1. Etthu xeeni eniwiiriha apinaatamu ovirikanaka ni axinama?

YEHOVA ohaavaha apinaatamu etthu ya vameekhaaya, eyo piiyo, yowuupuxerya ya murima. Eyo ti etthu eniwiiriha apinaatamu ovirikanaka ni axinama. Ninsuwela sai wira Adamu ni Eva yaahikhalana yowuupuxerya ya murima? Okhala wira nuumala ohimwiiwelela Muluku, awo yaahiipitha. Maana yowuupuxerya ya murima aya yaanaaphukela.

2. Yowuupuxerya ya murima ahu enlikana sai ni eleemi? (Nwehe elatarato yoopacerya.)

² Yowuupuxerya ya murima, etthu nrina ahu yeeyo eneettiha okumi ahu ni ennikhaliherya osuwela othanla etthu yooloka ni yoohiloka. Mutthu yoole yowuupuxerya ya murima awe ehiixuttihiwe saana, onlikana ni pakiti eleemi awe ehononeyale. Nto epheyo ni maasi a mphareya pooti omwiiriha pakiti owo orowa opuro ohiniphavela awe. Masi akhala wira eleemi ennivara saana, enoomukhaliherya ole onimweettiha pakiti otthara ephiro onrowa awe. Moolikanasa, naixuttiha saana  yowuupuxerya ya murima ahu, enoonikhaliherya vanceene.

3. Exeeni enikhumelela akhala wira yowuupuxerya ya murima ahu khiyiixuttihiwe saana?

³ Akhala wira yowuupuxerya ya murima ahu khiyiixuttihiwe saana, khenrowa onilopolaka wira nihipake itthu soohiloka. (1 Timótheyo 4:1, 2) Eyo enooniiriha woonaka wira “sorera . . . [ti] sotakhala”. (Yesaya 5:20) Yesu aahaaleela atthareli awe wira: “Onophiya okathi atthu anrowaya owivani, yupuwelaka wira animuttittimiha Muluku”. (Yohani 16:2) Eyo ti etthu yuupuwela aya atthu ale yaamwiivale mwiixutti Siteefano. (Miteko 6:8, 12; 7:54-60) Okhuma khalai, anatiini anceene aapaka ikrime suulupale, ntoko wiiva ahimyaka wira anvara yootthuna ya Muluku. Masi etthu ampaka aya khenivarihana ni malamulo a Muluku. (Okhuma 20:13) Tthiri yowuupuxerya ya murima aya kheniweettiha saana!

4. Ninrowa osuwela sai wira yowuupuxerya ya murima ahu ennivara saana?

⁴ Nto ninrowa osuwela sai wira yowuupuxerya ya murima ahu ennivara saana? Malamulo ni malakiheryo a Biibiliya apakeliwe ‘wira yixuttiheke ekekhai, yavanyiheke ale anvonya, yattaruxeke ale anttheka, ewettiheke atthu ephiro ya xariya’. (2 Timótheyo 3:16) Tivonto, nihaana omusoma Biibiliya khula nihiku, wuupuwelela ele enisoma ahu ni ovarihela muteko mookumini mwahu. Opaka eyo, enooniiriha wuupuwelaka ntoko Yehova. Nto nnookupaliki wira yowuupuxerya ya murima ahu enooneettihaka saana. Vano, nrowe niwehe moota nikhanle ahu oorumeela malamulo ni malakiheryo a Yehova, wira niixuttihe yowuupuxerya ya murima ahu.

5, 6. Malamulo a Muluku annikhaliherya sai?

⁵ Naaphavelaka okhaliheriwa ni malamulo a Muluku, nihaana opaka etthu ekina ohiya osuwela ni osoma paahi. Nihaana wiixutta ophenta ni ottittimiha malamulo awo. Biibiliya onihimya so: “Munyokheke sotakhala, mphenteke orera murima”. (Amosi 5:15) Ninrowa opaka sai eyo? Nihaana wiixutta woona itthu ntoko Yehova onoona awe. Nkahaya muupuwele ela: Vaakhanle wira khamumphwanya ikhove, nto totoro oovahani malakiheryo ala: olya yoolya eniphwanyiha ekumi, wiina nikuruta ni opaka marukunuxo makina mweekumini mwanyu. Nuumala otthara malakiheryo awo, ekumi anyu enakhala saana! Mwaarowa woonela sai malakiheryo a totoro ole?

