1, 2. (a) Moota Yehova onaathokorerya awe atthu, ovirikanne sai ni apinaatamu? (b) Mwaha ola, matakiheryo xeeni ninrowa ahu othokorerya?

IKWAHA SINCEENE, ale arina owerya annaaruma atthu akina aahiiso waahaaxa. (Matheyo 20:25; Musuweli 8:9) Yehova khonipaka eyo! Nnaamwi ori ene Muluku Oowerya Sotheene, owo onnaathokorerya apinaatamu oohimalela. Tooreera murima ni onnithokorerya muupuwelo ni itthu sinnithowa. Nave onnisuwela wira na ntthupi paahi ni khanimalenle, tivonto khonnivekela itthu nihinwerya ahu.​—Esalimo 103:13, 14.

² MBiibiliyani, aakhala matakiheryo anooniherya wira Yehova onnaathokorerya atthu awe. Nrowe niwehe mararu. Noopacerya, Yehova aahimukhaliherya mmiravo Samuweli omuleela Eli, Mukhulupale Aanamukuttho, muhupi woophukela. Na nenli, Yehova aahimpixerya murima Moise vaavo Moise oona awe wira khaawerya waakumiha aIsarayeli wEjiitu ni waahoolela. Na neeraru, Yehova aanaathokorerya  aIsarayeli okathi yaakhumme aya wEjiitu. Matakiheryo ala anniixuttiha exeeni voohimya sa Yehova, ni ninrowa omutakiha sai?

3. Ohiyu omosa, etthu xeeni yootikiniha yaamwiiranenle mmiravo Samuweli? Nikoho xeeni ninkhumelela? (Nwehe elatarato yoopacerya.)

³ Samuweli aapacenrye orumeela otabernaakulu oyenve ene. (1 Samuweli 3:1) Ohiyu omosa orupaka, yaahikhumelela etthu yootikiniha. * (Nwehe enoota.) (Mmusome 1 Samuweli 3:2-10.) Samuweli aahiiwa nsu naamwiihana. Owo uupuwela wira iihaniwa ni Eli, Mukhulupale Aanamukuttho yoowo uuluvanle. Tivonto, aahitthimakela wa Eli, khumuhimeerya wira: “Miyo kiri va: mukìhanenle-ni?” Vano Eli aahimwaakhula wira: “Nkiwihanneni, mwan’aka”. Nuumala wiiraneya eyo ovikana ikwaha piili, Eli aahisuwela wira Samuweli iihaniwa ni Muluku. Tivonto, Eli aahimuleela Samuweli etthu yoohimya, akhala wira aamwiihaniwa-tho. Nto Samuweli aahitthara malakiheryo ale. Xeeni Yehova ohimuleelaka Samuweli wanipacerya etthu aaphavela awe? Biibiliya khonihimya nthowa naya. Masi vanikhala wira Yehova aahipaka eyo mwaha woowi aanithokorerya moonelo wa Samuweli.

4, 5. (a) Samuweli aapanke exeeni vaavo Yehova aamulenle awe muhupi aamuroihela awe Eli? (b) Yowiiraneya ela, enniixuttiha exeeni voohimya sa Yehova?

⁴ Mmusome 1 Samuweli 3:11-18. Nlamulo na Yehova ninnaatumererya anamwane waattittimiha atthu oowuuluvala, otepexa wene ale arina okhulupale. (Okhuma 22:27; Onamukuttho 19:32) Nto, vaaninvila mmiravo Samuweli orowa voosiisu wa Eli, omuleela moolipa murima muhupi woophukela wa Muluku. Tivo Biibiliya onihimya awe wira Samuweli “anova omuhimerya Eli molumo aiwalyawe”. Masi Eli aahikhaliheriwa woona wira Samuweli iihaniwa ni Muluku. Vano Eli aahinvekela Samuweli wira omuleele itthu sotheene Muluku aahimmye awe. Tivonto, Samuweli “ahimuhimerya [Eli] molumo othene”.

⁵ Eli khaatikhina muhupi ole, maana “mutthu a Muluku” ootoko omuleela Eli muhupi ene yoole. (1 Samuweli 2:27-36) Yowiiraneya ela, enniniixuttiha wira Yehova toothokorerya ni ta miruku.

6. Exeeni eniixutta ahu sa moota Muluku aamukhalihenrye awe mmiravo Samuweli?

⁶ Niireke mwa mmiravo? Vakhala wira ti siiso, yowiiraneya ya mmiravo Samuweli enooniherya wira Yehova onnisuwela mixankiho sanyu ni moonelo anyu. Woonasa wene, munnuuliwa muru ni vannoovilani waalaleerya atthu aalupale aahiiso a iyaakha soovirikana. Nto mukupaliki wira Yehova onniphavela wookhaliheryani. Tivonto, munvekeleke ni mmuleeleke oratteene muxankiho anyu. (Esalimo 62:9) Muupuweleleke matakiheryo ari mBiibiliyani a amiravo anlikana ni Samuweli. Nuumala-vo, nvaanele ni anna aahiiso arokora  arina iyaakha sanyu wala oowuuluvala, yaawo woonasa wene axinttale mixankiho ntoko sawinyu. Waaniheryasa awo animooleelani moota Yehova aakhalihenrye awe, mwa enamuna yahaalipelela aya.

