1, 2. (a) Ohiihiiha onikumiherya exeeni? (b) Xeeni nintthuneya ahu othokorerya voohimya sa wiihiiha?

YEHOVA pooti onikhaliherya okhalana mukhalelo ola wa wiihiiha. (aGalasia 5:22, 23) Owo ookhalana wiihiiha woomalela. Nto hiyo khanirina, maana khanimalenle. Mixankiho sinceene sinikhumelela olelo-va, mwaha wa ohiihiiha. Ohikhalana wiihiiha pooti omwiiriha mutthu opisa opaka itthu sootthuneya wala ohikhumela saana oxikola hata omutekoni. Ohiihiiha pooti omwiiriha mutthu waaruwana atthu akina, ohapaliwa, otakhala murima, omwalana, okopha-kopha, okhalana soolema soohiloka, otthukweliwa mukhatteya, waakanyereya mmuupuweloni, orava iretta sa mooraruwani ni orupala aahiiso orupalihiwa moohiphavela.​—Esalimo 34:12-15.

² Atthu ahiniihiiha anniikumiherya mixankiho ni waakumiherya atthu akina. Olelo-va, atthu anootepa ohiihiiha. Eyo khenintikiniha, maana Nuulumo na Muluku naahihimya vahinatthi wira “okathi wokiserya” atthu yaarowa okhala oohiihiiha.​—2 Timótheyo 3:1-3.

3. Xeeni nintthuneya ahu wiihiiha?

 ³ Xeeni nintthuneya ahu wiihiiha? Aakhala mathowa manli maalupale. Noopacerya: Okhala wene atthu yaale anikasoopa muupuwelo aya anikhalana mixankiho vakhaani. Awo khanoona ovila wataana ni akina ni osyaka waakuva onanariwa, oxanka ni oriipiwa murima. Na nenli: Wira nivikanihe okhala apatthani a Muluku, nihaana okhootta okathi nneehereriwa ahu, nave nihaana osyaka wuupuwelela itthu soohiloka. Adamu ni Eva khiyaapanke eyo. (Maphattuwelo 3:6) Ntoko Adamu ni Eva, anamunceene olelo-va annikhalana mixankiho sinceene mwaha wa ohiihiiha.

4. Exeeni enrowa waakhaliherya ale aniwanana miyuupuwelo soohiloka?

⁴ Yehova onnisuwela wira hiyo na atthu oohimalela ni vanninixankiha wiihiiha. Masi owo oniphavela onikhaliherya oxintta soophavela sahu soohiloka. (1 Mamwene 8:46-50) Ntoko mpatthani oophenta, owo mooreera murima onnaakhaliherya atthu yaale vanaavila owehaweha muupuwelo aya ni soophavela saya. Mwaha ola ninrowa wiixutta ntakiheryo na Yehova voohimya sa wiihiiha. Nave nnoothokorerya matakiheryo ooloka ni oohiloka a atthu aniromoliwa mBiibiliyani, ni nnooweha-tho malakiheryo oovareleya muteko.

5, 6. Ntakiheryo xeeni na wiihiiha Yehova onnivaha awe?

⁵ Wiihiiha wa Yehova ti woomalela maana owo toomalela mwa itthu sotheene. (Otumererya 32:4) Hiyo na atthu oohimalela. Masi nihaana otthara ntakiheryo nawe na wiihiiha wira nimutakihe saana. Eyo enoonikhaliherya wiikasoopa okathi nniireliwa ahu etthu ehinnisivela. Matakiheryo xeeni anilavula sa wiihiiha wa Yehova?

⁶ Nkuupuwelani moota Yehova aariipiwe awe murima okathi Satana ammwarenle awe. Woonasa wene, eyo yaahiiriha malaikha otheene oororomeleya oxanka, onanariwa ni oriipiwa murima. Waaniheryasa nyuwo munoonela siiso okathi munuupuwela anyu ohaawa wotheene Satana okumihenrye awe. Masi Yehova aahipixa murima. Owo aahiphuka mwaha ole okathi wooreerela. Yehova toopisa onanariwa ni onnipixerya murima omwareya wa Satana. (Okhuma 34:6; Yobi 2:2-6) Mwaha aya? Owo oheemererya wira ovire okathi maana khoniphavela wira apinaatamu apwetexiwe, masi oniphavela “wira atthu othene erukunuxe murima”.​—2 Pedru 3:9.

