1. Exeeni otheene ahu nimphavela ahu?

MWAAROWA woonela sai vaakhanle wira mutthu onimusuwela anyu ni omuttittimiha ooliyala nsina nanyu ni khoniwuupuwelani? Eyo pooti wira yaamookhulumulani. Mwaha wa xeeni? Mwaha woowi otheene ahu ninniphavela osuweliwa ni atthu akina. Nnaamwi vari siiso, atthu awo ahaana opaka etthu ekina ohiya onisuwela paahi. Maana nimphavela wira asuweleke omutthu ahu ni ele enivara ahu.​—Mothakoni 11:16; Yobi 31:6.

2, 3. Exeeni ekhanle ookhumelela ni yoophavela ahu ya ovuwa? (Nwehe elatarato yoopacerya.)

² Naahikhalane ephoole, yoophavela eyo yeephattu ya ophavela ovuwa pooti onihapuxa. Maana olumwenku wa Satana oniphavela oniiriha okhala atthu oovuwa. Nto eyo yakhumelela, khaninrowa onvuwiha nnakhala omukokhorela ole oniphwanela, eyo piiyo, Tiithi ihu a wiirimu, Yehova Muluku.​—Wisupulula 4:11.

 ³ Mahiku a Yesu, ahooleli akina a itiini khiyaarina moonelo wooloka voohimya sa ottottopela. Yesu aahaalopola awiixutti awe wira: “Mwipasope n’awixuttihi a ikano. Awo wasivela wettakasa ewanrene ikuwo sorekama, n’ukhomasiwa mmuthukumanoni. Anniphavela okilathi mapuro òttittimiheya mpani mothukumana ni mapuro òsuwanyeya, mumpakiwa nìra”. Nave aahincererya oriki: “Tivó mulattu aya onimwaviherya vanjene”. (Luka 20:46, 47) Moovirikana ni ahooleli awo, Yesu aahimuttottopela naamukhweli oohaawa aavanhe inoota piili, woonasa wene khuuvo aamucalela. (Luka 21:1-4) Tthiri moonelo wa Yesu waahivirikana ni atthu akina. Mwaha ola onoonikhaliherya ovikaniha okhalana moonelo wooloka, yoowo Yehova Muluku oniphavela awe wira nikhalane.

4. Enamuna xeeni yoolokexa ya osuweliwa, ni nthowa xeeni?

⁴ Enamuna xeeni yoolokexa ya osuweliwa? Khahiyo osuweliwa anamunceene aniphavela aya arumeelaka osoma wuniversidade, anakoso aalupale ni matthekulelo a olumwenku ola. Murummwa Paulo aahitthokiherya enamuna yoolokexa ya osuweliwa, oriki: “Nto vano, vamusuwenlyanyu Muluku - walá kìreke so: vano Muluku vosuwenlyaweni – munwerya sai ohokolowela wettela ikano iye sihinwerya wopola, sihintekeliwa etthu? Mumphavelela-ni wikhaliha-tho ipottha?” (aGalasia 4:9) Tthiri, eparakha yuulupale ‘osuweliwa ni Muluku’ Mukhulupale a olumwenku wotheene! Yehova tonipattunxe, tivonto Owo oonisuwela, onniniphenta ni oniphavela wira nikhale apatthani awe.​—Musuweli 12:13, 14.

5. Nipakeke exeeni wira nisuweliwe ni Muluku?

⁵ Noosuwela wira Moise aari mpatthani a Yehova. Vaavo Moise aamuxonttenle awe Yehova oriki: “Mukòniherye ekhove anyu, wira kosuweleni”, Yehova aahimwaakhula wira: “Kinimwira enkivekelanyu, okhala wira kinnisiveliwa ni nyuwo: tthirí miyo kihosuwelani orattene”. (Okhuma 33:12-17) Nave Yehova onnimusuwela khula mmosa a hiyo. Nto nipakeke exeeni wira nikhale apatthani a Yehova? Nihaana omphenta ni wiivahererya wa yena.​—Mmusome 1 aKorinto 8:3.

6, 7. Exeeni ekhanle ooniiriha oyeleela ompatthani ahu ni Yehova?

