1. Etthu xeeni Yehova onivanhe awe enniiriha ohakalala?

NINNIHAKALALA wiiwa wira arumeyi a Muluku annihiya muthuko aya waaryaka! Mwaakha wa 2017, anamoona a Yehova ahiiriha soosoma sa Biibiliya sinivikana 10.000.000. Nave yaahirwa atthu imilyau sinceene ansiveliwa ekeekhai wuupuwelela okhwa wa Yesu, ni ahiixutta ophenta Yehova oonihenrye awe onivahaka mukuttho.​—1 Yohani 4:9.

2, 3. (a) Niireke ovirikana mattaava onninikhoottiherya “warya ntoko mithuko sa mulaponi”? (b) Exeeni ninrowa ahu othokorerya mwaha ola?

² Olumwenku wotheene, Anamoona a Yehova annilavula mattaava oovirikana. Hata vari siiso, awo anniwerya onvuwiha Yehova ntoko emusi yowiiraana. (Wisupulula 7:9) Nnaamwi nlavulaka mattaava oovirikana aahiiso nikhalaka ilapo soovirikana, ninnivikaniha “warya ntoko mithuko sa mulaponi”.​—aFilipi 2:15.

³ Muteko ahu woolaleerya, wiiraana wahu ni nthiti nahu, sinninvuwiha Yehova ni owiiriha atthu weemererya ekeekhai.  Ninrowa ohiya sai muthuko ahu waaryaka inamuna iya tthaaru?​—Mmusome Matheyo 5:14-16.

4, 5. (a) Ohiya paahi olaleerya, ninrowa ohiya sai muthuko ahu waaryaka? (b) Waareerela murima atthu onikumiherya mireerelo xeeni? (Nwehe efootu yoopacerya.)

⁴ Muteko woolaleerya ni waapaka awiixutti enamuna yootepa otthuneya ya ohiya muthuko ahu waaryaka. (Matheyo 28:19, 20) Mwaakha wa 1925, waahikumiheriwa mwaha oni: “Waarya Eriyari ya Epiphi”, waahimya wira mahiku ookiserya khuuvo aarowa owerya ororomeleya wa Pwiya akhala wira “khonihiya muthuko awe waaryaka”. Nave yaahincererya wira: “Mutthu owo ohaana waalaleerya atthu a valaponi ihapari sooreera, ni okhala moovariha ni waarya iwo”. (The Watch Tower [Owehaweha], 1 a Junyo, 1925) Ohiya paahi muteko woolaleerya, mweettelo ahu onninvuwiha Yehova. Nto vaavo ninlaleerya ahu, atthu anceene anniniweha. Waathokorerya saana ni waakhomasa onoowiiriha onithokorerya saana ni omuttittimiha Muluku onimukokhorela ahu.

⁵ Yesu aahaaleela awiixutti awe wira: “Vano, mukelaka mpani-mmo, muxonttele murettele”. (Matheyo 10:12) Tthiri muttetthe Yesu aalaleerya awe, atthu yaaniweemererya aletto okela mpaani. Masi, mittetthe sinceene olelo-va yoolema eyo khekhanle. Axineene etthoko anninyoonyiheya yanweha muletto ori ene vamukhora vaya. Masi akhala wira ninnaareerela murima ni opatthaneya, eyo enoowiiriha ohixanka. Vaavo munlaleerya anyu murumeelaka ekarinyu, atthu anaweha wira munnaakhomasa ni munnipatthaneya, niireke eyo khenrowa owiiriha okuxa iliivuru? Tthiri eyo enoowiiriha ophavela ovaanela ni nyuwo!

6. Exeeni enaakhaliherya anamathelana amosa oowuuluvala ovikaniha olaleerya?

⁶ Mwaha woowereyasiwa, anamathelana oowuuluvala a wInglaterra, khaniwerya olaleerya empa ni empa ntoko yiira aya khalai. Tivo, awo annipweha iliivuru vameesa waattamela empa aya. Okhala wira yaattamenle exikola, annipweha iliivuru sinaasivela anamuyari yaawo anrwa waakuxa anaaya. Anamuyari akina annikuxa iliivuru iyo, ohela muhina eliivuru Os Jovens Perguntam—Respostas Práticas, Evolume 1 ni 2. Murokora mmosa pioneera, onnilaleerya ni anamathelana ale. Anamuyari annoona wira owo toopatthaneya ni anamathelana ale annaakhaliherya atthu akina. Namuyari mmosa oopacerya omusoma Biibiliya.

7. Munrowa waakhaliherya sai ale atthyanwe elapo aya ari muttetthe anyu?

⁷ Mahiku ala atthu anceene annitthyawa ilapo saya arowaka okhala ilapo sikina. Munrowa opaka exeeni wira mwaakhaliherye ale atthyanwe elapo aya omusuwela Yehova? Wanipacerya, muhaana wiixutta moota wowaakoha ihaali ni nttaava naya. Ya nenli, nyuwo pooti omurumeela aplikativo JW Language, wira mwiixutte moolumo vakhaani  anrowa owiiriha ophavela ovaanela ni nyuwo. Ya neeraru, nyuwo pooti owooniherya eviidiyu aahiiso iliivuru sa nttaava naya siri va jw.org.​—Otumererya 10:19.

