1. Moovarihana ni Malakhiya 3:16, eliivuru xeeni Yehova onilepa awe? Etthu xeeni elempwale muliivuruni mmo?

 OKHUMA iyaakha sinceene sivinre, Yehova onnilepa eliivuru awe ya vameekhaaya. Eliivuru eyo yookhalana masina manceene, nsina noopacerya ti namoona oopacerya oororomeleya Abeli. * (Luka 11:50, 51) Mpakha olelo-va, Yehova onnilepa masina a atthu muliivuruni mmo, nto olelo-va anniphwanyaneya masina imilyau sinceene. Mbiibiliyani eliivuru eyo ennihimmwa okhala ‘eliivuru ya masina a atthu animuttittimiha Muluku’ ‘eliivuru ya okumi’ ni ‘eroolu ya okumi’. Mwaha ola ninrowa wiitthana eliivuru eyo ntoko ‘eliivuru ya okumi’. — Mmusome Malakhiya 3:16; Wiis. 3:5; 17:8.

2. Atthu xeeni masina aya anilempwa eliivuru ya okumi? Nave olelo-va exeeni nikhanle ahu oopaka wira nsina nahu nlempwe eliivuru eyo?

² Eliivuru eyo aalempwa masina a atthu ootheene yaale animukokhorela Yehova ni murima wootheene, ni nttittimiho ni aniphenta nsina nawe. Atthu awo anookhalana eparakha ya ophwanya okumi woohimala. Olelo-va, vanooweryaneya masina ahu olempwa muliivuruni mmo, vakhala wira nnookhalana waataana wooloka ni Yehova orweela wa mukuttho wa Mwanawe, Yesu Kristu. (Yoh. 3:16, 36) Moohaanyiherya ootheene ahu, ninniphavela wira masina ahu alempwe eliivuru eyo, hata nirina ene nlipelelo nookhala wiirimu aahiiso valaponi!

3-4. (a) Niireke mwaha wa masina ahu olempwa muliivuruni mmo ontaphulela wira noophwanya okumi woohimala? Mutthokiherye. (b) Exeeni ninrowa ahu othokorerya mwaha ola ni mwaha onittharelana?

 ³ Niireke mwaha wa masina ahu olempwa muliivuruni mmo, ontaphulela wira noophwanya okumi woohimala? Nnoowerya ophwanya waakhuliwa wa nikoho nlo, nisomaka moolumo Yehova aamuleelale awe Moise, ari eliivuru ya Okhuma 32:33. Yaawo Yehova aahimmye awe so: “Kinimwattipiha mulivuruni mwaka yale akitthekenle pahi”. Tivonto, masina anilempwa vano, pooti ottipihiwa aahiiso okumihiwa. Eyo enlikana ni Yehova olepa masina awo ni elaapi wanipacerya. (Wiis. 3:5.) Tivo nikupaliki wira masina ahu anookhalaka muliivuruni mpakha okathi anrowa aya olempwa ni ekaneta aahiiso etinta.

⁴ Mwa ntakiheryo, atthu akina pooti wiikohaka so: Xeeni Biibiliya onihimya awe sa masina atthu alempwale muliivuruni mwa okumi ni atthu ahilempwale muliivuruni mmo? Masina atthu awo anrowa okhala mpakha silini wira yaakhele okumi woohimala? Ankhi atthu ale akhwiiye ahinatthi okhalana eparakha ya omusuwela Yehova? Niireke vanooweryaneya masina aya olempwa muliivuruni mmo? Makoho ala animwaakhuliwa mwaha ola ni mwaha onittharelana.

ATTHU XEENI ANILEMPWA MULIIVURUNI MWA OKUMI?

5-6. (a) Moovarihana ni aFilipi 4:3, ekrupu xeeni ya atthu masina aya alempwale muliivuruni mwa okumi? (b) Okathi xeeni masina aya ahinrowa aya ottipihiwa?

⁵ Atthu xeeni alempwale eliivuru eyo ya nthoonyeryo? Nrowe nithokorerye ikrupu 5 sa atthu oovirikana wira niwerye waakhula nikoho nlo. Mwa atthu awo, akina masina aya aalempwa muliivuruni mwa okumi masi akina khalempwale.

