1, 2. (a) Murettele xeeni orina ahu vano? (b) Xeeni vahiniweryaneya aya okhalana murettele woomalela nenna-va? (Nwehe elatarato yoopacerya.)

OTHEENE ahu ninniphavela okhalana murettele, ni osyaka oxankiheya. Nto ninnimuxukhuru Yehova mwaha woonivaha “murettele wa Muluku”. Murettele owo onninikhaliherya ohikhalana miyuupuwelo sinnixankiha vanceene. (aFilipi 4:6, 7) Hiyo nihiivahererya wa Yehova, nave-tho nookhalana “murettele ni Muluku”. Nto eyo enitaphulela wira nookhalana ompatthani wooloka ni Muluku.​—aRoma 5:1.

² Masi nlelo khonatthi ophiya okathi Muluku onrowa awe oruuha murettele valaponi. Ninkhala mahiku ookiserya, ti maana aya sinikhumelela aya itthu sinceene sinnixankiha. Anamunceene tootakhala. (2 Timótheyo 3:1-4) Nave ninniwana ni Satana ni sowiixuttiha sa ethiru onikumiherya awe. (2 aKorinto 10:4, 5) Masi etthu yuulupale ennixankiha ti olupatthiwa ni amusi ahu ahinimurumeela Yehova. Awo pooti onitheyaka mwaha wa sookupali sahu aahiiso onootherya  wira ninnihonona itthoko. Ikwaha sikina pooti onihimeeryaka wira naahihiye omurumeela Yehova, weeso omusi woomala. Nooneleke sai okathi ninlupatthiwa ahu ni amusi ahu? Ninrowa ovikaniha sai okhalana murettele okathi owo?

3, 4. (a) Sowiixuttiha sa Yesu saakumihenrye exeeni? (b) Exeeni yaarowa oxankihaka omutthara Yesu?

³ Yesu aanisuwela wira aakhala atthu akina yaarowa okhootta sowiixuttiha sawe. Nave-tho aanisuwela wira awiixutti awe yaahaana olipa murima, maana akina yaarowa waalupatthaka. Olupatthiwa iwo pooti ohonona murettele wa mweemusini mwaya. Yesu aahimmye so: “Muhùpuwele wira miyo kirwenle oruha murettele mulaponi. Nkirwenle oruha murettele, kiruhale ohìwanana. Khweli, kirwenlé onvirikanyiha mwana mwamulopwana ni tithi awe, nave mwana mwamuthiyana n’ame awe, muthiyana òtheliwa ni piyamwan’awe. Awanani awe mutthu t’ale a ntthoko nawe”.​—Matheyo 10:34-36.

⁴ Exeeni Yesu aaphavela awe ohimya ni moolumo oowi ‘muhùpuwele wira kiruhale murettele’? Aaphavela wira atthu asuweleke wira okhala mwiixutti a Yesu onnikumiherya mixankiho. Mwekeekhai, ninnisuwela wira etthu Yesu aarwenle awe valaponi yaari owiixuttiha atthu voohimya sa Muluku, ohiya opwexa itthoko. (Yohani 18:37) Masi awiixutti awe yahaana osuwela wira ikwaha sikina khivaarowa okhweya okhala mutthareli a Yesu, vanceenexa vakhala wira apatthani wala amusi ahu khanimurumeela Yehova.

5. Itthu xeeni siniwiiraneela ale animutthara Yesu?

⁵ Yesu aahihimya wira ale aniphavela omutthara yahaana ovilela olupatthiwa ni amusi aya. (Matheyo 10:38) Wira awiixutti a Yesu emuhakalalihe yena, annivilela oramusiwa ni onyokhiwa ni amusi. Masi mareeliho aniphwanya aya annivikana ale anihiya aya ottuli.​—Mmusome Marko 10:29, 30.

6. Nuupuweleke exeeni okathi amusi ahu annilupattha aya?

⁶ Hata amusi ahu aninyokhaka mwaha woowi nimmukokhorela Yehova, hiyo ninnithipelela waaphenta. (Matheyo 10:37) Nave nihaana osuwela wira naahikhalane ephoole, Satana pooti orumeela waaphenta wahu amusi ahu, wira nimutthekele Yehova. Nrowe nithokorerye mixankiho vakhaani ni niwehe moota woovilela.

