1, 2. Ontaphulela exeeni onwehexexa Yehova?

NINKHALA “mahiku òxanka” ni oovila okhala. (2 Timótheyo 3:1) Nave itthu sinrowa otepaka oxankiha mpakha nihiku Yehova onrowa awe opwetexa olumwenku ola wootakhala ni oruuha murettele wekeekhai valaponi. Tivonto, nihaana wiikoha so: ‘Ti pani oninvekela aka nikhaliheryo ni malakiheryo?’ Vakhala wira munaakhula wira “Ti Yehova”, vaareera.

² Ontaphulela exeeni onwehexexa Yehova? Ninrowa osuwela sai wira ninnivikaniha onwehexexa Yehova vaavo ninkumana ahu mixankiho? Khalai, namalepa mmosa a Biibiliya aatthokihenrye wira ti vootthuneya onwehexexa Yehova, niire so, onvekela nikhaliheryo. (Musome Esalimo 123:1-4.) Owo ohimmye wira vaavo nninwehexexa ahu Yehova, ninlikana ni murumeyi oninwehexexa pwiyawe. Moota xeeni? Murumeyi onnimuroromela pwiyawe wira ovahiwe yoolya ni okhapeleliwa. Nave onninwehexexa wira osuwele ele enivekeliwa  awe ni pwiyawe ni opaka etthu eyo. Moolikanasa, nihaana osoma khula nihiku Nuulumo na Muluku, wira nisuwele ele Yehova oniphavela awe wira nipakeke. Nto nikupaliki wira Yehova onrowa onikhaliherya okathi oninvekela ahu nikhaliheryo.​—aÉfeso 5:17.

3. Exeeni ekhanle ooniiriha ohiya onwehexexa Yehova?

³ Nnaamwi nisuwelaka wira okathi wotheene nihaana onwehexexa Yehova, ikwaha sikina ninniliyala opaka eyo. Eyo ti etthu yiiraneyale ni mpatthani awe Yesu iihaniwa Martha. Maana Martha khaareere ‘okhummwa murima, [ni] ahivelavela n’itthu sinjene’. (Luka 10:40-42) Akhala wira Martha yoowo aari oororomeleya aahipaka eyo ohoolo wa Yesu, enooniherya wira nave pooti oniiraneela. Exeeni ekhanle ooniiriha ohiya onwehexexa Yehova? Mwaha ola, ninrowa othokorerya moota soovonya sa atthu akina sikhanle aya oonihiiha onwehexexa Yehova. Nave ninrowa wiixutta moota woovikaniha onwehexexa Yehova.

4. Xeeni nintikhina ahu osuwela wira Moise aahiyeleela eparakha ya okela Elapo Yooleiheriwa?

⁴ Moise aamakela onwehexexa Yehova maana aaphavela ovahiwa malakiheryo. Biibiliya onihimya wira Moise “ahilipiha murim’awe, ntoko amona Muluku ohinòneya”. (Mmusome aHéberi 11:24-27.) Nave onihimya wira “eriyari y’atthu a Isarayeli, khanakhumelele-tho profeta mukina onlikana ni Moise. Owo àsuwenle Apwiya ekhove n’ikhove”. (Otumererya 34:10) Nnaamwi Moise aarina wataana wooloka ni Yehova, owo aahiyeleela eparakha ya okela Elapo Yooleiheriwa. (Mothakoni 20:12) Exeeni yiiraneyale?

5-7. Exeeni yaakhumelenle moohipisa nuumala aIsarayeli okhuma wEjiitu? Moise aapanke exeeni?

⁵ Sihinatthi ovira myeeri miili, nuumala aIsarayeli okhuma wEjiitu ni ahinatthi ophiya Mwaako Sinayi, yaahikhumelela etthu emosa. Atthu ale yaahipacerya wiixinliha mwaha woohikhala maasi. Nto yaahipacerya omwaapa Moise, vano onanariwe ene, “Moise ahikhuwelela w’Apwiya, iraka: Kintthuna owìriha exeni atthu ala? Ahalanse vakhani okivonyakasa maluku, ekìve”. (Okhuma 17:4) Yehova aahinvaha Moise malakiheryo oowiiwanyeya. Nto aahimuleela Moise wira omukuxe ttootto awe wira amane mwala wa Horebi. Biibiliya onihimya so: “Moise ahira siso, makhulupale a Isarayeli emònaka”. Vano yaahikhuma maasi manceene, nto muxankiho ole waahimala.​—Okhuma 17:5, 6.

