1. Itthu xeeni soohakalaliha ninlipelela ahu sinrowa wiiraneya okathi wa Olamulelo wa Iyaakha Ekonto Emosa?

 TTHIRI vanrowa okhala voohakalaliha okathi anrowa aya opacerya ohihimuxiwa atthu valaponi okathi wa Olamulelo wa Iyaakha Ekonto Emosa wa Kristu. Okhala wira atthu ootheene akhweliwe ni amusi aya annilipelela otthikela waaweha. Nave Yehova onoorowa osiveliwa waaweha-tho. (Yobi 14:15) Nkahaya muupuwele moota atthu anceene anrowa aya ohakalala nuumala owaakhela amusi aya akhwiiye. Ntoko niixuntte ahu mwaha ovinre, “ale avanre miteko sooreera” masina aya alempwale muliivuruni mwa ekumi, anrowa ohihimuxiwa wira yaakhele “okumi woohimala”. (Yoh. 5:29; Mit. 24:15) Woonasa wene, amusi ahu akina anrowa okhala vamosa ni ale anrowa ohihimuxiwa nuumala ekhotto ya Harmagedoni. * Nave “ale avanre miteko sootakhala” yahaarina okathi munceene wira amusuwele Yehova, aahiiso wira amurumeele moororomeleya ahinatthi okhwa anrowa ohihimuxiwa wira ‘aphukeliwe’.

2-3. (a) Moovarihana ni Yesaya 11:9, 10, muteko xeeni muulupale wa wiixuttiha onrowa ovariwaka mulaponi mootheene? (b) Exeeni ninrowa ahu othokorerya mwaha ola?

² Ootheene ale anrowa ohihimuxiwa anooreerelaka wiixuttihiwa. (Yes. 26:9; 61:11) Ti maana aya vanireerela aya okhala muteko wowiixuttiha atthu ootheene valaponi. (Mmusome Yesaya 11:9, 10.) Mwaha wa xeeni? Okhala wira ale ahikhanle anaxariya anrowa ohihimuxiwa, anooreerelaka wiixuttihiwa voohimya sa Yesu Kristu,  Omwene wa Muluku, mukuttho wowoopola, ni efaita nrina naya nsina na Muluku ni okokhoreliwaka yena paahi. Hata anaxariya anooreerelaka wiixuttihiwa voohimya sa yoolakela ya Yehova orina awe ni elapo ela. Eyo enimwiiraneya okhala wira akina arumeyi awo a Yehova aakhwiiye nlelo Biibiliya ohinatthi omalihiwa olempwa. Ootheene aya, anaxariya ni ale ahikhanle a xariya anooreerelaka wiixutta itthu sinceene.

³ Mwaha ola nnoothokorerya makoho ala anittharelana: Muteko ola muulupale wowiixuttiha onrowa ovariwa naani? Moota atthu awo anrowa aya woonelaka muteko owo wowiixuttiha, onrowa wooniherya sai vakhala wira masina aya annireerela olempwa ni ekaneta aahiiso ottipihiwa muliivuruni mwa okumi? Osuwela waakhuliwa wa makoho awo ti wa faita vanceene olelo-va. Vaavo ninrowa ahu othokorerya iprofesia siri eliivuru ya Daniyeli ni Wiisuupulula, sinoonikhaliherya wiiwexexa moota alipa-ookhwa anrowa aya ohihimuxiwa. Woopaceryani nrowe nithokorerye soowiiraneya sookuxa murima saahimmwale Daniyeli 12:1, 2.

4-5. Etthu xeeni Daniyeli 12:1, onihimya awe sa mahiku ookiserya?

⁴ Mmusome Daniyeli 12:1. Eliivuru ya Daniyeli ennooniherya itthu sinrowa wiiraneya mootthokiheya mahiku ookiserya. Mwa ntakiheryo, Daniyeli 12:1 onnooniherya wira Mikhayeli, yoowo onisuweliwa okhala Yesu Kristu, onoorowa waakhapelela arumeyi a Muluku. Mpantta mmosa wa eprofesia eyo, epacenrye wiiraneya mwaakha wa 1914, okathi yoowo Yesu aathanliwe awe okhala Mwene a Omwene wa Muluku.