7. Mpakeke exeeni akhala wira ole othelanne anyu khonimurumeela Yehova?

⁷ Biibiliya onninlopola wira mutthu onithela aahiiso otheliwa, ‘onophwanya maxakha’ wala mixankiho. (1 aKorinto 7:28) Akhala wira muthelanne ni mutthu ohinimurumeela Yehova, eyo pooti wuncererya mixankiho mukasamentoni mwanyu. Hata vari siiso, muhaana okhalana moonelo wa Yehova. Owo onihimya wira nihivalaaneke wala omwalana ni ole othelanne ahu, mwaha woowi mutthu owo khonimurumeela Yehova. (1 aKorinto 7:12-16) Akhala wira iyanyu khonimurumeela Yehova ni khonihoolela emusi mmukhalelo wa omunepani, hata vari siiso muhaana omuttittimiha ntoko muhooleli a etthoko anyu. Ni akhala wira mwaarinyu khonimurumeela Yehova, nyuwo muhaana omphenta ni omukhapelela saana.​—aÉfeso 5:22, 23, 28, 29.

8. Mwiikoheke exeeni akhala wira ole othelanne anyu onnoovahani mikano sa omukokhorela Yehova?

 ⁸ Exeeni enireerela anyu opaka akhala wira ole othelanne anyu onneererya wokhoottiheryani omurumeela saana Yehova? Iyawe murokora mmosa aahimuleela mahiku aamweemiherya awe murokora ole orowa olaleerya. Akhala wira eyo enniwiiraneelani, mwiikoheke so: ‘Kiireke toko ola onikikhoottiherya omukokhorela Yehova? Nto kiireke nkiniwerya wiiwelela etthu onikivekela awe opaka?’ Okhalana ankhili ooloka, onimookhaliheryani ovukula mixankiho mukasamentoni mwanyu.​—aFilipi 4:5.

9. MuKristau onrowa waakhaliherya sai anaawe omuttittimiha namuyari aya ohinimurumeela Yehova?

⁹ Pooti okhala etthu yoovila owiixuttiha aniinyu ekeekhai, akhala wira ole othelanne anyu khonimurumeela Yehova. Mwa ntakiheryo, nyuwo muhaana owiixuttiha aniinyu wiiwelela yooruma ya mBiibiliyani eni: “Mwattittimiheke atith’inyu n’ame anyu”. (aÉfeso 6:1-3) Munrowa opaka exeeni akhala wira iyanyu wala mwaarinyu khoneettela malamulo a mBiibiliyani? Aniinyu ahaana woona ntakiheryo nanyu, wira munnimuttittimiha ole othelanne anyu. Muhaana oweha mikhalelo sooloka sa mutthu othelanne anyu, ni mmuleeleke wira munnixukhurela itthu sooloka oniwiirela aweni. Muhimuramuseke iyanyu wala mwaarinyu ohoolo wa anamwane. Ohiya-vo, mwaatthokiheryeke aniinyu wira khula mutthu ohaana othanla omurumeela Yehova wala nnaari. Owiixuttiha aniinyu omuttittimiha namuyari aya ohinimurumeela Yehova, pooti omwiiriha namuyari owo ophavela wiixutta voohimya sa Yehova.

10. Anamuyari maKristau anrowa owiixuttiha sai anaaya omphenta Yehova?

¹⁰ Anamuyari akina ahinimurumeela Yehova pooti ophavelaka wira anaaya yiireleke mpantta ifesta sa epakawu wala yiixutteke itthu sa etiini yowootha. Alopwana  akina pooti wakhoottiheryaka axaaraya ari maKristau, owiixuttiha Biibiliya anaaya. Hata vari siiso, muthiyana ootheliwa onoophavelaka inamuna sa owiixuttiha anaawe ekeekhai. (Miteko 16:1; 2 Timótheyo 3:14, 15) Mwa ntakiheryo, mulopwana ohinimurumeela Yehova pooti omukhoottiherya mwaarawe waasomiha anamwane Biibiliya wala waarowana omuthukumanoni. Nnaamwi muthiyana muKristau orowaka omwiiwelela iyawe, masi onoophavelaka inamuna sa ovaanela ni anaawe voohimya sa Biibiliya. Wira siiso, awo anoowerya wiixutta malamulo a Yehova ni osuwela etthu yooloka ni yoohiloka. (Miteko 4:19, 20) Muhoolo mwaya, anamwane awo anrowa oothanla akhala wira anniphavela omurumeela Yehova wala nnaari. * (Nwehe enoota.)​—Otumererya 30:19, 20.