7, 8. Yehova oonihenrye sai wira aanithokorerya moonelo wa Moise?

⁷ Okathi Moise aarina awe iyaakha 80, Yehova aahinvaha muteko woovila, eyo piiyo, owoopola aIsarayeli weepotthani wEjiitu. (Okhuma 3:10) Woonasa wene, muteko ole waahimuxankiha Moise, okhala wira aahiviriha iyaakha 40 oMadiyani ntoko makampusi. Moise aahimmye wira: “Miyo ka pani, kikhanle orowa olavula ni mwené Farawó, wira kakumihe atthu a Isarayeli wEjitu?” Yehova aahimulipiha Moise oriki: “Miyo kinokhala ni nyuwo”. (Okhuma 3:11, 12) Nave Yehova aahimuleela wira makhulupale a Isarayeli yaarowa ‘wiwelela molumo awe’. Hata vari siiso, Moise aahimmye so: “Kinanyiherya wira atthu a Isarayeli khanrowa okikupali miyo, nnákhala okìwelela”. (Okhuma 3:18; 4:1) Tthiri Moise aahimya wira Yehova aahivonya! Masi Yehova aahimpixerya murima Moise. Nave aahinvaha owerya woopaka miiriirya. Nto Moise ti pinaatamu oopacerya opaka miiriirya onilavuliwa mBiibiliyani.​—Okhuma 4:2-9, 21.

⁸ Hata Yehova aamulipihenrye, Moise aahoothererya etthu ekina. Owo aahimmye wira khaasuwela olavula. Nto Muluku aahimuleela wira: “Miyo kinrowa okhala ni nyuwo mwalavulaka: kinrowa wohimeryakani entthunanyu ohimya”. Niireke Moise aahikupali? Nnaari. Maana aahinvekela Muluku wira omurume mutthu mukina! Eyo yaahimunanara Yehova. Masi Yehova aahivikaniha othokorerya moonelo wa Moise, nto aahimuruma Aroni wira alavuleke nipuro na Moise.​—Okhuma 4:10-16.

9. Opixa murima ni oreera murima wa Yehova waamukhalihenrye sai Moise okhala muhooleli ooloka?

 ⁹ Yowiiraneya ela, enniixuttiha exeeni voohimya sa Yehova? Ekeekhai wira Yehova toowerya sotheene, nto anwerya omoopopiha Moise wira omwiiweleleke. Masi, Yehova aahimpixerya ni omureerela murima, omulipiheryaka wira aarowa omukhaliheryaka murumeyi awe ole oowiiyeviha. Niireke eyo yaahimukhaliherya? Aayo! Moise aahikhala muhooleli ooloka a atthu a Muluku. Omutakihaka Yehova, Moise aanaapixerya murima ni waathokorerya saana atthu.​—Mothakoni 12:3.

10. Ninrowa ophwanya mureerelo xeeni naathokorerya akina ntoko Yehova siniira awe?

¹⁰ Olelo-va, itthu xeeni nniixutta ahu? Akhala wira moothela, mwa namuyari aahiiso mutokweene, moovahiwa owerya wowaahoolela akina. Tivonto, ti vootthuneya omutakiha Yehova mwaathokoreryaka, waareerela murima ni ompixerya murima mwaarinyu, aniinyu ni anna a mmulokoni. (aKolosi 3:19-21; 1 Pedru 5:1-3) Mwamutakiha Yehova Muluku ni Yesu Kristu, yoowo ori Moise Muulupale, munimwaakhweiherya atthu olavula ni nyuwo ni munimwaalipiha. (Matheyo 11:28, 29) Nave munimwaavaha ntakiheryo nooloka.​—aHéberi 13:7.

11, 12. Yehova aawooponle sai aIsarayeli okathi yaakhuma aya wEjiitu?

¹¹ AIsarayeli yaakhumme wEjiitu mwakha wa 1513 ohinatthi Kristu orwa. Woonasa wene, yaahivikana imilyau 3. Egrupu ele, yaahikhala anamwane, atthu oowuuluvala ni waaniheryasa atthu akina oowereyasiwa ni oorakala. Nto muttitthi ole muulupale wa atthu, waatthuneya okhalana Muhooleli oothokorerya ni oosuwela. Eyo ti etthu Yehova aapanke awe omurumeelaka Moise. Nto aIsarayeli yaahoopoliwa mwa enamuna yahaalipelela aya.​—Esalimo 78:52, 53.

¹² Yehova aawooponle sai aIsarayeli? Vaavo yaakhuma aya wEjiitu, aIsarayeli yaahikuxa ‘iyuma saya s’ekhotto’. (Okhuma 13:18) Mwaha wootthokihiwa mwa enamuna ele, awo yaaniwerya woona wira Yehova taahoolela. Nto, wira Yehova owooniherye wira aanaakhapelela ni aari ni yena, “othana wothene aniwettiherya nneku” ni “khula ohiyu, anahola nneku nowarya”. (Esalimo 78:14) Tthiri aIsarayeli yaahaana olipihiwa  mwaha wa ele yaarowa waakhumelela muhoolo.

