NINKHALA olumwenku wooxankiha. Ti maana aya vanivila aya ophwanya murettele. Hata nrina ene murettele, owo pooti omala. Nto Biibiliya onihimya exeeni enrowa onikhaliherya ophwanya murettele wekeekhai ni ohinimala? Nave ninrowa waakhaliherya sai akina ophwanya murettele?

Murettele wekeekhai, ontaphulela ovareleleya ni okhapeleleya. Nave ontaphulela okhalana apatthani ooloka ni otepexa wene, wataana ni Muluku. Ninwerya sai opaka eyo?

Malamulo ni malakiheryo a Yehova taniwerya onikhaliherya. Vaavo nniiwelela ahu, ninnooniherya wira ninnimuroromela Yehova ni nimphavela okhalana wataana wooloka ni yena. (Yeremiya 17:7, 8; Yakobo 2:22, 23) Nto Yehova onoonaattamela ni onivaha murettele wa mmuupuweloni. Yesaya 32:17, oni: “Exariya enoruha murettele: ehakhi enoruha witthyala ni mukhaliheryo wa mahiku othene”. Tivo, nnoophwanya murettele vaavo nimmwiiwelela ahu Yehova ni murima wotheene.​—Yesaya 48:18, 19.

Nave-tho, Yehova oonivaha etthu yootthuneya wira niphwanye murettele ohinimala. Etthu ene ti munepa awe wootteela.​—Miteko 9:31.

Murummwa Paulo ohimmye wira murettele oniirela mpantta yoowiima ya munepa. (aGalasia 5:22, 23) Okhala wira munepa wa Muluku onnikumiherya murettele, nihaana weemya wira munepa owo wootteela oneettiheke. Ninrowa opaka sai eyo?

Yoopacerya, nihaana osoma Nuulumo na Muluku khula nihiku. (Esalimo 1:2, 3) Vaavo nnuupuwelela ahu ele esomme ahu, munepa wootteela onoonikhaliherya wiiwexexa moota  Yehova onuupuwela awe voohimya sa myaha soovirikana. Mwa ntakiheryo, ninniixutta moota Muluku onikhaliha awe murettele ni moota murettele owo ori aya wootthuneya wa yena. Vaavo nneettela ahu ele eniixutta ahu mBiibiliyani, ninrowa otepaka okhalana murettele mookumini mwahu.​—Miruku 3:1, 2.

Ya nenli, nihaana ovekela munepa wootteela wa Muluku. (Luka 11:13) Yehova onnaaleiherya ale anivekela munepa awe wira: “Murettele wa Muluku, onvikana osuwela wa mutthu, onosuka mirima sanyu n’iroho sanyu mwa Yesu Kristu”. (aFilipi 4:6, 7) Vaavo nintepa ahu omwaattamela Yehova ni ororomela munepa awe, eyo enoonivaha murettele wekeekhai mmuupuweloni mwahu.​—aRoma 15:13.

Biibiliya ohaakhaliherya atthu anceene opaka marukunuxo mookumini mwaya. Nto vano aakhalana murettele ni Yehova, muupuwelo aya ni atthu akina. Awenrye sai opaka marukunuxo awo?

Ahinatthi osuwela ekeekhai, anna ni arokora akina yaari oowaakuva onanariwa ni oowali. Masi aamananiha opaka marukunuxo, nto vano awo tooreera murima, oopixa murima ni a murettele. * (Nwehe enoota.) (Miruku 29:22) Nwehe moota munna oniihaniwa David ni murokora Rachel, apanke aya marukunuxo awo.

Ohinatthi osuwela ekeekhai, ikwaha sinceene David aanaavaanyiha akina ni khaalavuliha saana amusi awe. Masi aahoona wira aahaana oturuka mukhalelo awe. Owenrye sai ophwanya murettele? David onihimya wira: “Kaahipacerya weettela malakiheryo a Biibiliya, nto eyo ehincererya nttittimiho vatthokoni vaka”.

Rachel innuwale etthoko ya atthu oowaakuva  onanariwa. Owo onihimya so: “Mpakha olelo-va, kinniwanana muxankiho ola, okhala wira kinnuwale etthoko ya atthu oowaakuva onanariwa”. Exeeni emukhalihenrye Rachel ophwanya murettele? Owo onihimya so: “Ovekela ni omuroromela Yehova”.

