1, 2. (a) Muteko xeeni muulupale Salomoni aavahiwe awe? (b) Xeeni Davidi aaxenkereya awe mwaha wa Salomoni?

SALOMONI aahithanleliwa ovara muteko wootepa otthuneya. Yehova aahimuthanla wira oweherye otekiwa wa etemplo ya oYerusalemu. Etemplo eyo eniirela mpantta ipa sootepa otthuneya sitonko otekiwa mpakha olelo-va! Eyo yaahaana okhala “yulupalexa ni yorerexa”, nave yaarowa okhala yoovuwa mwaha wa oreera waya. Vanceenexa, eyo yaarowa okhala “empa y’Apwiya Muluku [eekeekhai]”.​—1 Wahala 22:1, 5, 9-11.

² Mwene Davidi aaniroromela wira Muluku ammukhaliherya Salomoni. Masi Salomoni nlelo aari “mmiravo ni òhiratta”, wala khaasuwela itthu sinceene. Niireke Salomoni aamulipa murima wira aakhulele muritti owo wa oteka etemplo? Wala aamooceela mwaha wookhala mmiravo ni ohisuwela wawe itthu? Wira owerye ovara muteko owo, aahaana olipa murima ni ophavela ovara muteko.

3. Moota xeeni Salomoni aixuntte awe olipa murima ni paapa awe?

 ³ Woonasa wene, Salomoni aahiixutta olipa murima, onwehaka paapa awe, Davidi. Okathi aari awe mmiravo, Davidi aahiwana ni inama sowoopiha, seiyo saaphavela okhuura ipwittipwitthi sa paapa awe. (1 Samuweli 17:34, 35) Nave-tho aahooniherya olipa murima okathi aawanne awe ni nakhotto ootupa ni oowoopiha, aitthaniwa Goliyathi. Nto okhaliheriwaka ni Muluku, Davidi aahimuxintta Goliyathi, orumeelaka nluku noovilikeya.​—1 Samuweli 17:45, 49, 50.

4. Xeeni Salomoni aatthuneya awe olipa murima?

⁴ Hiyo ninniwerya oweha nthowa naya Davidi aamutumerenrye Salomoni okhala mutthu oolipa murima ni oteka etemplo. (Mmusome 1 Wahala 28:20.) Vaakhanle wira Salomoni khaalimpe murima, owo amoovelelaka opacerya ovara muteko ole. Eyo yaarowa okhala etthu yootepa otakhala ovikana opacerya muteko owo masi khooceelaka.

5. Xeeni nintthuneya ahu olipa murima?

⁵ Ntoko Salomoni, hiyo ninlipa ni nikhaliheryo na Yehova wira nilipe murima ni nivare muteko onirummye awe. Nrowe nithokorerye matakiheryo makina a atthu a khalai yoonihenrye olipa murima. Nuumala-vo, nnoowerya wuupuwelela moota nikhanle ahu owooniherya olipa murima ni omaleliha muteko nirummwale ahu.

6. Exeeni yoosivenleni voohimya sa olipa murima wa Yosefe?

⁶ Yosefe aahooniherya olipa murima okathi mwaara a Potifari anveka awe wira omurupihe. Woonasa wene, aanisuwela wira sammukhumelela mixankiho mwaha wa okhootta omurupiha muthiyana ole. Ohiya ovara ele aavekeliwa awe ni muthiyana ole, Yosefe aahooniherya olipa murima ni moohipisa aahimukhootta muthiyana ole.​—Maphattuwelo 39:10, 12.

7. Rahabi oonihenrye sai olipa murima? (Nwehe elatarato yoopacerya.)

⁷ Mutthu mukina ovanhe ntakiheryo nooloka na olipa murima ti Rahabi. Okathi anamahottela a wIsarayeli yaaphiyale aya owannyawe oYerikho, owo anwerya okhootta waakhaliherya mwaha wowoova. Masi mwaha woomuroromela Yehova, moolipa murima aahiwiipithiha alopwana ale anli ni aahaakhaliherya otthyawa. (Yoxuwa 2:4, 5, 9, 12-16) Rahabi aanikupali wira Yehova ti Muluku eekeekhai, ni aaniroromela wira aamwaavaha elapo ele aIsarayeli. Owo khemerenrye wira owoova atthu, omuhela muhina mwene a oYerikho ni atthu awe, omuhiihe opaka etthu yooloka. Ohiya-vo, aahilipiha murima ni aahoopola ekumi awe ni aahiwoopola atthu a etthoko awe.​—Yoxuwa 6:22, 23.