⁵ Masi Daniyeli onnihimya-tho wira Yesu aamurowa waakhapelela ‘arumeyi a Muluku okathi wa mahiku oovelavela wuulupale, ahinakhumelele okhuma woopaceryani wa elapo mpakha mahiku yaawo’. “Mahiku ovelavela wulupale” anihimmwa ni Daniyeli “okathi wa maxakha maalupale” anihimmwa ni eliivuru ya Matheyo 24:21. Yesu onoorowa ovenya aahiiso owaakiha arumeyi a Muluku, wanikisa wa maxakha awo maalupale, niire so, wanipacerya wa ekhotto ya Harmagedoni. Eliivuru ya Wiisupulula ennihimya egrupu eyo ya atthu okhala muttitthi muulupale yoowo ‘onikhuma mmaxakhani maalupale’. — Wiis. 7:9, 14.

6. Exeeni enrowa wiiraneya nuumala muttitthi muulupale wa atthu woopoliwa maxakha maalupale? Mutthokiherye. (Wira nwehe itthu sikina voohimya sa ale anrowa ohihimuxiwa wira akhaleleke valaponi, murowe epantte eni “Makoho Anikohiwa ni Ale Anisoma Irevista Sahu”.)

⁶ Mmusome Daniyeli 12:2. Exeeni enrowa wiiraneya ni muttitthi muulupale nuumala woopoliwa maxakha maalupale? Khalai nuupuwela wira eprofesia eri Daniyeli 12:2, yaahimya ohihimuxiwa wa nthoonyeryo, niire so, wuncerereya muteko woolaleerya nuumala okhoottihiwa ni awanani ahu mwaakha wa 1918. * Moovirikana ni-vo, eprofesia eyo enihimya ohihimuxiwa wa alipa-ookhwa onrowa wiiraneya elapo esya. Exeeni enniiriha ohimya siiso? Moolumo oowi “elapo ya alipa-ookhwa” anirumeeliwa eliivuru ya Yobi 17:16 anihimmwa “Mahiye”. Eyo enitaphulela wira eprofesia eri Daniyeli 12:2, enihimya ohihimuxiwa wa ekeekhai onrowa wiiraneya yamala mahiku ookiserya ni yamala ekhotto ya Harmagedoni.

7. (a) Moota xeeni atthu akina anrowa aya ohihimuxiwa wira aphwanye “okumi woohimala”? (b) Xeeni ohihimuxiwa iwo ori aya “wootepa oreera”?

⁷ Xeeni Daniyeli 12:2 onihimya awe wira atthu akina anoohihimuxiwa wira yaakhele “okumi woohimala?” Eyo enitaphulela wira okathi wa eyaakha ekonto emosa, ale aniphavela ophwanya okumi woohimala ahaana omusuwela aahiiso ovikaniha omusuwela, ni omwiiwelela Yehova vamosa ni Yesu. (Yoh. 17:3) Tthiri nno onrowa okhala ohihimuxiwa “wootepa oreera”, ovikana ohihimuxiwa waatonko wiiraneya khalai. (aHeeb.  11:35) Mwaha wa xeeni? Mwaha woowi atthu yaale yaahihimuxiwe khalai muhoolo mwaya yaahitthikela-tho okhwa.

8. Moota xeeni atthu akina anrowa aya ohihimuxiwa wira ‘aphwanye wuliwa muru n’utakhaliwa ohinimala’?

⁸ Masi atthu akina anrowa ohihimuxiwa, khanrowa weemererya wiixuttihiwa ni Yehova. Eprofesia ya Daniyeli enihimya wira atthu akina anrowa ohihimuxiwa “anophwanya wuliwa muru n’utakhaliwa ohinimala”. Okhala wira awo khanrowa omwiiwelela Yehova masina aya khanirowa olempwa muliivuruni mwa okumi, nto ti nthowa naya ahinrowa aya waakhela okumi woohimala. Daniyeli 12:2, onilavula sa ophukeliwa wookiserya wa ale anrowa ohihimuxiwa moovarihana ni miteko anrowa aya ovara nuumala ohihimuxiwa. (Wiis. 20:12) Atthu akina anrowa ohihimuxiwa anoophwanya okumi woohimala masi akina khanirowa ophwanya. *

9-10. Etthu xeeni-tho enrowa wiiraneya yamala maxakha maalupale, nave atthu xeeni anrowa ‘waaryaka vanceene ntoko nsuwa’?