⁶ Ekrupu yoopacerya enihela muhina atthu anithanliwa wira yalamuleleke vamosa ni Yesu wiirimu. Niireke masina aya aalempwa  muliivuru mwa okumi? Aayo. Moovarihana ni masu murummwa Paulo aalepenle awe “apatthani awe” a oFilipi, masina atthu awo oothanliwa, yaawo alattuliwe wira yalamuleleke ni Yesu wiirimu, aalempwa muliivuruni mmo. (Mmusome aFilipi 4:3.) Wira masina aya ahittipihiwe eliivuru eyo ya nthoonyeryo, awo ahaana ohihiya wooniherya ororomeleya. Nuumala waakhela ekanyeryo yookiserya, masina aya khanrowa ottipihiwa-tho muliivuruni mmo. Eyo eniiraneya awo ahinatthi okhwa aahiiso ahinatthi opacerya maxakha maalupale. — Wiis. 7:3.

7. Okathi xeeni atthu aniirela mpantta muttitthi muulupale wa ipwittipwitthi sikina masina aya ahinrowa aya ottipihiwa-tho eliivuru ya okumi? (Wiisuupulula 7:16, 17)

⁷ Ekrupu ya nenli enihela muhina muttitthi muulupale wa ipwittipwitthi sikina. Nto niireke masina aya aalempwa muliivuruni mwa okumi? Aayo. Niireke masina aya nlelo anoovikaniha okhala muliivuruni mmo nuumala woopowa ekhotto ya Harmagedoni? Aayo. (Wiis. 7:14) Yesu aahimmye wira atthu awo anlikana ni ipwittipwitthi “anrowa ophwanya okumi woohimala”. (Math. 25:46) Masi awo khanrowa ophwanya okumi woohimala eviraka-ru ekhotto ya Harmagedoni. Okhala wira masina aya alempwale muliivuruni mmo ni elaapi niire so, awo pooti ottipihiwa. Okathi wa Olamulelo wa Iyaakha Ekonto Emosa, Yesu “onrowa waakukhula ni waaroiha mapuro aniphattuwa maasi a okumi”. Nto atthu ale anrowa wiiwelelaka malamulo a Yesu, okathi owo wa Eyaakha Ekonto Emosa, ni anrowa othokoreriwa okhala oororomeleya ni Yehova, masina aya khanrowa ottipihiwa muliivuruni mwa okumi. — Mmusome Wiisuupulula 7:16, 17.

8. Atthu xeeni masina aya ahilempwale muliivuruni mwa okumi ni etthu xeeni enrowa owiiraneela?

⁸ Ekrupu ya neeraru enihela muhina atthu anithokoreriwa okhala ipuri yaawo anrowa opwetexiwa okathi wa Harmagedoni. Maana awo khalempwale eliivuru ya okumi. Yesu ohimmye wira atthu awo anrowa “opwetexiwa voomalela”. (Math. 25:46) Uupuxeriwaka ni Muluku, murummwa Paulo ohimmye wira atthu awo “ehukhumu aya enrowa okhala opwetexiwa ohinimala”. (2 aTes. 1:9; 2 Ped. 2:9) Etthu emosa-ru enoowiiraneela atthu ootheene yaale yaatthekenle moolakelela munepa woowaarya wa Muluku. Veekeekhai atthu awo khanrowa ohihimuxiwa. Okhala wira ehukhumu aya enrowa okhala opwetexiwa moomalela, ohiya waakhela okumi woohimala. (Math. 12:32; Mar. 3:28, 29; aHeeb. 6:4-6) Vano nrowe nithokorerye ikrupu piili sa atthu anrowa ohihimuxiwa wira yaakhele okumi valaponi.

ATTHU ANROWA OHIHIMUXIWA

9. Moovarihana ni Miteko 24:15, ikrupu xeeni piili sinrowa ohihimuxiwa wira sikhaleke valaponi? Ni ovirikana xeeni okhanle ikrupu iyo?

