1. Atthu a Yehova anooniherya sai ophentana mukina ni mukhwaawe?

OLUMWENKU WOTHEENE, atthu a Yehova aniirela mpantta emusi emosa. Awo anna ni arokora aniphentana mukina ni mukhwaawe. (1 Yohani 4:16, 21) Ikwaha sikina, anniimananiha waakhaliherya annaya, masi ikwaha sinceene annooniherya ophenta awiirelaka itthu saamukhaani. Mwa ntakiheryo, annilavula itthu soolipiha aahiiso oreerelana murima. Nto vaavo nnaathokorerya ahu atthu, nimmutakiha Tiithi ihu a wiirimu.​—aÉfeso 5:1.

2. Yesu aatakinhe sai ophenta wa Tiithi awe?

² Yesu aanimutakiha Tiithi awe moomalela. Maana okathi wotheene aanaareerela murima atthu. Owo aahimmye so: “Nyuwo othene mukhulumunwe, mulemeliwene muritti mulupale, mukirwele miyo: komumuliheni”. (Matheyo 11:28, 29) Vaavo nimmutakiha ahu Yesu ‘nakhapelelaka  alipa-òthoiwa’, ninnihakalala ni omusiveliha Yehova. (Esalimo 41:2) Mwaha ola, ninrowa woona moota wowaathokorerya atthu a vatthokoni vahu, anna ni arokora ni ale nnaalaleerya ahu.

3. Mulopwana onrowa wooniherya sai wira onnimuthokorerya mwaarawe? (Nwehe efootu yoopacerya.)

³ Alopwana oothela ahaana ovaha ntakiheryo yaathokoreryaka saana atthu a vatthokoni vaya. (aÉfeso 5:25; 6:4) Biibiliya onihimya wira mulopwana ohaana omuthokorerya ni omukhapelela mwaarawe. (1 Pedru 3:7) Mulopwana oothokorerya onnisuwela wira hata ohilikanaka ni mwaarawe mwa inamuna sinceene, owo khahiyo ootthuneya onvikana yena. (Maphattuwelo 2:18) Nave, owo onnithokorerya moonelo wa mwaarawe ni onnimuttittimiha. Olavulaka sa iyawe, murokora mmosa a oCanadá onihimya wira: “Owo khonikiramusa aahiiso okiirela wira: ‘Muhiireke siiso’. Masi onnikiwiriyana saana. Okathi onikikhaliherya awe, oniira eyo mooreerela murima”.

4. Mulopwana onithokorerya moonelo wa mwaarawe, oniwoonela sai athiyana akina?

⁴ Mulopwana onithokorerya moonelo wa mwaarawe, khonilavula moovekana ni athiyana akina, hata orumeelaka redes sociais aahiiso interneti. (Yobi 31:1) Nave khoniweha itthu soohiloka orumeelaka interneti. Masi onnivikaniha ororomeleya, okhala wira onnimphenta mwaarawe, Yehova, ni onninyokha itthu soohiloka.​—Musome Esalimo 19:15; 97:10.

5. Muthiyana onrowa omuttittimiha sai iyawe?

⁵ Vaavo mulopwana onitakiha awe ophenta wa muhooleli awe, niire so, Yesu Kristu, eyo ennimukhweiherya mwaarawe ‘omuttittimiha’. (aÉfeso 5:22-25, 33) Nave, vaavo muthiyana onimuttittimiha awe iyawe, onoosuwelaka mukhalelo wa iyawe akhala wira oovareya ni miteko sa muloko aahiiso yookhala etthu enimuxankiha. Munna oothela a wInglaterra, ohimmye so: “Waahikhala okathi mwaaraka oonale awe wira yaahikhala etthu yaakixankiha. Nto aahivarihela muteko malakiheryo ari Miruku 20:5, hata waatthuneya olipelela okathi wooreerela wira okiirihe ohimya etthu yaakixankiha ni ovaanela ni yena”.

6. Ninrowa waakhaliherya sai anamwane owuupuwela akina ni waareerela murima? Anamwane awo, anrowa ophwanya mureerelo xeeni?