David ni Rachel, matakiheryo manli a atthu anceene vano aphwannye murettele mwaha woweettela malakiheryo a Biibiliya ni ororomela munepa wootteela. Hata nikhalaka olumwenku atthu anaakuva aya onanariwa, nnoowerya ophwanya murettele mmuupuweloni mwahu. Eyo enooniiriha okhala vamosa ni amusi ahu ni anna ni arokora mmulokoni. Nave Yehova onnileela wira nihaana “wiwanana n’atthu othene”. (aRoma 12:18) Niireke vanniweryaneya? Xeeni vanitthuneya ahu ophavela murettele ni atthu akina?

Hiyo ninlaleya muhupi wa murettele voohimya sa Omwene wa Muluku. (Yesaya 9:5, 6; Matheyo 24:14) Atthu anceene annisiveliwa ni annaakhela muhupi owo. Nto eyo, enniwiiriha okhalana nlipelelo, ohiya onanariwa mwaha wa itthu soohiloka sa olumwenku ola. Vano aakhalana nlipelelo neekeekhai na muhoolo, nto eyo enniwiiriha ‘ophavela murettele’.​—Esalimo 34:15.

Masi khahiyo wira wanipacerya atthu otheene annisiveliwa muhupi ahu. (Yohani 3:19) Hata atthu akina ahiphavelaka, Muluku onninivaha munepa awe. Nto owo onninikhaliherya ovikaniha okhala a murettele ni olaleerya ni nttittimiho; nittharaka miruku sa Yesu sini: “Vano, mukelaka mpani-mmo, muxonttele murettele. Etthoko eyo yaphwanelelá, murettele anyu okhuruwele-mo; nto yahiphwanelele, murettele owo wotthikeleni”. (Matheyo 10:11-13) Otthara malakiheryo ala, anninikhaliherya okhalana murettele hata atthu akina ahiphavelaka. Nave ninnisuwela wira okathi mukina, hiyo pooti waakhaliherya atthu awo.

Nave-tho, ninnikhaliha murettele vaavo ninlavula ahu mwa nttittimiho ni ale aneettiha elapo, hata ahisiveliwaka ni muteko ahu. Mwa ntakiheryo, elapo emosa ya wÁfrica, guvernu kheemererya otekiwa Ipa sa Omwene. Anna yaanisuwela wira yaahaana weererya ophuka mwaha ole ni murettele. Vano yaahimuruma munna aatonko okhala misionaario elapo ele, orowa olavula ni Embaixador a wInglaterra, wira omutthokiherye muteko wa murettele wa Anamoona a Yehova.

Munna ole onihimya so: “Nuumala ophiya, moota aawanre awe muthiyana aakaakhenle, kaahoona wira aari a nloko kiixuntte aka nttaava naya. Nto kaahimukhomasa kirumeelaka nttaava nawe. Otikinihiwe ene, aahikikoha wira: ‘Murwenle-ni nno?’ Mwa nttittimiho kaamulenle wira kiniphavela olavula ni Embaixador. Muthiyana ole aahimwiitthana mukhulupale ole, nto nuumala ophiya, aahikilavuliha ni nttaava na elapo ele. Nave, aahikiwiriyana saana vaavo kaamutthokiherya aka muteko wa murettele wa Anamoona”.

Nuumala mukhulupale ole owiriyana otthokiherya wa munna ole, aahisuwela oratteene muteko ahu ni aahimaliha nthalu aarina awe. Moohipisa, guvernu aahituruka yoothanla awe onaweemererya Anamoona a Yehova oteka Ipa sa Omwene. Tthiri, anna yaahihakalala vanceene! Ela enooniherya wira, vaavo nnaathokorerya ahu akina ni nttittimiho, ninnikhaliha murettele.

Olelo-va, atthu a Yehova aakhalana parayiisu oomunepani, ni annimukokhorela Yehova ni murettele. Otheene ahu nnoowerya wuncererya murettele nimananihaka wunnuuherya murettele owo mookumini mwahu. Nikupaliki wira Yehova onnisiveliwa ni hiyo. Nave elapo esya, onrowa onivaha murettele woohimala.​—2 Pedru 3:13, 14.