1. Moota xeeni olumwenku ola okhanle aya oonihapuxa?

XEENI vanivila aya ovarihela muteko itthu siniixutta ahu mBiibiliyani? Nthowa nimosa, mwaha woowi, wira nipake itthu sooloka, nihaana wiiyeviha. Nave “mahiku [ala] ookiserya” vannivila wiiyeviha, okhala wira atthu anceene ‘aniiphenta mmansaya, atthu a milili, oowittottopa, atthu oowisoona, ooveeha’ ni “oohisumaaliha”. (2 Timoteyo 3:1-3, Waataana wa Naanaano) Okhala wira na arumeyi a Muluku, ninnisuwela wira mikhalelo iyo ti soohiloka. Masi pooti woonaka wira atthu arina mikhalelo iyo annikhumela saana ni annipuha. (Esalimo 37:1; 73:3) Nave pooti wiikoha so: ‘Kiireke vannireerela ohela soophavela sa atthu akina nipuro noopacerya? Akhala wira kinimwiiyeviha, kiireke atthu anrowa okittittimihaka?’ (Luka 9:48) Akhala wira ninneemererya ohapuxiwa ni olumwenku ola, nnoohonona wataana wahu ni anna, nave vanoovila atthu onisuwela wira na maKristau. Masi vaavo ninsoma ahu matakiheryo a arumeyi oowiiyeviha a Muluku ni  otthara ntakiheryo naya, nnoophwanya mareeliho.

2. Matakiheryo a arumeyi a khalai a Muluku anrowa onikhaliherya sai?

² Exeeni yaakhalihenrye arumeyi a khalai okhala apatthani a Muluku? Exeeni yaapanke aya wira amuhakalalihe? Exeeni yaakhalihenrye opaka itthu sooloka? Osoma matakiheryo aya ni wuupuwelela ele enisoma ahu, waamini wahu onoolipa.

3, 4. (a) Yehova onniixuttiha sai? (b) Yesu aahimmye wira nihaana opaka exeeni wira nilipihe waamini wahu?

³ Yehova onninivaha itthu sinnikhaliherya olipiha waamini wahu. Mwa ntakiheryo, Yehova onninivaha miruku ni oniixuttiha omurumeelaka Biibiliya, iliivuru sahu, jw.org, TV JW, mithukumano sa mmulokoni ni mithukumano suulupale. Masi Yesu aahimmye wira sookhala itthu sikina sootthuneya, ohiya osuwela paahi, oriki: “Yoly’aka miyo, wettela otthuna wawe ole okirumme n’umaliherya miteko sawe”.​—Yohani 4:34.

⁴ Yesu aanoona okhala yoolya awe opaka yootthuna ya Muluku. Olya yoolya yooloka onnikhaliherya erutthu ahu, nto opaka yootthuna ya Muluku onnilipiha waamini wahu. Mwa ntakiheryo, niireke mootoko orowa olaleerya mukhulumunwe ene, masi muhokolowa muhakalanle ene wala mulimpe ene?

5. Ankhili anniphwanyiha mireerelo xeeni?

⁵ Vaavo nimpaka ahu ele Yehova onnivekela awe, ninniwooniherya ankhili. (Esalimo 107:43) Nave, atthu arina ankhili anniphwanya itthu sooloka. Miruku 3:13-18, oni: “Khivo etthu yophaveleya enlikananaya [ankhili]. . . . Awo ti mwiri onavaha ekumi ale anatthara: onavaha oreriwa ale aniwettela”. Yesu aahimmye wira: “Nyuwo mosuwela itthu iya: vano, mwettelakaru, munoreriwa”. (Yohani 13:17) Awiixutti yaamuhakalalaka akhala wira yanvikaniha opaka ele Yesu aavekenle awe. Nto okumi aya wotheene, yaahaana otthara ntakiheryo ni sowiixuttiha sa Yesu.