⁶ Vaavo anamuyari anittittimihana aya ni oreerelana murima, animwaavaha anaaya ntakiheryo nooloka. Nave, ahaana owiixuttiha anaaya owuupuwela atthu akina ni waareerela murima. Mwa ntakiheryo, anamuyari ahaana owiixuttiha anaaya wira ahitthimakeke Empa ya Omwene. Vaavo anitthekula aya, pooti waaleela anamwane wira yaalipeleleke atthu aalupale opacerya okuxa yoolya. Tthiri, khula mutthu mmulokoni ohaana waakhaliherya anamuyari. Tivonto, nihaana omuttottopela  mwaana apaka etthu yooloka, ntoko onihulela mukhora. Eyo enoomulipiha mwaana ni omukhaliherya woona wira, “mulipa-òvaha onoreriwa onvikana mulipa-òvahiwa”.​—Miteko 20:35.

7. Yesu aamuthokorenrye sai mulopwana ahaiwa? Ninrowa otthara sai ntakiheryo nawe?

⁷ Nihiku nimosa, Yesu ori ene muttetthe wa oDekaapoli, “ahiruheliwa mulopwana ahaiwa, ahalavula sana”. (Marko 7:31-35) Vano Yesu aahimuroiha okhwipi khunvoniha. Xeeni ohalaka omuroiha okhwipi? Mwaha woowi mulopwana ole khaiwa, nto aamoovaka okhala ohoolo wa muttitthi ole. Nave, okhala wira Yesu aanithokorerya moonelo wa mulopwana ole, “ahimurowana okhwipi”, opuro yoowo yahaakhanle atthu wira ompenuxe. Ekeekhai wira khaninwerya opaka miiriirya, masi nnoowerya othokorerya moonelo wa anna ni waareerela murima. Murummwa Paulo aalempe so: “Nupuwelaneke mukina ni mukhw’awe, wira nakuviheryaneke ophenta n’uvara miteko sorera”. (aHéberi 10:24, Biblia Solempwa sa Muluku) Yesu aanisuwela moonelo wa mulopwana ole, nto aahimureerela murima. Tthiri, Yesu oonivaha ntakiheryo!

8, 9. Ninrowa wooniherya sai wira ninnaathokorerya anna oowuuluvala ni ahiniiwerya-werya? (Nvahe matakiheryo.)

⁸ Mwaathokoreryeke anna oowuuluvala ni ahiniiwerya-werya. Ophenta tori mukhalelo wootthuneya mmulokoni mwa eKristau, ohiya osuwela opaka itthu. (Yohani 13:34, 35) Ophenta onooniiriha waakhaliherya anna ni arokora oowuuluvala aahiiso ahiniiwerya-werya orowa olaleerya wala omuthukumanoni. Nave nnimwaakhaliherya hata noonaka wira anna awo khanivara vanceene aahiiso khanrina okathi. (Matheyo 13:23) Munna Michael, yoowo oneetta ni ekarinyu, onnixukhurela vanceene nikhaliheryo na amusi awe ni anna a mmulokoni. Owo onihimya so: “Nikhaliheryo kinvahiwa aka ninnikikhaliherya orowela mithukumano ni olaleerya. Okisivela vanceene olaleerya mapuro oowaatta atthu”.

⁹ IBetheli sinceene, aakhala anna ni arokora oowuuluvala aahiiso ahiniiwerya-werya. Nto axitokweene oothokorerya, annooniherya ophenta apakaka marehereryo wira anna awo alaleeryeke arumeelaka iwarakha aahiiso telefoni. Bill, yoowo orina iyaakha 86 ni onaalepela iwarakha atthu anikhala ottaiwene, onihimya wira: “Ninnixukhurela eparakha ya waalepela atthu iwarakha”. Nancy, yoowo ohanle wiiriha iyaakha 90, ohimmye wira: “Waalepela atthu iwarakha, khontaphulela othukumanya invelope. Masi oniirela mpantta muteko woolaleerya. Atthu ahaana wiixutta ekeekhai!” Ethel, yoowo oyariwe 1921, oni: “Kinimakela owereiwa. Nto mahiku makina vannikivila owara ikuwo”. Hata vari siiso, owo onnisiveliwa olaleerya  omurumeelaka telefoni ni ookhalana irevisita. Barbara, yoowo orina iyaakha 85, onitthokiherya so: “Mwaha woowi kinimakela owereiwa, nkinwerya olaleerya ikwaha sinceene. Masi olaleerya kimurumeelaka telefoni onnikikhaliherya olavula ni atthu akina. Kinnooxukhuruni Yehova!” Ohinatthi omala mwaakha, anna ala oowuuluvala ni akina anirumeela ibetheli iyo anniviriha iwoora 1.228 alaleeryaka, annilepa iwarakha 6.265, annaalikarela atthu 2.000 ni annivaha iliivuru 6.315! Tthiri wiimananiha waya onnimusivela vanceene Yehova!​—Miruku 27:11.

