaakhala ntoko wira Yesu aahimya so: “Apwiya! Miyo kiri va! Kirwenle wira sintthunanyu”.​—Esalimo 40:8, 9.

5, 6. (a) Yehova aahimmye exeeni vaavo Yesu aabatiziwe awe? (b) Nlikanyiho xeeni ninnikhaliherya osuwela moonelo wa Yehova vaavo nniivahererya ahu?

⁵ Yehova oonenle sai vaavo Yesu aabatiziwe awe? Biibiliya onihimya wira: “Amalakaru obatiziwa, Yesu ahikhuma mmàsini. Okathi ene yowo, wirimu wahitthukuwa: Yesu ahona eroho [munepa] ya Muluku ekhuruwaka ntoko epomba, emurwelaka yowo. Vano nsu nikhumaka wirimu nahihimya wira: Ola mwan’aka onimphentexaka: miyo kosiveliwa ni yowo”. (Matheyo 3:16, 17) Okhala wene Yesu aari mutthu a Muluku. Nto Yehova aahisiveliwa omoona Yesu ovahereryaka okumi awe wira opakeke yootthuna ya Yehova. Nave Yehova onnihakalala vaavo nniivahererya ahu ni onrowa onireeliha.​—Esalimo 149:4.

⁶ Okhala wira itthu sotheene ti sa Yehova, exeeni ekhanle ahu onvaha? Nkahaya mmuupuwele mulopwana orina ematta awe ya nakhuwo. Vano, nihiku nimosa mwanawe mwaamuthiyana onnimunta nakhuwo khumooxa onanvaha paapa awe. Nnaamwi nakhuwo owo olimmwale ene ni paapa awe, paapa owo onnisiveliwa mwaha woovahiwa nakhuwo owo. Maana enooniherya wira onniphentiwa ni mwanawe. Tthiri nakhuwo ovahiwa awe ni mwanawe, tootepa otthuneya onvikana nakhuwo otheene ori mmatta mwawe. Moolikanasa, Yehova onnisiveliwa vaavo nniivahererya ahu wa yena ni murima wotheene.​—Okhuma 34:14.

7. Malakhiya onnikhaliherya sai osuwela moota Yehova oniwoonela awe atthu animurumeela ni murima wotheene?

⁷ Mmusome Malakhiya 3:16. Xeeni vari aya vootthuneya wiivahererya wa Yehova  ni obatiziwa? Ekeekhai wira okhuma okathi muyariwe anyu, mwa mutthu a Mpattuxa anyu, Yehova. Masi, nkahaya muupuwele moota Yehova onihakalala awe vaavo munimuthanla anyu okhala Namalamulela anyu ni muniivahererya anyu wa yena! (Miruku 23:15) Yehova onnaasuwela ale animurumeela ni murima wotheene ni onnilepa masina aya “mulivuruni” mwawe.

8, 9. Yehova onaavekela exeeni atthu ale masina aya olempe awe “mulivuruni” mwawe?

⁸ Naaphavelaka wira masina ahu alempwe “mulivuruni” mwa Yehova, yookhala etthu enitthuneya ahu opaka. Malakhiya ohimmye wira nihaana omuttittimiha Yehova ni wuupuwelela nsina nawe. Nto akhala wira nimmukokhorela mutthu aahiiso etthu, nsina nahu nnoottipihiwa muliivuruni mwa Yehova!—Okhuma 32:33; Esalimo 69:29.

⁹ Tivonto, khivaniphiyerya paahi omuleiherya Yehova wira ninrowa opakaka yootthuna awe ni obatiziwa. Iyo itthu nimpaka ahu ekwaha emosa paahi, masi nihaana omukokhorela Yehova okumi ahu wotheene. Nto khula nihiku nihaana wooniherya ni miteko sahu wira ninnimwiiwelela Yehova.​—1 Pedru 4:1, 2.

