1. Xeeni Anamoona a Yehova ari aya atthu oohakalala? (Nwehe efootu yoopacerya.)

ANAMOONA A YEHOVA atthu oohakalala. Khula opuro ari aya, mithukumano sa mmulokoni aahiiso suulupale, okathi anitthekula aya annivaanela moohakalala. Exeeni eniwiiriha ohakalala? Mwaha woowi annimusuwela Yehova, Muluku oohakalala. Awo annimurumeela ni ophavela omutakiha. (1 Timótheyo 1:11; Esalimo 16:11) Yehova tori mwaneene ohakalala, tivonto oniphavela awe wira hiyo nihakalaleke ni onninivaha mathowa manceene anniphwanyiha ohakalala.​—Otumererya 12:7; Musuweli 3:12, 13.

2, 3. (a) Ohakalala ontaphulela exeeni? (b) Xeeni vanivila aya ophwanya ohakalala?

² Ankhi nyuwo? Niireke mwa mutthu oohakalala? Ohakalala ontaphulela okhala saana, otteeliwa murima ni itthu murina anyu aahiiso otthapa. Biibiliya onnooniherya wira atthu yaale anireelihiwa ni Yehova, tanihakalala mwekeekhai. Masi xeeni mahiku ala vanivila aya ophwanya ohakalala?

 ³ Itthu ntoko, mixankiho suulupale, okhweliwa mutthu namphenta ahu aahiiso okumihiwa mmulokoni, omwalana ni woomoliwa muteko pooti ohiniphwanyiha ohakalala. Nave mutthu pooti ohihakalala vaavo vatthokoni vawe ohinkhala aya murettele mwaha wa onyakulihana, onyoholiwa ni ale onvarana awe muteko wala onsomana awe oxikola. Nave-tho, khannihakalala akhala wira ninnilupatthiwa aahiiso otthukweliwa mukhatteya mwaha woomurumeela Yehova. Vaavo ekumi ahu ehinloka-loka aya, hiyo pooti owereyasiwa aahiiso ohaawa onikumiheriwa ni oriipiwa murima. Masi muupuweleke wira Yesu Kristu “yowo okhanle òreriwa ni . . . Pwiya a mapwiya othene” aahiiso Namalamulela, onnisiveliwa waamaaliha atthu wira ahakalaleke. (1 Timótheyo 6:15; Matheyo 11:28-30) Mwaha Yesu aalavunle awe Vamwaako, aahihimya mikhalelo sinnikhaliherya ohakalala hata nikumanaka mixankiho sinceene, olumwenku ola wa Satana.

4, 5. Nipakeke exeeni wira niphwanye ohakalala?

⁴ Etthu yoopacerya Yesu aalavunle awe ti yootepa otthuneya. Owo aahimmye wira: “Òreriwa t’ale ari amasikhini murohoni mwaya, okhala wira Omwene wa wirimu ti wawaya”. (Matheyo 5:3) Akhala wira na amasikhini momunepani, ethoonyeryo yoowi ninnisuwela wira nihaana omusuwela Muluku niphavelaka nikhaliheryo nawe ni malakiheryo awe. Nimpaka sai eyo? Ninnipaka eyo, nimusomaka Biibiliya, nipwehaka nipuro noopacerya omukokhorela Muluku ni omwiiwelela yena. Opaka itthu iyo sinooniphwanyiha ohakalala. Nto, waamini wahu wira anatiri a Muluku animwiiraneya, onrowa olipaka. Nave nlipelelo noohakalaliha nimphwanya ahu mBiibiliyani ninninlipiha.​—Tito 2:13.

⁵ Ovikaniha olipiha wataana wahu ni Yehova, onoonikhaliherya ophwanya ohakalala wekeekhai hata nikumanaka mixankiho. Murummwa Paulo aalempe so: “Mutteliweke murima mw’Apwiya, okathi wothene. Kinohimeryani-tho wira mutteliweke murima”. (aFilipi 4:4) Ankhili a Muluku anoonikhaliherya olipiha wataana wahu ni Yehova. Nuulumo na Muluku ninhimya so: “Òreriwa mutth’ule àphwannye ankhili: tthiri òphwanya wakuva osuwela. Awo ti mwiri onavaha ekumi ale anatthara: onavaha oreriwa ale aniwettela”.—Miruku 3:13, 18.