10. Ninrowa waakhaliherya sai anna ottottela mureerelo mithukumano?

¹⁰ Mwaathokoreryeke akina mmithukumanoni. Akhala wira na atthu oothokorerya, nnimwaakhaliherya anna ottottela mureerelo mithukumano. Moota xeeni? Enamuna emosa ophiya sihinatthi opacerya mithukumano wira nihiwaakanyerye anna. Ikwaha sikina pooti ophiya mithukumano sipacenrye ene mwaha woniiraneela etthu nahaalipelela ahu. Akhala wira nimmakela ophiya mithukumano sipacenrye ene, nihaana wuupuwela moota anna anoonela aya ni wiimananiha ophiya vahinatthi. Nave, muupuweleke wira Yehova ni Yesu tannilattula orowela mithukumano. (Matheyo 18:20) Tthiri, ophiya mithukumano sihinatthi opacerya, ninnooniherya wira ninnattittimiha atthu akina!

11. Anna arina ipantte mmithukumanoni anrowa otthara sai malakiheryo ari 1 aKorinto 14:40?

¹¹ Akhala wira ninnaathokorerya anna, nnootthara malakiheryo ari 1 aKorinto 14:40, ani: “Vano, itthu iya sothene sìriwe ni nttittimiho ni wiwanana”. Anna yaale anitthara malakiheryo ala, annimaliha ipantte saya okathi avahiwa aya. Annipaka eyo, ohiya paahi mwaha wa omuthokorerya ole  orina mpantta onittharelana masi muloko wotheene. Omaliha mithukumano ovinre ene okathi, pooti waanyoonyiha akina. Maana anna akina ahaana weetta mikwaha soorakama atthikelaka owannyeya. Akina ahaana onwela xaapa aahiiso etaakixi. Nave ale athelanne ni mutthu ohinimurumeela Yehova, annilipeleliwa otthika okathi avarihanne aya.

12. Xeeni nintthuneya ahu waattittimiha ni waaphenta axitokweene? (Nwehe ekaaxa eni: “ Mwaathokoreryeke Ale Annihoolela”.)

¹² Okhala wira axitokweene annimananiha okhaliherya muloko ni olaleerya, nto nihaana waattittimiha ni waaphenta. (Mmusome 1 aTesalonika 5:12, 13.) Mwekeekhai, ninnaaxukhurela vanceene mwaha wa muteko aya. Nyuwo pooti wooniherya oxukhurela iwo, nwiiwelelaka ni waakhaliherya “okhala wira annokhapelelani mutthu ti mutthu, yawo anrowa okohiwa mwaha wa nyuwo”.​—aHéberi 13:7, 17.

13. Moota Yesu aathokorerya awe atthu, onniixuttiha exeeni?

¹³ Yesaya aahihimya vahinatthi wira Yesu ‘kharowa osinsa mutathi wowunteyene khalai: kharowa ottipiha ntthampo nintthuwa mwixi’. (Yesaya 42:3) Mwaha wowaaphenta atthu, Yesu aaniwoonela othunku. Owo aanisuwela moonelo wa atthu ookhulumuwa ni ootteettheya, yaawo yaari ntoko ‘mutathi wowunteya’ aahiiso “ntthampo nintthuwa mwixi”. Tivonto aanaareerela ni waapixerya murima. Nave anamwane yaanisiveliwa okhala ni Yesu. (Marko 10:14) Ekeekhai wira, khanniwerya waathokorerya aahiiso owiixuttiha atthu ntoko Yesu! Masi moota ninlavulana ahu, okathi onivira nilavulanaka ni ikwaha ninlavulana ahu, sinimooniherya akhala wira ninnaathokorerya atthu a muttetthe ahu.