13, 14. (a) Yehova aakhapelenle sai aIsarayeli Ephareya Yooxeerya? (b) Yehova oonihenrye sai okhala oowerya waavikana anakhotto a wEjiitu?

¹³ Mmusome Okhuma 14:19-22. Nkahaya muupuwele vaakhanle wira muri vamosa ni aIsarayeli. Vano mookutteleliwa, maana ottuli wanyu muntthariwa ni anakhotto a wEjiitu, ohoolo eri Ephareya Yooxeerya. Nuumala-vo, Muluku khookhaliheryani. Nto, neeku nle naari ohoolo wanyu ninnitthikela ottuli wanyu, khukhala eriyari ya nyuwo ni anakhotto a wEjiitu. Vano anakhotto ale yaahikhala weepiphini, masi mwa mwiiriirya aIsarayeli yaari nipuro nookokola! Moottharelana, munninweha Moise ookolelaka ntata nawe mphareya khupacerya woopa epheyo, yeeyo yaakawannye maasi eriyari. Nave, nyuwo, amusi anyu ni inama sanyu munneetta mootthokiheya mphareya moowuuma ni atthu akina. Nto munnitikinihiwa mwaha woowi etthaya khekhanle nttophe ni khenthererya. Vano munniwerya weetta saana. Hata ale yahaawerya weetta, yaahiphiya ekhopela ekina moovareleleya.

¹⁴ Mmusome Okhuma 14:23, 26-30. Vaavo eyo yiiraneya aya, Farawo yoowo aari mulolo ni oowiixinnuuha, aahipacerya owoomolani ni aIsarayeli akina. Vano Moise, aahitthikela wookolela ntata nawe mphareya, nto ixiri sa maasi ale saahikumanela-tho. Farawo ni anakhotto awe, yaahisama mmaasini ni khuuvo ooponwe!​—Okhuma 15:8-10.

15. Yowiiraneya ela, eniwiixuttihani exeeni voohimya sa Yehova?

 ¹⁵ Yowiiraneya ela enniniixuttiha etthu ekina voohimya sa Yehova. Owo Muluku ootthokiheya, nto mukhalelo ola onninikhaliherya okhala oovareleleya. (1 aKorinto 14:33) Ntoko makampusi oophenta ni onikhapelela ipwittipwitthi sawe, Yehova onnaakhapelela atthu awe. Owo onnaakhaliherya wira ahixinttiwe ni awanani aya. Nto eyo enninimaaliha ni onlipiha vanceene vaavo nintepa ahu waattamela wanikisa wa olumwenku ola.​—Miruku 1:33.

16. Moota Yehova aawooponle awe aIsarayeli onnikhaliherya sai?

¹⁶ Olelo-va, Yehova onnaakhapelela atthu awe ntoko egrupu. Onnaakhaliherya okhalana wataana wooloka ni yena ni onniwaakiherya awanani aya. Nave onoopaka eyo okathi wa maxakha maalupale anaattamela. (Wisupulula 7:9, 10) Hata ari ene amiravo aahiiso oowuuluvala, arina ene ekumi yooloka wala arakanle ene, atthu a Muluku khanrowa oxanka aahiiso woova okathi wa maxakha maalupale. * (Nwehe enoota.) Tthiri awo anrowa omuroromelaka moomalela Yehova! Okhala wira animuupuwela masu a Yesu oowi: “Mulipihe murima, nvenxe muru, okhala wira wopoliwa wanyu ori vakhiviru”. (Luka 21:28) Hata okathi anrowa aya otupheliwa ni Gogi, egrupu ya maloko oowerya onvikana Farawo, atthu a Muluku anniroromela wira Yehova onoowaakiherya. (Ezekiyeli 38:2, 14-16) Nthowa xeeni? Nthowa noowi annisuwela wira Yehova khoturukeyale. Owo onrowa wooniherya wira onnikhapelela ni Moopoli onaathokorerya atthu awe.—Yesaya 26:3, 20.

17. (a) Osoma moota Yehova onaathokorerya awe atthu awe, nimphwanya mureerelo xeeni? (b) Mwaha onittharelana, ninrowa othokorerya exeeni?

¹⁷ Mwaha ola, nihoona inamuna vakhaani Yehova onooniherya awe waathokorerya ni waareerela murima aakhapelelaka, waalakiherya ni owoopola atthu awe. Vaavo munuupuwelela anyu sowiiraneya iya, mmananiheke wiixutta etthu esya voohimya sa Yehova, mphavelasaka itthu sikina muhaasuwela anyu. Nto vaavo munrowa anyu wiixuttaka mikhalelo sa Yehova, omphenta ni omwaamini wanyu onrowa olipaka. Mwaha onittharelana, ninrowa woona inamuna nikhanle ahu oomutakiha Yehova, naathokoreryaka ale a vatthokoni vahu, anna a mmulokoni ni ale nnaalaleerya ahu.