6. Exeeni-tho nintthuneya ahu opaka wira nihakalaleke?

⁶ Wira nihakalaleke, ti vootepa otthuneya ovikaniha ovarihela muteko ele ninsoma ahu mBiibiliyani. Yesu aahittittimiherya mwaha ola, oriki: “Nyuwo mosuwela itthu iya: vano, mwettelakaru, munoreriwa”. (Yohani 13:17; mmusome Yakobo 1:25.) Eyo ti yootthuneya akhala wira ninniphavela  olya momunepani ni ophwanya ohakalala. Masi ninrowa ophwanya sai ohakalala hata nikumanaka mixankiho sinceene? Nrowe noone ele Yesu aalavunle awe Mwaha awe Vamwaako.

7. Moota xeeni ale ariipiwe murima aniwerya aya ohakalala?

⁷ “Òreriwa t’ale òripiwa murima, okhala wira Muluku onimwakurunuxa murima”. (Matheyo 5:4) Hiyo pooti wiikoha so: ‘Vaniweryaneya sai atthu ohakalala ariipiwe ene murima?’ Yesu khaamuhimya khula mutthu oriipiwe murima. Maana atthu ootakhala murima anniiniwa aahiiso oriipiwa murima, okhala wira “okathi [ola] wokiserya” sinnaaphwanya mixankiho soovila weettiherya. (2 Timótheyo 3:1) Masi atthu awo aniisuupuwela mmansaya, omuhiya Yehova, tivo, khaniwerya ohakalala okhala wira kharina wataana ni yena. Atthu Yesu aahimya awe taale ansuwela wira amasikhini momunepani. Awo anniriipiwa murima mwaha woowi atthu anceene khanimphavela Muluku, nnakhala wiiwelela malamulo awe. Nave annisuwela wira anatampi ni anniweha itthu sootakhala siiraneyaka olumwenku ola. Nto Yehova onnaaweha ale tthiri ariipiwe murima, onimwaavaha ohakalala ni nimaaliho orumeelaka Nuulumo nawe.​—Mmusome Ezekiyeli 5:11; 9:4.

8. Moota xeeni okhala oomaala onoophwanyihayani ohakalala?

⁸ “Òreriwa t’ale òwimàliha, okhala wira animwakhela elapo ntoko yohiyeriwa”. (Matheyo 5:5) Moota xeeni omaala onrowa aya woophwanyihani ohakalala? Atthu anceene tootakhala ni oowali, mikhalelo iyo sinnikumiherya mixankiho. Masi vaavo aniixutta aya ekeekhai, awo annihiya mikhalelo iyo anawara “omutthu wa nanano”. Nto awo annooniherya “murima w’othunku, murima worera, wowiyeviha, womàla ni wovilela”. (aKolosi 3:9-12) Mwaha wookhala atthu a murettele, annaataana saana ni atthu akina ni annihakalala. Nave-tho, Biibiliya onleiherya wira “animwakhela elapo yohiyeriw’aya”.​—Esalimo 37:8-10, 29.

9. (a) Exeeni Yesu aaphavela awe ohimya ni masu oowi atthu oomaala “animwakhela elapo yohiyeriw’aya”? (b) Xeeni ale “amphavelexa exariya” anrowa aya ohakalala?

⁹ Exeeni Yesu aaphavela awe ohimya ni masu oowi atthu oomaala “animwakhela elapo yohiyeriw’aya”? Atthu oothanliwa animwaakhela elapo okathi anrowa aya olamulelaka elapo ela ntoko mamwene ni anamukuttho. (Wisupulula 20:6) Atthu imilyau sinceene anlipelela okhala valaponi, animwaakhela elapo, vaavo anrowa aya okhalaka valaponi mahiku otheene. Awo anrowa okhala oomalela ni anookhalana murettele ni ohakalala. Olavulaka sa atthu awo, Yesu aahimmye wira: “Òreriwa t’ale amphavelexa exariya”. (Matheyo 5:6) Ophavela waya exariya onimwiiraneya vaavo Yehova onrowa awe omaliha otakhala wotheene. (2 Pedru 3:13) Elapo esya, anaxariya anrowa ohakalalaka ni khankhala-khala ariipiwaka murima mwaha wa itthu sootakhala siniiraneya valaponi.​—Esalimo 37:17.

10. Ontaphulela exeeni omoriwa ikharari?

¹⁰ “Òreriwa t’ale òmoriwa ikharari, okhala wira Muluku onimwamorela ikharari”. (Matheyo 5:7) Omoriwa  ikharari ontaphulela othokorerya, oreerela murima, woona othunku, eyo piiyo, wiihela nipuro na mutthu onihaawa. Masi omoriwa ikharari khahiyo olavula paahi. Maana Biibiliya onninleela wira omoriwa ikharari onihela muhina waakhaliherya atthu.