⁶ Biibiliya onihimya wira Moise aahivaha opuro ole nsina na Masa, nintaphulela “Otharamula” ni Meriba, nintaphulela ‘Ovanyiha’. Nthowa xeeni? Nthowa noowi “atthu a Isarayeli yahavanya Apwiya, khwatharamula, ehimyaka wira: ‘Apwiya ari ni hiyo, walá khàkhanle ni hiyo?’”—Okhuma 17:7.

⁷ Yehova oonenle sai ele yaakhumelenle oMeriba? Yehova aahoona wira aIsarayeli yaahimurukunuwela yena ni okhulupale awe ohiya Moise. (Musome Esalimo 95:8, 9.) Tthiri etthu aIsarayeli yaapanke aya yaari yoohiloka. Masi, Moise aahipaka etthu yooloka. Owo aahinwehexexa Yehova ni aahitthara malakiheryo awe.

8. Exeeni yaakhumelenle aIsarayeli ahalaka omaliha mukwaha ole yeetta aya moothakoni?

 ⁸ Nuuvira iyaakha 40, yaahiiraneya etthu ntoko ele yaakhumelenle oHorebi. AIsarayeli yaahanle vakhaani omaliha mukwaha ole yeetta aya moothakoni. Awo yaahiphiya nipuro niihaniwa Kadexi, waattamela Elapo Yooleiheriwa. Opuro ole waanisuweliwa-tho okhala Meriba. * (Nwehe enoota.) Nthowa xeeni? Nthowa noowi aIsarayeli yaahiixinliha-tho mwaha woohikhala maasi. (Mothakoni 20:1-5) Masi opuro ole, Moise aahipaka yoovonya yuulupale.

9. Malakiheryo xeeni Yehova anvanhe awe Moise? Moise aapanke exeeni? (Nwehe elatarato yoopacerya.)

⁹ Exeeni Moise aapanke awe nuumala aIsarayeli ommwareela? Moise aahitthikela onwehexexa Yehova wira ovahiwe malakiheryo. Okathi ole Yehova khaamulenle Moise omana mwala. Masi Yehova aamulenle Moise wira omukuxe ttootto awe ni aathukumanye atthu waattamela mwala ni olavulihe mwala owo ohoolo wa atthu ale. (Mothakoni 20:6-8) Niireke Moise aahitthara malakiheryo ale? Nnaari. Moise aahinanariwa vanceene, khokhuwela oriki: “Nyuwo atthu ohìwelela, nwiriyane. Hiyo nnowerya ophutula màsi vamwala vava?” Nuumala-vo, Moise aahimana mwala ole ikwaha piili.​—Mothakoni 20:10, 11.

10. Yehova oonenle sai ele Moise aapanke awe?

¹⁰ Yehova aahinviruwela Moise. (Otumererya 1:37; 3:26) Xeeni Yehova ohalaka onviruwela? Nthowa nimosa, okhala wira Moise khaatthanre malakiheryo ale masya aavahiwe awe ni Yehova.

11. Mwaha woomana mwala ole, niireke Moise khaawiirinhe aIsarayeli woona wira Yehova khahiyo taapanke mwiiriirya ole?

¹¹ Vanikhala wira naahikhala nthowa nikina naamwiirinhe Yehova onanariwa. Mwala a Meriba oopacerya, waari wa nluku noolipa nniihaniwa granito. Hata mutthu omananihaka khivaniweryaneya opwexa mwala ole wira ophwanye maasi. Mwala a Meriba a nenli, waari woovirikana ni woopacerya. Maana Meriba ola a nenli, mwala aya waari wa nluku nniihaniwa calcário. Okhala wira maluku aniihaniwa calcário toohilipa, vanniweryaneya ophwanya maasi mutthu ohiimananihale vanceene. Atthu akina yaahithipa ihime mwala ole. Niireke mwaha wa Moise ohilavuliha mwala ole, khaawiirinhe aIsarayeli woona wira masi ale yaakhumme mahala ene, voohikhala wira Yehova taapanke mwiiriirya ole? * (Nwehe enoota.) Hiyo khaninsuwela oratteene.

