1. Xeeni nihintikinihiwa ahu olelo-va naawehaka atthu ahaaroromelaka atthu akina?

 OLUMWENKU ola oneettihiwa ni Satana, atthu anceene vannaaxankiha waaroromela atthu akina. Okhala wira awo ari ookhulumuwa ene mwaha wa mweettelo woohiloka wa alipa a nakoso, ahooleli a ipoliitika ni ahooleli a itiini. Nave akina khanaaroromela apatthani aya, mavisinyu aya, hata amusi aya. Masi hiyo khanintikinihiwa ni itthu iyo. Okhala wira Biibiliya aahihimya vahinatthi wira: “Mahiku ookiserya . . . , atthu anrowa okhalaka . . . oohiroromeleya . . . , owootheryaka akhwaaya . . . [ni] owiirelaka itthu sootakhala akhwaaya”. Ni masu makina, atthu yaarowa weettihiwaka ni mikhalelo sa Satana yoowo ohinroromeleya. — 2 Tim. 3:1-4; 2 aKor. 4:4.

2. (a) Tani ninreerela ahu waaroromelaka ni murima wootheene? (b) Exeeni ekhanle oowaaxankiha anna akina?

² Hiyo ntoko makristau ninnisuwela wira nihaana omuroromela Yehova ni murima ahu wootheene. (Yer. 17:7, 8) Maana ninnikupali wira owo onniniphenta ni ‘khonaanyanyala’ apatthani awe. (Esal. 9:11) Nihaana omuroromela Yesu Kristu okhala wira ooleva okumi awe wira onoopole. (1 Ped. 3:18) Nave yoosoma ahu nihiixutta wira Biibiliya eliivuru ninreerela ahu ororomela. (2 Tim. 3:16, 17) Nave-tho, nihoona wira nihaana omuroromela Yehova ni Yesu. Masi anna akina pooti wiikohaka so: Kiireke okathi wootheene kihaana waaroromelaka anna ni arokora a mmulokoni? Aayo, hiyo nihaana waaroromelaka anna awo. Nto ninrowa owerya sai opaka eyo?

3. Eparakha xeeni yuulupale nirina ahu? (Marko 10:29, 30)

³ Nookhalana eparakha yuulupale, okhala wira Yehova oonithanla wira niireleke mpantta emusi awe ya olumwenku wootheene. Ninniphwanya mareeliho manceene mwaha woowiirela mpantta emusi ela. (Mmusome Marko 10:29, 30.) Olumwenku wootheene aakhala anna ni arokora animphenta Yehova ntoko hiyo, nave awo anniimananiha wiiwelela malakiheryo a Yehova. Nnaamwi nttaava nahu, mawarelo  ahu ni makhalelo ahu avirikanne ene ni anna awo, hiyo ninnaaphenta vanceene, hata naasuwenle ene niinano. Nave vanninisivela okathi ninkhala ahu hoothe ni anna awo, wira nimukokhorele Tiithi ahu a wiirimu Yehova. — Esal. 133:1.

4. Efaita xeeni anna ni arokora arina aya?

⁴ Nenna-va, niimananiheke okhala oowiiraana ni anna ni arokora ovikana khalai. Ikwaha sinceene, anna awo anninikhaliherya okathi sinniphwanya aya mixankiho. (aRom. 15:1; aGal. 6:2) Nave awo anninikhaliherya ohihiya omurumeela Yehova ni olipiha ompatthani ahu ni yena. (1 aTes. 5:11; aHeeb. 10:23-25) Naarowa okhala sai yaahaakhanle anna ni arokora, onikhaliheryaka okathi sinniphwanya aya sooweeha seiyo sinikumiheriwa ni awanani ahu, eyo piiyo, Satana ni olumwenku awe! Voohipisa, Satana vamosa ni ale ammukhaliherya animwaatuphela arumeyi a Yehova. Okathi owo, nnoohakalala mwaha woosuwela wira anna ni arokora anrowa okhalaka ni hiyo wira anikhaliheryeke.