8. Olipa murima wa Yesu waakhalihenrye sai arummwa awe?

⁸ Arummwa oororomeleya a Yesu nave-tho yaahooniherya olipa murima. Awo yaahoona olipa murima wa Yesu, nto eyo yahaakhaliherya omutakiha yena. (Matheyo 8:28-32; Yohani 2:13-17; 18:3-5) Okathi aSaduki yaamananinhe aya waahiiha owiixuttiha atthu voohimya sa Yesu, arummwa awo yaahikhootta opaka eyo.​—Miteko 5:17, 18, 27-29.

9. Moota xeeni 2 Timótheyo 1:7 onnikhaliherya awe wiiwexexa moota woophwanya olipa murima?

 ⁹ Yosefe, Rahabi, Yesu ni arummwa, yaahikhalana yoolakela ya ovikaniha opaka itthu sooloka. Awo yaahooniherya olipa murima ohiya mwaha wa ororomela ikuru saya, masi yaamuroromela Yehova. Ikwaha sikina ni hiyo ninnitthuneya olipa murima, nave nihaana-tho omuroromela Yehova, ohiya hiyo mmansihu. (Mmusome 2 Timótheyo 1:7.) Nrowe nithokorerye mapuro manli nintthuneya ahu olipa murima: vatthokoni vahu ni mmulokoni.

10. Xeeni amiravo maKristau anitthuneya aya olipa murima?

¹⁰ Wookhala okathi amiravo maKristau anitthuneya aya wooniherya olipa murima wira amurumeele Yehova. Awo pooti wiixutta etthu awehaka ntakiheryo na Salomoni, yoowo oonihenrye olipa murima, opakaka soothanla sooloka wira omalihe otekiwa etemplo. Nnaamwi amiravo atthuneyaka olakiheriwa ni anamuyari aya, masi sookhala itthu awo aneene anitthuneya aya othanla. (Miruku 27:11) Ahaana olipa murima wira yaathanle saana apatthani aya, athanlele matthekulelo ooloka, asyake mweettelo woohiloka ni athanle okathi aniphavela aya obatiziwa. Ahaana olipa murima maana awo aniwana ni Satana, yoowo oninveeha Muluku.

11, 12. (a) Moise oonihenrye sai olipa murima? (b) Amiravo anrowa omutakiha sai Moise?

¹¹ Yoothanla emosa yuulupale amiravo arina aya tiila: soolukama saya. Ilapo sikina, amiravo annitumereriwa orowa osoma wuniversidade ni ophavela muteko anrowa aya waakhelaka musurukhu munceene. Ilapo sikina atthu toohaawa, nto amiravo annuupuwela wira ahaana ovara muteko wira yaakhaliherye amusi aya. Akhala wira eyo enniiraneya ni nyuwo, nto muhaana wuupuwela ntakiheryo na Moise. Owo aahuuwale ni mwaana muthiyana a Farawo, nto anwerya othanla okhala thaaciri wala mukhulupale. Waaniheryasa amusi awe a wEjiitu, maprisoori awe ni ale yanvaha miruku, yaanimutumererya ophavela okhala mukhulupale. Masi Moise aahilipa murima ni aahithanla okhala ni atthu a Muluku. Nuumala okhuma wEjiitu ni ohiya mihakhu sa elapo ele, owo aahimuroromela Yehova voomalela. (aHéberi 11:24-26) Nuuvira okathi Yehova aahimureeliha vanceene, nave muhoolo onoomutthuvela-tho.

¹² Okathi mmiravo moolipa murima onikhalana awe soolukama sa omunepani ni onahela opuro woopacerya soophavela sa Omwene mookumini mwawe, owo onootthuveliwa vanceene. Yehova onoomukhaliherya owerya okhapelela emusi awe. Eseekulu yoopacerya, mmiravo mmosa aitthaniwa Timootheyo aahipweha opuro woopacerya muteko wa Muluku, ni nyuwo-tho munoowerya omutakiha. * (Nwehe enoota.)​—Mmusome aFilipi 2:19-22.

