Niwooneleke Othunku “Atthu Othene”
OKATHI Yesu aawiixuttiha awe atthareli awe moota woolaleya ihapari sooreera, aahaalopola wira khiyaarowa owiriyaniwaka ni atthu otheene. (Luka 10:3, 5, 6) Eyo enniiraneya okathi onilaleerya ahu. Maana atthu akina nnaaphwanya ahu khannaakhela saana aahiiso toowali. Nto vaavo anooniherya aya mukhalelo owo, pooti onixankiha owoonela othunku ni waalaleerya.
Mutthu oothunku, onnoona sootthuneya ni mixankiho sa atthu akina onaamorela ikharari ni waakhaliherya. Exeeni enrowa okhumelela akhala wira khanniwoonela othunku atthu nnaalaleerya ahu? Akhala wira khaninluttuweliwa, eyo pooti oniiriha ohiya waalaleerya atthu ni ohiwerya waakhaliherya. Oluttuweliwa wahu onlikana ni mooro. Wira mooro ovikaniheke opatta, onitthuneya oheliwa ikhuni. Moolikanasa, oluttuweliwa wahu onoolipa vaavo ninwoonela ahu othunku atthu!—1 aTesalonika 5:19.
Ninrowa okhala sai atthu oothunku, hata vaxankihaka? Nrowe nithokorerye matakiheryo mararu anitthuneya ahu otakiha. Matakiheryo ene taala: Yehova, Yesu ni murummwa Paulo.
MUTAKIHEKE OTHUNKU WA YEHOVA
Okhuma khalai, atthu annimootherya Yehova wira onipaka itthu sootakhala. Masi Yehova onnivikaniha waareerela murima “ale ahinimuxukhuru n’ale òtakhala murima”. (Luka 6:35) Yehova onooniherya sai oreera wawe murima? Owo onnimpixerya murima khula mutthu. Maana Yehova oniphavela wira “atthu othene yòpowe”. (1 Timótheyo 2:3, 4) Hata onyokhaka itthu sootakhala, Muluku onnaavaha efaita atthu ni khoniphavela wira nnakhala mmosa opweteye.—2 Pedru 3:9.
Yehova onnisuwela wira, Satana onnirumeela olavilavi wira aawoke atthu. (2 aKorinto 4:3, 4) Atthu anceene anniixuttihiwa itthu sowootha okhuma enamwane aya. Nto moota anuupuwela aya ni moonelo aya pooti waavila weemererya ekeekhai. Nnaamwi vari siiso, Yehova onniphavela waakhaliherya. Ninsuwela sai eyo?
Nkahaya muupuwele moota Yehova aawoonela awe atthu a epooma ya oNiinive. Hata yaari atthu ootakhala, Yehova aahimuleela Yona wira: “Miyo nkakhanle òmorela ikharari muttetthe mulupale w’oNínive, weiwo okhanlyaya atthu ikonto miloko mulokó ni mili (120.000) ahinsuwela t’uvi mono wolopwana walá mono wothiyana?” (Yona 4:11) Yehova aahiwoonela othunku atthu ooNiinive, yaawo yahaasuwela ekeekhai voohimya sa yena. Tivonto aamurumme awe Yona wira aalopole.
Nimutakihaka Yehova, hiyo ninniwoonela othunku atthu. Maana atthu awo ta faita. Nave, nimphavela waakhaliherya atthu wiixutta voohimya sa Yehova, hata noonaka wira khanrowa weemererya ekeekhai.
MUTAKIHEKE OTHUNKU WA YESU
Omutakihaka Tiithi awe, Yesu aaniwoonela othunku atthu “okhala wira yari òthwelela ni ònyanyaliwa, ntoko ipwittipwitthi sihikhalanne makampusi aya”. (Matheyo 9:36) Yesu aahisuwela makhalelo a atthu ale. Maana ahooleli a itiini khiyaathokorerya saana ni khiyaawiixuttiha ekeekhai. Mwaha wa mathowa oovirikana, Yesu aanisuwela wira khahiyo wira atthu otheene yanwiriyana yaamukhala atthareli awe. Hata vari siiso, Yesu aahivikaniha owiixuttiha itthu sinceene.—Marko 4:1-9.
Muhikhulumuwe akhala wira mutthu khonoowiriyanani ekwaha yoopacerya
Vaavo makhalelo aya aniturukeya aya, pooti wira atthu awo anoophavela oniwiriyana
Vaavo atthu akina ahiniphavela aya oniwiriyana, nihaana ophavela osuwela etthu eniwiiriha. Woonasa wene, awo arina muupuwelo woohiloka voohimya sa Biibiliya ni maKristau, mwaha woowi atthu anceene aniihimya okhala maKristau annipaka itthu soohiloka. Nave akina ahiiwa itthu sowoothiwa voohimya sa itthu ninkupali ahu. Akina-tho anniwoova amusi ni atthu a mmuttettheni mwaya wira animwaaramusaka akhala wira animwaaweha avaanelaka ni hiyo.
Pooti wira atthu akina anaaphwanya ahu, sowiiraneela itthu sootakhala ahinliyala aya. Misionaaria oniihaniwa Kim, ohimmye wira atthu anceene a muttetthe awe yaahitthyawa mwaha wa ekhotto, nto yaahipweteiwa mireerelo saya. Awo khiyaarina nlipelelo na muhoolo. Eyo yaahiwiiriha onyoonyiheya ni ohimuroromela mutthu. Tivonto, atthu a muttetthe ole, ikwaha sinceene annaakhoottiherya Anamoona olaleerya. Nihiku nimosa olaleeryaka, murokora Kim aahimaniwa ni mwaneene etthoko.
