1, 2. (a) Xeeni vari aya va miruku okhala mpantta wa Yehova? (b) Mwaha ola, ninrowa othokorerya exeeni?

TI VA miruku omwaattamela Yehova. Maana owo paahi tori oowerya, a miruku ni oophenta! Tivonto, okathi wotheene nihaana ororomeleya wa Yehova ni okhala mpantta awe. (Esalimo 96:4-6) Masi atthu akina yaamukokhorela Muluku yaahihiya opaka eyo.

² Mwaha ola, ninrowa othokorerya matakiheryo a atthu vakhaani yaihimya okhala mpantta wa Yehova masi avaraka itthu Yehova oninyokha awe. Ele ninrowa ahu wiixutta, enoonikhaliherya ovikaniha ororomeleya wa Yehova.

3. Yehova eerenrye sai omukhaliherya Kayini, ni aamulenle exeeni?

³ Nkahaya muupuwele ntakiheryo na Kayini. Owo khaakokhorela amuluku eethiru, masi Yehova aahikhootta okokhorela wa Kayini. Mwaha wa xeeni? Mwaha woowi, Yehova aahoona itthu sootakhala saari vamurimani va  Kayini. (1 Yohani 3:12) Vano Yehova aahimulopola, oriki: “Mwira-ru sorera, ekhove anyu enimokokolani. Mwahiré sorera, etampi enowipithelani, ephavelaka wovarani. Nto nyuwo munniwerya oxintta?” (Maphattuwelo 4:6, 7) Yehova aahimmye wira akhala wira Kayini aamuttharuwa khukhala mpantta wa Muluku, vano Muluku aamukhala mpantta wa Kayini.

4. Kayini aapanke exeeni okathi aarina awe eparakha yookhala mpantta wa Yehova?

⁴ Vaakhanle wira Kayini aahituruka muupuwelo awe, Yehova aamweemererya okokhorela wa Kayini. Masi Kayini khanwiriyanne Muluku, nto muupuwelo ni soophavela sawe soohiloka saahimwiiriha opaka etthu yootakhala. (Yakobo 1:14, 15) Woonasa wene, Kayini khaatonko wuupuwela omurukunuwela Yehova. Masi nuuvira okathi Kayini khaacalenle nlopolo na Muluku mpakha omwiiva muhima awe!

5. Muupuwelo xeeni okhanle ooniiriha okhoottiwa ni Yehova?

⁵ Ntoko Kayini, olelo-va, muKristau onihimya omukokhorela Yehova, pooti opacerya opaka itthu Yehova oninyokha awe. (Yuda 11) Waaniheryasa, owo onniluttuweliwa olaleerya ni khonicompela mithukumano. Masi okathi omosaru oneemererya ovikaniha wuupuwelela orupihana woohiloka, nrima ni nthalu. (1 Yohani 2:15-17; 3:15) Itthu iyo pooti omwiiriha opaka etampi yuulupale. Hata atthu akina ahisuwelaka itthu sinuupuwela ahu aahiiso opaka, Yehova onnisuwela. Nave Yehova onnisuwela akhala wira khanikhanle mpantta awe.​—Mmusome Yeremiya 17:9, 10.

6. Yehova onnikhaliherya sai oxintta soophavela soohiloka?

⁶ Hata nivonyaka, Yehova khonaakuva onihiya. Akhala wira nimphavela opaka etthu yoohiloka, Yehova onnileela wira: “Muhokoloweleke wa miyo, ni miyo kinohokolowela wa nyuwo”. (Malakhiya 3:7) Yehova onnisuwela wira ninniwanana sootteettheya sahu. Masi Yehova oniphavela wira nikhaleke oororomeleya ni onyokha itthu soohiloka. (Yesaya 55:7) Akhala wira nnoopaka eyo, Yehova ooleiherya wira onoonikhaliherya ni onivaha ikuru wira nixintte soophavela sahu soohiloka.​—Maphattuwelo 4:7.

