AMIRAVO
11: Ophavela Ovara Muteko
ELE ENTAPHULELA AYA
Atthu aniphavela ovara muteko, toowiilipiha. Ohiya-vo, waasivela ovara muteko sinaaphwanyiha mureerelo ni waakhaliherya akina, hata ele enivara aya ehooneliwaka vatthu ni atthu akina.
XEENI VANIREERELA AYA?
Nnaamwi woonasa wene vahinsivelaka, masi otheene ahu nookhalana miritti sinreerela othokorerya. Olumwenku ola atthu ahiniphavela aya ovara miteko soovila, ovara muteko moowiilipiha onimoophwanyihani mireerelo.—Musuweli 3:13.
“Kihiixutta wira mutthu aavaraka muteko ni nthiti, onniivaha efaita ni ohakalala. Ohakalala iwo onnikiiriha osiveliwa ovara muteko. Nave okhalela nthiti ovara muteko onnikhaliherya okhalana nsina nooloka”.—Reyon.
ELE BIIBILIYA ONIHIMYA AWE: “Muteko ti muteko onnimurerela mutthu”.—Miruku 14:23.
ETTHU YOOPAKA
Mukhalaneke moonelo wooloka voohimya sa ovara muteko, moovarihana ni inamuna sinittharelana.
Musiveliweke wiixutta opaka itthu oratteene. Akhala wira munivara miteko sa vate, sa oxikola, wala sikina, mwiimananiheke ovara saana. Hata musuwelaka ovara saana, mphaveleke enamuna yoovara saana ovikana-vo ni voowaakuveya. Nto mwalimalela ovara saana muteko, onimoosivelani.
ELE BIIBILIYA ONIHIMYA AWE: “Mmone onvara miteko sawe orattene: owo khankhala eriyari y’ale òhoneliwa vatthu, masi onowerya onvarela muteko mwené”.—Miruku 22:29.
Muupuweleke mireerelo sinrowa okhumelela. Khula ekwaha munivara anyu saana muteko anyu, munnaaphwanyiha mureerelo atthu akina. Mwa ntakiheryo, akhala wira munnivara saana miteko sa vate, eyo ennaakhweiherya amusi anyu.
ELE BIIBILIYA ONIHIMYA AWE: “Mulipa-òvaha onoreriwa onvikana mulipa-ònvahiwa”.—Miteko 20:35.
Mwiimananiheke vanceene. Ohiya paahi ovara itthu munivekeliwa anyu, mwiimananiheke ovara hata iye muhinivekeliwa anyu. Wira siiso, onooniherya wira nyuwo ti muneettiha okumi anyu, khamunivara itthu mwaha wookhanyereriwa paahi, masi ti vootthuna wanyu.—Matheyo 5:41.
ELE BIIBILIYA ONIHIMYA AWE: “Masi nkitthunne wira etthu, nyuwo muhikèmihenrye, wira orera wanyu murima ohikhalé wokhanyereriwa: okhalé w’otthuna wanyu”—Filémoni 14.
Mukhalaneke moonelo wooloka. Mutthu onisiveliwa ovara muteko, khahiyo toolosowa, masi-tho khonisivelaxiwa muteko vootepana. Mutthu owo onnisuwela weereryaniha itthu. Onnivara muteko ni onniphavela okathi woophumurya.
ELE BIIBILIYA ONIHIMYA AWE: “Halali okhalana itthu vakhani mmatatani ni murettele, ovikana otepa ovara muteko mahala”.—Musuweli 4:6.
