Tiithi awe Robowamu iihaniwa Salomoni, aahaalamulela aIsarayeli iyaakha 40. (1 Mamwene 11:42) Nuumala Salomoni okhwa, Robowamu aahikhuma oYerusalemu orowaka oSikhemi wira akhalihiwe mwene. (2 Wahala 10:1) Niireke aanoova okhala mwene? Salomoni aanisuweliwa mwaha wookhalana ankhili anceene. Moohipisa, Robowamu aahaana wooniherya akhala wira aahikhalana ankhili yaaphiyerya ophuka mwaha wooxankiha.

Okhala wira aIsarayeli yaanihasuliwa, yaahaaruma anamitthaka orowa omuleela Robowamu ele yaaphavela aya wira opake, ariki: “Atith’inyu yahinihaxa vanjene: vano nyuwo nvukule opotthiwa wahu n’atith’inyu awo, nveyihe miritti solemela sanireiyaya: mwira siso, hiyo nnowiwelelakani”.​—2 Wahala 10:3, 4.

Robowamu aahaana opaka yoothanla yooxankiha. Nto eemerenrye ele atthu yaavekenle aya, owo ni emusi awe ni ale aakhalana awe, khiyaarowa okhalana mireerelo sikina yaarina aya. Vaakhanle wira aamukhootta yooveka ya atthu ale, awo yammurukunuwela. Exeeni aapanke awe? Wanipacerya, aahaavekela miruku mahumu yeettanne Salomoni. Awo yaahimuleela wira aahaana opaka ele aavekeliwe awe. Nave-tho, Robowamu aahaakoha amiravo annuwanne awe, khuthanla waahaaxa atthu aaleelaka wira: “Vano miyo kinotepa olemeliha miritti sanyu seiyo: atithi aka yahiwiputthani ni mirepettho: nto miyo kinowiputthani ni kwekweru”.​—2 Wahala 10:6-14.

Niireke munniweha etthu eniixutta ahu? Olelo-va, nookhalana anna anceene oowuuluvala apacenrye khalai omurumeela Yehova, aniwerya onikhaliherya opaka soothanla sooloka. Nihaana owiriyana miruku saya.​—Yobi 12:12.

Robowamu aahaathukumanya anakhotto awe wira yawane ni maloko ale 10. Masi Yehova aahimuruma profeta Xemaya orowa waaleela wira: “Muhirowé watuphela amus’inyu, atthu a Isarayeli,  . . . Tivó khula mutthu atthikeleke owannyawe”.​—1 Mamwene 12:21-24. *—Nwehe enoota.

Niireke vaahikhweya Robowamu omwiiwelela Yehova? Exeeni atthu ale yaarowa aya wuupuwela sa mwene aya musya? Owo iira aaleelale ene wira aarowa waahukhumu “ni kwekweru” aahiiso murepettho. Masi khaarowa owerya okhoottiherya omwareya wa atthu ale! (Mulikanyihe ni 2 Wahala 13:7.) Moohicikha ele atthu yuupuwela aya, mwene ni anakhotto awe “yahìwelela molumo Àpwiya, khutthikelasa elapo aya, ntoko sàrumalyaya Apwiya”.

Exeeni nniixutta ahu? Nniixutta wira okathi wotheene nihaana omwiiwelela Muluku hata atthu akina aninyoholaka. Tthiri Muluku onninreeliha vaavo nimmwiiwelela ahu.​—Otumererya 28:2.

Niireke Robowamu aahireelihiwa mwaha wowiiwelela? Nlelo Robowamu aanilamulela nihimo na Yuda ni Beniyamini, ni aahiteka ipooma isya mittetthe iyo. Nave-tho aahiteka ipooma sikina, “khulipiha mittetthe iyo vanjene”. (2 Wahala 11:5-12) Etthu yootepa otthuneya, okhala wira waahikhala okathi aiwelenle awe malamulo a Yehova. Okhala wira omwene wa mahimo 10 waahipacerya waakokhorela amuluku eethiru, atthu anceene yaanirowa oYerusalemu omukhaliherya Robowamu ni okokhorela wekeekhai. (2 Wahala 11:16, 17) Tivo, mwaha wa Robowamu omwiiwelela Yehova omwene awe waahilipa.