10. Ovirikana xeeni onrowa wooneya eriyari ya ale animurumeela Muluku ni ahinimurumeela?

¹⁰ Mwaha ovinre, nihiixutta wira Kayini, Salomoni ni aIsarayeli yaihimya wira yaanimukokhorela Yehova, masi khiyaaroromeleya wa yena. Matakiheryo ala anniniixuttiha wira khivaniphiyerya ohimya paahi wira ninnimukokhorela Yehova. Masi nihaana onyokha itthu soohiloka ni ophenta itthu sooloka. (aRoma 12:9) Yehova ohimmye wira onimooneya ovirikana wa “anaxariya, yawo animurumela Muluku, . . . [ni] alipa-òtakhala ahinimurumela”.​—Malakhiya 3:18.

11. Ninrowa waakhaliherya sai atthu woona wira nimmukokhorela Yehova paahi?

¹¹ Ninnimuxukhurela Yehova mwaha woonithanla wira nikhale atthu awe! Eyo ennaakhaliherya atthu otheene woona wira nri mpantta wa Yehova. (Matheyo 5:16; 1 Timótheyo 4:15) Nto niikoheke so: ‘Niireke atthu akina annoona wira kinniroromeleya wa Yehova ni murima wotheene? Kinnisiveliwa waaleela atthu akina wira ka Namoona a Yehova?’ Nkahaya muupuwele moota Yehova onrowa awe woonela akhala wira ninnuuliwa muru ohimya wira na atthu awe.​—Esalimo 119:46; mmusome Marko 8:38.

12, 13. Itthu xeeni siniwiiriha atthu akina ohaasuwela saana ale ari Anamoona a Yehova?

¹² Mooriipiha murima, Anamoona akina annitakiha munepa “w’olumwenku” ola. Nto eyo enniwiiriha ohivirikana ni atthu ahinimukokhorela Yehova. (1 aKorinto 2:12) Munepa “w’olumwenku” onniwiiriha atthu ophavela wiihakalaliha paahi.  (aÉfeso 2:3) Mwa ntakiheryo, hata naakhelaka malakiheryo, atthu akina khaniwara saana. Maana awo aniwara ikuwo sootita, sowooneela nnaamwi arowaka omuthukumanoni. Aahiiso anniwara yaatakihaka atthu a olumwenku ola. (1 Timótheyo 2:9, 10) Nto eyo, enniwiiriha akina ohisuwela akhala wira Anamoona a Yehova aahiiso nnaari.​—Yakobo 4:4.

¹³ Nave sookhala inamuna sikina, Anamoona akina anitakiha aya olumwenku ola. Mwa ntakiheryo, okathi wa ifesta, Anamoona akina anniina mwa enamuna muKristau ohineemereriwa awe. Anamoona akina annihela ifootu saya ni annilepa munternetini moolumo anooniherya soophavela sa werutthuni. Woonasa wene, anna awo khanapake etampi yuulupale, hata vari siiso, awo pooti waahapuxa anna ni arokora aniimananiha okhala oovirikana ni atthu a olumwenku ola.​—Mmusome 1 Pedru 2:11, 12.

14. Exeeni ekhanle ahu oopaka wira nikhapelele wataana wahu ni Yehova?

¹⁴ Olumwenku wa Satana, woopaka itthu sinceene sikhanle ooniiriha “ophavela itthu sonanara, ophavela okhalana sothene sinònahu, ororomela ni wisona mwaha wa mihakhu sirinahu”. (1 Yohani 2:16) Okhala wira na atthu a Yehova, nihaana ovirikana ni olumwenku. Nto nihaana “okhotta makhalelo ahu òtakhala n’uhiya itthu sintthunexiwa vathí-va, wira mahiku othene netteke ni wisumaliha n’ixariya n’omuttittimiha Muluku”. (Tito 2:12) Okumi ahu wotheene, ohela muhina ilavulelo sahu, olya, owurya, owara ni muteko onivara ahu, ohaana wooniherya wira na atthu a Yehova.​—Mmusome 1 aKorinto 10:31, 32.

15. Xeeni nintthuneya ahu waareerela murima ni waaphenta anna ni arokora?

¹⁵ Enamuna nnaathokorerya ahu anna ni arokora, enimooniherya wira ninnixukhurela wataana nrina ahu ni Yehova. Awo atthu a Yehova ntoko hiyo. Akhala wira ninnuupuwela eyo, enoonikhaliherya waareerela murima ni waaphenta. (1 aTesalonika 5:15) Xeeni opaka eyo eri aya yootthuneya? Yesu aahaaleela atthareli awe wira: “Atthu othene anosuwela wira mwá awixutti aka, mwaphentanaka mukina ni mukhw’awe”.​—Yohani 13:35.