7. Exeeni eniixutta ahu ni ntakiheryo na Yehova?

⁷ Ntakiheryo na Yehova ninniixuttiha wira nihaana wuupuwela ni ephoole nihinatthi olavula aahiiso opaka etthu. Nto, muhinatthi opaka yoothanla yuulupale, muhaana wiivaha okathi wira muupuwele saana. Munvekele Yehova wira oovaheeni miruku soopaka etthu yooloka. (Esalimo 141:3) Okathi ninnanariwa ahu wala oriipiwa murima, ti vookhweya opaka itthu soohikhalela. Ti nthowa naya anamunceene aniikhupanyerya  aya mwaha wa itthu yaalavunle aya wala opaka ehinatthi wuupuwela saana.​—Miruku 14:29; 15:28; 19:2.

8. (a) Ninrowa ophwanya woowi matakiheryo ooloka a wiihiiha? (b) Exeeni yaamukhalihenrye Yosefe ohipaka etthu yoohiloka okathi aavekiwa awe ni amwaarawe Potifari? (Nwehe elatarato yoopacerya.)

⁸ Matakiheryo xeeni a mBiibiliyani anittittimiherya efaita erina aya wiihiiha? Ntakiheryo nimosa ti Yosefe mwaana a Yakobe. Owo aahikhootta yooweeha okathi aari awe namuteko a Potifari, muulupale a maguarda a Farawo. Mwaarawe Potifari aahiweha wira Yosefe aari mulopwana ookuxa murima, maana erutthu awe “yari yomphwanela” ni aari mutthu ooreerexa, nto aaninveka ikwaha sinceene. Exeeni yaamukhalihenrye Yosefe okhootta yoweeha eyo? Woonasa wene aahuupuwelela saana etthu yaakhanle ookhumelela, akhala wira aamurupa ni muthiyana ole. Nto okathi muthiyana ole aavanre awe ikuwo sa Yosefe, owo aahimutthyawa. Yosefe aahihimya so: “Kiniwerya sai wira etthu yotepexa otakhala, kinvehaka Muluku?”​—Maphattuwelo 39:6, 9; musome Miruku 1:10.

9. Munrowa wiilokiherya sai wira musyake soweeha?

⁹ Exeeni ninniixuttiha aya ntakiheryo na Yosefe? Okathi nneehereriwa ahu opaka etthu yoohiloka, nihaana okhootta. Atthu akina ehinatthi okhala Anamoona a Yehova yaahikhalana muxankiho wa olya vanceene, ohapaliwa, ompaha soona, olya mirette soohapala, orupihana woohiloka, ni ihiila sikina. Hata nuumala obatiziwa, awo pooti weehereriwaka opaka itthu iyo. Nto eyo yawiiraneelani, muhaana wuupuwela moota wataana wanyu ni Yehova onrowa aya ohononeya mwatthikela opaka itthu iyo. Mweereryeke osuwela itthu sikhanle oowootthekihani, nto musyakeke. (Esalimo 26:4, 5; Miruku 22:3) Akhala wira munimakela weehereriwa, munvekeleke Yehova ankhili ni wiihiiha wira mukhootte soweeha iyo.

10, 11. (a) Exeeni enaakhumelela amiravo anceene oxikola? (b) Exeeni ekhanle oowaakhaliherya amiravo maKristau okhootta opaka etthu ehinimusivela Muluku?

¹⁰ Etthu yaamukhumelenle Yosefe, ennaakhumelela amiravo anceene maKristau olelo-va. Ntakiheryo nimosa ti na mwali oniitthaniwa Joaquina. Aximwali aasomana awe oxikola yaamakela wiittottopa mwaha woorupa ni alopwana wuumalani wa esumana. Joaquina khaahimya etthu yaavarihana ni mwaha owo. Owo onneemererya wira mwaha wookhala mutthu oovirikana ni aximwali akina, waanimwiiriha omphwanya “omeekha”, ni okathi mukina awo yuupuwela wira aari mulolo maana khaanamorari. Masi Joaquina aahirumeela miruku. Owo aanisuwela wira okhala wene amiravo anneehereriwa vanceene ni yoophavela ya orupihana woohiloka. (2 Timótheyo 2:22) Anaxikola akina yaamakela omukoha nthowa naya ahaatonko awe orupa ni mulopwana. Eyo yaahimukhaliherya otthokiherya nthowa naya ahaaphavela awe orupihana woohiloka. Ninnaattottopela amiravo maKristau  anikhootta yooweeha ya orupihana, nave Yehova onnihakalala vanceene ni amiravo awo!