13. Olipa murima omukhalihenrye sai murokora mmosa ophwanya soolukama sawe?

¹³ Murokora mmosa onikhala wAlabama, E.U.A, aahaana olipa murima wira okhalane soolukama sooloka. Owo olempe so: “Okathi kaari aka mwaana, kaari mutthu oowuuliwa muru. Nkaawerya ovaanela ni atthu Empa ya Omwene, nave-tho waanikoopiha olavula ni atthu mmawaani kilaleeryaka”. Anamuyari awe ni anna a mmulokoni yaahimukhaliherya,  nto murokora owo aahiwerya okela muteko wa opioneero. Owo onihimya so: “Olumwenku wa Satana onitumererya osoma wuniversidade, ovuwa, ophwanya musurukhu ni okhalana mihakhu sinceene”. Aahiweha-tho wira atthu anceene aniphavelasa itthu iyo, khaniwerya ophwanya, nto anniriipiwa murima ni okhulumuwa. Onincererya-tho oriki: “Masi omurumeela Yehova onnikihakalaliha vanceene”.

14. Okathi xeeni anamuyari maKristau anitthuneya aya olipa murima?

¹⁴ Anamuyari maKristau ahaana wooniherya olipa murima. Mwa ntakiheryo, patarau anyu pooti omakelaka woovekelani ovaraka muteko iwoora sinceene nihiku nanyu na omulompa Muluku vatthokoni, nihiku munilaleerya anyu, ni na mithukumano sa mmulokoni. Vanitthuneya olipa murima wira mmukhoottele patarau anyu ni waavaha aniinyu ntakiheryo nooloka. Aahiiso munniwoona anamuyari akina mmulokoni aweemereryaka anaaya opaka itthu seiye nyuwo muhiniweemererya anyu aniinyu opaka. Nto akhala wira anamuyari awo annookohani nthowa naya, niireke nyuwo munoolipa murima wira mwaatthokiherye saana nthowa nene?

15. Esalimo 37:25 ni aHéberi 13:5, sinrowa waakhaliherya sai anamuyari?

¹⁵ Vanitthuneya wiimananiha wira anamuyari yaakhaliherye anaaya okhalana ni ophwanya soolukama sooloka mmutekoni mwa Muluku. Mwa ntakiheryo, anamuyari akina pooti woovelelaka waatumererya anaaya othanla okhala mapioneero okumi aya wotheene, orumeela  mapuro oothowa anamalaleerya, orumeela oBetheli wala okhaliherya oteka Inupa sa Omwene ni sa Asembeleya. Khino anuupuwela wira anaaya khanrowa owerya waakhapelela awo yuuluvala vale. Masi anamuyari a miruku, annooniherya olipa murima ni anniroromela wira Yehova onimwaakhaliherya. (Musome Esalimo 37:25; aHéberi 13:5) Anamuyari anooniherya olipa murima ni omuroromela Yehova, annaakhaliherya anaaya opaka etthu emosaru.​—1 Samuweli 1:27, 28; 2 Timótheyo 3:14, 15.

16. Anamuyari akina yaakhalihenrye sai anaaya okhalana soolukama somunepani? Nto mareeliho xeeni anamwane awo aphwannye aya?

¹⁶ Anamathelana amosa wEstados Unidos, yaahaakhaliherya anaaya ophavela omurumeela Yehova ni murima wotheene. Mulopwana onihimya so: “Aniihu ahinatthi opacerya weetta ni olavula, hiyo nanaahimeerya voohimya sa mareeliho a muteko wa opioneero ni okhaliherya mmulokoni. Vano [yinnunwe aya], eyo ti etthu aniphavela aya”. Onnincererya oriki, mwaha woowi anamwane awo aaphwanya soolukama iyo, eyo ennaakhaliherya okhootta soweeha sa olumwenku wa Satana ni ovikaniha omurumeela Yehova. Munna mmosa orina anamwane anli onihimya so: “Anamuyari anceene annirumeela okathi munceene yiimananihaka waakhaliherya anaaya okhalana soolukama sintoko okhumela saana ni axooku, matthekulelo, ni osoma vanceene. Masi ti vamiruku wiimananiha waakhaliherya anamwane okhalana soolukama sinirowa waakhaliherya olipiha wataana waya ni Yehova. Ninnihakalala vanceene waaweha aniihu aphwanyaka soolukama saya somunepani ni nivaraka miteko iyo hoothe”. Yehova onnihakalala ni anamuyari anaakhaliherya anaaya okhalana ni ophwanya soolukama somunepani.

17. Nvahe matakiheryo a moota wowooniherya olipa murima mmulokoni.

¹⁷ Hiyo-tho nihaana wooniherya olipa murima mmulokoni. Mwa ntakiheryo, axitokweene ahaana olipa murima wira emukhaliherye muKristau opanke etampi yuulupale. Nave awo annaakhaliherya ale aniwereiwa ni anitthuneya okhaliherya wira ehiheleliwe ephome. Axitokweene akina annaaxukurya anamutthukiwa anisiveliwa ekeekhai wira yaasomihe Biibiliya aahiiso yiirihe mithukumano. Ankhi arokora oohitheliwa? Awo aakhalana eparakha ya wooniherya olipa murima mmutekoni mwa Yehova. Awo pooti okela opioneero, othaamela mapuro oothowa anamalaleerya, okhaliherya oteka inupa sa Omwene, ni orowa Exikola ya Anamalaleerya a Omwene. Nave arokora akina annilattuliwa orowa Exikola ya oGileadi.