16. Nlamulo na Moise ninniixuttiha exeeni sa moota Yehova onaaphenta awe atthu awe?

¹⁶ Ntakiheryo nimosa na Nlamulo na Moise, nnoonikhaliherya osuwela moota wowaathokorerya saana anna a mmulokoni. Mutemplo, saahikhala iferemento saarumeeliwa paahi okathi aakokhoreliwa awe Yehova. Nlamulo naanihimya moowiiwanyeya moota aLevi yaatthuneya aya okhapelelaka iferemento iyo, nto ole ahaatthara Nlamulo nle aahaana wiiviwa. (Mothakoni 1:50, 51) Akhala wira Yehova aanivaha efaita yinceene iferemento saarumeeliwa wira okokhoreliweke, owo onnitepa waavaha efaita ale yiivaherenrye, yaawo animukokhorela moororomeleya! Yehova onninsuweliha wira nookhalana efaita vaavo onihimya awe wira: “Ale anahaxa atthu aka, annikiveha yomi ene”.​—Zakariya 2:13.

17. Tani Yehova ‘onawiriyana’ awe yaavekelaka?

¹⁷ Malakhiya ohimmye wira Yehova ‘onnawiriyana, khwiwa anihimyaya’ atthu awe ni moota anaathokorerya aya atthu akina. (Malakhiya 3:16) Tthiri “Apwiya [Yehova] annasuwela atthu ari awaya”.  (2 Timótheyo 2:19) Nave onnisuwela khula etthu enipaka ahu ni enihimya ahu. (aHéberi 4:13) Nto vaavo nihinaareerela ahu murima anna ni arokora, Yehova onnisuwela. Masi nisuweleke wira Yehova onnoona vaavo nnaavaha ahu, owaakhela, waalevelela ni waareerela murima anna ni arokora.​—aHéberi 13:16; 1 Pedru 4:8, 9.

18. Ninrowa omuxukhurela sai Yehova mwaha woonithanla okhala atthu awe?

¹⁸ Nimphavela omooniherya Yehova wira ninnimuxukhurela mwaha wookhala atthu awe. Nave noosuwela wira vaavo naivaherenrye ahu wa yena, naahipaka yoothanla ya miruku. Hata nikhalaka “eriyari y’atthu òtakhala murima ni òhononeya”, ninnivikaniha okhala “òrera murima ni òhittheka” naaryaka “ntoko mithuko sa mulaponi”. (aFilipi 2:15) Tivonto noolakela ohipaka khula etthu Yehova oninyokha awe. (Yakobo 4:7) Nave-tho, ninnaaphenta ni waattittimiha anna ni arokora okhala wira awo atthu a Yehova.​—aRoma 12:10.

19. Yehova onaatthuvela sai atthu awe?

¹⁹ Biibiliya onileiherya so: “Nyuwo [Yehova] khamunanyanyala atthu anyu”. (Esalimo 94:14) Tthiri eyo enninlipiha. Moohicikha etthu enrowa onikhumelela, Yehova onookhala ni hiyo. Nto hata nikhwaaka, Yehova khonrowa oniliyala. (aRoma 8:38, 39) Tivonto “nakhalaka akumi, nnakhalela Apwiya: nakhwaka, nnakhwela Apwiya. Siso, nakhalaka akumi walá nakhwá, hiyo n’àtthu Àpwiya”. (aRoma 14:8) Tthiri ninnilipelela okathi Yehova onrowa awe waahihimuxa apatthani awe akhwiiye. (Matheyo 22:32) Nave olelo-va, ninniphwanya itthu soohakalaliha sa Tiithi ihu, ntoko Biibiliya onihimya awe oriki: “Noreriwa nloko Muluku aya akhanle Apwiya [Yehova]: nenlo Muluku nìthanlenlyawe okhala nawawe”.​—Esalimo 33:12.