7. Salomoni aayelenle sai wataana wawe ni Yehova?

⁷ Okathi Salomoni aari awe mmiravo, owo aahikhalana wataana wooloka ni Yehova. Nave Muluku aahinvaha ankhili anceene ni aahinvaha muteko wootthuneya wa oteka etemplo yooreera oYerusalemu. Masi Salomoni aahiyeleela wataana wawe ni Yehova. (1 Mamwene 3:12; 11:1, 2) Nlamulo na Muluku naahimya wira mwene “ahikhalane-tho axar’awe anjene, wira murim’awe ohihononeye”. (Otumererya 17:17) Masi Salomoni khaiwelenle nlamulo nne. Owo aahikhalana axaarawe 700 ni axihawala awe 300! (1 Mamwene 11:3) Axaarawe anceene yaari amalapo ni yaakokhorela amuluku eethiru. Nave-tho, Salomoni khaiwelenle nlamulo na Muluku vaavo aathenle awe athiyana a amalapo.​—Otumererya 7:3, 4.

8. Salomoni aapanke exeeni yaamunananre Yehova?

⁸ Vakhaani-vakhaani, Salomoni aahihiya ophenta malamulo a Yehova. Muhoolo  mwaya, aahipaka itthu sootakhala. Aahimpakela altari muluku eethiru Astarte ni Kemoxi, vano Salomoni ni axaarawe aahipacerya waakokhorela amuluku awo. Ohiya-vo, Salomoni aahaateka altari awo vamwaako ohoolo wa etemplo oYerusalemu! (1 Mamwene 11:5-8; 2 Mamwene 23:13) Okhala wira Salomoni aaninvaha mikuttho Yehova, owo oona wira Yehova khaarowa ocalela itthu soohiloka Salomoni aapaka awe.

9. Exeeni yiiraneyale mwaha wa Salomoni ohiiwelela nlopolo na Muluku?

⁹ Yehova khaasiveliwe ni ele Salomoni aapanke awe. Tivo, Biibiliya onihimya awe wira: “Apwiya yahinviruwela Salomoni mulattu w’opheruwa murim’awe ni wanyanyala Apwiya Muluku awe”. Muluku aaheererya omukhaliherya Salomoni. Nave Yehova ‘ahimukhumelela imara pili, [wira] . . . amukhottiherye watthara amuluku akina. Vano Salomoni khaìwelenle sarummwalyawe ni Muluku’. Nto Muluku aahimukhootta Salomoni. Yehova kheemerenrye wira osuulu wa Salomoni ovikanihe olamulela nloko notheene na Isarayeli. Nto awo yaahikhalana mixankiho suulupale iyaakha sinceene.​—1 Mamwene 11:9-13.

10. Exeeni ekhanle oohonona wataana wahu ni Yehova?

¹⁰ Akhala wira nnaathanla apatthani ahintthara nnakhala ottittimiha malamulo a Muluku, awo pooti ohonona muupuwelo  ahu ni wataana wahu ni Yehova. Pooti wira awo anna a mmulokoni, masi ahirina wataana wooloka ni Yehova. Woonasa wene, atthu awo amusi ihu, anamwaattamanani ihu, ninvara muteko hoothe aahiiso ninsoma exikola emosa, masi khanimukokhorela Yehova. Vano oviriha okathi munceene ni atthu awo ahineettela malamulo a Yehova, pooti onihapuxa mpakha oyeleela wataana wahu ni Muluku.

11. Exeeni enrowa onikhaliherya waathanla apatthani ihu?

¹¹ Mmusome 1 aKorinto 15:33. Ekeekhai wira atthu akina aakhalana mikhalelo sooreera. Nave khahiyo wira atthu ale ahinimukokhorela Yehova, okhala wene, anipaka itthu soohiloka. Pooti wira nyuwo munnaasuwela atthu awo. Niireke eyo entaphulela wira nihaana opatthana ni atthu awo? Niireke animookhaliheryani olipiha wataana wanyu ni Yehova? Animookhaliheryani omwaattamela Muluku? Etthu xeeni enipweha aya nipuro noopacerya? Itthu xeeni sinaasivela olavula? Niireke onaasivela olavula musurukhu, itthu sikumiheriwe niinaano, apareelyo eletroniko, matthekulelo ni itthu ntoko iyo? Niireke onaasivela waavaanyiha akina? Niireke onaasivela olavula itthu sootheiha siri ene sooveeha? Yesu aahimmye so: “Eyano ennilavula itthu sisanrye mmirimani”. (Matheyo 12:34) Nto moona wira atthu muneettana anyu annihonona wataana wanyu ni Yehova, muhaana opaka etthu! Mmananihe ohiviriha okathi munceene ni atthu awo, vaatthuneyaka, muhiye weettana.​—Miruku 13:20.