14. Xeeni nintthuneya ahu waalavuliha saana atthu?

¹⁴ Naalavuliheke sai atthu? Imilyau sinceene sa atthu olelo-va, ‘àthwelelihiwa’ ni olumwenku wa nakoso woohiloka, epoliitika ni ahooleli a itiini a elapo ela. (Matheyo 9:36) Nto atthu anceene, khanimuroromela mutthu ni kharina nlipelelo. Ti maana aya moolumo ahu ni moota ninlavula ahu, nihaana wooniherya waareerela murima ni waathokorerya! Atthu anceene anniphavela owiriyana muhupi ninlaleya ahu, ohiya paahi mwaha woosuwela omurumeela Biibiliya, masi mwaha woowi ninnaathokorerya ni waattittimiha.

15. Mwa inamuna xeeni nikhanle ahu oowaathokorerya atthu a muttetthe ahu?

¹⁵ Sookhala inamuna sinceene nikhanle ahu oowaathokorerya atthu a muttetthe ahu. Nihaana waakoha mwa nttittimiho ni waareerela murima. Aakhala atthu oowuuliwa muru. Nto pioneero mmosa onirumeela muttetthe owo, onnisyaka opaka  makoho ooxankiha ni oovila waakhula. Owo khonaakoha mooluluwanya oriki: “Munnisuwela nsina na Muluku?” aahiiso “Omwene wa Muluku exeeni?” Masi owo onihimya so: “Kihiixutta mBiibiliyani wira Muluku ookhalana nsina. Munniphavela wira kiwooniheryeni?” Enamuna ela khenivareleya muteko khula elapo, mwaha woowi makhalelo ni soolema sinnivirikana. Masi okathi wotheene nihaana waattittimiha ni waareerela murima atthu a muttetthe ahu. Nto, wira nipake eyo, nihaana waasuwela saana.

16, 17. Ninrowa wooniherya sai oreerela murima (a) okathi nnaalaleerya ahu atthu? (b) okathi ninviriha ahu nivaanelaka?

¹⁶ Okathi xeeni ninreerela ahu waaxukurya atthu? Vaavo ninlaleerya ahu empa ni empa, nihaana osuwela wira atthu awo khiyaanilipelela, maana khanilattunle. Nto nihaana waaxukurya okathi nnoona ahu wira anoophavela oniwiriyana. (Matheyo 7:12) Mwa ntakiheryo, niireke atthu a muttetthe anyu waasivela orupa vanceene wanikisa wa esumana? Akhala wira ti siiso, muhaana opacerya olaleerya mphironi, opuro wowaatta atthu aahiiso orowa waaxukurya atthu mutonko anyu olavulana.

¹⁷ Niviriheke okathi mikavi nlavulaka ni atthu awo? Okhala wira atthu waatteliwa miteko, nto nihiku noopacerya nihipiseke. Nave, ti vooloka ohipisa naavaanelaka. (1 aKorinto 9:20-23) Atthu yoona wira ninnisuwela wira ahaatteliwa miteko, anoophavela ovaanela ni hiyo ekwaha ekina. Vaavo nnooniherya ahu mikhalelo sa munepa wa Muluku, ninnivara “vamosá . . . [ni] Muluku”. Vano Yehova onoonikhaliherya omwiixuttiha mutthu ekeekhai!​—1 aKorinto 3:6, 7, 9.

18. Vaavo nnaathokorerya ahu atthu, mareeliho xeeni ninrowa ahu ophwanya?

¹⁸ Tivonto, nrowe niimananihe waathokorerya atthu a vatthokoni vahu, anna ni arokora ni ale nnaalaleerya ahu. Nto nnoophwanya mareeliho vano ni muhoolo. Esalimo 41:2, 3, enihimya wira: “Òreriwa t’ale anakhapelela alipa-òthoiwa: nihiku n’ohawa Apwiya anowòpola. Apwiya animwasuka, animwavaha ekumi n’ureriwa vathí-va”.