11. Nlikanyiho na muSamariya ooreera murima ninniixuttiha exeeni?

¹¹ Mmusome Luka 10:30-37. Nlikanyiho na Yesu na muSamariya ooreera murima, ninnooniherya saana ele entaphulela aya omoriwa ikharari. Okhala wira muSamariya ole aari oomoriwa ikharari ni oowoona othunku, eyo yaahimwiiriha omukhaliherya mulopwana ole aahaawa. Nuumala olavula nlikanyiho nne, Yesu aahimmye wira: “Muroweke! Ni nyuwo mwireke siso”. Tivonto nihaana wiikoha so: ‘Kiireke kinnipaka eyo? Kiireke kinnimutakiha muSamariya ole? Vaavo atthu anihaawa aya, kiireke kinnaakhaliherya? Mwa ntakiheryo, kinoowerya waakhaliherya anna oowuuluvala, anaamukhweli, aahiiso anamwane anamuyari aya ahikhanle anamoona a Yehova? Kiireke kinoowerya otthara miruku iya sini: “Mwalipiheke murima ale ahilimpe”?’​—1 aTesalonika 5:14; Yakobo 1:27.

12. Xeeni omoriwa ikharari onniphwanyiha aya ohakalala?

¹² Xeeni omoriwa ikharari onniphwanyiha aya ohakalala? Mwaha woowi waamorela ikharari atthu, enamuna emosa yoovaha, nto Yesu aahimmye wira ovaha onninihakalaliha. Nthowa nikina, okhala wira waamorela ikharari atthu onnimuhakalaliha Yehova. (Miteko 20:35; mmusome aHéberi 13:16.) Olavulaka sa Yehova yoowo ori oomoriwa ikharari, Mwene Davidi aahimmye so: “Apwiya animwasuka, animwavaha ekumi n’ureriwa vathí-va”. (Esalimo 41:2, 3) Vakhala wira ninnaamorela ikharari ni owoonela othunku atthu, Yehova onoonimorela ikharari ni oniphwanyiha ohakalala mahiku otheene.​—Yakobo 2:13.

13, 14. Xeeni vari aya vootthuneya okhala “òrera murima”?

¹³ Yesu aahimmye wira: “Òreriwa t’ale òrera murima, okhala wira anomona  Muluku”. (Matheyo 5:8) Wira nikhale ooreera murima, nihaana wuupuwelaka itthu sooloka. Eyo ti yootepa otthuneya naaphavelaka wira Yehova eemererye okokhorela wahu.​—Mmusome 2 aKorinto 4:2; 1 Timótheyo 1:5.

¹⁴ Atthu ooreera murima, anoowerya okhalana wataana wooloka ni Yehova, yoowo onihimya wira: “Òreriwa t’ale ankattha ikuwo saya”. (Wisupulula 22:14) Ontaphulela exeeni ‘okattha ikuwo saya’? MaKristau oowoottihiwa, entaphulela wira Yehova onnaathokorerya okhala ooloka ni onrowa waavaha okumi ohinikhwa wiirimu ni ohakalala woohimala. Vano, muttitthi muulupale onlipelela okhala valaponi, ontaphulela wira Yehova onniweemererya okhala apatthani awe mwaha woowaathokorerya okhala anaxariya. Biibiliya onihimya so: “Awo àkattha malay’aya, khutteliha mphomeni mwa mwapwittipwitthi”.​—Wisupulula 7:9, 13, 14.

15, 16. Vaniweryaneya sai atthu ooreera murima ‘omona Muluku’?

¹⁵ Yehova ohimmye so: “Khavo onwerya oweha owitho waka: ònaru, onimokhwa”. (Okhuma 33:20) Nto vaniweryaneya sai atthu ooreera murima ‘omona Muluku’? Nuulumo na eGriki noowi ‘wona’, nintaphulela wuupuwela, wiiwexexa aahiiso osuwela. Tivonto, ‘omona Muluku’ ontaphulela osuwela Omutthu awe ni osiveliwa mikhalelo sawe. (aÉfeso 1:18) Yesu aahitakiha mikhalelo sa Muluku moomalela, ti maana aya aahimmye awe wira: “Ole okònne miyo, owònne Atithi”.​—Yohani 14:7-9.

¹⁶ Nto hiyo ‘ninnimona Muluku’, vaavo nnoona ahu wira onninikhaliherya mookumini mwahu. (Yobi 42:5) Nave-tho, nnoowerya ‘wona’ aahiiso wuupuwelela itthu sooloka Yehova aaleihenrye awe atthu ooreera murima ni oororomeleya. Masi ale oowoottihiwa anrowa onweha Yehova nuumala ohihimuxiwa ni orowa wiirimu.​—1 Yohani 3:2.