12. (a) Yehova aalenle exeeni aIsarayeli nuumala okhuma wEjiitu? (b) AIsarayeli yaakhunle sai vaavo Muluku aavekenle awe okhala oororomeleya?

¹² Nnoowerya wiixutta etthu ni ele yiiraneyale ni aIsarayeli nuumala Yehova owoopola wEjiitu. Vaavo atthu yaathukumanne aya waattamela Mwaako Sinayi, Yehova aahiixooniherya mwa enamuna yootikiniha! Atthu ale yaahoona neeku nooriipa, etari, mwiixi, ni yaahiiwa oruma ntoko oruma wa nlope. (Okhuma 19:16-19) Yehova aahaaleela wira ‘atthuna wira akhalé awawe pahi’. Nave aahaaleiherya wira aarowa ororomeleya wa ale animphenta ni wiiwelela malamulo awe. (Mmusome Okhuma 20:1-6.) Yehova aahiwooniherya aIsarayeli wira yakhala mpantta awe, Yehova aarowa okhala ni awo. Vaakhanle wira mwaari ni atthu ale, mwaarowa woonela sai masu a Yehova? Woonasa wene, nyuwo mwaarowa waakhula ntoko aIsarayeli yaawo yaakhunle wira: “Molumo othene arumalyaya Apwiya, nnimwettelaka yawo”. (Okhuma 24:3) Masi moohipisa, yaahiiraneya etthu yeeherenrye waamini waya. Etthu xeeni?

13. Exeeni yeeherenrye waamini wa aIsarayeli?

¹³ AIsarayeli yaahoova vanceene mwaha wa itthu saakumiheriwe ni owerya wa Muluku, nto Moise aahirowa oMwaako Sinayi khulavula ni Yehova. (Okhuma 20:18-21) Waahivira okathi Moise ohinatthi okhuruwa omwaako. Nto vaakhala ntoko wira atthu ale yaahirimeela ni khiyaarina muhooleli. Exeeni yaarowa aya opaka? Woonasa wene, aIsarayeli yaanitepa omuroromela pinaatamu, eyo piiyo, Moise  yoowo aari muhooleli aya. Nto atthu ale yaahixanka khimuleela Aroni wira: ‘Munipakele muluku wira oniholeke: Moise ole onikumihale mulaponi mwa wEjitu, khansuwenle emukhumelenle’.​—Okhuma 32:1, 2.

14. AIsarayeli yoonihenrye sai okhala alolo, nto Yehova aapanke-ni?

¹⁴ AIsarayeli yaanisuwela wira ti voohiloka waakokhorela amuluku eethiru. (Okhuma 20:3-5) Nto moowaakuveya yaahipacerya omukokhorela mwaanyompe a eweero! Hata yahiiwelenle malamulo a Yehova, awo yaaniiwoka yuupuwelaka wira yaari mpantta wa Yehova. Aroni aahiitthana okhala “nirá no watthapela Apwiya!”, okokhoreliwa wa mwaanyompe ole. Exeeni Yehova aapanke awe? Yehova aahimuleela Moise wira atthu ale “àhononeya murima” ni aahiya otthara ephiro “yalakihenryaka“. Vano Yehova aahinanariwa vanceene onuupuwela opwetexa nloko notheene.​—Okhuma 32:5-10.

15, 16. Moise ni Aroni yoonihenrye sai wira yaari mpantta wa Yehova? (Nwehe elatarato yoopacerya.)

¹⁵ Okhala wira Yehova toomoriwa ikharari, owo khaapwetenxe nloko nle. Masi aahaavaha aIsarayeli eparakha wira yooniherye akhala wira yaaniphavela okhala mpantta wa Muluku. (Okhuma 32:14) Okathi Moise aawenhe awe atthu akhuwelaka, yiipaka ni wiina ohoolo wa elatarato, aahimurihela vaikho mwaanyompe ole a eweero. Nuumala-vo aahikhuwela oriki: “Anatthara Apwiya [Yehova] ethukumane va!” Nto “atthu othene a nloko na Levi yahithukumana ni Moise”.​—Okhuma 32:17-20, 26.