11. Etthu xeeni ekhanle ookumiherya mixankiho ni amusi ahinimurumeela Yehova?

¹¹ Woonasa wene, okathi naapacenrye ahu omusoma Biibiliya ni Anamoona a Yehova, khinaahimenrye amusi ahu. Masi nuuvira okathi, waamini wahu waanincerereya, nto naahiweha wira nahaana waaleela amusi ahu wira naaphavela omurumeela Yehova. (Marko 8:38) Waaniheryasa eyo yaahikumiherya mixankiho mweemusini mwanyu. Nrowe nthokorerye itthu vakhaani mukhanle anyu oopaka wira mukhalane murettele ni amusi anyu ni nvikanihe okhala oororomeleya wa Yehova okathi omosaru.

12. Etthu xeeni khino eniwiiriha amusi ahu onilupattha, nto ninrowa owooniherya sai wira ninnithokorerya miyuupuwelo saya?

¹² Mmananihe wiihela nipuro na amusi anyu ahinimurumeela Yehova. Ninnihakalala osuwela ekeekhai ya mBiibiliyani. Hata vari siiso, amusi ahu ahinimurumeela Yehova pooti woonaka wira nnoowokiwa aahiiso nniirela mpantta etiini yowoopiha. Awo pooti wuupuwelaka wira hiyo khinnaaphenta okhala wira khanniirela mpantta ifesta sinceene sa mulaponi. Wala pooti woovaka wira enoonikhumelela etthu yootakhala nuumala okhwa. Nihaana waawiriyana oratteene okathi anilavula aya, wira nisuwele etthu eniwiiriha oxanka ni hiyo. (Miruku 20:5) Murummwa Paulo aaheererya osuwela makhalelo ‘atthu othene’, wira owerye owiixuttiha ihapari sooreera. Akhala wira nnimweererya osuwela moonelo wa amusi ahu, eyo pooti onikhaliherya oweha moota nikhanle ahu oowaakhaliherya wiixutta ekeekhai.​—1 aKorinto 9:19-23.

13. Naathokoreryeke sai amusi ahu ahinimurumeela Yehova?

¹³ Mulavuleke moowiiyeviha. Biibiliya onihimya wira “okathi p’ukathi molumo  anyu ekhaleke òrera”. (aKolosi 4:6) Eyo pooti ohikhweya. Hiyo pooti onvekela Yehova munepa awe wootteela wira naathokoreryeke saana amusi ahu. Niheereryeke waavaanyiha khula etthu yoohiloka anikupali aya. Vakhala wira yookhala etthu yoohiloka anilavulenle aya wala anipakenle aya, nihaana waatakiha arummwa. Paulo aahimmye so: “Naruwaniwaka, nnàkhula ni molumo òrera: nalupatthiwaka, ninnilipa. Nòtheriwaka, nnàkhula ni molumo òpatthani”.​—1 aKorinto 4:12, 13.

14. Mireerelo xeeni sinikumiherya aya mweettelo wooloka?

¹⁴ Mukhalaneke mweettelo wooloka. Xeeni vanitthuneya aya wira siiso? Nnaamwi vatthuneyaka olavula mowiiyeviha ni amusi ahu, masi mweettelo ahu wooloka ti wootepa otthuneya ni onnikumiherya mireerelo. (Mmusome 1 Pedru 3:1, 2, 16.) Mwaahiye amusi anyu yooneke ntakiheryo nanyu ni aweheke wira Anamoona a Yehova aakhalana ikasamento soohakalala, annaakhapelela saana anaaya, anneettela malakiheryo a Biibiliya ni annihakalala. Hata amusi aheemereryaka ekeekhai, hiyo ninnihakalala osuwela wira mweettelo ahu wooloka onnimuhakalaliha Yehova.

15. Ninrowa opaka exeeni wira nisyake onyakulihana ni amusi ahu?

¹⁵ Mumpake palano vahinatthi. Muupuweleke itthu saarowa owiiriha amusi anyu ophavela onyakulihana ni nyuwo. Nto muupuweleke vahinatthi etthu ekhanle anyu oopaka. (Miruku 12:16, 23) Eyo ti etthu murokora mmosa wAustralia aapanke awe. Apaapa aya aiyawe khiyaasiveliwa ekeekhai, ni ikwaha sikina aanikuxerya owali. Nto ohinatthi murokora ole waaligarela apaapa aya aiyawe, owo ni iyawe aahaana onvekela Yehova wira omukhaliherye ohinanariwa okathi yaarowa aya ovaanelaka. Awosa yaaniphavela myaha saarowa omusivela mulopwana ole ovaanela. Nave-tho yaanihela mukano okathi yaavira aya alavulaka, maana khiyaaphavela wira apacerye olavula myaha sa etiini, seiyo saakumiherya onyakulihana.