5. Ikwaha sikina xeeni vanvila aya waaroromela anna ni arokora?

⁵ Masi anna akina ni arokora annoona okhala vooxankiha waaroromela anna akina a mmulokoni. Otepexa wene vakhala wira yaahitoko omuleela mutthu esiiri, nuumala-vo owo khwaaleela atthu akina, aahiiso yaahivarihana etthu ni munna owo, masi owo khuhipaka siiso. Aahiiso, pooti wira munna wala murokora oopaka etthu eniwereyale vanceene. Okathi enniiraneela aya eyo, pooti onivila waaroromela anna ni arokora a mmulokoni. Exeeni enrowa onikhaliherya ohihiya waaroromela anna ni arokora?

6. Niphento ninrowa onikhaliherya sai waaroromela anna ni arokora? (1 aKorinto 13:4-8)

⁶ Okhalana niphento, onoonikhaliherya waaroromela anna. Yoolepa ya aKorinto oopacerya ekapiitulu  13 onnooniherya moota ophenta onrowa aya onikhaliherya waaroromela atthu akina,  aahiiso otthikela waaroromela atthu yaale yaaninyoonyinhe. (Mmusome 1 aKorinto 13:4-8.) Mwa ntakiheryo, eversiikulu 4 enihimya wira “ole oniphenta, toopixa murima ni tooreera murima”. Yehova onninipixerya murima hata okathi nimmutthekela ahu. Nave hiyo nihaana waapixerya murima anna ni arokora hata okathi anninyoonyiha aya, aahiiso anniriipiha aya murima. Nave-tho, eversiikulu 5 enihimya wira: “[Ole oniphenta] khonuupuwela sootakhala siireliwe awe”. Etthu enrowa onikhaliherya ohaakuva oviruwa ori ohimakela wuupuwela itthu soonanara anna ni arokora anniirelaya. Nave Musuweli 7:9 onnintumererya wira nihaana ‘ohaakuva onanariwa’. Ohiya omakela onanariwa ni khula etthu muniireliwa anyu, muhaana wuupuwelela etthu eri aEefeso 4:26, yeeyo eni: “Muhihiye nsuwa nikelaka nlelo munanariwe ene.”

7. Ntoko sinihimya awe Matheyo 7:1-5, exeeni enrowa onikhaliherya waaroromela anna ni arokora?

⁷ Etthu enrowa onikhaliherya waaroromela anna ni arokora ori okhalana moonelo mmosaru yoowo Yehova orina awe. Okhala wira Yehova onnaaphenta anna ni arokora ni khoniwehexexa soottheka saya. Nto hiyo nihaana omutakiha aka Yehova. (Esal. 130:3) Ohiya omakela owehexexa soovonya sa anna, nihaana owehaka mikhalelo saya sooloka ni itthu aniwerya aya opaka saana. (Mmusome Matheyo 7:1-5.) “Ole oniphenta, onnivilela itthu sotheene, onnikupali itthu sotheene”. Tivonto ninnikupali wira axinnihu aniphavela opaka itthu sooloka ni khanipaka itthu sootakhala moolakelela. (1 aKor. 13:7) Eyo khentaphulela wira Yehova oniphavela wira naaroromeleke atthu ootheene, masi owo oniphavela wira naaroromeleke ale anooniherya ororomeleya. *

8. Munrowa wuncererya sai waaroromela wanyu anna ni arokora?

⁸ Naaphavelaka ororomeliwa, hiyo nihaana okhala atthu oororomeleya. Masi wira niwerye opaka eyo, pooti ovira okathi munceene. Nto munrowa wuncererya sai waaroromela wanyu anna ni arokora? Etthu yoopacerya, mwiimananiheke waasuwela saana. Nyuwo pooti opaka eyo okathi wa mithukumano, aahiiso okhuma hoothe muteko woolaleerya. Mpixeke murima ni mwaavaheke okathi wira awo yooniherye wira toororomeleya. Vakhala wira munna owo aahiiso murokora owo nimusuwenle niinano, hiyo pooti woovelelaka omuleela myaha sahu. Masi vaavo munrowa anyu omusuwelaka saana munna owo, vanookhweyaka omuleela myaha sanyu. (Luka 16:10) Munrowa opaka exeeni vakhala wira munna aahiiso murokora ohooniherya wira khoniroromeleya? Muhaakuveke omaliha opatthani anyu ni yena. Ohiya-vo, munvaheke okathi ni muheemererye wira mweettelo wa mutthu mmosa paahi, owiirihekeni ohaaroromela atthu ootheene. Nto wira nipake eyo, mwaha ola nnooweha matakiheryo a atthu a khalai, yaawo hata yaanyoonyihiwe masi yahaahiyale waaroromela atthu akina.