¹⁶ Nnaamwi Aroni ampanke mwaanyompe ole a eweero, owo aahittharuwa vamosa ni aLevi akina, khukhala mpantta wa Yehova. Aroni ni aLevi ale yaahooniherya wira khiyaari mpantta wa anatampi. Tthiri awo yaahipaka yoothanla yooloka, maana nuuvira okathi nihiku nenne, ikonto sinceene sa atthu yaamukokhorenle mwaanyompe, yaahiiviwa. Masi ale yaari mpantta wa Yehova, yaahoopowa ntoko Muluku aaleihenrye awe.​—Okhuma 32:27-29.

17. Nniixutta exeeni ni ele Paulo olempe awe sa mwaanyompe a eweero?

¹⁷ Exeeni nniixutta ahu ni yowiiraneya ela? Murummwa Paulo ohimmye so: “Itthu iya sahikhumelela wira nixuttihiwe” wira nihikhala-khale ‘nakokhorelaka amuluku èthiru’. Nto Paulo aatthokihenrye wira yowiiraneya ele ‘yahilempwa wira enlopole hiyo, okhala wira omala wa mahiku wonattamela. Siso, ole onòna wira orimwemela, aìpasope wira ahimoré’. (1 aKorinto 10:6, 7, 11, 12) Ntoko anooniherya aya masu a Paulo, ale animukokhorela Yehova pooti opacerya ovara itthu soohiloka. Awo pooti wuupuwela wira nlelo Yehova onneemererya mweettelo aya. Ophavela paahi okhala mpatthani a Yehova aahiiso wiihimya  okhala oororomeleya, khontaphulela wira onneemereriwa ni Yehova.​—1 aKorinto 10:1-5.

18. Exeeni ekhanle ookhumelela naahiluttuweliweke miteko sa Yehova?

¹⁸ Mwaha wa Moise opisa okhuruwa omwaako Sinayi, aIsarayeli yaahixanka. Akhala wira wanikisa wa olumwenku ola onnipisa orwa, hiyo-tho pooti oxanka. Waaniheryasa, hiyo pooti opacerya wuupuwelaka wira sooleiherya sa Yehova soorakamela ni khasinrowa wiiraneya. Nave eyo pooti oniiriha oluttuweliwa miteko sahu, ohiya sa Yehova. Naahivahe ephoole, nnoohiya omurumeela Yehova ni opacerya opaka itthu nahuupuwela ahu.

19. Exeeni nintthuneya ahu wuupuwelaka ni nthowa xeeni?

¹⁹ Yehova omphavela wira nimwiiweleleke ni murima ahu wotheene ni omukokhorela yena paahi. (Okhuma 20:5) Xeeni onnivekela awe opaka eyo? Okhala wira onniniphenta. Akhala wira khannipaka ele Yehova onnivekela awe, ninrowa opakaka otthuna wa Satana, nto eyo enoonikumiherya maxakha. Paulo ohimmye so: “Nyuwo khamunwerya owurerya ekalisi y’Apwiya vamosá n’ikalisi ya Satana; siso khamunwerya olya vamesa v’Apwiya ni vamesa va Satana”.​—1 aKorinto 10:21.

20. Yehova onnikhaliherya sai hata nivonyaka?

²⁰ Kayini, Salomoni ni aIsarayeli otheene, yaahikhalana eparakha ya ottharuwa ni orukunuxa murima aya. (Miteko 3:19) Maana Yehova khaanyanyanle moowaakuveya mwaha wa soovonya saya. Nkuupuwelani moota Yehova aamulevelenle awe Aroni. Olelo-va, moophenta Yehova onninlopola wira nisyakeke opaka itthu soohiloka. Owo onnimurumeela Biibiliya, iliivuru sa mutthenkeso ahu ni maKristau akhwiihu. Vaavo nniiwelela ahu soolopola sa Yehova, nikupaliki wira onoonimorela ikharari.

21. Nipakeke exeeni okathi waamini wahu oneehereriwa aya?

²¹ Omoriwa ikharari wa Yehova onninikhaliherya. (2 aKorinto 6:1) Mwaha woowi onninivaha eparakha ya “okhotta makhalelo ahu òtakhala n’uhiya itthu sintthunexiwa vathí-va”. (Mmusome Tito 2:11-14.) Nuupuweleke wira okathi mukina sookhala itthu sinrowa weehererya waamini wahu. Muhaana olakela okhala mpantta wa Yehova ni wuupuwela wira “Apwiya Muluku anyu t’arinanyu wattittimiha n’uwova, awo t’arinanyu warumela n’owiwelela”.​—Otumererya 10:20.