⁶ Nave nihaana olipiha wataana wahu ni Tiithi ihu a wiirimu. Ntoko maKristau a oGalasia, nihaana ohiya okhala ipottha sa “ikano iye sihinwerya wopola, sihintekeliwa etthu” sa olumwenku ola, ohela muhina ele enihimmwa okhala okhumela saana ni ovuwa. (aGalasia 4:9) MaKristau ale a oGalasia yaanimusuwela Muluku ni owo aanaasuwela. Vano Paulo aahimmye wira anna ale ‘yahihokolowela ikano’ sihikhanle etthu. Mwa enamuna ekina Paulo aakonhe so: ‘Xeeni mumphavela anyu otthikela okhala ipottha sa itthu sa ololo sihimphwanyiha etthu?’

⁷ Niireke eyo pooti oniiraneela? Aayo. Ntoko Paulo, okathi niixuntte ahu ekeekhai, waaniheryasa noohiya ovuwa aahiiso itthu sikina sa olumwenku wa Satana. (Mmusome aFilipi 3:7, 8.) Pooti wira akina aakhootta oliveriwa osoma wuniversidade, miteko sooloka, aahiiso eparakha yoophwanya musurukhu munceene. Nave,  pooti wira naarowa ovuwa wala okhalana ekumi yooloka mwaha woosuwela wiipa aahiiso oweetta axooku. Masi noohiya itthu iyo sotheene. (aHéberi 11:24-27) Tthiri khivaarowa okhala va miruku othanana mwaha wa soothanla sooloka nipanke ahu nuupuwelaka wira okumi ahu waamuloka naatthanre itthu iye! Moonelo owo, pooti oniiriha otthikela itthu iyo sa olumwenku ola, seiyo naahiyale ahu mwaha woosuwela wira ‘khasintekeliwa etthu’. *—Nwehe enoota.

8. Exeeni enrowa olipiha ophavela wahu osuweliwa ni Yehova?

⁸ Moota xeeni osuweliwa wahu ni Yehova ontepa aya olipa vaavo ninkhootta ahu osuweliwa ni olumwenku ola? Nrowe nithokorerye ikeekhai piili sinrowa onikhaliherya. Yoopacerya, okathi wotheene Yehova onnaasuwela arumeyi awe oororomeleya. (Mmusome aHéberi 6:10; 11:6) Yehova onninvaha efaita khula murumeyi awe oororomeleya. Tivonto khonrowa oliyala miteko sahu, maana Muluku “naxariya”. Nave okathi wotheene Yehova onnaasuwela ‘atthu ari awawe’. (2 Timótheyo 2:19) Yehova “onnijaliha ephiro y’atthu òloka” ni onnisuwela owoopola.​—Esalimo 1:6; 2 Pedru 2:9.

9. Nvahe matakiheryo anooniherya wira Yehova aanaalipiha atthu awe?

⁹ Okathi mukina Yehova aanaalipiha arumeyi awe mwa enamuna ya vameekhaaya. (2 Wahala 20:20, 29) Mwa ntakiheryo, nkahaya muupuwele okathi Yehova aawooponle awe atthu awe Ephareya Yooxeerya, vaavo yoomoliwa aya ni anakhotto oowerya a Farawo. (Okhuma 14:21-30; Esalimo 106:9-11) Yowiiraneya ele, yaari yoovuwa mpakha owiiriha atthu a ilapo sikina wuupuwela hata saavinre iyaakha 40. (Yoxuwa 2:9-11) Ti voolipiha osuwela wira Yehova aanaaphenta ni aahirumeela owerya wawe wira owoopole atthu awe a khalai, maana moohipisa, Gogi a oMagogi onrowa onituphela. (Ezekiyeli 38:8-12) Okathi owo, nnoohakalala vanceene mwaha woosuweliwa ni Muluku ohiya ni olumwenku ola.

10. Ekeekhai xeeni ekina ennilipiha?

¹⁰ Ya nenli, Yehova pooti onitthuvela mwa enamuna nahaalipelela ahu. Akhala wira ninnipaka itthu sooloka niphavelaka ottottopeliwa ni atthu akina, Yehova khonrowa onitthuvela. Mwaha wa xeeni? Mwaha woowi, Yesu aahimmye wira vaavo akina annittottopela aya, eyo ti etthuvo ahu. (Mmusome Matheyo 6:1-5.) Masi Yehova ‘onniwona’ atthu yaale ahinttottopeliwa nnaamwi apakaka itthu sooloka. Nto onrowa waatthuvela mwaha wa itthu iyo anipaka aya. Ikwaha sikina Yehova onnaatthuvela arumeyi awe mwa enamuna yahaalipelela aya. Nrowe niwehe matakiheryo vakhaani.

