1. Etthu xeeni Yesu aahaareere awe olavula ohiyu wookiserya aari awe ni awiixutti awe?

OHIYU wookiserya aari awe ni awiixutti awe ohinatthi wiiviwa, Yesu aahilavula ophenta ikwaha sinaattamela 30. Yesu aahaaleela awiixutti awe wira yaahaana ‘ophentana mukina ni mukhw’awe’. (Yohani 15:12, 17) Ophentana waya, waarowa okhala ekanyeryo yaarowa waasuwanyeiha wira awiixutti eekeekhai a Kristu. (Yohani 13:34, 35) Ophenta Yesu aahimmye awe khahiyo olavula paahi, maana ophenta aalavula awe mukhalelo muulupale ni wowiileva. Yesu aahimmye wira: “Khavo onaphenta akhw’awe vanjene onvikana ole onleva ekumi awe mwaha w’apatthani awe. Nyuwo munokhala apatthani aka, mwettelakaru itthu kinorumakani”.​—Yohani 15:13, 14.

2. (a) Olelo-va, arumeyi a Muluku anisuweliwa sai? (b) Makoho xeeni ninrowa ahu waakhula mwaha ola?

² Olelo-va, arumeyi a Yehova annisuweliwa mwaha wa  ophentana mwekeekhai ni wiiraana waya. (1 Yohani 3:10, 11) Awo anniphentana hata ari ene a ilapo soovirikana, nikhuli, nttaava, opuro anikhala aya aahiiso aahuuwale aya. Tthiri olumwenku wotheene, arumeyi a Yehova anniphentana ni murima wotheene. Vano xeeni olelo-va ophenta ori aya wootepa otthuneya? Ophenta wa Yehova ni Yesu onnilipiha sai? Nave, ninrowa wooniherya sai ophenta onaalipiha atthu akina?​—1 aKorinto 8:1.

3. Moota xeeni “mahiku òxanka” annihapuwela aya?

³ Ninkhala “mahiku òxanka”, nto okumi ahu woosareya “ovelavela n’uhawa pahi”. (2 Timótheyo 3:1-5; Esalimo 90:10) Atthu anceene annihaawa anaphavela wiixiiva. Nto khula mwaakha atthu anivikana 800.000 anniixiiva, eyo enooniherya wira khula isegundo 40 onniixiiva mutthu mmosa. Mooriipiha murima, vaavo anna akina sinaaphwanya aya mixankiho anniixiiva.

4. Arumeyi xeeni a Muluku yaaxankale anaphavela okhwa?

⁴ Okathi wa Biibiliya, arumeyi akina oororomeleya a Muluku saahaaphwanya mixankiho anaphavela okhwa. Mwa ntakiheryo, Yobi aahihaawa vanceene khuhimya wira: “Kophweliwa n’ikumi aka ela: nkinikhala-tho mahiku othene”. (Yobi 7:16; 14:13) Nave, Yona aahinyoonyiheya mpakha ohimya wira: “Tivó vano, kovarelani metto, mukuxeke ekumi aka, halali kikhweke: okhala mukumi wokiphwela”. (Yona 4:3) Profeta Eliya, oxankale ene, aahimmye wira: “Nyuwo Apwiya! Okumi wokimalela. Kuxani eroho [okumi] aka!” (1 Mamwene 19:4) Okhala wira Yehova aanaaphenta vanceene arumeyi ale, owo aaphavela wira avikaniheke okhala akumi. Tivonto, Yehova khaapwapwenle. Masi, aahaakhaliherya wira aphaveleke okhala akumi ni ovikaniha omurumeela moororomeleya.