16. Nipakeke exeeni okathi amusi ahu aniphavela aya onyakulihana ni hiyo?

¹⁶ Ekeekhai wira khivaniweryaneya osyaka moomalela onyakulihana ni amusi ahu ahinimurumeela Yehova. Okathi onikhumelela aya ohiiwanana ni amusi, hiyo ninniriipiwa murima, okhala wira nimphavela waahakalalihaka. Masi muhaana wuupuwela wira omphenta wanyu Yehova ohaana okhala wuulupalexa ovikana waaphenta wanyu amusi. Akhala wira amusi anyu anniweha eyo, awo anoosuwela wira omurumeela Yehova ti etthu yootthuneyexa. Khanikhanle oomukhanyererya mutthu weemererya ekeekhai. Masi munoowerya owooniherya akina moota weettela iphiro sa Yehova onookhaliheryaayani. Tthiri Yehova onnaavaha atthu otheene eparakha ya othanla omurumeela yena.​—Yesaya 48:17, 18.

17, 18. Exeeni enrowa wookhaliheryani olipa, akhala wira mmusi anyu oohiya omurumeela Yehova?

¹⁷ Okathi mmusi ahu onikumihiwa awe wala wiikumiha mmulokoni, pooti okhala etthu yoowereya vanceene. Owereya waya pooti olikanaka ni mutthu onihommwa ni nivaka. Munrowa ovilela sai owereya iwo?

¹⁸ Muluttuweliweke ovara muteko wa Yehova. Okathi eyo eniiraneya aya, muhaana olipiha waamini wanyu. Mmusomeke Biibiliya khula nihiku, muhihiyererye olaleerya ni munvekeleke Yehova ikuru wira nwerye ovilela. (Yuda 20, 21) Ankhi vakhala wira munnipaka itthu iyo sotheene, masi owereya iwo khonivukuwa? Muhikhulumuwe! Mukhaleleke nthiti muteko wa Muluku. Nuuvira okathi, itthu sinookhala saana ni munooweryaka weettiherya saana miyuupuwelo sanyu. Eyo ti etthu yaamwiiranenle mulipa olempe Esaalimo 73. Wookhala okathi waamuxankiha aya weettiherya saana miyuupuwelo sawe. Masi etthu yaamukhalihenrye otthikela okhalana miyuupuwelo sooloka waari omukokhorela Yehova. (Esalimo 73:16, 17) Nave-tho eyo pooti wiiraneya ni nyuwo.

19. Munrowa wooniherya sai wira munnittittimiha moota Yehova onaalaka awe atthu awe?

¹⁹ Muttittimihe yoolaka ya Yehova. Muluku onnisuwela wira yoolaka awe enimwaakumiherya mireerelo atthu otheene, omuhela muhina ole okumihiwe. Nnaamwi vaniwereyaka vanceene okathi mmusi ahu onikumihiwa awe mmulokoni, masi eyo pooti omukhaliherya omuhokolowela Yehova muhoolo. (Mmusome aHéberi 12:11.) Masi mutthu owo ohinatthi nlelo otthikela wa Yehova, hiyo nihaana ovikaniha ‘ohatàna’ nuuwo. (1 aKorinto 5:11-13) Eyo khahiyo etthu yookhweya. Masi nihaana osyaka omulavuliha mutthu owo, hata nimurumeelaka telefoni, mensage, iwarakha, email, aahiiso redes sociais.

20. Nihihiye olipelela exeeni?

²⁰ Muhihiye olipelela! Biibiliya onihimya wira ole oniphenta “onniroromela vohihiyererya”, nto hiyo ninnilipelela wira amusi ahu ahiyale omurumeela Yehova anoomuhokolowela. (1 aKorinto 13:7) Mwaweha wira mmusi anyu okumihiwe mmulokoni onniimananiha orukunuxa muupuwelo ni mweettelo awe, nyuwo pooti onvekelela wira ophwanye ikuru, ni wira aakhulele nlattulo na Yehova nni: “Muhokoloweleke wa miyo”.​—Yesaya 44:22.

21. Mpakeke exeeni akhala wira amusi anyu annoolupatthani mwaha wa omutthara Yesu?

²¹ Yesu oohimya wira nihaana omphenta vanceene yena, waavikana apinaatamu otheene. Owo aanisuwela wira awiixutti awe yaarowa ororomeleyaka wa yena, hata alupatthiwaka ni amusi aya. Nto akhala wira amusi anyu annoolupatthani mwaha wa omutthara Yesu, mmuroromeleke Yehova. Munvekele wira ookhaliheryeni ovilela saana. (Yesaya 41:10, 13) Muhakalaleke osuwela wira Yehova ni Yesu annisiveliwa vanceene ni nyuwo ni anrowa wootthuvelani mwaha wa ororomeleya wanyu.