11. Yehova aamureelinhe sai Maria?

¹¹ Yehova aahimuthanla mwali oowiiyeviha iihaniwa Maria wira omuyare Yesu. Maria aakhala epooma yaamukhaani yiihaniwa Nazarethi. Epooma ele yaahittaivela oYerusalemu opuro yoowo yaakhala aya etemplo. (Mmusome Luka 1:26-33.) Xeeni Yehova ohalaka omuthanla Maria? Nlaikha Gabriyeli naahimuleela Maria wira ‘aniphentexiwa ni Muluku’. Ele Maria aamulenle awe mmusi awe Elizabeti, ennooniherya wira Maria aahikhalana wataana wooloka ni Yehova. (Luka 1:46-55) Yehova aanisuwela mukhalelo wa Maria, nave okhala wira aari oororomeleya, Yehova aahimureeliha mwa enamuna ahaalipelela awe.

12, 13. Yesu aattittimihiwe sai okathi aayariwe awe ni okathi Maria aamurowanne awe otemplo nuuvira mahiku 40?

¹² Okathi Yesu aayariwa awe, Yehova aalenle aani oyariwa wa Yesu? Owo khaalenle makhulupale ni anamalamulela ooYerusalemu aahiiso oBethelehemu. Masi, Yehova aahiruma malaikha, orowa waaleela amakampusi oowiiyeviha, yaawo yaakhapelela ipwittipwitthi mmathalani, ota wa oBethelehemu. (Luka 2:8-14) Nuumala-vo, amakampusi ale yaahirowa omuxukurya mwaana ole aayariwe niinaanoru. (Luka 2:15-17) Maria ni Yosefe khiyaatikinihiwe onweha Yesu ottittimihiwaka mwa enamuna ele. Maana enamuna Yehova onipaka awe itthu woovirikana ni Diabo. Okathi Satana aarumme awe alipa-oosoma itheneeri orowa omuxukurya Yesu ni anamuyari awe, atthu otheene oYerusalemu yaahisuwela oyariwa wa Yesu. Nto eyo yaahikumiherya maxakha manceene. (Matheyo 2:3) Maana yaahiiviwa anamwane anceene.​—Matheyo 2:16.

¹³ Nlamulo Muluku aavanhe awe aIsarayeli, naahimya wira nuumala mahiku 40, muthiyana omuyanre ene mwaana mwaamulopwana, aahaana onvaha Yehova mukuttho. Tivonto, Maria, Yosefe ni Yesu yaahikhuma oBethelehemu arowaka oYerusalemu, mukwaha wa ikiloomo 9. (Luka  2:22-24) Woonasa wene, mphironi Maria aaniikoha akhala wira namukuttho ampaka etthu ya vameekhaaya wira omuttittimihe Yesu. Tthiri Yesu aahittittimihiwa mwa enamuna Maria ahaalipelela awe. Yehova aahimuthanla Simeyoni mulopwana “òrera murima ni òmuttittimiha Muluku” ni profeta Ana naamukhweli aarina iyaakha 84, yaawo yaahimmye wira Yesu aarowa okhala Mesiya aahiiso Kristu.​—Luka 2:25-38.

14. Yehova aamutthuvenle sai Maria?

¹⁴ Niireke Yehova anvikaniha omureeliha Maria mwaha woororomeleya ni omuhuwa Yesu? Aayo. Muluku aahiiriha wira itthu Maria aahimmye awe ni aapanke awe silempwe mBiibiliyani. Vanikhala wira Maria khaawenrye omutthara Yesu okathi aalaleerya awe iyaakha iye tthaaru nnimeya. Woonasa wene, mwaha woowi aari naamukhweli, Maria aahivikaniha okhala oNazarethi. Eyo enooniherya wira Maria khaawenhe itthu sikina sooloka Yesu aapanke awe. Masi okathi Yesu aiviwe awe, Maria aahikhala. (Yohani 19:26) Muhoolo mwaya, Maria aahikhala ni awiixutti a Yesu okathi yaakhenle aya munepa wootteela Pentekoositi a 33 EC. (Miteko 1:13, 14) Tthiri Maria aahoottihiwa vamosa ni awiixutti akina. Nto eyo, enooniherya wira aahivahiwa eparakha ya okhala ni Yesu wiirimu mahiku otheene. Tthiri ororomeleya wawe waahimwiiriha waakhela etthuvo ele yoohakalaliha!