9. (a) Ana oonihenrye sai wira aanimuroromela Yehova nnaamwi atthu akina yaapaka itthu soohiloka? (b) Ntakiheryo na Ana ninniixuttiha exeeni sa moota Yehova onvaha awe miruku? (Nwehe elatarato.)

⁹ Niireke mootoko onyoonyihiwa ni mweettelo wa munna mmosa orina miritti sinceene mmulokoni? Vakhala wira eyo yootoko owiiraneelani, vannireerela wuupuwelela ntakiheryo na Ana. Okathi ole wisarayeli, muulupale a anamukuttho Eli, taahoolela aisarayeli wira amukokhoreleke Yehova. Masi anaawe Eli khiyaavaha ntakiheryo nooloka. Anaawe Eli yaari anamukuttho, masi okathi wootheene awo yaanipaka itthu soohiloka, ohela muhina orupihana woohiloka. Masi Eli, khaapaka etthu wira aattaruxe anaawe ale. Nnaamwi vari siiso, Yehova khaamuhiihale Eli okhala namukuttho muulupale. Masi hata Ana aasuwenle wira Eli taari muulupale anamukuttho, owo khaahiyale omukokhorela Yehova otabernaakulu. Nihiku nimosa vaavo Eli aamoonale  awe Ana ovekelaka oriipiwe ene murima, owo uupuwela wira aaroohapaliwa. Eli aahimpwapwela Ana nnaamwi ahaasuwela etthu yaamuriipiha murima. (1 Sam. 1:12-16) Hata yaamwiiranenle eyo, Ana aahileiherya wira vakhala wira ammuyara mwaana mwaamulopwana, owo aamunvahererya wira arumeeleke otabernaakulu okumi awe wootheene, nnaamwi aasuwela wira Eli taarowa omukhapelelaka mwaana owo. (1 Sam. 1:11) Nto ankhi anaawe Eli, niireke nlelo yaanireerela ottaruxiwa? Aayo, Yehova aahaattaruxa okathi wooreerela. (1 Sam. 4:17) Muhoolo mwaya, Yehova aahimureeliha Ana, onvahaka mwaana iitthaniwa Samuweli. — 1 Sam. 1:17-20.

10. Nnaamwi aarukunuweliwe, exeeni Davidi aahaahiyale awe opaka?

¹⁰ Niireke ookhala mpatthani anyu otonko owooniheryani ohiroromeleya? Vakhala wira yootoko owiiraneelani eyo, muupuwele etthu yaamwiiranenle mwene Davidi. Davidi aahikhalana mpatthani awe iitthaniwa Ahitofeli. Nto okathi mwanawe Davidi iitthaniwa Absalomi aaphavela awe omwaakha omwene, Ahitofeli aahimukhaliherya. Tthiri Davidi vaahimuxankiha vanceene okathi aarukunuweliwe awe ni mwaana awe vamosa ni mpatthani awe aamuroromela awe. Masi hata vari siiso, Davidi khaahiyale waaroromela atthu akina. Owo aahivikaniha omuroromela mpatthani awe mukina iitthaniwa Huxayi, yoowo aakhoottale omukhaliherya Absalomi. Tthiri Davidi aahikhalana mathowa ooloka a ohihiya omuroromela mpatthani awe. Huxayi aahooniherya wira aari mpatthani ooloka, okhala wira aahileva okumi awe wira omukhaliherye Davidi. — 2 Sam. 17:1-16.