⁹ Biibiliya onnilavula ikrupu piili sa atthu anrowa ohihimuxiwa ni arina nlipelelo na okhala valaponi mahiku ootheene. Ikrupu iyo ti “anaxariya” ni ale “ahikhanle anaxariya”. (Musome Miteko 24:15.) Nto “anaxariya” anihimmwa atthu yaale yamurumeela Yehova moororomeleya ahinatthi okhwa. Masi ale “ahikhanle anaxariya” anihimmwa atthu yaale akhwiiye mweettelo aya wahaavarihana ni ele Yehova oniphavela awe. Okhala wira ikrupu iyo soopiili sinoohihimuxiwa, niireke eyo entaphulela wira masina aya aalempwa muliivuruni mwa okumi? Wira niphwanye waakhuliwa wa nikoho nno, nrowe nithokorerye ikrupu iyo piili.

10. Xeeni Yehova onrowa awe waahihimuxa “anaxariya” ni eparakha xeeni anrowa aya waakhela? (Mwaaphavelaka osuwela itthu sikina sa ale anrowa ohihimuxiwa wira akhale valaponi, nwehe mpantta oni: “Makoho Anikohiwa ni Ale Anisoma Irevista Sahu” wa erevista ela)

¹⁰ Ekrupu ya neexexe “anaxariya” yaawo ahinatthi okhwa masina aya yaalempwale eliivuru ya okumi. Nto niireke nuumala okhwa masina  aya aattipihiwa eliivuru ya okumi? Nnaari, okhala wira awo nlelo ari mmuupuweloni mwa Yehova. Yehova “khahiyo Muluku aalipa-ookhwa, masi Muluku a atthu akumi, okhala wira onniwoona otheene okhala akumi”. (Luka 20:38) Nto eyo entaphulela wira, okathi anaxariya anrowa aya ohihimuxiwa, masina aya nlelo anrowa okhala eliivuru ya okumi. Masi woopaceryani anrowa olempwa ni “elaapi”. (Luka 14:14) Moohaanyiherya, atthu awo akina anrowa ohihimuxiwa anookhalana eparakha ya orumeela ntoko “mapewe a mulaponi”. — Esal. 45:17.

11. Xeeni atthu “ale ahikhanle anaxariya” anrowa aya oreerelaka wiixuttihiwa, masina aya ahinatthi olempwa muliivuruni mwa okumi?

¹¹ Vano, ninrowa oweha ekrupu yookiserya, “ale ahikhanle anaxariya”. Woonasa wene, awo khiyaasuwenle sooruma sa Yehova, tivo yaapaka aya itthu soohiloka. Ti nthowa naya masina aya ahilempwale aya muliivuruni mwa okumi. Masi Yehova onimwaahihimuxa atthu awo wira akhalane eparakha ya olempwa masina aya muliivuruni mwa okumi. Atthu “ale ahikhanle anaxariya” anooreerelaka okhaliheriwa vanceene. Okhala wira ahinatthi okhwa yaahipaka itthu soohiloka ni sootakhala. Nto ahaana wiixuttihiwa moota wooweettela malamulo a xariya a Yehova. Nto moomweneni mwa Muluku, onookhala muteko munceene woowiixuttiha ohitonko okhala valaponi.

12. (a) Tani anrowa owiixuttihaka ale ahikhanle anaxariya? (b) Exeeni enrowa owiiraneela ale ahinrowa ophavela weettela itthu anrowa aya wiixuttihiwaka?

¹² Nto tani anrowa owiixuttiha ale ahikhanle anaxariya? Anrowa okhala atthu a muttitthi muulupale ni anaxariya anrowa ohihimuxiwa. Wira atthu ale ahikhanle anaxariya masina aya alempwe muliivuruni mwa okumi, ahaana okhalana waataana wooloka ni Yehova ni wiivahererya wa yena. Nave Yesu Kristu vamosa ni ale oothanliwa ari ene wiirimu, anrowa waavahaka ephoole ale ahikhanle anaxariya moota anrowa aya weemererya ele anrowa aya wiixuttihiwaka. (Wiis. 20:4) Nto khula mutthu onrowa okhootta weettela malakiheryo a Yehova,  khonrowa okhalana ediretu ya waakhela okumi woohimala hata arina ene iyaakha 100. (Yes. 65:20) Tthiri Yehova ni Yesu anniwerya osuwela ele eri vamurimani va mutthu, nto khanrowa omuhiya mutthu opakaka itthu soohiloka elapo esya. — Yes. 11:9; 60:18; 65:25; Yoh. 2:25.