6. Xeeni nintthuneya ahu ovikaniha ovarihela muteko ele eniixutta ahu?

⁶ Nave olelo-va, nihaana ovikaniha ovarihela muteko ele nniixutta ahu. Mmuupuwele mulipa-onilokiha ikaaro oosuwela ni orina ikaruma. Akhala wira onnirumeela saana ikaruma iyo, sinoomukhaliherya okhala mulipa-oolokiha ikaaro saana. Hata opacenrye ene khalai olokiha ikaaro, owo ohaana ovikaniha wiixutta moota woorumeela ikaruma iyo wira olokiheke saana. Moolikanasa, okathi naapacenrye ahu wiixutta ekeekhai, naanihakalala mwaha woowi naaneettela ele niixutta ahu mBiibiliyani. Wira nihakalaleke mahiku otheene, khula nihiku nihaana ovikaniha ovarihela muteko ele Yehova onniixuttiha awe.

7. Nipakeke exeeni wira nittottele mureerelo matakiheryo a mBiibiliyani?

⁷ Mwaha ola, ninrowa othokorerya mikhalelo vakhaani waaniheryasa siniiriha ovila ovikaniha wiiyeviha. Ninrowa woona moota arumeyi oororomeleya a khalai yaawenrye aya wiiyeviha. Maana wira nlipe momunepani nihaana opaka itthu sikina ohiya paahi osoma matakiheryo aya. Nave nuupuweleke moota nikhanle ahu oovarihela muteko mookumini mwahu.

8, 9. Miteko 14:8-15, onniixuttiha exeeni sa wiiyeviha wa Paulo? (Nwehe elatarato yoopacerya.)

⁸ Muluku oniphavela wira “atthu othene yòpowe, esuwele ekekhai”. (1 Timótheyo 2:4) Muniwoonela sai atthu ahiixuntte ekeekhai? Murummwa Paulo aahaalaleerya aYuda yaawo yaasuwela itthu vakhaani voohimya sa Yehova. Nave-tho, aahaalaleerya ale yaakokhorela amuluku eethiru. Waalaleerya atthu awo, waaheehererya wiiyeviha wa Paulo. Moota xeeni?

⁹ Paulo aahirowa ni Baarnaba epooma ya oListra, ekwaha awe yoopacerya ya omisionaario. Nto atthu a oLikawonia yaakhala oListra, yaamuthokorerya Paulo ni Baarnaba ntoko amuluku, nave yaahaavaha masina aamuluku aya eethiru Zeu ni Herme. Niireke Paulo ni Baarnaba yaahiixinnuwiha? Niireke yoona ntoko eparakha othokoreriwa siisaale okhala wira yaahilupatthiwa mittetthe iye miili yaaxukunrye aya? Niireke yaahuupuwela wira eyo yanwiiriha atthu anceene owiriyana ihapari sooreera? Nnaari! Masi awo yaahinyoonyiwa anakhuwela ariki: “Apatthani, munìrela-ni siso? Hiyo n’atthu ntoko nyuwo!”​—Miteko 14:8-15.

10. Xeeni Paulo ni Baarnaba yahiixoona aya okhala ootthuneya waavikana atthu a oLikawonia?

¹⁰ Vaavo Paulo ni Baarnaba yaahimmye aya wira yaari atthu, eyo yaataphulela wira yaari oohimalela. Nave khiyaaphavela ohimya wira yaakokhorela amuluku eethiru ntoko atthu a oLikawonia. Maana Paulo ni Baarnaba yaarummwale ni Muluku ntoko mamisionaario. (Miteko 13:2) Awo yaathanliwe ni munepa wootteela ni yaanilipelela itthu sooreera. Hata vari siiso, awo khiyiixinnuwiha. Masi yaanisuwela wira atthu ale yanwerya waakhela nlipelelo nimosaru na orowa wiirimu, akhala wira yaamweemererya ihapari sooreera.