⁶ Moolikanasa, Mpattuxa ahu oonivaha malamulo annikhaliherya osyaka etampi wira nikhalaneke ekumi yooloka. Mwa ntakiheryo, Biibiliya onniniixuttiha wira nihootheke, owoka, wiiya, oraruwa, owali aahiiso opaka itthu sa onammunepani. (Musome Miruku 6:16-19; Wisupulula 21:8) Vaavo nimphwanya ahu mireerelo mwaha womwiiwelela Yehova, omphenta wahu ni malamulo awe onninnuwa.

7. Sowiiraneya sa mBiibiliyani sinnikhaliherya sai?

⁷ Khanintthuneya ophwanya maxakha mwaha woohiiwelela malamulo a Muluku, niphavelaka wiixutta ele eri yooloka ni yoohiloka. Nihaana wiixutta ni soovonya sa atthu akina anilavuliwa mBiibiliyani. Miruku 1:5 onihimya so: “Musuweli, aiwaka, onninjererya osuwela wawe”. Malakiheryo ala anikhuma wa Muluku yoowo ori namalakiherya ootepa osuwela! Nkahaya  muupuwele moota Davidi aahaawale awe mwaha woohimwiiwelela Yehova vaavo aararunwe awe ni Bathi-Xeba. (2 Samuweli 12:7-14) Vaavo munisoma anyu yowiiraneya ela, mwiikoheke so: ‘Davidi aarowa osyaka sai mixankiho iye? Kinrowa opaka exeeni yakikhumelela etthu siisa? Yakiphwanya yoweeha ya orupihana woohiloka, kinrowa omutakiha Davidi aahiiso Yosefe?’ (Maphattuwelo 39:11-15) Wuupuwelela maxakha akhanle ookhumelela nattheka, onoonikhaliherya ‘onyokha sotakhala’.

8, 9. (a) Yowuupuxerya ya murima ahu ennikhaliherya sai? (b) Yowuupuxerya ya murima ahu eneettihiwa sai ni malakiheryo a Yehova?

⁸ Nihaana onyokha itthu Muluku onnyokha awe. Ninrowa opaka exeeni akhala wira ninnikumana muxankiho Biibiliya ohinvaha awe nlamulo nooluluwanya? Ninrowa osuwela sai ele Muluku omphavela awe wira nipakeke? Akhala wira nnoomweemererya Biibiliya wiixuttiha yowuupuxerya ya murima ahu, nnoopakaka soothanla sooloka.

⁹ Okhala wira onniniphenta, Yehova oonivaha malakiheryo wira yeettiheke yowuupuxerya ya murima ahu. Yehova onihimya so: “Ti miyo Apwiya Muluku anyu, kiniwixuttihani wira mphwanyeke sorera: ti miyo kiniwettihani ephiro ela erinanyu otthara”. (Yesaya 48:17, 18) Wuupuwelela saana malakiheryo a Biibiliya ni weemererya ovara murima ahu, nnoowerya  olokiherya yowuupuxerya ya murima ahu. Tthiri eyo enoonikhaliherya opaka soothanla sooloka.

10. (a) Malakiheryo, exeeni? (b) Yesu aarumenle sai malakiheryo okathi iixuttiha awe?

¹⁰ Malakiheryo, ti ikeekhai suulupale sineettiha muupuwelo ahu wira nipakeke soothanla sooloka. Osuwela malakiheryo a Yehova, onoonikhaliherya osuwela muupuwelo awe ni nthowa nimmwiiriha onivaha malamulo. Yesu aahirumeela malakiheryo wira owooniherye awiixutti awe wira muupuwelo ni sowiira pooti okumiherya maxakha. Mwa ntakiheryo, Yehova onnihimya wira onanariwa pooti okumiherya itthu sootakhala, nave wuupuwelela itthu soohiloka, pooti omwiiriha mutthu oraruwa. (Matheyo 5:21, 22, 27, 28) Neemererya weettihiwa ni malakiheryo a Yehova ni okhalana yowuupuxerya ya murima yowiixuttihiwa saana, nnoopakaka soothanla sininvuwiha Muluku.​—1 aKorinto 10:31.