⁹ Mmusome Daniyeli 12:3. Exeeni-tho enrowa wiiraneya yamala “mahiku ovelavela wulupale?” Ohiya paahi ele onihimya awe Daniyeli 12:2, eversiikulu ya 3 ennooniherya etthu ekina enrowa wiiraneya yamala maxakha maalupale.

¹⁰ Atthu xeeni anrowa waaryaka ‘ntoko waarya wa wiirimu ni wa itheneeri?’ Nnoowerya ophwanya waakhuliwa wa makoho awo, nisomaka moolumo a Yesu ari eliivuru ya Matheyo 13:43, yaawo anihimya so: “Okathi owo, anaxariya anrowa waarya vanceene ntoko nsuwa, Moomweneni mwa Tiithi aya”. Ni moolumo ala, Yesu aahimya “anamwane a Omwene” niire so, axinna awe oothanliwa anrowa olamulelaka ni yena wiirimu. (Math. 13:38) Ti nthowa naya Daniyeli 12:3 onaahimya awe ale athanliwe ni muteko anirowa aya ovara okathi wa Olamulelo wa Iyaakha Ekonto Emosa.

11-12. Muteko xeeni makristau 144.000 anrowa aya ovara okathi wa iyaakha ekonto emosa?

¹¹ Moota xeeni atthu oothanliwa anrowa aya “waakhaliherya atthu akina ophwanya ephiro ya xariya?” Makristau awo oothanliwa, anrowa omukhaliherya Yesu Kristu muteko wa wiixuttiha onrowa ovariwaka valaponi okathi wa iyaakha ekonto emosa. Makristau awo oothanliwa 144.000, khanrowa olamulelaka ntoko mamwene paahi masi-tho anrowa orumeelaka ntoko anamukuttho. (Wiis. 1:6; 5:10; 20:6) Nave awo anrowa okhaliherya okathi anrowa aya ‘openuxiwaka atthu a maloko otheene’, eyo piiyo, yaakhaliherya aka apinaatamu okhala oomalela. (Wiis. 22:1, 2; Ezek. 47:12) Tthiri vanrowa okhala voohakalaliha wa atthu ale oothanliwa.

¹² Tani anrowa wiirela mpantta atthu ale ‘anceene’ anrowa okhaliheriwa ophwanya ephiro ya xariya? Awo anihela muhina ale anirowa ohihimuxiwa ni ale anrowa woopoliwa okathi wa ekhotto ya Harmagedoni ni waahela muhina anamwane anrowa oyariwaka elapo esya. Samala iyaakha ekonto emosa, atthu ootheene anrowa okhalaka valaponi anrowa okhala oohittheka. Masi okathi xeeni masina a atthu awo anrowa aya olempwa ni ekaneta ohiya ni elaapi?

13-14. Etthu xeeni atthu oohittheka anrowa okhalaka valaponi anireerela aya opaka wira yaakhele okumi woohimala?

¹³ Nihiliyale wira okhala mutthu oohittheka khontaphulela wira mutthu owo oophwanya okumi woohimala. Nkahaya mmuupuwele Adamu ni Eva. Awo yaari atthu oohittheka masi yaahaana omwiiwelela Yehova Muluku wira aphwanye okumi woohimala. Masi mooriipiha murima awo khiyaamwiiwelenle. — aRom. 5:12.

 ¹⁴ Exeeni enrowa owiiraneela ale anrowa okhalaka valaponi nuumala olamulelo wa iyaakha ekonto emosa? Ootheene aya khanirowa okhalana etampi. Niireke ale anrowa okhala oohittheka okathi wootheene anookhaliheryaka olamulela wa Yehova? Aahiiso anrowa waatakiha Adamu ni Eva yaawo yaathanlale ohimwiiwelela Yehova? Makoho ala anooreerelaka waakhuliwa, moota xeeni?

15-16. (a) Okathi xeeni apinaatamu ootheene anrowa aya wooniherya ororomeleya waya wa Yehova? (b) Exeeni enrowa wiiraneya yamala yooweeha eyo yookiserya?

¹⁵ Satana onrowa otthukweliwa iyaakha ekonto emosa. Okathi owo Satana khonirowa owerya waawoka-tho atthu. Masi savira iyaakha ekonto emosa, Satana onrowa otaphuliwa. Nuumala otaphuliwa owo onootthikela waawoka apinaatamu oohittheka. Okathi wa yooweeha eyo yookiserya, apinaatamu ootheene anrowa okhalaka valaponi, anookhalana eparakha yoowooniherya vakhala wira annikhaliherya olamulelo wa Yehova aahiiso eguvernu awe. (Wiis. 20:7-10) Ele anrowa aya opaka okathi owo, enimooniherya vakhala wira masina aya annireerela olempwa ni ekaneta.