8, 9. (a) Mithukumano sa eriyari ya esumana sinnikhaliherya sai? (b) Anamuyari anrowa waakhaliherya sai anaaya ovaha ikomentaario soovara murima?

⁸ Yehova oonivaha ele enitthuneya wira nikhumeleke saana naalaleeryaka. Mwa ntakiheryo, ele eniixutta ahu Muthukumano wa Okumi ni Orummwa Ahu wa eKristau, enninikhaliherya osuwela moota woopaka mikwaha sootthikela oxukurya ni opaceriha soosoma sa Biibiliya.

⁹ Vaavo ale annixukurya anrwa aya mithukumano sahu, awo annitikinihiwa ni ikomentaario anamwane anivaha aya. Nave nyuwo pooti owiixuttiha aniinyu okomentari arumeelaka moolumo aya. Atthu akina ahiixutta ekeekhai mwaha woowiiwa anamwane avahaka ikomentaario soovara murima.​—1 aKorinto 14:25.

10. Moota xeeni omulompa Muluku vatthokoni onikhaliherya aya itthoko otepa wiiraana?

¹⁰ Vaavo nimmananiha ahu okhaliherya etthoko ahu nivaraka moowiirana ni murettele, ninninvuwiha Yehova. Mwa ntakiheryo, akhala wira mwa namuyari, muhicompeleke Omulompa Muluku Vatthokoni vanyu. Imusi sinceene, sinniweha vamosa eprograma ya JW Broadcasting, nuumala-vo annithokorerya ele yiixuntte aya. Muupuweleke wira moota munimulakiherya anyu mwaana, ohaana ovirikana ni moota  munimulakiherya anyu mmiravo. Tivonto mmananiheke omukhaliherya khula mutthu a vatthokoni vanyu ottottela mureerelo omulompa Muluku.​—Esalimo 148:12, 13.

11-13. Ninrowa okhaliherya sai muloko ahu okhala wowiiraana?

¹¹ Hata muri ene mmiravo, munoowerya omukhaliherya khula mutthu mmulokoni woona wira ta faita. Enamuna emosa yoopaka eyo ti waapaka apatthani anna ni arokora oowuuluvala. Mwaakoheke etthu enaakhaliherya ovikaniha omurumeela Yehova iyaakha sinceene. Awo anoowiixuttihani itthu sinceene sootthuneya. Nto eyo enimwaalipiha awo ni nyuwo! Hata nri ene amiravo aahiiso nuuluvanle ene, nnoowerya owiiriha ale annixukurya Mmulokoni woona wira annaakheliwa saana. Nyuwo pooti omukhomasa, ovaanelana, onvaha opuro wookilaathi ni omusuweliha anna. Nave mmwiirihe woona wira ohaakheliwa saana.

¹² Akhala wira moothanliwa ohoolela muthukumano woorowa olaleerya, muhaana waakhaliherya anna oowuuluvala ovikaniha ohiya muthuko aya waaryaka. Nto muhaaroiheke muttetthe woorakamela. Nave mwaathanleke amiravo wira alaleeryeke ni anna awo. Okathi mukina anna ni arokora oowuuluvala ni ale aniwereyasiwa annikhulumuwa mwaha woowi khaniwerya olaleerya vanceene ntoko yiira aya khalai. Tthiri anoolipa vanceene osuwela wira munnaathokorerya ni munnisuwela mukhalelo aya. Nnaamwi yuuluvanle ene aahiiso yiixuntte ene ekeekhai khalai, waareerela wanyu murima onoowiiriha ovikaniha olaleerya mooluttuweliwa.​—Onamukuttho 19:32.

¹³ AIsarayeli yaanisiveliwa omukokhorela Yehova mowiiraana. Nasaalimo olempe so: “Mòne: ti yorera ni ti yosivela tthiri wira amusi [anna] ekhaleke vamosá”. (Musome Esalimo 133:1, 2.) Nasaalimo, oolikanyiha wiiraana ni makhura oowunkhela, yaawo anreeriha erutthu. Moolikanasa, nnoowerya waalipiha anna ni arokora vaavo nnaaphenta ahu ni waareerela murima. Nto eyo enniiriha muloko okhala wowiiraana. Niireke munoomananiha waasuwela saana anna ni arokora a muloko anyu?​—2 aKorinto 6:11-13.

14. Munrowa ohiya sai muthuko anyu waaryaka muttetthe anyu?

¹⁴ Moohicikha etthu sa opuro onikhala anyu, munoowerya ohiya muthuko anyu waaryaka. Oreera wanyu murima pooti owiiriha ale mwaattamanne anyu ophavela wiixutta voohimya sa Yehova. Mwiikoheke so: ‘Ale kaattamanne aka ankoonela sai? Vate vaka ti vooratteleya? Atthu kaattamanne aka anoonela sai? Kiireke kinnaakhaliherya ale kaattamanne aka?’ Nave mwaakoheke Anamoona akina moota oreera waya murima ni ntakiheryo naya nooloka naakhalihenrye aya amusi aya, atthu yaattamanne aya ni anivarana aya muteko aahiiso anaxikola akhwaaya.​—aÉfeso 5:9.

