1. Exeeni Yehova aamulenle awe Moise? Xeeni eyo eri aya yootthuneya?

OKATHI omosa, Muluku aahimuleela Moise nsina nawe, ni mikhalelo sawe. Yehova khaattittimihenrye owerya wawe wala osuwela wawe, masi owo aapacenrye ottittimiherya omoriwa wawe ikharari ni othunku. (Mmusome Okhuma 34:5-7.) Moise aaphavela osuwela akhala wira Yehova ammukhaliherya. Ti maana aya Yehova aattittimihenrye awe mikhalelo iyo, ooniheryaka wira tthiri onniphavela waakhaliherya arumeyi awe. (Okhuma 33:13) Munoonela sai osuwela wira Yehova onninithokorerya vanceene? Mwaha ola, ninrowa othokorerya mukhalelo wa othunku, niire so, woona owereya onaaphwanya akina ni ophavela waakhaliherya.

2, 3. (a) Exeeni enooniherya wira apinaatamu okhala wene toowoona othunku? (b) Xeeni vanitthuneya aya osuwela ele Biibiliya enihimya awe sa othunku?

² Yehova toomoriwa ikharari, nave aapanke apinaatamu ailikanyihaka yena. Tivonto, apinaatamu, waahela muhina ale ahinimusuwela Yehova, aniphavela aya owoonela othunku ni waakhaliherya akhwaaya. (Maphattuwelo 1:27) MBiibiliyani aakhala atthu  anceene yoonihenrye othunku. Mwa ntakiheryo, okathi Salomoni aaphavela awe omusuwela maama awe mwaana mmosa, aahiweehererya athiyana ale, nto aahiruma wira mwaana ole othikiliwe eriyari. Maama awe eekeekhai aahimoonela othunku mwanawe ni aahinvekela mwene wira mwaana ole ohiiviwe, masi ovahiweke muthiyana ole mukina. (1 Mamwene 3:23-27) Ntakiheryo nikina na omoriwa ikharari ti na mwaana mwaamuthiyana a Farawo. Okathi aamuttontte awe Moise oryeene mwaana, owo aanisuwela wira mwaana ole aari muHeeberi ni aahaana wiiviwa. Masi “ahimonela othunku”, ni aahimukuxa khumuhuwa ntoko mwanawe oomuyara.​—Okhuma 2:5, 6.

³ Xeeni nintthuneya ahu wiixutta vanceene voohimya sa woona othunku? Mwaha woowi Yehova oniphavela wira nimutakiheke yena. (aÉfeso 5:1) Hata nipattuxiwe ene ni mukhalelo wa woona othunku, hiyo na atthu oohimalela, nto eyo pooti oniiriha ohaacalela akina. Ikwaha sikina vannixankiha opacerya waathokorerya atthu akina khuhiya wiithokoreryaka mmansihu. Exeeni enrowa onikhaliherya waathokorerya akina? Yoopacerya, nrowe nithokorerye moota Yehova ni akina anooniherya aya othunku. Ya nenli, niwehe moota nikhanle ahu ootakiha othunku wa Yehova ni nthowa naya eyo eri aya etthu yooloka.

4. (a) Xeeni Yehova aarumme awe malaikha orowa oSodoma? (b) Etthu yaamukhumelenle Lothi ni emusi awe, enniixuttiha exeeni?

⁴ MBiibiliyani aakhala matakiheryo manceene anooniherya othunku wa Yehova. Mwa ntakiheryo muupuwele etthu Muluku aamwiirenle awe Lothi. Lothi aari “naxariya avelavelihiwe mwaha” wa mweettelo wa onamuttompe wa atthu a oSodoma ni oGomora. Atthu ale khiyaamuttittimiha Muluku, nto Yehova aahoona wira yaaniphwanela wiiviwa. (2 Pedru 2:7, 8) Yehova aahiruma malaikha orowa omuleela Lothi wira oSodoma ni oGomora wampwetexiwa, ni wira owo aahaana okhuma epooma ele. Biibiliya onihimya so: “Okhala wira Lothi anipisa, malaikh’ale yahinvarela ntata owo n’amwar’awe n’an’awe anli axithiyana, mana Apwiya yaphavela owòpola, khwakumihasa mmuttettheni-mme, yarowanaka otá”. (Maphattuwelo 19:16) Tthiri Yehova aanisuwela mixankiho sa Lothi, nto hiyo nroromeleke wira owo onnisuwela mixankiho sahu.​—Yesaya 63:7-9; Yakobo 5:11; 2 Pedru 2:9.