5. Xeeni nintthuneya ahu waaphenta anna ni arokora?

⁵ Olelo-va, anna ni arokora anceene aakhalana mixankiho suulupale, nto nihaana waaphenta. Akina anniveehiwa aahiiso olupatthiwa. Akina anninyoholiwa omutekoni waya. Nave pooti wira aaxanka mwaha woovirihaka okathi munceene avaraka muteko aahiiso muteko anivara aya ti wookhulumula. Akina-tho aakhalana mixankiho suulupale vatthokoni vaya. Woonasa wene, athelanne ni mutthu ohinimurumeela Yehova, nto onimakela waaramusa. Itthu iyo ni sikina pooti owiiriha anna anceene okhulumuwa ni woona wira kharina efaita. Vano, ninrowa waakhaliherya sai?

6. Moota xeeni ophenta wa Yehova onaalipiha aya arumeyi awe?

⁶ Yehova onnaalipiherya arumeyi awe wira onnaaphenta ni onrowa waaphentaka mahiku otheene. Nkahaya muupuwele moota aIsarayeli yoonenle aya okathi Yehova aalenle awe wira: “Vekekhai, nyuwo munniphwanelela vamaithoni vaka: miyo kinnolemelihani vanjene, kinnophentani vorera”, tivo “Muhové! Miyo kiri ni nyuwo”. (Yesaya 43:4, 5) Noosuwela wira  khula mutthu tootthuneya wa Yehova. * (Nwehe enoota.) Biibiliya onileiherya wira: “Owerya waya onowopolani. Awo kharere otteliwa murima mwaha wa nyuwo”.​—Sofoniya 3:16, 17.

7. Ophenta wa Yehova onlikana sai ni mai onimmaaliha mwanawe? (Nwehe elatarato yoopacerya.)

⁷ Yehova ooleiherya waalipiha ni waamaaliha arumeyi awe hata saaphwanyaka mixankiho, oriki: “Anamwane awe anrowa okuxiwa mmatatani, anrowa wepesiwa vamettoni. Ntoko muthiyana onimmaliha mwan’awe, siso miyo kinrowa wohakalalihani”. (Yesaya 66:12, 13) Tthiri mwaana khonoova okathi maama awe onimuyara awe ottuli aahiiso onimukuxa awe mmatatani mwawe! Nave Yehova onnoophentani vanceene ni oniphavela wira muhooveke. Mukupaliki wira Yehova onnoovahani efaita yuulupale.​—Yeremiya 31:3.

8, 9. Moota xeeni ophenta wa Yesu onnilipiha aya?

⁸ Ntakiheryo nikina nnooniherya wira Yehova onniniphenta nri Yohani 3:16, oni: “Vekekhai, Muluku ohaphentexa atthu mpakha wavaha Mwan’awe mmosene, wira othene ale animwamini yowo, ehirimelé, masi ekhalane ekumi ehinimala”. Mwaha wa Yesu ovaha okumi awe ntoko mukuttho, ohooniherya wira onniniphenta. Nto ophenta iwo onninlipiha. Biibiliya onihimya wira “ovelavela n’ulupatthiwa” khoniwerya “onimwalanyiha n’uphenta wa Kristu”.​—aRoma 8:35, 38, 39.

⁹ Ikwaha sikina, sinniniphwanya mixankiho sinnikhulumula werutthuni, mmuupuweloni aahiiso sihinniphwanyiha ohakalala naamurumeelaka Yehova. Masi muupuweleke  wira Kristu onniniphenta vanceene ni onoowerya onivaha ikuru wira nivilele mixankiho. (Mmusome 2 aKorinto 5:14, 15.) Ophenta wa Yesu onniniiriha ophavela okhala akumi ni omurumeela Yehova. Nave onninikhaliherya ohiphavela wiixiiva hata nihaawaka vanceene, olupatthiwa, onyoonyiheya aahiiso oxanka.

10, 11. Tani arina muritti wowaalipiha anna akhulumunwe? Mutthokiherye.