15. Xeeni nintthuneya ahu ovikaniha owehaweha?

¹⁵ Osuwela okathi onkhala ahu, onoonikhaliherya ovikaniha ohiya muthuko ahu  waaryaka. Yesu aamakela waaleela awiixutti awe wira: “Mulipeleleke” aahiiso nwehaweheke. (Matheyo 24:42; 25:13; 26:41) Wuupuwela wira “maxakha malupale” ari ottaiwene, khonrowa oniiriha oluttuweliwa waakhaliherya atthu omusuwela Yehova. (Matheyo 24:21) Nto eyo enimwiiriha muthuko ahu ovukuwa vakhaani-vakhaani mpakha ottipha.

16, 17. Muhaana opaka exeeni wira nvikaniheke owehaweha?

¹⁶ Mahiku ala, ti vootthuneya ovikaniha owehaweha ovikana khalai. Maana mikhalelo sa olumwenku ola sinootepa otakhala. Tthiri noosuwela wira wanikisa onoophiya okathi Yehova othanlale awe. (Matheyo 24:42-44) Nave nihaana opixa murima ni owehexexa etthuvo ahu ya muhoolo. Nto mmusomeke Biibiliya khula nihiku ni nvikaniheke onvekela Yehova. (1 Pedru 4:7) Nave mwiixutteke ni sookumanana sa anna ni arokora apacenrye khalai omurumeela Yehova. Mwa ntakiheryo, nyuwo pooti osoma sowiiraneya sa mweekumini, ntoko mwaha ola: “Setenta anos ‘agarrando a aba da veste de um judeu’”, waakumiheriwe A Sentinela, 15 a Abril, 2012 ipaaxina 18-21.

¹⁷ Nave nyuwo mmurumeeleke Yehova  mooluttuweliwa. Mwaareereleke murima atthu akina ni mutthekuleke ni anna ni arokora. Nto munoohakalalaka ni munrowa woonaka wira okathi onnaakuva ovira. (aÉfeso 5:16) Mwa iyaakha 100, arumeyi a Yehova aavara muteko munceene. Nave olelo-va, khoreere muteko. Maana muteko wa Yehova onootepa wunnuwa ovikana khalai. Tthiri muthuko ahu onootepa waarya!

18, 19. Moota xeeni axitokweene annikhaliherya aya omurumeela Yehova mooluttuweliwa? Nvahe ntakiheryo.

¹⁸ Nnaamwi nivonyaka ikwaha sinceene, Yehova onnineemererya omurumeela. Wira onikhaliherye, owo oonivaha “sovaha sawe”, niire so, axitokweene a mmulokoni. (Mmusome aÉfeso 4:8, 11, 12.) Tivonto vaavo axitokweene anooxukuryayani, muttottele mureerelo okathi owo, wira mwiixutte osuwela ni miruku saya.

¹⁹ Mwa ntakiheryo, anamathelana amosa a wInglaterra yaahikhalana mixankiho mukasamentoni mwaya. Nto yaahaavekela nikhaliheryo axitokweene anli. Amuthiyana oona wira iyawe khaahoolela miteko sa Yehova vatthokoni vale. Amulopwana oona wira khiixuttiha saana ni aaheemererya wira khaamulompa Muluku vatthokoni. Axitokweene ale yaahaakhaliherya anamathelana ale wuupuwela ntakiheryo na Yesu. Nto yaahimulipiha amulopwana otakiha moota Yesu aakhapelela awe awiixutti awe. Nave yaahaatumererya aathiyana wira ampixeryeke murima iyaya. Nave-tho, yaahaavaha anamathelana ale malakiheryo a moota woomulompa Muluku vatthokoni ni anaaya anli. (aÉfeso 5:21-29) Amulopwana ohiimananiha vanceene wira okhale muhooleli a etthoko ooloka. Nave axitokweene yaahimulipiha wira ovikaniheke ororomela munepa wa Yehova. Tthiri ophenta ni oreera murima wa axitokweene, wookhaliherya vanceene emusi ele!

20. Exeeni enrowa okhumelela mwahiya muthuko anyu waaryaka?

²⁰ Esaalimo 128:1, enihimya so: “Òreriwa t’ale anattittimiha Apwiya n’uwova, yale anettela iphiro Saya”. Munoohakalala akhala wira munoohiya muthuko anyu waaryaka. Tivonto nwiixuttiheke akina voohimya sa Muluku, mmananihe okhaliherya emusi anyu vamosa ni muloko okhala wowiiraana ni nvikaniheke owehaweha. Tthiri, atthu akina anooweha ntakiheryo nanyu nooloka nto anrowa ophavelaka onvuwiha Tiithi ihu, Yehova.​—Matheyo 5:16.