11. Vaavo ninlaleerya ahu, ninrowa otakiha sai wiiyeviha wa Paulo?

¹¹ Ntoko Paulo, nihuupuweleke wira muteko ahu woolaleerya aahiiso itthu Yehova onikhalihenrye awe opaka, sinniniiriha okhala atthu a vameekhaaya. Eyo enamuna nnooniherya ahu wira ninniiyeviha. Vano, niikoheke so: ‘Kiniwoonela sai atthu a muttetthe aka? Kiireke kinnaakhalela nthalu atthu akina?’ Olumwenku wotheene, Anamoona a Yehova anniwaavya atthu aniphavela owiriyana ihapari sooreera. Anamoona akina annimananiha wiixutta nttaava aahiiso soolema sa atthu ahinooneliwa vatthu. Masi khaniixoona okhala atthu ootthuneyexa waavikana ale anaalaleerya aya. Ohiya-vo, anneererya onwiriyana khula mutthu wira yaakhaliherye atthu anceene weemererya muhupi wa Omwene.

12. Epafra oonihenrye sai wira aanaathokorerya anna?

¹² Enamuna ekina nnooniherya ahu wiiyeviha ori waavekelela anna ni arokora, yaawo ‘yakhenle wamini worerexa ntoko nakhenlyahu’. (2 Pedru 1:1) Eyo ti etthu Epafra aapanke awe. Biibiliya onnimulavula Epafra ikwaha tthaaru. Okathi Paulo aatthukiwe awe oRoma, aahaalepela maKristau a oKolosi, mukhalelo wa Epafra oriki: “Owo khanihiya wolompelani nyuwo mahiku othene ni murim’awe wothene”. (aKolosi 4:12, Biblia Solempwa sa Muluku) Epafra aanaasuwela saana anna  a oKolosi ni aanaathokorerya vanceene. Paulo aahimuhimya Epafra okhala mutthu “otthukwelaniwaka”, maana Epafra aahikhalana mixankiho ntoko sa Paulo. (Filémoni 23) Hata vari siiso, Epafra aanaathokorerya anna ale ni aahipaka etthu wira aakhaliherye. Nave aanaavekelela anna ni arokora, oromolaka masina aya, nto hiyo nihaana opaka etthu emosa-ru. Mavekelo awo aakhalana owerya wuulupale.​—2 aKorinto 1:11; Yakobo 5:16.

13. Munrowa omutakiha sai Epafra okathi munivekela anyu?

¹³ Nkahaya mmuupuwele mutthu oniphavela anyu onvekelela muromolaka nsina nawe. Pooti wira aakhala apatthani anyu mmulokoni aahiiso amusi anyu arina mixankiho. Woonasa wene, annixanka moota woopaka soothanla aahiiso oxintta yoweeha. Nyuwo pooti waavekelela anna yaawo masina aya ari va jw.org opuro oni: “Testemunhas de Jeová presas por causa de sua fé”. (Nwehe mpantta oni: IMPRENSA > CASOS JURÍDICOS.) .) Nave-tho, pooti waavekelela ale akhweliwe, ale aphwanyiwe ehasara aahiiso ikhotto ni anihaawa. Tthiri aakhala anna ni arokora anceene nintthuneya ahu waavekelela! Okathi nnaavekelela ahu, ninnooniherya wira khanimphavela mureerelo ahu paahi, masi nimphavela-tho mureerelo wa akina. (aFilipi 2:4) Mwekeekhai, Yehova onniwiriyana mavekelo awo.

14. Moota xeeni Yehova ori awe mulipa-oowiriyana saana?

¹⁴ Enamuna ekina nnooniherya ahu wiiyeviha ti owiriyana saana. Yakobo 1:19 onnileela wira ‘nihana wakuvela owiriyana’. Yehova tori mulipa-oowiriyana saana. (Maphattuwelo 18:32; Yoxuwa 10:14) Mwa ntakiheryo, nkawehani ovaanela ori yoolepa ya Okhuma 32:11-14. (Mmusome.) Hata vahaatthuneya owiriyana moonelo wa Moise, Yehova aahinwiriyana. Niireke munonwiriyana moopixa murima ni otthara moonelo  awe munna yoowo aatonko ottheka? Masi Yehova onnaawiriyana moopixa murima apinaatamu otheene aninvekela ni waamini.