¹⁰ Nave Yehova onninlipiha orumeelaka muloko awe woophenta. Vaavo nnaaphenta ahu anna ni arokora ninnooniherya wira ninnimphenta Yehova. Nto nihaana opaka khula etthu eniwerya ahu wira naakhaliherye anna nisuwelaka wira ta faita ni Yehova onnaaphenta. (1 Yohani 4:19-21) Murummwa Paulo aalempe so: “Mulipihaneke murima, mukhaliheryaneke ntoko sinìranyu vano”. (1 aTesalonika 5:11) Owo khahiyo muteko wa axitokweene paahi. Maana khula mutthu onoowerya omutakiha Yehova ni Yesu aalipihaka anna ni arokora.​—Mmusome aRoma 15:1, 2.

¹¹ Anna akina anihaawa mwaha wooriipiwa murima aahiiso oxanka, ahaana ophavela okhaliheriwa ni mameediku. (Luka 5:31) Ekeekhai wira axitokweene ni anna akina khahiyo mameediku, masi anoowerya waakhaliherya anna awo. Tthiri anna otheene a mmulokoni ahaana ‘walipiha murima ale ahilimpe, wakhaliherya ale òlosowa, wavilela atthu othene’. (1 aTesalonika 5:14) Nave nihaana omananiha osuwela etthu enaaxankiha. Nto okathi owo nihaana waapixerya murima ni olavula moolumo oolipiha ni oomaaliha. Niireke  munnaalipiha anna? Munrowa opaka exeeni wira mwaalipiheke vanceene anna awo?

12. Nvahe ntakiheryo na murokora aalipihiwe ni ophenta wa muloko.

¹² Murokora a wEuropa ohimmye so: “Waahikhala okathi kaaphavela aka wiixiiva, masi kaahiphwanya nikhaliheryo. Anna a muloko kaari aka ahoopola okumi aka. Anna ni arokora yaamakela okilipiha ni okiphenta. Muloko wotheene waamakela okilipiha, nnaamwi yaasuwenle anna vakhaani wira kaaniriipiwa murima. Anamathelana amosa ari ntoko anamuyari aka oomunepani. Awo annikikhapelela saana ni annikhala ni miyo nihiku notheene”. Ekeekhai wira khivaniweryaneya atthu otheene onikhapelela mwa enamuna emosa-ru. Masi otheene ahu nnoowerya waakhaliherya anna ni arokora. * (Nwehe enoota.)

13. Nipakeke exeeni wira naalipihe atthu akina?

¹³ Nwiriyaneke saana. (Yakobo 1:19) Ninnooniherya waaphenta anna naawiriyanaka mwa enamuna enooniherya othunku. Nto mmukoheke mwa enamuna enrowa wookhaliheryani osuwela moonelo awe. Makhalelo a owiitho wanyu anoomukhaliherya woona wira munnimuthokorerya saana. Vano okathi onilavula awe, mpixeke murima wira ohimye moonelo awe mootaphuwa. Mwanwiriyana saana, munoosuwela moonelo awe ni owo onimoororomelakani. Nave eyo enoomwiiriha woowiriyanani vaavo muniphavela anyu omukhaliherya. Tivonto, akhala wira munnaathokorerya saana, munimwaalipiha vanceene.

14. Xeeni nintthuneya ahu olavula moolumo oolipiha?

¹⁴ Moolumo oohilipiha. Mutthu okhulumunwe pooti otepa onyoonyiheya akhala wira ninlavula masu ahinlipiha. Nto masu awo pooti ohimulipiha yena. Miruku 12:18, onihimya wira: “Okakaruwa mwano tukuthi onvulaliha: nlumi na musuweli ninnivoliha makhwatta”. Nnaamwi nihiphavelaka omunyoonyiha mutthu oriipiwe murima ni moolumo ahu, okathi mukina eyo pooti wiiraneya. Masi onootepa woona owereya nalavula nihuupuwenle. Wira mmulipihe munna, muhaana wiimananiha omooniherya wira muniphavela osuwela etthu enimuxankiha.​—Matheyo 7:12.