17. Xeeni ale aniphavela murettele anihakalala aya?

¹⁷ Moottharelana, Yesu aahimmye wira: “Òreriwa t’ale anetetela wiwanana ni murettele”. (Matheyo 5:9) Vaavo nniimananiha ahu okhalana murettele ni atthu akina, ninnihakalala. Mwiixutti Yakobo olempe so: “Ale anaphavelela murettele atthu othene, annàla murettele, annìmiha exariya”. (Yakobo 3:18) Akhala wira khamuniiwanana ni munna aahiiso mmusi anyu, mmuxonttele Yehova wira ookhaliheryeni okhaliha murettele. Nto Yehova onimoovahani munepa awe wootteela wira mooniherye mikhalelo sa eKristau ni okhala oohakalala. Yesu aahittittimiherya otthuneya waya opacerya okhaliha murettele ni atthu akina, oriki: “Tivó, mwarowaka ovelela yovah’anyu waltari, weiwo mùpuwelá wira munn’inyu khakhanle sana ni  nyuwo, muhiye yovah’anyu oholo w’altari, murowé toko, mwatàne ni munn’iny’uwo. Vano-nto muhalé murwaka ovelela yovah’anyu”.​—Matheyo 5:23, 24.

18, 19. Xeeni maKristau anihakalala aya hata alupatthiwaka?

¹⁸ “Nyuwo munoreriwa mwaruwaniwaka, mwalupatthiwaka ni motheriwaka sotakhala sothene mwaha wa miyo”. Exeeni Yesu aaphavela awe ohimya ni masu ala? Yesu aahincererya oriki: “Mutthapeke, mutteliweke murima, okhala wira otthuveliwa wanyu wirimu onokhala wulupale. Tthiri ti siso salupatthiwaya maprofeta a khalai muhinatthi nyuwo”. (Matheyo 5:11, 12) Okathi yaamaniwa aya ni okhoottiheriwa olaleerya, “arummwa yahikhuma mmuthukumanoni etteliwene murima”. Khahiyo wira yaatteeliwe murima mwaha woomaniwa. Masi etthu yaatteeliha murima, “okhala wira Muluku ahaphwaneliha ohaxiwa mwaha wa nsina na Yesu”.—Miteko 5:41.

¹⁹ Olelo-va, Anamoona a Yehova annivilela ni ohakalala okathi anlupatthiwa aya mwaha woomutthara Yesu. (Mmusome Yakobo 1:2-4.) Ntoko arummwa, etthu ennihakalaliha khahiyo ohaawa aahiiso olupatthiwa. Masi akhala wira nnoovikaniha ororomeleya wa Yehova, owo onoonivaha olipa murima wira nivilele. Nrowe nthokorerye ele yiiraneyale ni Henryk Dornik ni munnawe. Agosto a 1944, awo yaahiroihiwa opuro onivariwa muteko wookhanyereriwa. Atthu ale yaalupattha yaahimmye so: “Khivaniweryaneya owiiriha opaka itthu soohiloka. Maana hata ahasuliwaka annihakalala”. Henryk otthokihenrye wira: “Nnaamwi kahaaphavela okhwa mwaha woohaaxiwa, olipa murima ni ovilela moororomeleya wa Yehova wookiphwanyiha ohakalala”. Nave, aahincererya oriki: “Opaka mavekelo mooluttuweliwa wookaattamiherya Yehova ni kihoona wira owo Namakhaliherya oororomeleya”.

20. Omurumeela Muluku oohakalala, onniphwanyiha mureerelo xeeni?

²⁰ Vaavo Yehova, yoowo ori Muluku oohakalala, onisiveliwa awe ni hiyo, ninnihakalala hata nilupatthiwaka, ninyokhiwaka ni amusi ihu, niwereiwaka aahiiso wuuluvala. (1 Timótheyo 1:11) Nave ninnihakalala mwaha woowi Muluku ahu yoowo “ori òhòtha”, ooleiherya itthu sooloka. (Tito 1:2) Vaavo Yehova onrowa awe waamaliherya anatiri awe, khaninrowa-tho wuupuwela mixankiho nrina ahu vano. Tthiri vanrowa okhala voohakalaliha okhala mParayiisu ni ophwanya ohakalala wuulupale! Mwekeekhai ninrowa ‘okhala ni murettele womalela’.​—Esalimo 37:11.