Exeeni yaamukhalihenrye Kim ovikaniha owoonela othunku atthu hata yahaamuthokorerya saana? Okathi wotheene, Kim onneererya wuupuwelela masu a Miruku 19:11, yaawo ani: “Namiruku t’ule onsuwela okhotta oviruwa”. Nto okathi onuupuwela awe itthu atthu a muttetthe awe yiixuttihiwa aya, eyo ennimukhaliherya owoonela othunku. Nave khahiyo wira atthu otheene onaalaleerya awe toohipatthaneya. Maana muttetthe ene yoole, ookhalana irevisita sooloka.
Vano, nihaana wiikoha so: ‘Vaakhanle wira nkisuwenle ekeekhai, kaarowa woonela sai okathi Anamoona a Yehova yaarowa aya okilaleerya?’ Mwa ntakiheryo, nihiiwa itthu sinceene anootheriwa aya Anamoona a Yehova. Woonasa wene, khinaarowa owaakhela saana nto namphavela wooneliwa othunku. Yesu aahimmye wira naathokoreryeke atthu ntoko nimphavela ahu wira nithokoreriweke. Tivonto, nihaana ophavela osuwela moonelo wa atthu ni waapixerya murima hata vavilaka.—Matheyo 7:12.
MUTAKIHEKE OTHUNKU WA PAULO
Murummwa Paulo aaniwoonela othunku hata atthu yaale yammana okathi aalaleerya awe. Nthowa xeeni? Nthowa noowi aanuupuwela wira yena aahipaka etthu emosa-ru. Paulo ohimmye so: “Yomi khalai kanveha Yesu yowo, kamulupattha, kamuhaxa. Nto Muluku òkimorela ikharari, mana kahìra sothene kihisuwelaka, kihinatthi wamini”. (1 Timótheyo 1:13) Paulo aanisuwela wira aahimoreliwa ikharari ni Yehova ni Yesu. Nave aanisuwela etthu yaawiiriha atthu ale ophavela omuhiiha olaleerya, maana Paulo ootoko opaka etthu emosa-ru.
Okathi mukina, Paulo aanaaphwanya atthu yaakupali vanceene itthu sowoothiwa. Vano Paulo oonela sai? Miteko 17:16, ninnisoma wira vaavo aari awe wAthena “murima wahimuripa n’unyonyiwa, ònaka muttetthe” ole “osareiyene ilatarato s’amuluku èthiru”. Masi Paulo aahirumeela etthu ele yaamunyoonyinhe wira owiixuttihe atthu ale. (Miteko 17:22, 23) Eyo yaahimwiiriha Paulo oturuka enamuna aalaleerya awe ni aanisuwela waalavuliha atthu a makhalelo otheene wira ‘owopole mano akina’.—1 aKorinto 9:20-23.
Okathi nnaalaleerya ahu atthu ahiniphavela oniwiriyana aahiiso anikupali itthu soohiloka, nihaana omutakiha Paulo. Nihaana orumeela itthu ninsuwela ahu wira naakhaliherye wiixutta “ihapari sorera”. (Yesaya 52:7) Murokora oniihaniwa Dorothy, onihimya wira: “Muttetthe onlaleerya ahu, atthu anceene yiixuttihiwe wira Muluku tootakhala ni oophukela. Wanipacerya, kinnaattottopela mwaha woowi annimukupali Muluku. Nuumala-vo, kinniwooniherya mBiibiliyani wira Yehova toophenta ni ooleiherya okumi wooloka muhoolo”.
“MUXINTTE SOTAKHALA MWIRAKA SORERA”
Vaavo nnaattamela ahu wanikisa wa olumwenku ola, mweettelo wa atthu akina onrowa ‘oviraka otepaka’ otakhala. (2 Timótheyo 3:1, 13) Masi eyo ehiniirihe ovukula othunku ahu aahiiso ohakalala wahu. Nto Yehova onoonivaha ikuru wira ‘nixintte sotakhala niraka sorera’. (aRoma 12:21) Pioneera oniihaniwa Jessica, onihimya wira ikwaha sinceene atthu anniixinnuwiha ni anninramusa mwaha wa muteko ahu woolaleerya. Jessica onincererya oriki: “Eyo pooti oninyoonyiha. Masi vaavo kimpacerya aka ovaanela, kinninvekela Yehova ni murima wira okikhaliherye owoona atthu ntoko oniwoonela awe”. Eyo ennimukhaliherya Jessica ohicalela muupuwelo awe masi onahaavya inamuna sa waakhaliherya atthu awo.
Nivikaniheke waaphavela ale anrowa weemererya ekeekhai
Okathi mukina atthu pooti weemererya nikhaliheryo nahu ni wiixutta ekeekhai
Nave nihaana wiimananiha waalipiha anna ni arokora vaavo ninlaleerya ahu hoothe. Jessica onihimya wira okathi munna onilaleeryana awe onihimya awe itthu soohiloka simwiiranenle olaleeryaka, owo onnimananiha ohikhumuwa. Masi, onnilavula itthu soolipiha sa muteko woolaleerya hata atthu akina ahiphavelaka oniwiriyana.
Yehova onnisuwela wira okathi mukina onnixankiha olaleerya. Masi onnihakalala vaavo nintakiha ahu omoriwa wawe ikharari! (Luka 6:36) Tthiri, othunku ni opixa murima wa Yehova onoomala moohipisa. Nikupaliki wira Yehova oosuwela nihiku onrowa awe omaliha olumwenku ola. Niwehereryaka ophiya nihiku nlo, nimananihe waalaleerya atthu otheene. (2 Timótheyo 4:2) Tivonto, nrowe nivikanihe oluttuweliwa olaleerya ni owoonela othunku “atthu othene”.