5. Moota xeeni Nuulumo na Muluku ninniixuttiha aya woona othunku?

⁵ Yehova onniwiixuttiha arumeyi awe owoonela othunku akhwaaya. Nkuupuwelani nlamulo nimosa aavanhe awe aIsarayeli. Nlamulo naahimya wira akhala wira mutthu ookopha, ole okopheliwe pooti okuxa mukhumi wa mutthu owo okomphe ntoko neemexeryo. (Mmusome Okhuma 22:25, 26.) Masi nihalaka okela nsuwa, ole eemexeriwe mukhumi aahaana omuttikiherya mwaneene mukhumi ole wira iikhuneele ohiyu. Mutthu ahaarina othunku woonasa wene khaaphavela ottikiha,  masi Yehova aahiwiixuttiha atthu awe woonelana othunku. Exeeni ninniixuttiha aya nlamulo nlo? Nihaana owoonela othunku maKristau akhwiihu oothoiwa. Naweha wira nnoowerya omukhaliherya munna wala murokora oothoiwa, nihaana tthiri omukhaliherya.​—aKolosi 3:12; Yakobo 2:15, 16; mmusome 1 Yohani 3:17.

6. Nniixutta exeeni ni moota Yehova aamorela awe ikharari aIsarayeli yaamutthekela?

⁶ Yehova aanaamorela ikharari aIsarayeli hata okathi yaamutthekela aya. Biibiliya onihimya so: “Apwiya, Muluku àxitithi aya, yaharuma anamitthak’aya imara sinjene wira yalopole sotakhala iyo sìraya: tthiri Apwiya yanaphenta atthu awo n’imp’aya”. (2 Wahala 36:15) Moolikanasa, hiyo nihaana owoonela othunku atthu yaale nlelo ahinimusuwela Yehova, masi akhanle oottharuwa mweettelo aya woohiloka wira ekhale apatthani awe. Yehova khoniphavela wira apwetexiwe mutthu nihiku na ophukela wawe. (2 Pedru 3:9) Nto nihinatthi ophiya nihiku nlo, nrowe niimananihe waaleela atthu otheene ihapari soolopola ni waakhaliherya atthu anceene ottottela mureerelo othunku wa Muluku.

7, 8. Xeeni emusi emosa yaakupanli aya wira Yehova aahiwoonela othunku?

⁷ Olelo-va, arumeyi anceene a Yehova aatoko wooneliwa othunku ni Yehova. Mwa ntakiheryo, opacerya mwaakha wa 1990, elapo ya oBósnia, maloko manceene yaaniwana ni wiivana. Yaahikhala emusi emosa yaarina mmiravo a iyaakha 12, yoowo ninrowa ahu omwiitthanela nsina na Milan. Owo, munnawe, anamuyari awe ni Anamoona akina yaahikhuma oBósnia erowaka oSérvia ni karera. Awo yaarowa omuthukumanoni wa muttetthe, weiwo anamuyari awe Milan yaarowa aya obatiziwa. Okathi yaaphiyale aya ofronteera, atoropa yaahiweha wira emusi ya Milan yaari ya nloko nikina, nto awo yaahaakuruxa mukarerani-mme. Nuumala-vo, atoropa ale yahaaleela anna akina yaahanle mukarerani wira avikaniheke mukwaha aya. Emusi ele yaahimala mahiku manli nlelo avariwe ene. Nto toropa mmosa aavara muteko nihiku nle aahimuligarela xeefi awe ophavelaka osuwela etthu yoowiiriha atthu ale. Emusi ele yaahimwiiwa xeefi owo aakhulaka so: “Mwaakumiherye ota, mwawoopelase!”

⁸ Okathi anakhotto ale yaavaanela aya, yaahirwa atthu anli khurowa opuro yaari aya emusi ele. Awo yaahilavula vathi-vathi ehimyaka wira yena-tho yaari Anamoona ni yaahileeliwa ni anna yaari mukarerani etthu yaakhumelenle. Anamoona ale anli yaahimuleela Milan ni muhima awe wira ewele ekaaro aya wira evirase vafronteera, okhala wira anakhotto khiiyaakoha anamwane idukumento. Nuumala-vo, anna ale yaahaalela anamuyari aya anamwane ale wira evire epantte ekina ya efronteera, yakumaneke ekhopela ekina. Milan aahixanka ni owiitho waahimuuma. Anamuyari awe yaahaakoha Anamoona ale wira: “Niireke tthiri nnoowerya otthyawa anakhotto ale ehiniwenhe?” Masi okathi emusi ele yaapacenrye aya weetta, vaakhala ntoko anakhotto yaaphwannye evaasi, nto ahinaaweha. Milan ni munnawe yaahikumana ni anamuyari aya opuro mukina ni yaahirowasa omuthukumanoni wa muttetthe. Awo yaahiweha wira Yehova aahaakhula mavekelo aya! Biibiliya oonikhaliherya osuwela wira Yehova onnirumeela inamuna sinceene wira aakhapelele arumeyi awe. (Miteko 7:58-60) Milan onihimya so: “Kinoona wira Yehova aarumme malaikha awe wira ewale maitho aanakhotto ale wira onoopole”.​—Esalimo 97:10.