12. Nthowa xeeni nikina naamwiirinhe Yehova onviruwela Moise ni Aroni?

¹² Woonasa wene, nookhala nthowa nikina naamwiirinhe Yehova onviruwela Moise ni Aroni. Moise aalenle so atthu ale: “Hiyo nnowerya ophutula màsi vamwala vava?” Vaavo Moise aahimmye awe wira “hiyo”, pooti wira aihimya owo ni Aroni. Mwaha woohimya eyo, Moise aahooniherya wira khaamuttittiminhe Yehova yoowo aaphwanela ovuwihiwa mwaha wa mwiiriirya ole. Esalimo 106:32, 33, enihimya so: “Atthu awo yahinviruxa Muluku okherekhere wa màsi òMeriba: Moise ahihukhummwa mwaha wa sottheka saya. Tthiri awo yahimunyonyiha Moise: owo khulavula ahupuwenle orattene”. * (Nwehe enoota.) (Mothakoni 27:14) Tthiri Moise khanvanhe Yehova ovuwa aaphwanela awe. Yehova aahimuleela Moise ni Aroni wira: “Nyuwo khamwiwelenle soruma saka”. (Mothakoni 20:24) Mwekeekhai eyo yaari etampi yuulupale!

13. Xeeni vaari aya va xariya ni vookhalela Yehova omuhukhumu Moise?

¹³ Yehova aaphavela wira Moise ni Aroni apaceryeke omwiiwelela okhala wira yaari ahooleli a atthu Awe. (Luka 12:48) Khalai, atthu otheene a nloko na Isarayeli yaarina iyaakha 20 orowa ohoolo, Yehova khaaweemerenrye okela Elapo Yooleiheriwa mwaha woowi khiyaamwiiwelenle. (Mothakoni 14:26-30, 34) Tivonto vaari va xariya ni vookhalela, Yehova omuhukhumu Moise mwaha wa ohimwiiwelela. Ntoko atthu ale yahaamwiiwelenle Yehova, Moise kheemereriwe okela Elapo Yooleiheriwa.

14, 15. Exeeni yaamwiirinhe Moise ohimwiiwelela Yehova?

¹⁴ Exeeni yaamwiirinhe Moise ohimwiiwelela Yehova? Nwehe-tho ele enihimya aya Esalimo 106:32, 33, eriki: “Atthu awo yahinviruxa Muluku okherekhere wa màsi òMeriba: Moise ahihukhummwa mwaha wa sottheka saya. Tthiri awo yahimunyonyiha Moise: owo khulavula ahupuwenle orattene”. Okhala wira aIsarayeli yaahimmwareela Yehova, eyo yaahimwiiriha Moise onyoonyiheya aahiiso onanariwa. Vano Moise khaikasoopale, nto aahilavula ohuupuwenle ele yaarowa okhumelela.

¹⁵ Moise aahihiya onwehexexa Yehova mwaha woowi aaheemererya ohapuxiwa ni soovonya sa atthu akina. Ekwaha yoopacerya atthu ale yaixinlinha aya mwaha wa maasi, Moise aahipaka etthu yooloka. (Okhuma 7:6) Waaniheryasa, Moise aahikhulumuwa ni onyoonyiheya mwaha woowi aIsarayeli yaamakela ohimwiiwelela Yehova. Pooti wira Moise uupuwela paahi onyoonyiheya wawe ohiya ophavela onvuwiha Yehova.