18. Arokora oowunnuwa anrowa wooniherya sai olipa murima?

¹⁸ Hiyo ninnaaphenta arokora oowuuluvala, tthiri eparakha yuulupale okhalana arokora awo mmulokoni! Hata akina ahiweryaka ovara vanceene mmutekoni mwa Yehova sintoko yiira aya khalai, awo annivikaniha wooniherya olipa murima ni ovara miteko sa Muluku. (Mmusome Tito 2:3-5.) Mwa ntakiheryo, murokora oowunnuwa onnitthuneya wooniherya olipa murima okathi axitokweene aninvekela aya ovaanela ni murokora orina iyaakha vakhaani voohimya sa mawarelo ooreerela. Murokora owo oowunnuwa khanrowa ompwapwela mwaha wa iwarelo sawe, masi mooreerela murima onrowa omukhaliherya murokora ole mmiravo oweha wira iwarelo sawe pooti waakhaliherya wala waakhumuliha  akina. (1 Timótheyo 2:9, 10) Okathi axirokora oowunnuwa anooniherya aya niphento moota owo, awo annilipiha muloko.

19. (a) Anna oobatiziwa anrowa wooniherya sai olipa murima? (b) AFilipi 2:13 ni 4:13, onrowa waakhaliherya sai anna oobatiziwa wooniherya olipa murima?

¹⁹ Anna oobatiziwa ahaana wooniherya olipa murima ni ophavelaka ovara muteko wa Muluku. Anna awo yeemereryaka orumeela ntoko arummwa oorumeela wala axitokweene, nto muloko onnittottela mureerelo. (1 Timótheyo 3:1) Masi akina annoovelela opaka eyo. Woonasa wene munna owo yookhala etthu yoohiloka aapanke awe khalai, nto vano onoona wira khoniphwanela okhala murummwa oorumeela wala mutokweene. Munna mukina pooti wuupuwelaka wira khoniwerya orumeela ntoko murummwa oorumeela wala mutokweene. Akhala wira munuupuwela siiso, Yehova onoowerya wookhaliheryani okhala oolipa murima. (Mmusome aFilipi 2:13; 4:13.) Muupuwele ntakiheryo na Moise. Owo uupuwela wira khaawerya opaka ele Yehova anvekela awe. (Okhuma 3:11) Masi Yehova aahimukhaliherya olipa murima wira ovare muteko aavekeliwe awe. Nto munna oobatiziwa onrowa olipa sai murima? Ohaana onvekela Yehova ni omusoma Biibiliya mahiku otheene. Ohaana wuupuwelela matakiheryo a mBiibiliyani a atthu yoonihenrye olipa murima. Pooti waavekela nikhaliheryo axitokweene ni wiivahererya okhaliherya miteko sa mmulokoni. Ninnaatumererya anna otheene oobatiziwa wooniherya olipa murima ni ovaraka muteko mmulokoni!

20, 21. (a) Etthu xeeni Davidi aamuupuxenrye awe Salomoni? (b) Nto hiyo nikupaliki exeeni?

²⁰ Mwene Davidi aahimuupuxerya Salomoni wira Yehova aarowa okhala ni yena mpakha omalihiwa otekiwa etemplo. (1 Wahala 28:20) Tthiri Salomoni aanuupuwelela moolumo ale, nto kheemyale wira omiravo ni ohisuwela itthu sinceene omooceelihe ovara muteko ole. Ohiya-vo, aahooniherya olipa murima ni aahikhaliheriwa ni Yehova, khumaliha oteka etemplo muhina mwa iyaakha thanu na piili ni myeeri mithanu.

²¹ Okhala wira Yehova aahimukhaliherya Salomoni, owo onoowerya onikhaliherya olipa murima wira naakhaliherye atthu a vatthokoni vahu ni annihu mmulokoni. (Yesaya 41:10, 13) Akhala wira nnimooniherya olipa murima nimurumeelaka Yehova, nto nroromeleke wira onoonivaha mareeliho vano ni muhoolo. Tivonto, “mwilipihe, . . . mpajerye ovara muteko”.