9. Yesu oonela sai muttitthi wa atthu waamutthara? (Nwehe elatarato yoopacerya)

 ⁹ Yesu aahivaha ntakiheryo nooloka na omoriwa ikharari. Owo aanaamorela ikharari atthu maana yaakhala ntoko “ipwittipwitthi sihikhalanne makampusi aya”. Nto exeeni aapanke awe? “Ahipajerya owixuttiha itthu sinjene”. (Matheyo 9:36; mmusome Marko 6:34.) Moovirikana ni Yesu, aFarisi khiyoona othunku ni khiyaakhaliherya atthu. (Matheyo 12:9-14; 23:4; Yohani 7:49) Nto niireke munnimutakiha Yesu mwaakhaliheryaka atthu akina ni owiixuttiha voohimya sa Yehova?

10, 11. Niireke okathi wotheene vannireerela woona othunku? Mutthokiherye.

¹⁰ Eyo khentaphulela wira okathi wotheene vannireerela woona othunku. Mwa ntakiheryo Mwene Sawuli woonasa wene uupuwela wira oona othunku vaavo ahaamwiivale awe Agagi, mwene a wAmaleeki yoowo aari nwanani a atthu a Muluku. Nave Sawuli khaawiivale axinama otheene a wAmaleki. Masi Yehova aahimuruma Sawuli owiiva Amaleeki otheene ni mihuwo saya sotheene. Mwaha wa ohiiwelela wawe, Yehova aahimwaakha emwene. (1 Samuweli 15:3, 9, 15.) Yehova ti Mphuki a xariya maana onniwerya oweha mirima sa atthu ni osuwela okathi xeeni mutthu onintthuneya awe woona othunku. (Wikhupanyerya 2:17; Ezekiyeli 5:11) Moohipisa owo onirowa waaphukela atthu otheene yaale anikhootta omwiiwelela. (2 aTesalonika 1:6-10) Okathi owo Yehova khonrowa waamorela ikharari atakhali. Nuumala waapwetexa atakhali, onoowoopola anaxariya. Nto eyo enrowa okhala ethoonyeryo ya omoriwa wawe ikharari.

¹¹ Hiyo khanivahiwe ehakhi ya waathanla atthu anrowa wiiviwa wala anrowa okhala akumi. Nihaana wiimananiha vanceene waakhaliherya atthu. Tiivi ekhanle enamuna yootepa oreera owoonela othunku akina? Nrowe niwehe malakiheryo anittharelana.

12. Munrowa wooniherya sai othunku voohimya sa moota munaathokorerya anyu akina?

¹² Mwaakhaliheryeke atthu mahiku otheene. Yehova oniphavela wira maKristau yaamoreleke ikharari anamwaattamanani aya ni axinnaya. (Yohani 13:34, 35; 1 Pedru 3:8) Enamuna emosa ya waamorela ikharari ti “ohaawa hoothe naawo”. Mutthu onoona othunku onnimananiha omukhaliherya ole onihaawa. Nto nihaana ohaavya inamuna wira naakhaliherye akina, woonasa wene naakhaliheryaka ni muteko mmosa owannyaya, wala waapakela etthu ekina.​—Matheyo 7:12.

13. Exeeni atthu a Muluku anipaka aya okathi sinikhumelela aya ihasara?

¹³ Mwaakhaliheryeke atthu aniphwanyiwa ihasara sa ephattu. Okathi nnaaweha ahu atthu anihaawa mwaha wa ihasara sa ephattu, nihaana owoonela othunku. Arumeyi a Yehova annisuweliwa vanceene mwaha wa waakhaliherya atthu akina okathi wa ihasara. (1 Pedru 2:17) Mwa ntakiheryo,  oJapão eyaakha ya 2011, murokora mmosa, aakhala muttetthe waaphwanyiwe ni etetere ni osareya wa maasi. Owo onihimya wira “aahilipiheya vanceene ni ophwanya nimaaliho” okathi aawenhe awe Anamoona ekhumaka mittetthe sa oJapão ni ilapo sikina, erwaaka okhaliherya olokiherya inupa sa atthu saaphwanyiwe ni ehasara ele ni Inupa sa Omwene. Owo onihimya-tho so: “Yoowiiraneya ele yaahikikhaliherya oweha wira Yehova onninthokorerya. Nave-tho annihu annithokoreryana. Anna ni arokora anceene olumwenku wotheene anninivekelela”.