ALE ANROWA OHIHIMUXIWA WIRA YAAKHELE OKUMI WOOHIMALA NI ALE ANROWA OHIHIMUXIWA WIRA APHUKELIWE

13-14. (a) Khalai naiwexexa sai moolumo a Yesu ari Yohani 5:28, 29? (b) Eponto xeeni ninreerela ahu ovaha efaita ni moolumo ala a Yesu?

¹³ Yesu aahilavula sa ale anrowa ohihimuxiwa wira akhaleke valaponi. Mwa ntakiheryo, owo aahimmye so: “Muhitikinihiwe vanceene ni etthu ela, okhala wira enoophiya ewoora atthu otheene ari mmahiye anrowa aya wiiwa nsu nawe, akhume mmahiye. Ale avanre miteko sooreera animwaakhela okumi woohimala, masi ale avanre miteko sootakhala anrowa ophukeliwa ni olamuliwa”. (Yoh. 5:28, 29) Yesu aaphavela ohimya exeeni ni moolumo ala?

¹⁴ Khalai iliivuru sahu, saatthokiherya wira moolumo ala a Yesu yaahimya miteko sa ale akhwiiye anrowa aya ovaraka nuumala ohihimuxiwa. Nave wira atthu akina yaarowa ovaraka miteko sooreera ni akina yaarowa ovaraka miteko soonanara. Masi Yesu khaahimmye wira ale anrowa ohihimuxiwa anrowa opakaka itthu sooloka wala anrowa opakaka itthu soohiloka. Yesu aahimya itthu siraneyale khalai ohiya saarowa wiiraneyaka muhoolo. Nto owo aahimya atthu yaale “avanre miteko sooreera” ni ale “avanre miteko sootakhala”. Maana atthu awo, apanke itthu iyo ahinatthi okhwa, ohiya nuumala ohihimuxiwa. Mwiixuttiho ola ti wookhalela kiira? Mweekeekhai, khuuvo onrowa weemereriwa opaka itthu soohiloka elapo esya. Nto ale ahikhanle anaxariya, apanke itthu iya sootakhala ahinatthi okhwa. Masi Yesu aaphavela ohimya exeeni vaavo aalavunle awe sa ale anrowa ohihimuxiwa wira ‘yaakhele okumi’ ni ale anrowa ohihimuxiwa wira ‘aphukeliwe’?

15. Tani anrowa waakhela “okumi woohimala” ni nthowa xeeni?

¹⁵ Anaxariya avanre miteko sooreera ahinatthi okhwa, anrowa waakhela “okumi woohimala”. Okhala wira masina aya aalempwa muliivuruni mwa okumi. Nto eyo entaphulela wira ohihimuxiwa wa “ale avanre miteko sooreera” ori yoolepa ya Yohani 5:29, onoolikana ni ohihimuxiwa wa “anaxariya” ari Miteko 24:15. Tthiri moolumo awo annivarihana ni ele aRoma 6:7 onihimya awe wira: “Ole okhwiiye ooleveleliwa itampi sawe”. Nto eyo entaphulela wira Yehova onnaalevelela anaxariya vaavo anikhwa aya. Masi khoniliyala miteko sooreera anaxariya avanre aya okathi yaari aya akumi. (aHeeb. 6:10) Ekeekhai wira ahittipihiwe masina anaxariya eliivuru ya okumi, awo ahaana ohihiya okhala oororomeleya hata nuumala ohihimuxiwa.

16. ‘Ohihimuxiwa wira mutthu aphukeliwe’ ontaphulela exeeni?