15. Yehova anvuwinhe sai Yesu okathi aari awe valaponi?

¹⁵ Yesu khaaphavela ovuwihiwa ni ahooleli a itiini ni a ipoliitika. Masi, Yehova aahilavula ikwaha tthaaru ohimyaka wira aanimusuwela ni omphenta mwanawe. Tthiri eyo yaahimulipiha vanceene Yesu! Moohipisa nuumala Yesu obatiziwa oMuro Yordani, Yehova aahimmye so: “Ola mwan’aka onimphentexaka: miyo kosiveliwa ni yowo”. (Matheyo 3:17) Vanikhala wira Yohani Mbatiza paahi taiwale masu ale a Yehova. Moottharelana, ohalaka mwaakha mmosa wira Yesu iiviwe,  arummwa awe araru yaahimwiiwa Yehova omuhimyaka Yesu, wira: “Ola ti Mwan’aka onimphentexaka: yola t’osiveliwa waka. Mmwiweleleke yola!” (Matheyo 17:5) Nave, ahalaka mahiku vakhaani wira Yesu iiviwe, Yehova aahitthikela omulavula Mwanawe.​—Yohani 12:28.

16, 17. Yehova anvuwinhe sai Yesu mwa enamuna ahaalipelela awe?

¹⁶ Yesu aanisuwela wira aamootheriwa onveeha Muluku ni wiiviwa vowooniha othunku. Masi aahivekela wira wiireye otthuna wa Muluku ohiya otthuna wawe. (Matheyo 26:39, 42) Yesu “ahivilela wiviwa” vamwirini va nihaaxeryo, “ahithokoreryaka wuliwa muru” mwaha woowi aaphavela ovuwihiwa ni Tiithi awe ohiya ni olumwenku. (aHéberi 12:2) Yehova anvuwinhe sai Yesu?

¹⁷ Okathi Yesu aari awe valaponi, aahivekela wira ovahiwe ovuwa aarina awe wiirimu ni Tiithi awe. (Yohani 17:5) Masi Biibiliya khonihimya wira Yesu aanilipelela ovuwihiwa ovikana aarina awe. Nave ori ene valaponi, khaalipelela wira aamutthuveliwa mwa enamuna ya vameekhaaya mwaha wa opaka yootthuna ya Yehova. Masi exeeni Yehova aapanke awe? Owo aahinvuwiha Yesu mwa enamuna ahaalipelela awe. Nuumala omuhihimuxa ni omuroiha wiirimu “Muluku ònvuwiha [Yesu] vanjene”. Nave Yehova onvaha Yesu erutthu yomunepani ehinikhwa. Yesu paahi topacenrye ovahiwa etthuvo eyo! * (Nwehe enoota.) (aFilipi 2:9; 1 Timótheyo 6:16) Tthiri moota Yehova omutthuvenle awe Yesu mwaha woororomeleya, ti woohakalaliha!

18. Exeeni enrowa onikhaliherya ophavela osuweliwa ni Yehova ohiya ni olumwenku ola?

¹⁸ Exeeni enrowa onikhaliherya ophavela osuweliwa ni Yehova ohiya ni olumwenku ola? Nihaana weemererya wira okathi wotheene Yehova onnaasuwela ni waatthuvela arumeyi awe oororomeleya ni ikwaha sinceene onnipaka eyo mwa enamuna yahaalipelela aya. Nave nihaana wuupuwelela moota Yehova onrowa awe onreeliha muhoolo! Masi, vaavo ninvilela ahu mixankiho sa olumwenku ola wootakhala, nihaana wuupuwela wira olumwenku ola onoomala moohipisa. Tivonto khula etthu enniiriha ovuwa olumwenku ola enoomala. (1 Yohani 2:17) Tthiri Tiithi ihu oophenta, Yehova, khonrowa oliyala muteko ahu ni ophenta noonihenrye ahu nsina nawe, maana owo “naxariya”. (aHéberi 6:10) Mwekeekhai, Yehova onrowa ontthuvela mwa inamuna nihaalipelela ahu!