11. Murumeyi a Nabali, oonihenrye sai wira aanimuroromela Abigayili?

¹¹ Vano nrowe nithokorerye ele yaamwiiranenle murumeyi awe Nabali. Mooreerela murima, Davidi ni anakhotto awe yaahaakhapelela arumeyi a mwisarayeli mmosa oothaaciri iitthaniwa Nabali. Nihiku nimosa, Davidi aahinvekela Nabali wira omukhaliherye onvahaka eyoolya aahiiso etthu ekina yena ni anakhotto awe. Eyo yaari etthu yookhweya Davidi aavenke awe, masi Nabali aahikhootta omukhaliherya. Nto Davidi aahinanariwa vanceene onaphavela omwiiva Nabali ni atthu ootheene a etthoko awe. Murumeyi ole a Nabali, aahimuleela Abigayili mwaara awe Nabali, etthu Davidi aarowa awe oopaka. Mwaha wookhala murumeyi a Nabali, mulopwana ole aanisuwela wira aamwiiviwa ni aanisuwela wira Abigayili anwerya ophuka muxankiho ole. Murumeyi ole  khaatthyanwe, okhala wira aanimuroromela Abigayili. Etthu yaamwiiriha omuroromela Abigayili, okhala wira owo aanisuweliwa okhala muthiyana a miruku. Etthu yiiraneyale moottharelana, ennooniherya wira murumeyi ole aahikhalana mathowa ooloka oomuroromela Abigayili. Mwaha woolipa murima, Abigayili aahimwiiriha Davidi oturuka muupuwelo awe. (1 Sam. 25:2-35) Owo aanikupali wira Davidi ampaka etthu yooloka.

12. Yesu oonihenrye sai wira anaaroromela arummwa awe nnaamwi yaari atthu oottheka?

¹² Yesu anaaroromela awiixutti awe, nnaamwi yaari atthu oottheka. (Yoh. 15:15, 16) Nihiku nimosa, Yakobo ni Yohani yaahinvekela Yesu wira yakilaathi moono awe woolopwana aahiiso woothiyana moomweneni mwawe. Hata vari siiso, Yesu khaakonhe etthu yaawiiriha omurumeela Yehova, nnakhala khaahiihale okhala arummwa awe. (Mar. 10:35-40) Muhoolo mwaya, okathi Yesu aatthukiwe awe, arumeyi awe ootheene yaahimutthyawa. (Math. 26:56) Masi hata vari siiso, Yesu khaahiyale waaroromela awiixutti awe. Nnaamwi Yesu aasuwenle wira awiixutti awe yaari oottheka, “owo khaahiyerenrye waaphenta mpakha wookiseryani”. (Yoh. 13:1) Nuumala ohihimuxiwa, Yesu aahaavaha arummwa awe 11 muteko wookhapelela ni ohoolela muteko woolaleerya. (Math. 28:19, 20; Yoh. 21:15-17) Nto Yesu aahikhalana mathowa ooloka oowaaroromela arumeyi awe nnaamwi yaari atthu oottheka. Okhala wira awo yaahiroromeleya mpakha okhwa. Moohaanyiherya Ana, Davidi, murumeyi awe Nabali, Abigayili ni Yesu, aavaha ntakiheryo nooloka na waaroromela atthu akina, nnaamwi ari ene atthu oottheka.

13. Exeeni ekhanle oowiiriha atthu akina ohaaroromela axitokweene?

¹³ Niireke mootoko omuleela esiiri munna mmosa, nuumala-vo musuwela wira owo oomuleela mutthu mukina? Woonasa wene, nyuwo mwaahiriipiwa murima. Nwehe yoowiiraneya ela: Murokora mmosa aahimuleela mutokweene a muloko awe mwaha awe, nave aanikupali wira owo khaarowa omuleela mutthu mukina. Mmeeloni mwaya, mwaara awe mutokweene ole aahimulikarela murokora ole wira omulipihe. Nuumala-vo, murokora ole aahoona wira mutokweene ole aahaaleela amwaara awe mwaha ole. Vannooneya wira murokora ole vammuxankiha omuroromela-tho mutokweene ole. Moohakalaliha, murokora ole aahinvekela nikhaliheryo mutokweene mukina. Owo aahimuleela itthu saamwiiranenle, nto mutokweene ole aahimukhaliherya murokora ole ootthikela waaroromela axitokweene.

14. Exeeni yaamukhalihenrye munna mmosa otthikela waaroromela axitokweene anli?

¹⁴ Munna mmosa aahinanariwa ni axitokweene anli mwa iyaakha sinceene yaawo aawoona awe wira khiyaareerela waaroromela. Munna owo aahipacerya wuupuwelela moolumo aalavunle awe munna mmosa aamuttittimiha awe vanceene. Owo aahimmye so: “Satana tori nwanani ahu, ohiya axinnihu”. Moolumo ale yaahimwiiriha munna ole wuupuwelela etthu aakhanle awe oopaka. Nuumala onvekela Yehova wira omukhaliherye, owo aahitthikela waataana ni axitokweene ale anli.