¹⁶ Masi ankhi ale apanke itthu sootakhala ahinatthi okhwa? Nnaamwi aleveleliwe ene itampi saya nuumala okhwa, awo khamurumenle Yehova moororomeleya okathi yaari aya akumi. Nave nsina naya khanikhanle muliivuruni mwa okumi. Ohihimuxiwa wa atthu “avanre miteko soohiloka” onoolikana ni ohihimuxiwa wa atthu “ahikhanle anaxariya” anromoliwa Miteko 24:15. Atthu awo anrowa ‘ohihimuxiwa wira aphukeliwe’. * Nto eyo entaphulela wira awo anrowa owehiwaka ni ovareriwa ni Yesu Kristu. (Luka 22:30) Nuuvira okathi, Yesu oonoowehaka vakhala wira anniphwanelela olempwa muliivuruni mwa okumi. Wira eyo yiiraneye, awo  ahaana ohiya miteko soonanara yaavara aya khalai ni ovahererya okumi aya wa Yehova.

17-18. (a) Exeeni enrowa aya oreerelaka opaka ale anrowa ohihimuxiwa? (b) Moovarihana ni Wiisuupulula 20:12, 13, ale anrowa ohihimuxiwa anrowa ophukeliwa etthariheliwaka exeeni?

¹⁷ Nuumala ohihimuxiwa, hata anaxariya ni ale ahikhanle anaxariya anooreerela aka wiiwelela malamulo masya a iroolu sinrowa ohuliwa okathi wa iyaakha ekonto emosa. Murummwa Yohani otthokiheryaka itthu aawenhe awe, owo aahimmye so: “Kaahaaweha-tho alipa-ookhwa, aalupale ni acikhaani, yeemenle ene ohoolo wa ehice, nave saahihuliwa iroolu. Vano, yaahihuliwa eroolu ekina. Eyo ti eroolu ya okumi. Nto, alipa-ookhwa yaahiphukeliwa sitthariheliwaka miteko yaavanre aya, ntoko saalempwale aya murooluni-mmo”. — Wiis. 20:12, 13.

¹⁸ Ale anrowa ohihimuxiwa anrowa ophukeliwa etthariheliwaka exeeni? Niireke anrowa ophukeliwa etthariheliwaka miteko yaavanre aya ahinatthi okhwa? Nnaari. Maana itampi sa mutthu sinnileveleliwa nuumala okhwa. Ti nthowa naya ale anrowa ohihimuxiwa, ahinrowa aya ophukeliwa sittharihiwaka itthu avanre aya ahinatthi okhwa. Nto ale anrowa ohihimuxiwa, anrowa ophukeliwa sitthariwaka moota anrowa aya ovarihelaka muteko malakiheryo anrowa aya wiixuttihiwaka elapo esya. Nave hata arumeyi oororomeleya a khalai ntoko Nowe, Samuweli, Davidi ni Daniyeli, anoorowa oprisari wiixuttihiwa voohimya sa Yesu Kristu ni waamini mukuttho wowoopola ovanhe awe. Nto akhala wira arumeyi oororomeleya, anoorowa wiixuttihiwaka itthu sinceene, vannooneya wira ale ahikhanle anaxariya anoorowa-tho wiixuttihiwaka itthu sinceene!

19. Exeeni enrowa owiiraneela ale anrowa okhootta omwiiwelela Yehova?

¹⁹ Nto exeeni enrowa owiiraneela ale anrowa okhootta omwiiwelela Yehova okathi owo? Wiisuupulula 20:15, onihimya so: “Otheene ale masina aya yahaalempwale muliivuruni mwa okumi, yaahiriheliwa vantthiyani na mooro”. Niire so, awo anrowa opwetexiwa moomalela. Nto ninnireerela wiimananiha wira nsina nahu nihittipihiwe muliivuruni mmo mwa okumi.

20. Muteko xeeni woohakalaliha onrowa ovariwa okathi wa olamulelo wa Iyaakha Ekonto Emosa? (Nwehe edesenyo ya ekaapa.)

²⁰ Olamulelo wa Iyaakha Ekonto Emosa, onrowa okhala okathi woohakalaliha! Okhala wira itthu sinceene sooreera sinimwiiraneya. Ntoko eprokrama ya otthikela owiixuttiha atthu valaponi. Nave onrowa okhala okathi anrowa aya ovareriwa anaxariya ni ale ahikhanle anaxariya. (Yes. 26:9; Mit. 17:31) Enrowa opakiwaka sai eprokrama eyo ya wiixuttiha? Mwaha onittharelana, nnoorowa wiiwa waakhuliwa wa nikoho nno.