15. Ninrowa omutakiha sai Yehova naattittimihaka atthu?

¹⁵ Mwiikoheke so: ‘Akhala wira Yehova toowiiyeviha ni onnaawiriyana atthu ntoko anwiriyanne awe Abrahamu, Rakheli, Moise, Yoxuwa, Manowa, Eliya ni Ezekiya, kiireke miyo nkinwerya omutakiha? Kinoowerya waattittimiha anna otheene kiwiriyanaka ni otthara moonelo aya? Niireke ookhala mutthu mmulokoni aahiiso mweemusini mwaka onitthuneya aka omuthokorerya vanceene? Kinrowa opaka sai eyo?’​—Maphattuwelo 30:6; Makhulupale 13:9; 1 Mamwene 17:22; 2 Wahala 30:20.

16. Exeeni Mwene Davidi aapanke awe vaavo Ximeyi anveeha awe?

¹⁶ Wiiyeviha onninikhaliherya wiihiiha okathi ninthokoreriwa ahu moohixariya. (aÉfeso 4:2) Ntakiheryo nooloka na wiihiiha nri yoolepa ya 2 Samuweli 16:5-13. (Mmusome.) Ximeyi, mmusi awe Mwene Sawuli, aahinveeha ni omutuphela Davidi ni arumeyi awe. Davidi anwerya omuhiiha Ximeyi, masi moopixa murima aahivilela oruwana wa Ximeyi. Exeeni yaamukhalihenrye Davidi opixa murima? Othokorerya Esalimo ya neeraru, enoonikhaliherya waakhula.

17. Exeeni yaamukhalihenrye Davidi wiihiiha, nto ninrowa omutakiha sai?

¹⁷ Davidi aalempe Esalimo ya neeraru, okathi mwanawe iihaniwa Absalomi aaphavela awe omwiiva. Nave waari okathi yoole Ximeyi anveeha awe Davidi, masi Davidi aahiphwanya ikuru mwaha woomaala. Moota xeeni? Esalimo 3:5, ninnisoma masu a Davidi ani: “Miyo kinnikhuwelela w’Apwiya: awo annikakhula omwako waya wowarya”. Vaavo ninthokoreriwa ahu vootakhala, nihaana ovekela ntoko Davidi. Nto Yehova onoonivaha munepa awe wootteela wira niwerye ovilela. Niireke munoowerya wiihiiha aahiiso omulevelela mutthu oothokoreryani vootakhala? Niireke munnikupali wira Yehova onniweha ohaawa wanyu, onimookhaliheryani ni wooreelihani?

18. Ninrowa ottottela sai mureerelo ovarihela muteko malakiheryo a Yehova?

¹⁸ Vaavo nimpaka ahu itthu sooloka, ninniwooniherya ankhili nto Yehova onoonireeliha. Miruku 4:7, Biibiliya onihimya wira: “Ankhili” tootthuneya vanceene. Nnaamwi ankhili avarihanaka ni osuwela, awo annivikana osuwela itthu siiraneyale paahi. Maana ankhili anihela muhina soothanla nimpaka ahu. Hata ineneele sinniwooniherya ankhili sithukumanyaka yoolya aya elimwe. (Miruku 30:24, 25) Kristu onnihimmwa okhala “miruku sa Muluku”, maana okathi wotheene onnimusiveliha Tiithi awe. (1 aKorinto 1:24; Yohani 8:29) Muluku onrowa ontthuvela navikaniha wiiyeviha ni okhalana ankhili okathi nimpaka ahu itthu sooloka. (Mmusome Matheyo 7:21-23.) Tivonto, mmananihe wiiriha muloko okhala opuro onirumeeliwa Yehova mowiiyeviha. Vanitthuneya okathi ni opixa murima wira nipakeke itthu sooloka. Wira siiso, onooniherya wiiyeviha nto wiiyeviha onooniphwanyiha ohakalala vano ni mahiku otheene.