¹⁶ Mooriipiha murima atthu akina animwaatakiha Adamu ni Eva akhoottaka okhaliherya olamulela wa Yehova. Etthu xeeni enirowa owiiraneela atthu awo? Eliivuru ya Wiisuupulula 20:15, enihimya so: “Otheene ale masina aya yahaalempwale muliivuruni mwa okumi, yaahiriheliwa vantthiyani na mooro”. Atthu awo oohiiwelela anrowa opwetexiwa moomalela aahiiso khanirowa-tho  okhala. Masi atthu anceene oomalela anoorowa oxintta yooweeha eyo. Nave masina aya, khanirowa ottipihiwa nto anookhala muliivuruni mwa okumi mahiku ootheene.

17. Etthu xeeni nlaikha naamulenle aya profeta Daniyeli saarowa wiiraneya mahiku ahu ala?

¹⁷ Tthiri ti voohakalaliha wuupuwelela itthu sinrowa wiiraneya muhoolo! Nave profeta Daniyeli, aahileeliwa ni nlaikha itthu sikina sa efaita voohimya sa mahiku ahu ala, niire so, “okathi wokiserya”. (Mmusome Daniyeli 12:4, 8-10; 2 Tim. 3:1-5) Nlaikha naahimuleela Daniyeli wira: “Atthu anjene . . . animwinjererya osuwela waya”. Tthiri eprofesia ela enaahimya atthu a Muluku, yaawo osuwela waya waarowa wuncerereya. Nave nlaikha nno naahincererya nihimyaka wira okathi owo “atthu òtakhala murima anotepa wira sotakhala: khavo a yawo onrowa osuwela”.

18. Etthu xeeni enrowa owiiraneela atthu ootakhala murima moohipisa?

¹⁸ Olelo-va, vanikhala ntoko wira atthu ootakhala murima khaniirihiwa etthu okathi anipaka aya itthu sootakhala. (Mal. 3:14, 15) Masi moohipisa Yesu onimwaapwetexa atthu ootakhala yaawo anlikanyihiwa ni ipuri ni onimwaavalanya atthu yaale anilikanyihiwa ni ipwittipwitthi. (Math. 25:31-33) Atthu ootakhala murima khanirowa woopowa okathi wa maxakha maalupale, ni  khanirowa ohihimuxiwa wira akhaleke elapo esya. Nave masina aya khanirowa olempwa ‘eliivuru ya masina atthu animuttittimiha Muluku’ aniromoliwa eliivuru ya Malakhiya 3:16.

19. Etthu xeeni nikhanle ahu oopaka vano ni nthowa xeeni? (Malakhiya 3:16-18)

¹⁹ Tthiri ola okathi nikhanle ahu owooniherya wira khanikhanle eriyari ya atakhali. (Mmusome Malakhiya 3:16-18.) Olelo-va, Yehova onnaathukumanya atthu oniwoona awe okhala ntoko nloko nawe. Moohaanyiherya hiyo ninnihakalala wiirela mpantta nloko nlo.

20. Etthu xeeni Yehova aamuleihenrye awe Daniyeli, ni xeeni munreerela anyu olipelela wiiraneya wa yooleiherya eyo?

²⁰ Vekeekhai ninkhala okathi woohakalaliha. Masi moohipisa ninnilipelela itthu sikina sootepa ohakalaliha sinrowa wiiraneya. Ninrowa oweha opwetexiwa wa atthu ootheene ootakhala murima. Nuumala-vo, nnoorowa oweha wiiraneya wa moolumo Yehova aamuleihenrye awe profeta Daniyeli ohimyaka wira: “Nyuwo munimokhwa, masi munohihimuwa mokhwani mahiku òkiserya, wira mwakhele otthuveliwa wanyu”. (Dan. 12:13) Niireke munnilipelela moohakala okathi profeta Daniyeli vamosa ni amusi anyu akhwiiye anrowa aya “ohihimuwa mookhwani”? Vakhala wira ti siiso, mpakeke sootheene muniwerya anyu wira mukhaleke oororomeleya ni mukupaliki wira nsina nanyu khaninrowa ottipihiwa muliivuruni ya okumi ya Yehova.