¹¹ Nave Biibiliya onnaaromola atthu yahaakhoottale yooweeha ya orupihana woohiloka. Nto eyo ennooniherya maxakha anikhumelela okathi yoole nihiniihiiha ahu. Akhala wira onnoophwanyani muxankiho sintoko wa Joaquina, vannireerela omuupuwela mmiravo mulolo oniromoliwa eliivuru ya Miruku, ekapiitulu 7. Nave mmuupuwele Amoni ni mixankiho saakhumelenle mwaha wa ohiihiiha wawe. (2 Samuweli 13:1, 2, 10-15, 28-32) Anamuyari anoowerya waakhaliherya anaaya okhala atthu oowiihiiha ni amiruku, athokoreryaka myaha iyo okathi wa omulompa Muluku vatthokoni.

12. (a) Xeeni Yosefe aaihiihale awe okathi aari awe ni axinnawe? (b) Okathi xeeni-tho onitthuneya ahu okhalana ephoole?

¹² Okathi mukina, Yosefe aahivaha ntakiheryo nooloka na wiihiiha. Eyo yaakhumelenle okathi axinnawe yaarwiiye aya wEjiitu othuma eyoolya. Wira osuwele muupuwelo aya, Yosefe khaalenle wira aari munnaya. Okathi ahaawerya awe-tho ovitha muupuwelo awe, aahikhuma ni aahirowa wunla opuro mukina. (Maphattuwelo 43:30, 31; 45:1) Akhala wira munna wala murokora onoopaka etthu ehinoosivelani, muhaana wiihiiha ntoko Yosefe. Opaka eyo onimookhaliheryani osyaka ohimya wala opaka etthu enrowa owiirihani othanana muhoolo. (Miruku 16:32; 17:27) Woonasa wene mookhalana mmusi okumihiwe mmulokoni. Akhala wira ti siiso, muhaana okhalana ephoole wira musyake omulavuliha mutthu owo vahitthuneyaka. Pooti okhala voovila opaka eyo. Masi vanookhweya vakhala wira munimuupuwela wira munimutakiha Yehova ni munpaka etthu oniruma awe.

13. Exeeni nniixutta ahu ni itthu saamukhumelenle Mwene Davidi?

¹³ Nave hiyo ninnittottela mureerelo ntakiheryo na Mwene Davidi. Okathi Sawuli ni Ximeyi yaamukumiherya aya mixankiho, owo khaananariwe, wala khaarumenle ikuru sawe wira owiirihe etthu yootakhala. (1 Samuweli 26:9-11; 2 Samuweli 16:5-10) Masi, ikwaha sikina Davidi aanooceela wiihiiha. Ninnisuwela eyo okathi ninsoma ahu voohimya sa etampi aapanke awe ni Bathi-Xeba ni moota anviruwenle awe Nabali. (1 Samuweli 25:10-13; 2 Samuweli 11:2-4) Ntakiheryo na Davidi pooti oniixuttiha itthu sootthuneya. Yoopacerya, axitokweene a mmulokoni ahaana okhala oowiihiiha wira ehirumeele mwa enamuna yoohiloka okhulupale aya. Ya nenli, khuuvo onitthuneya wiiroromela uupuwelaka wira khonirowa ovonya.​—1 aKorinto 10:12.

14. Exeeni yaamwiiranenle munna mmosa, nave xeeni nintthuneya ahu wiihiiha okathi onitthekeliwa ahu?

¹⁴ Exeeni mukhanle anyu oopaka wira nvikanihe okhala oowiihiiha? Muthokorerye etthu yaamwiiranenle Luis. Mulopwana mmosa eettiha ekaaro awe aahimana ekaaro  ya Luis ottuli. Nnaamwi Luis aatthekeliwe, masi mulopwana ole aahinanariwa, khiyamuruwana Luis ophavelaka owana. Luis aahinvekela Yehova wira ohinanariwe ni aaheererya ommaaliha mulopwana ole. Masi mulopwana ole khaaphavela omaala. Nto Luis aahilepa matricula a kaaro ya mulopwana ole, aahitthikela mukwaha awe, khumuhiya mulopwana ole nlelo oruwanaka. Nuuvira esumana emosa, Luis aahirowa omuxukurya muthiyana mmosa aamulalenrye awe khalai. Nto iyawe muthiyana ole aari mulopwana yoole aamanne ekaaro ya Luis. Mulopwana ole aahuuliwa muru ni aahiveka musammaha mwaha wa etthu aapanke awe. Nuumala-vo aahihimya wira aarowa omphwanya mekaaniku wira olokihe ekaaro ya Luis moohipisa. Nave-tho aaheemererya wiirela mpantta yoosoma ya Biibiliya ni yaahimusivela vanceene. Nto Luis aahiweha wira mwaha wa wiihiiha, waahikhaliherya wira itthu sikhumele saana. Ahaapanke eyo, woonasa wene itthu khisaarowa weetta saana.​—Mmusome 2 aKorinto 6:3, 4.