Vaavo omwene wa Robowamu waalimpe aya, owo aahipaka etthu yoololo. Maana, aahihiya wiiwelela malamulo a Yehova, onaakokhorela amuluku eethiru! Exeeni yaamwiirinhe? Niireke aahapuxiwe ni maama awe, yoowo aari a nloko na Amoni? (1 Mamwene 14:21) Hiyo khaninsuwela. Masi nloko nne naahitthara ntakiheryo nawe noohiloka. Tivonto Yehova aahimweemererya Mwene Xixaki a wEjiitu, otuphela ipooma sinceene sa omwene wa oYuda. Eyo yaahiiraneya hata Robowamu aalipinhe vanceene mittetthe iye!​—1 Mamwene 14:22-24; 2 Wahala 12:1-4.

Itthu saahitepa otakhala vaavo Xixaki ni anakhotto awe yaamutuphenle aya Yerusalemu, epooma Robowamu aalamulela awe. Okathi ole, profeta Xemaya aahimuleela Robowamu ni makhulupale awe muhupi wa Muluku waahimya wira: “Nyuwo mokihiya, tivó miyo kihovahereryani mmatatani mwa Xixaki”. Robowamu oonenle sai yoolaka ele? Owo aahaakhulela! Biibiliya onihimya wira: “Makhulupale a Isarayeli vamosá ni mwené yahìyeviha, ehimyaka wira: Apwiya t’àxariya”. Tivonto, Yehova aahimoopola Robowamu nto Yerusalemu khaapwetexiwe.​—2 Wahala 12:5-7, 12.

Nuumala-vo, Robowamu aahivikaniha olamulela oYuda. Ohinatthi okhwa, aahaavaha itthu sinceene anaawe aaxilopwana. Woonasa wene, Robowamu aaphavela osuwelexa akhala wira khiyaarowa ommwareela munnaya Abiya, yoowo aarowa okhala mwene. (2 Wahala 11:21-23) Mwaha woopaka eyo, Robowamu aahooniherya okhalana ankhili ovikana okathi aari awe mmiravo.

Nnaamwi Robowamu aapanke itthu sikina sooloka, Biibiliya onnilavula olamulelo awe oriki: “Robowamu ahìra sotakhala”. Nthowa xeeni? Nthowa noowi, khaatthanre “Apwiya ni murim’awe wothene”. Ti maana aya Yehova ahaasiveliwa awe ni yena.​—2 Wahala 12:14.

Yowiiraneya ya Robowamu enniixuttiha exeeni? Ikwaha sikina owo aahimwiiwelela Muluku. Nave aahaapakela itthu sooloka atthu a Yehova. Hata vaari siiso, owo khaarina wataana wooloka ni Yehova. Nave-tho, khaamusivelinhe Muluku ni murima awe wotheene. Maana aahihiya opaka itthu sooloka onaakokhorela amuluku eethiru. Woonasa wene, munniikoha wira: ‘Okathi Robowamu eemerenrye awe yoolaka ya Yehova, niireke aapaka eyo mwaha woothanana soovonya sawe ophavelaka omusiveliha Muluku? Niireke aapaka eyo mwaha woorummwa ni atthu akina?’ (2 Wahala 11:3, 4; 12:6) Muhoolo mwaya, aahitthikela  opaka itthu sootakhala. Owo aahivirikana ni Mwene Davidi! Ekeekhai wira Davidi aahipaka itampi. Masi owo aahittharuwa ni murima wotheene. Nave, aanimphenta Yehova ni okokhorela wekeekhai.​—1 Mamwene 14:8; Esalimo 51:3, 19; 63:2.

Nihiixutta itthu sinceene ni yowiiraneya ela ya mBiibiliyani. Ti vooloka atthu waakhapelela amusi aya ni waareerela murima atthu akina. Masi wira neemereriwe ni Yehova, nihaana omukokhorela ntoko omphavela awe ni olipiha wataana wahu ni yena.

Wira niwerye opaka eyo, nihaana omphenta vanceene Yehova. Ntoko siisaale onitthuneya aya ohela ikhuni wira mooro ohittiphe, ninnivikaniha omphenta Yehova nimusomaka Biibiliya khula nihiku, wuupuwelela ele enisoma ahu ni ovikaniha ovekela. (Esalimo 1:2; aRoma 12:12) Tivonto, ophenta iwo onooniiriha opaka itthu sinimusivela Yehova. Nave-tho, onoonikhaliherya othanana napaka etampi ni ovekela wira Yehova onilevelele. Nto khaninrowa omutakiha Robowamu, masi ninrowa ovikaniha ororomeleya neettelaka okokhorela wekeekhai.​—Yuda 20, 21.