ANAMUYARI
6: Waalakiherya Anamwane
ELE ENTAPHULELA AYA
Nuulumo noowi olakiherya, nintaphulela wiixuttiha. Ikwaha sikina, eyo enihela muhina omuttaruxa mwaana mwaha wa mweettelo awe woohiloka. Nave ikwaha sinceene, onihela muhina omwiixuttiha makhalelo ooloka anrowa omukhaliherya muhoolo opaka soothanla sooloka.
XEENI VANIREERELA AYA?
Mahiku ala, anamuyari akina khanaalakiherya anaaya, yuupuwelaka wira eyo pooti omwiiriha mwaana ohiiroromela. Masi anamuyari a miruku annikumiherya malakiheryo ooloka ni annaatumererya anaaya wira ahaana weettela malakiheryo awo.
“Anamwane ahaana ovahiwa mikano wira akhalaneke miruku sooloka yannuwa vale. Yaahilakiweke, awo anrowa olikanaka ni pakiti ohirina eleemi. Pakiti owo onookuxiwa ni maasi wala onoopittuwa”.—Pamela.
ETTHU YOOPAKA
Enihimya anyu ekhaleke yeeyo. Akhala wira mwaninyu khonitthara malakiheryo muninvaha anyu, mmuleeleke ihukhumu sawe. Masi, vakhala wira onniiwelela mmuttottopeleke.
“Olumwenku ola woothowa anamwane oowiiwelela, miyo kinnaattottopela anaaka khula ekwaha anikiiwelela aya. Waattottopela anamwane onnikhweiherya okathi woowaattaruxa”.—Christine.
ELE BIIBILIYA ONIHIMYA AWE: “Eyo mutthu enàlawe, yeyo t’inhephawe”.—aGalasia 6:7.
Mukhaleke ooreera murima. Okathi munimuttaruxa anyu mwaana, muthokoreryeke munnuwelo ni makhalelo awe, ni otakhala waya etthu yoohiloka epanke awe. Mmuleeleke wira khula etthu yoohiloka, ennikumiherya mixankiho. Mwa ntakiheryo, mmuleeleke wira akhala wira khonimurumeela saana selulaari, nyuwo munoomwaakha ni khonrowa omurumeela-tho ninaano. Nave, musyakeke, omakelaka onyooniheya ni khula etthu.
“Kinnimananiha osuwela akhala wira mwanaka onoolakelela ohiiwelela wala mwaha wa othoiwa miruku. Maana sookhala itthu sinireerela omuttaruxa mwaana masi sikina onitthuneya omuleela paahi”.—Wendell.
ELE BIIBILIYA ONIHIMYA AWE: “Nyuwo, alipa-òyara: muhanyonyiheké an’inyu, wira ehojeyé”.—aKolosi 3:21.
Mphenteke. Anamwane vannaakhweela weemererya olakiwa vakhala wira annoona wira anamuyari aya anaalaka mwaha wa niphento.
“Okathi mwanihu onipaka awe etthu yoohiloka, hiyo ninnimmaaliha nimuleelaka wira ninnixukhurela mwaha wa soothanla sooloka opanke awe khalai. Ninnimutthokiherya wira yoovonya ele khenrowa ohonona mukhalelo awe akhala wira onoopaka marukunuxo wira ottharuwe ni weemererya nikhaliheryo nahu”.—Daniel.
ELE BIIBILIYA ONIHIMYA AWE: “Ole omphenta t’òvilela, t’òwarumela akhw’awe”.—1 aKorinto 13:4.
