“NLIPELELO . . . NINNITTHUNEYA WIRA NIKHALANE WAAMINI”. Moolumo ala anikhuma eliivuru enilavula sa nlipelelo okathi wa mixankiho (Hope in the Age of Anxiety). Eliivuru eyo ennihimya-tho so: “Nlipelelo ninnimukhaliherya mutthu oxintta miyuupuwelelo sa ohiivaha efaita, omeekha ni woova”.

Biibiliya onihimya wira nihaana okhalana nlipelelo. Masi-tho, onninlopola wira nihaana osyaka ororomela ethiru. Owo oni: “Muharoromeleké makhulupale, muhilipeké n’awo: khavo mutthu onwerya owòpolani”. (Esalimo 146:3) Nto ohiya waaroromela apinaatamu wira anoopole, etthu ya ankhili ori omuroromela Mpattuxa ahu, yoowo orina owerya woomaleliha sooleiherya sawe. Exeeni onileiherya awe? Nrowe niwehe:

OTAKHALA ONOOMALA; ANAXARIYA ANOOKHALA NI MURETTELE WOOHIMALA: “Atakhali anorimela nananoru: . . . Vano atthu òmàla anoreriwa vathí-va: anokhala-mu ni murettele womalela. Anaxariya . . . anokhala [mulaponi] mahiku othene”.​—Esalimo 37:10, 11, 29.

IKHOTTO SINOOMALA: “Apwiya . . . àmaliha ekhotto mulaponi mothene: ahintakasa miyura ni mavaka èkhotto, àhonona ni moro iyuma sothene s’ekhotto”.​—Esalimo 46: 9, 10.

IRETTA, OHAAWA, NI OKHWA SINOOMALA: “Emp’ela, empa ya Muluku variyari v’atthu. . . . Owo onopuputtha maithori aya othene: khunrowa okhala-tho okhwa, nnákhala oripiwa murima, walá ikuttho nnákhala ohawa”.​—Wisupulula 21: 3, 4.

ATTHU OTHEENE ANOOKHALANA YOOLYA YOOWAATTA: “Mmatta mothene muruwerye solya sinjene: mattumuxa esareye ipyó”.​—Esalimo 72:16.

EGUVERNU EMOSA PAAHI, OMWENE WA KRISTU YOOWO ONROWA OLAMULELA ELAPO YOTHEENE: “[Yesu Kristu] òvahiwa owerya n’uttittimihiwa n’umwene: atthu a ilapo sothene ni a maloko othene ni a ilavulelo sothene yahimurumela. Owerya wawe khunimala, khanakhiwa: omwene awe khunipwetexiwa-tho”.​—Daniyeli 7:14.

Exeeni ennikupaliha sooleiherya iya? Okathi Yesu aari awe valaponi, aahooniherya wira owo onniphwanelela okhala Mwene oothanliwa ni Muluku. Owo aahaavoniha aretta, waavaha yoolya atthu oohaawa, ni waahihimuxa alipa-ookhwa. Etthu ekina yuulupale, yaari soowiixuttiha sawe. Atthu aniiwelela soowiixuttiha iyo anrowa okhalaka voohimala, oowiiraana ni murettele. Nave-tho Yesu aahihimya itthu saarowa wiiraneya muhoolo, ohela muhina itthu saarowa wooniherya wira ninkhala mahiku ookiserya.

Yesu aahihimya wira mahiku ookiserya khiyaarowa okhala a murettele, masi ooxankiha! Owo aahihimya-tho wira ‘womalani wa olumwenku’ saamukhumelela ikhotto, etala, iretta, ni itetere suulupale. (Matheyo 24:3, 7; Luka 21:10, 11; Wisupulula 6:3-8) Nave-tho aahincererya oriki: “Sotakhala sinomwarela mulaponi: siso-tho, ophentana w’atthu anjene onovukuwa”.​—Matheyo 24:12.

Eyo ennooneya mwa inamuna sinceene olelo-va. Tivonto eliivuru ekina ya Biibiliya yaahihimya mukhalelo owo mooluluwanya eriki: “okathi wokiserya”, atthu yaarowa wiisupuwelaka mmansaya paahi, oophenta musurukhu, ni oophavela soopuha. Atthu yaarowa okhala oowiisoona, ni oowaakuva onanariwa. Imusi saamuhiya ophentana, nave anamwane khiyaarowa owiiwelelaka anamuyari aya. Atthu anceene aneettela itiini yaarowa okhala oowootha.​—2 Timótheyo 3:1-5.

Mixankiho sinikhumelela sinooniherya wira ninkhala mahiku ookiserya. Itthu iyo sinooniherya-tho wira Omwene wa Muluku ori vakhiviru. Tthiri, Yesu olavulaka sa eprofesia awe ya mahiku ookiserya, aahilipiherya wira: “Ehapar’ila Yorera y’omwene wa wirimu enolaleiwa mulaponi mothene, wira maloko othene esuwele, yamini. Vano-nto, olumwenk’ula omaleke”.​—Matheyo 24:14.

Ihapari sooreera sinnaalopola anamattheka ni waavaha nlipelelo anaxariya. Nave, sinnaalipiherya wira mareeliho aleiheriwe aya animwiiraneya voohipisa. Niireke munniphavela wiixutta itthu sikina voohimya sa mareeliho awo? Vakhala wira ti siiso, xontte nwehe epaaxina yookiserya ya erevista ela.