15, 16. Omusoma Biibiliya onirowa wookhaliheryani sai nyuwo ni emusi anyu okhala oowiihiiha?

¹⁵ Okhalana eprograma yooloka ya omusoma Biibiliya pooti omukhaliherya muKristau  okhala oowiihiiha. Muupuwele moolumo Muluku aamulenle awe Yoxuwa ohimyaka so: “Muhihiyeké osoma elívuru ila ya ikano. Mutthokeleleke ikano seiyo othana n’uhiyu, wira mwetteleke orattene sothene sinrumaya. Mwirá siso, munoreriwa okathi wothene w’ekumi anyu, khamunrowa wojela miteko sanyu, nnákhala mmosa”. (Yoxuwa 1:8) Masi moota xeeni omusoma Biibiliya onrowa aya wookhaliheryani okhalana wiihiiha?

¹⁶ Nihiixutta wira Biibiliya ookhalana matakiheryo anooniherya mireerelo sa okhala oowiihiiha, nave nooweha mixankiho nimphwanya ahu okathi nihiniihiiha ahu. Yookhala etthu emwiirinhe Yehova weemererya wira matakiheryo awo elempwe mBiibiliyani. (aRoma 15:4) Nto ti vamiruku osoma ni wuupuwelela saana matakiheryo awo. Nvareryeke moota mukhanle anyu oovarihela muteko vatthokoni vanyu wala mookumini mwanyu. Munvekele Yehova wira ookhaliheryeni ovarihela muteko miruku sa Nuulumo nawe. Mwaweha wira sookhala itthu muhiniwerya anyu wiihiiha, muhaana weemererya eyo. Nuumala-vo, nvekeleke, ni mwiimananiheke vanceene wira musuwele moota woolokiherya mukhalelo anyu. (Yakobo 1:5) Mutokoseke iliivuru sahu wira mphwanye malakiheryo akhanle owookhaliheryani.

17. Mwa inamuna xeeni anamuyari akhanle aya oowaakhaliherya anaaya okhala oowiihiiha?

¹⁷ Munrowa waakhaliherya sai aniinyu okhala oowiihiiha? Anamuyari annisuwela wira anaaya khayariwe ni mukhalelo ola wa wiihiiha. Nto awo annitthuneya owiixuttiha anaaya mikhalelo sooloka, yaavahaka ntakiheryo nooloka. (aÉfeso 6:4) Mwaweha wira aniinyu khaniihiiha, mwiikoheke mmansinyu akhala wira munnivaha ntakiheryo nooloka. Nyuwo pooti ovaha ntakiheryo nooloka mwaakhalelaka nthiti muteko woolaleerya, ohicompela mithukumano sa mmulokoni, ni omulompa Muluku vatthokoni. Muhoovelele waahiiha aniinyu vaavo anipaka aya etthu yoohiloka. Yehova aahinvaha mikano Adamu ni Eva. Mikano iye samwaakhaliherya wiixutta ottittimiha okhulupale wa Yehova. Moolikanasa, okathi anamuyari aniwiixuttiha aya ni waavaha ntakiheryo nooloka anaaya, eyo pooti owiixuttiha anamwane okhala oowiihiiha. Etthu emosa mukhanle anyu oowaakhaliherya aniinyu, ti omphenta Yehova ni ottittimiha malakiheryo awe.​—Musome Miruku 1:5, 7, 8.

18. Xeeni nintthuneya ahu waathanla saana apatthani ahu?

¹⁸ Nikhale namuyari wala nnaari, otheene nihaana waathanla saana apatthani ahu. Akhala wira apatthani anyu annimphenta Yehova, awo animootumereryakani okhalana soolukama sooloka ni osyaka mixankiho. (Miruku 13:20) Ntakiheryo naya nooloka nnoowiirihani otakiha wiihiiha waya. Nave-tho ntakiheryo nanyu nooloka nnimwaalipiha awo. Wiihiiha onoonikhaliherya weemereriwa ni Muluku, okhalana okumi wooloka, ni okhalana okathi woohakalaliha ni ale anaaphenta ahu.