15. Ikaruma xeeni nikhanle ahu oorumeela wira naalipihe anna?

¹⁵ Murumeeleke Nuulumo na Muluku wira mwaalipihe atthu. (Mmusome aRoma 15:4, 5.) Okhala wira Biibiliya onikhuma wa ‘Muluku [yoowo] onvaha nthiti n’uhakalala’, vanniweryaneya ophwanya moolumo oolipiha. Nave pooti omurumeela Índice das Publicações da Torre de Vigia aahiiso Eliivuru Enaakhaliherya Anamoona a Yehova Otokosa Myaha Sikumiheriwe. Ikaruma iyo sinninikhaliherya ophwanya soolepa ni iliivuru nikhanle ahu oorumeela wira naalipihe ni waamaaliha anna ni arokora.

16. Mikhalelo xeeni sinrowa onikhaliherya omulipiha munna oriipiwe murima?

¹⁶ Mukhale ooreerela murima ni oothunku. Yehova “Tithi a ikharari ni  Muluku onnihakalaliha inamuna sothene”, nave owo ‘Muluku . . . òsareya othunku’. (Mmusome 2 aKorinto 1:3-6; Luka 1:78; aRoma 15:13) Murummwa Paulo oovaha ntakiheryo nooloka, maana aamutakiha Yehova. Paulo olempe so: “Okathi waryaka ni nyuwo, kari òmàla murima, ntoko muthiyana onakhapelelawe an’awe. Miyo kihophentani vanjene, mpakha ophavela okawana ni nyuwo vohikhala ehapari yorera ya Muluku pahi, kaniphavela-tho wovahani hatá ekumi aka. Tthiri nyuwo mokisiveliha vanjene”. (1 aTesalonika 2:7, 8) Akhala wira ninnaareerela murima ni owoonela othunku anna nnaavekelela ahu, ninrowa omutakihaka Yehova.

17. Moonelo xeeni wooloka onrowa onikhaliherya waalipiha anna?

¹⁷ Muhuupuweleke wira anna toomalela. Muhiiwoke muupuwelaka wira anna toomalela ni khanrowa woonyoonyihani. (Musuweli 7:21, 22) Muupuweleke wira Yehova khonlipelela itthu nihinwerya ahu. Tivonto nihaana opixeryana murima. (aÉfeso 4:2, 32) Khanimphavela owiiriha anna wuupuwelaka wira khaniimananiha ovara miteko sa Muluku aahiiso waalikanyiha ni atthu akina. Ohiya-vo, ninnaalipiha naattottopelaka mwaha wa itthu aniwerya aya opaka saana. Nto eyo enimwaahakalaliha vaavo anivikaniha aya omurumeela Yehova.​—aGalasia 6:4.

18. Xeeni nimphavela ahu waalipiha anna moophenta?

¹⁸ Yehova ni Yesu annaavaha efaita arumeyi ootheene oororomeleya. (aGalasia 2:20) Okhala wira ninnaaphenta vanceene anna ni arokora, nihaana waathokorerya saana. Hiyo “niphaveleke itthu sinniphwanyiha murettele, sinnikhaliherya olipiheryana wamini wahu”. (aRoma 14:19, Biblia Solempwa sa Muluku) Tthiri, ninnilipelela okathi atthu anrowa aya okhalaka mParayiisu, ahinyoonyiheyaka! Nave khasinrowa okhala iretta nnakhala ikhotto. Atthu khanrowa okhwaaka mwaha wa etampi, okhalana mixankiho vatthokoni, olupatthiwa aahiiso onyoonyiheya. Wanikisa wa iyaakha ekonto emosa, apinaatamu otheene anrowa okhala oomalela. Atthu anrowa ororomeleya weehereriwa wookiserya, anookhalihiwa anamwane a Yehova. Nave anrowa ophwanya “otaphuwa n’uvuwa w’àna a Muluku”. (aRoma 8:21) Tivonto otheene ahu nrowe nooniherye ophenta onlipiha ni okhaliheryana mukina ni mukhwaawe wira noopowe nikelaka elapo esya ya Muluku.