11. Moota xeeni yowuupuxerya ya murima ya maKristau envirikana aya?

¹¹ Hata maKristau arina yowuupuxerya ya murima yiixuttihiwe ni Biibiliya, pooti okhalana moonelo woovirikana. Ntakiheryo nimosa ti na eviinyu. Biibiliya khonikhoottiha owurya eviinyu, masi onninlopola wira nihiwuryeke vanceene aahiiso ohapaliwa. (Miruku 20:1; 1 Timótheyo 3:8) Niireke eyo entaphulela wira muKristau ohinwuryexa, khonitthuneya wuupuwela okathi ompaka awe soothanla? Nnaari. Hata yowuupuxerya ya murima awe emweemereryaka owurya eviinyu, ohaana wuupuwela yowuupuxerya ya murima ya atthu akina.

12. ARoma 14:21 onnikhaliherya sai ottittimiha yowuupuxerya ya murima ya atthu akina?

¹² Murummwa Paulo ohooniherya otthuneya waya ottittimiha yowuupuxerya ya murima ya atthu akina, oriki: “Fatari ohikhura enama, walá ohiwurya evinyu n’uhìra etthu ekina, enimukwattuliha munn’inyu”. (aRoma 14:21) Hata nrina ene ehakhi yoowurya, nihaana wiimananiha ohiwurya nasuwela wira pooti oxankiha yowuupuxerya ya murima ya munna wala murokora. Woonasa wene, ohinatthi wiixutta ekeekhai eviinyu yaahimpahula, nto vano khoniphavela-tho owurya. Tivonto, khanimphavela opaka etthu yaarowa omwiiriha otthikela soolema aarina awe. (1 aKorinto 6:9, 10) Akhala wira munna owo aahiiso murokora ohoorwa onixukurya, niireke nnoomukhanyererya owurya eviinyu ohiphavelaka? Nnaari!

13. Timootheyo aattittiminhe sai yowuupuxerya ya murima ya atthu akina wira aakhaliherye weemererya ihapari sooreera?

¹³ Vaavo Timootheyo aari awe mmiravo, aaheemererya winnuwihiwa, nnaamwi vahaakhweyale opaka eyo. Maana aanisuwela wira winnuwihiwa yaari etthu yootthuneya wa aYuda aarowa awe waalaleeryaka. Ntoko Paulo, Timootheyo khaaphavela waakwattuliha atthu ale. (Miteko 16:3; 1 aKorinto 9:19-23) Niireke munimwiimananiha oleva itthu sikina wira mwaakhaliherye atthu akina?

14, 15. (a) Ninrowa olipa sai momunepani? (b) MuKristau oolipa momunepani onaathokorerya sai atthu akina?

¹⁴ Otheene ahu nihaana ohiya “ottuli mwixuttiho wopajerya w’oKristu”, wira “netteke nrowaka oholo”. (aHéberi 6:1) Osuwela ekeekhai khalai, khontaphulela wira noolipa momunepani. Maana onitthuneya wiimananiha wira nlipe momunepani. Nihaana ovikaniha wuncererya osuwela ni wiiwexexa wahu ekeekhai. Tivonto nihaana omusoma Biibiliya khula nihiku. (Esalimo 1:1-3) Niireke munnimusoma Biibiliya khula nihiku? Mwapaka eyo, enimookhaliheryani wiiwexexa malamulo ni malakiheryo a Yehova.