16. Ele Moise aapanke awe, enooniherya exeeni?

¹⁶ Akhala wira profeta oororomeleya ntoko  Moise aahinyoonyiheya mpakha ottheka, eyo pooti oniiraneela. Moise aahanle vakhaani okela Elapo Yooleiheriwa, nave hiyo nihanle vakhaani okela elapo esya. (2 Pedru 3:13) Tthiri khanimphavela oyeleela eparakha ela ya vameekhaaya. Masi wira nikele elapo esya, nihaana ovikaniha onwehexexa Yehova ni omwiiwelela okathi wotheene. (1 Yohani 2:17) Yoovonya ya Moise enniixuttiha exeeni?

17. Ninrowa wiikasoopa sai okathi atthu akina anninyoonyiha aya?

¹⁷ Muhihiye wiikasoopa mwanyoonyiheya vale. Okathi mukina sinninikhumelela mixankiho. Masi Biibiliya onihimya wira: “Nihikhulumuweleké ovara miteko sorera: okhala wira nahojeyeru, nnohepha okathi aya”. (aGalasia 6:9; 2 aTesalonika 3:13) Akhala wira mutthu onimakela oninyoonyiha, niireke ninnuupuwela nihinatthi olavula? Niireke ninnikasoopa onyoonyiheya wahu? (Miruku 10:19; 17:27; Matheyo 5:22) Vaavo atthu akina anninyoonyiha aya, nihaana wiixutta ‘ohiwunlelá ikuhu’ atthu awo, masi nimuhiyeke Yehova wira owunlele ikuhu. (Mmusome aRoma 12:17-21.) Eyo entaphulela exeeni? Entaphulela wira, hata ninanariwe ene, moopixa murima nihaana omulipelela Yehova ophuka mwaha owo okathi onoona awe oreerela. Akhala wira nimphavela  wunla ikuhu ohiya onwehexexa Yehova, eyo yaarowa wooniherya wira khannimuttittimiha.

18. Nuupuweleke exeeni voohimya sa otthara malakiheryo a niinaano?

¹⁸ Mmananihe otthara malakiheryo a niinaano. Niireke ninnitthara malakiheryo a niinaano ninvahiwa ahu ni Yehova? Nihimakeleke opaka itthu ntoko naalimalenle ahu khalai. Ohiya-vo, nihaana waakuvela otthara malakiheryo a niinaano Yehova onnivaha awe orumeelaka mutthenkeso awe. (aHéberi 13:17) Nave nihaana okhalana ephoole wira ‘nihipwahe mikano’ sa itthu silempwale. (1 aKorinto 4:6) Vaavo nintthara ahu malakiheryo, ninnooniherya wira ninninwehexexa Yehova.

19. Ninrowa osyaka sai ohiya soovonya sa akina sihononaka wataana wahu ni Yehova?

¹⁹ Muheemererye soovonya sa akina sihononaka wataana wanyu ni Yehova. Akhala wira ninnivikaniha onwehexexa Yehova, eyo enoonikhaliherya ohihonona wataana wahu wooloka ni Yehova aahiiso onyoonyiheya mwaha wa soovonya sa atthu akina. Eyo etthu yootepa otthuneya akhala wira nookhalana miritti mmutthenkesoni mwa Yehova, ntoko Moise. Tthiri otheene ahu nihaana wiimananiha omwiiwelela Yehova wira noopowe. (aFilipi 2:12) Yehova oniphavela wira navahiwa miritti sinceene, nivaheke ntakiheryo nooloka. (Luka 12:48) Nto, akhala wira ninnimphenta Yehova, khiivo etthu enrowa onikhumuliha aahiiso onivalaanya ni ophenta wa Yehova.​—Esalimo 119:165; aRoma 8:37-39.

20. Exeeni mulakenle anyu opaka?

²⁰ Ninkhala okathi wooxankiha. Tivonto, ori aya wootthuneya ovikaniha onwehexexa Yehova ‘onkhala wirimu’, wira nisuwele ele onnivekela awe opaka. Nihikhala-khale neemereryaka soovonya sa atthu akina sihononaka wataana wahu ni Yehova. Yowiiraneya ya Moise enniniixuttiha etthu yuulupale. Ohiya otepiha myaha vaavo akina annitthekela aya, nihaana wiimananiha ‘walipelela Apwiya Muluku ahu niwehereryaka onimorela ikharari’.​—Esalimo 123:1, 2.