EXEENI munipaka anyu mwaaphavelaka osuwela okathi? Woonasa wene, muniweha eroroce. Nto munnoona wira yooruma 13:30. Ankhi akhala wira mpatthani inyu ohookohani so: “Ewoora xeeni ela?”

Atthu annaakhula moovarihana ni muttetthe anikhala aya. Mwa ntakiheryo, nyuwo pooti ohimya so: “1:30 a othana” aahiiso “13:30”. Mapuro makina nyuwo pooti waakhula so: “Sinihala minutu 30 wira erume ewoora 14”.

Ankhi khalai, atthu yaakohana sai okathi? Awo yaarumeela inamuna sinceene. Soolempwa sa eHeeberi sinrumeela moolumo oowi “vasisu”, “othana”, “othana eriyari” ni “makáripi”. (Maphattuwelo 8:11; 19:27; 43:16; Otumererya 28:29; 1 Mamwene 18:26) Masi ikwaha sikina, Biibiliya onnirumeela moolumo makina.

Khalai, wIsarayeli, otepexa wene ohiyu, yaanikhala maguarda. Nto aIsarayeli yaanikawanya ohiyu ipantte tthaaru, seiyo yiihana aya ‘olipelela’. (Esalimo 63:7, Biblya Exirima) Makhulupale 7:19, ninsoma wira: “Ohiyu eriyari, okathi warantteliwaya alipa-òrupelela”. Mahiku a Yesu, aYuda yaanikawanya ohiyu ipantte xexe soolipelela, ntoko yiira aya aGriki ni aRoma.

Ivangelyo sinniromola ikwaha sinceene ipantte iyo sa olipelela ohiyu. Mwa ntakiheryo, olipelela wa neexexe, niire so, “oxaka” Yesu aahirowa eettaka vasulu va maasi okumana ni awiixutti awe yaari mukalawani. (Matheyo 14:25) Nave Yesu aahilavula nlikanyiho nna: “Musuwele sana etthu ila: mwanene etthoko àsuwela okathi w’ohiyu onrwawe nawiye, khàrupa: khamuhiyererya aphakulaka exiri y’emp’awe”.​—Matheyo 24:43.

Okathi Yesu aalopola awe awiixutti awe, aahiromola ipantte iyo xexe sa ‘olipelela’ oriki: “Khamunsuwela okathi omphiyawe mwanene etthoko. Onrwá makáripi, walá ohiyu eriyari, khinó vanìpa muthupi, nnákhala vaxaka? Kahiki”. (Marko 13:35) Olipelela woopacerya waakhuma “makáripi” aahiiso nsuwa nikelaka mpakha ewoora 21. Olipelela wa nenli waakhala “ohiyu eriyari”, niire so, okhuma ewoora 21 mpakha ewoora 24. Olipelela wa neeraru waakhala “vanìpa muthupi”, waapacerya ohiyu eriyari mpakha ewoora 3, oxaaka. Waaniheryasa, Yesu aatthukweliwe okathi woolipelela wa neeraru, muthupi iipaka. (Marko 14:72) Olipelela wa neexexe waakhala “vaxaka”, eyo piiyo, okhuma ewoora 3 mpakha nsuwa nikhumaka.

Tivonto, eyo enooniherya wira hata yahaarina eroroce, atthu a khalai yaanisuwela okathi.