14. Munrowa omukhaliherya sai mutthu oniwereiwa waala oowuuluvala?

¹⁴ Mwaakhaliheryeke ale aniwereiwa ni oowuuluvala. Okathi nnaaweha ahu atthu ehaawaka mwaha wa oretta ni wuuluvala, ninniwoonela othunku. Hiyo ninniweha mixankiho saahaaxaka atthu mwa okathi munceene, nto nihaana ovekelaka wira Omwene wa Muluku orwe. Hata vari siiso otheene ahu nnoowerya waakhaliherya ale aniwereiwa ni oovuuluvala. Mulopwana mmosa onilepa iliivuru, olempe wira nihiku nimosa maama awe yoowo aari oowuuluvala, ni aawereiwa oretta oniitthaniwa Alzheimer, aahinanariha ikuwo sawe. Okathi maama awe owo aamananiha awe wuukuttha ikuwo sawe, waahimaniwa mukhora awe. Yaamana mukhora yaari Anamoona anli yaamakela omuxukurya. Murokora mmosa aahimukoha muthiyana ole aaphavelaka okhaliheriwa. Muthiyana ole aahaakhula so: “Aayo, nnaamwi vakuulihaka  muru waakhulela”. Murokora ole aahikhaliherya oreeriha ikuwo iye. Nuumala-vo awosa yaahimpakela exa ni yaahikilaathi ni yena wira evaanelase. Mwanawe muthiyana ole aahixukhurela vanceene ni aahihimya wira Anamoona a Yehova “anneettela ele aniixuttiha aya”. Niireke owoonela wanyu othunku atthu aniwereiwa ni oowuuluvala onniwiirihani wiimananiha vanceene wira mwaakhaliherye?​—aFilipi 2:3, 4.

15. Moota xeeni muteko ahu woolaleerya onaakhaliherya aya akina?

¹⁵ Mwaakhaliherye akina omusuwela Yehova. Enamuna yootepa otthuneya okhanle anyu oowaakhaliherya akina ti owiixuttiha voohimya sa Muluku ni Omwene awe. Enamuna ekina ti waasuweliha nthowa naya wiiwelela malakiheryo a Yehova oniphwanyiha aya mireerelo. (Yesaya 48:17, 18) Olaleerya ti enamuna emosa ya onvuwiha Yehova ni owoonela othunku akina. Niireke munoowerya ovikaniha wiimananiha mmutekoni woolaleerya?—1 Timótheyo 2:3, 4.

16. Moota xeeni owoonela othunku akina onnikhaliherya aya?

¹⁶ Mameediku aniloola iretta sa muupuwelo anihimya wira owoonela othunku akina onnikhaliherya ekumi ahu ni onnilipiha wataana wahu ni atthu. Okathi munaakhaliherya anyu atthu anihaawa, munnihakalala, okhalana yoolipelela, ovukula omeekha, ni opacerya wiivaha efaita. Waamorela ikharari akina onnoophwanyihani mureerelo. (aÉfeso 4:31, 32) Okathi ophenta onniiriha aya waakhaliherya akina, ninnikhalana yowuupuxerya ya murima yooloka maana ninnisuwela wira nimpaka etthu enimuhakalaliha Yehova. Woona othunku onoonikhaliherya okhala anamuyari ooloka, mulopwana wala muthiyana ooloka ni okhala mpatthani ooloka.​—Mmusome Matheyo 5:7; Luka 6:38.

17. Xeeni muniphavela anyu okhala mutthu oowoona othunku?

¹⁷ Nnaamwi owoonela othunku akina oniphwanyihaka mireerelo, etthu enniiriha opaka eyo ti ophavela omutakiha Yehova ni onvuwiha. Owo Muluku a niphento ni oomoriwa ikharari. (Miruku 14:31) Owo oonivaha ntakiheryo noomalela. Nto otheene ahu nrowe niimananihe omutakiha Muluku naamorelaka ikharari akina. Eyo enoolipiha wataana wahu ni annihu ni arokorihu, vamosa ni atthu otheene.—aGálasia 6:10; 1 Yohani 4:16.