15. Xeeni onivira aya okathi munceene wira nimuroromele-tho mutthu mukina? Nvahe ntakiheryo.

¹⁵ Niireke mootoko ohiihiwa iparakha sanyu mmulokoni? Tthiri mwaahiriipiwa murima vanceene. Nwehe ntakiheryo na murokora Grete ni maama awe: Mwaakha wa 1930 okathi wa Alemanha nazista, muteko ahu woolaleerya waanikhoottihiwa. Hata vari siiso, murokora Grete ni maama awe, khiyaahiyale okhala oororomeleya. Grete aahivahiwa eparakha yoomukopiyari Owehaweha ni waakawela atthu akina. Masi, okathi anna yaasuwenle aya wira paapa awe Grete anaanyokha Anamoona a Yehova, yaahimwaakhasa eparakha ele. Okhala wira anna yaanoova wira paapa awe Grete, aamwaaleela makhulupale a elapo ele. Masi eyo khahiyo ti yaakhumelenle paahi. Mwa ntakiheryo, okathi wa Ekhotto ya Nenli ya Olumwenku Wootheene, anna khiyamuroromela-tho Grete vamosa ni amaama awe wira yaavaheke ikoopiya sa irevista, nave  okathi yaakumanaya khiyaalavulihasa. Mwaha waivaavo, waahivira okathi munceene Grete oriipiwe ene murima vahaawerya awe waalevelela anna ale ni otthikela waaroromela. Nuuvira okathi, Grete aahoona wira vakhala wira Yehova aahaalevelela anna ale, owo nave aahaana opaka etthu emosaru aalevelelaka anna awo. *

16. Mireerelo xeeni sinkhumelela vaavo nintthikela ahu waaroromela anna ni arokora?

¹⁶ Vakhala wira wootoko wookhumelelani muxankiho mmosaru ntoko wa Grete, mwiimananiheke wira mutthikele waaroromela anna. Woonasa wene, onooviira okathi munceene wira mutthikele waaroromela anna, masi wiimananiha wanyu onookumiherya mireerelo. Nkahaya muupuwele ntakiheryo nna: Muupuwele wira mulyiye etthu yowuntta muhisuwenle, nuumala-vo yoowereyani. Tthiri nyuwo mwaamukhalanaka ephoole ni khula eyoolya mwaarowa anyu olyaaka. Nto niireke mwaamuttharuwa olya iyoolya sikina? Nnaari. Mwa enamuna emosaru, niheemererye wira itthu soohiloka anna anipakaya, siniiriheke ohaaroromela anna akina. Okhala wira ootheene ahu ninnittheka. Nave okathi nintthikela ahu waaroromela anna akina ninnihakalala vanceene. Opaka eyo enoonikhaliherya wuncererya murettele mmulokoni.

17. Xeeni vari aya vooloka waaroromela anna akina? Nave mwaha onittharelana ninrowa othokorerya exeeni?

¹⁷ Olumwenku ola wa Satana, vannitepa ovila waaroromela atthu akina. Masi hiyo nihaana waaroromela anna ni arokora, okhala wira awo anniniphenta ni hiyo ninnaaphenta vanceene. Nto waaroromela wahu anna, onoonikhaliherya okhala oowiiraana naawo ni oohakalala olelo-va, nave onoonikhaliherya okathi sinrowa aya onikhumelela mixankiho muhoolo. Exeeni mukhanle anyu oopaka vakhala wira khamunwerya omuroromela-tho munna mukina oonyonyinheni? Mwiimananiheke omutakiha Yehova, mwaalevelelaka anna ni arokora awo, mutthareke malakiheryo a mBiibiliyani, muncereryeke waaphenta wanyu anna, nave mwiixutteke ni matakiheryo a mBiibiliyani. Nto nnoowerya otthikela waaroromela anna hata awo aninyoonyinhe ene. Akhala wira nnimwiimananiha opaka eyo, nnootteeliwaka murima mwaha wookhalana apatthani anceene ‘aniivaha ntoko maama’. (Mir. 18:24) Masi khivamphiyerya hiyo waaroromela anna awo paahi. Nave awo ahaana okupali wira ninnaaroromela. Nto mwaha onittharelana, ninrowa wiixutta etthu nikhanle ahu oopaka wira anna aniroromeleke.