¹⁵ Tinivi nri nlamulo nuulupalexa wa maKristau? Ti nlamulo na ophenta. Yesu aahaaleela awiixutti awe wira: “Atthu othene anosuwela wira mwá awixutti aka, mwaphentanaka mukina ni mukhw’awe”. (Yohani 13:35) Tthiri ophenta onnihimmwa okhala nlamulo nuulupale ‘nimmaleliha soruma sa Muluku’. (Yakobo 2:8; aRoma 13:10) Khanintikhina eyo, maana Biibiliya onihimya wira: “Muluku ophentá”. (1 Yohani 4:8) Ophenta khahiyo olavula paahi. Ti maana aya Muluku onooniherya awe ophenta ni miteko sawe. Murummwa Yohani olempe so: “Mota Muluku ònihenryawe oniphenta wawe t’ula: Owo òmuruma Mwan’awe mmosene orwa vathí-va, wira hiyo nikhalane ekumi mwa yowo”. (1 Yohani 4:9) Vaavo nnimphenta ahu Yehova, Yesu, anna ni atthu akina, ninnooniherya wira na maKristau oolipa momunepani.​—Matheyo 22:37-39.

16. Moota xeeni olipa momunepani onnikhaliherya aya otepa ovaha efaita malakiheryo?

¹⁶ Vaavo nintepa ahu olipa momunepani, nnootepaka ovaha efaita malakiheryo. Okhala wene, malamulo tooluluwanya,  masi malakiheryo annivariheleya muteko myaha soovirikana. Mwa ntakiheryo, mwaana pooti ohisuwela otthuneya waya waasyaka apatthani oohiloka. Nto anamuyari awe ahaana onvaha malamulo wira amukhapelele. (1 aKorinto 15:33) Masi vaavo mwaana owo oninnuwa awe, onimwiixutta ovarihela muteko malakiheryo a Biibiliya. Nto malakiheryo awo, anoomukhaliherya waathanla apatthani ooloka. (Mmusome 1 aKorinto 13:11; 14:20.) Vaavo nintepa ahu wuupuwela malakiheryo a Biibiliya, yowuupuxerya ya murima ahu enootepaka ororomeleya. Nto eyo enoonikhaliherya osuwela ele Muluku oniphavela awe wira nipakeke khula mwaha.

17. Itthu xeeni Yehova onivanhe awe sinnikhaliherya opaka soothanla mwa miruku?

¹⁷ Yehova oonivaha itthu sinnikhaliherya wira nipakeke soothanla sinimusivela. MBiibiliyani ninniphwanya malamulo ni malakiheryo annikhaliherya okhala ‘olikanyihiwa murohoni [ni], olipiheriwa ovara miteko sothene sorera’. (2 Timótheyo 3:16, 17) Tthiri malakiheryo a mBiibiliyani anninikhaliherya osuwela muupuwelo wa Yehova. Nto wira nisuwele nihaana wiimananiha vanceene. (aÉfeso 5:17) Nave pooti omurumeela Índice das Publicações da Torre de Vigia, Eliivuru Enaakhaliherya Anamoona a Yehova Otokosa Myaha Sikumiheriwe, Watchtower Library, EBIBLIOTEKA ONLAINE ya Torre de Vigia ni aplikativo JW Library. Nto vaavo ninrumeela ahu ikaruma iyo, sinoonikhaliherya ottottela mureerelo yoosoma ahu aahiiso naamulompaka Muluku vatthokoni.

18. Exeeni enikhumelela vaavo ninvarihela ahu muteko malamulo ni malakiheryo a Yehova?

¹⁸ Tthiri okumi ahu onniloka vaavo ninvarihela ahu muteko malamulo ni malakiheryo a Yehova! Esalimo 119:97-100 enihimya so: “Kinniphenta vanjene ikano sanyu: kinnitthokelela seiyo nihiku ti nihiku. Soruma sanyu sinnikivaha ankhili wavikana awanani aka: tthiri miyo kinnitthara seiyo mahiku othene. Miyo kokhalana miruku wavikana awixuttihi aka, okhala wira kinnitthokelela molumo anyu. Miyo kokhalana osuwelexa wavikana mahumu, okhala wira kinnettela otthuna wanyu”. Vaavo nnuupuwelela ahu vanceene malamulo ni malakiheryo a Muluku, nnoopakaka itthu mwa miruku. Nave vaavo ninrumeela ahu malamulo ni malakiheryo a Muluku wira niixuttihe yowuupuxerya ya murima ahu, ninrowa okhala “atthu òkhomala murohoni, nikaweliwaka munnuwelo womalela wa Kristu”.​—aÉfeso 4:13.