Wanipacerya wa mwaakha wa 1940, apaapa ni amaama, yaahipacerya omusoma Biibiliya ni Anamoona a Yehova. Yoosoma ele khiyaakelenle otthu, masi amaama nlelo yaanaakhela irevista sa Sentinela ni Despertai! Mwaakha wa 1950, aahipakiwa kongresu a olumwenku wootheene esidade ya oNova York, nto emusi ahu yaahimurowela.

Nuuvira okathi vakhaani, munna Lawrence Jeffries aahipacerya onixukurya. Aahimananiha okikhaliherya wira kiixutte ekeekhai. Woopaceryani, khiwaakisivela moonelo wa Anamoona a Yehova okhala wira khanikhaliherya myaha sa epoliitika ni ikhotto. Kaamakela omuleela wira akhala wira atthu ootheene a wAmérica yamukhootta orowa okhottoni, awanani ahu yaamoorwa ni yaamukuxa elapo ahu. Munna Jeffries moopixa murima, aahikaakhula so: “Mwa moonelo anyu, exeeni Yehova aarowa awe opaka vaakhanle wira atthu ootheene a wAmérica annimurumeela masi nuumala-vo anakhumelela awanani enaatuphela atthu awo?” Moota aakikhalihenrye awe wiiwexexa mwaha ole ni myaha sikina, waahikooniherya wira moonelo aka khiwaalonke. Nto ele yaahikiiriha ophavela wiixutta ekeekhai.

Kaahiviriha iwoora sinceene kisomaka irevista sa khalai sa A Sentinela ni Despertai! amaama yaasuka aya okhuma khalai. Nto nuuvira okathi kaahoona wira ele kaixutta aka yaari ekeekhai, nto kaaheemya osomihiwa Biibiliya ni munna Jeffries nave kaahipacerya orowela mithukumano moohicompela. Itthu sa mBiibiliyani kaaixutta aka saanikisivela, nto kaahivekela okhala namalaleerya oohipatisiwa. Itthu kaaphavelaxa aka saahiturukeya okathi kaixuntte aka wira: “Nihiku nulupale n’Apwiya nri vakhiviru”. (Sof. 1:14) Nkaaphavela-tho orowa wuniversidade. Nto kaaphavela waakhaliherya atthu wiixutta ikeekhai sa mBiibiliyani.

 Nihiku 13 a Junho a 1956, kaahimaliha osoma exikola sekuntaaria, nave nuuvira mahiku mararu, kaahipatisiwa waasembeleyani a esirkwitu. Nkaasuwela wira Yehova aamukivaha itthu sinceene mwaha wa omusuwela ni owiixuttiha atthu akina Nuulumo nawe.

Nuuvira miyeeri 6 kipatisiwe ene, kaahikhala pioneero ookilaatheya. Orummwa Ahu wa Omwene a 1956, aahikhalana mwaha waahimya so: “Niireke Munoowerya Orumeela Mapuro Oothowa Anamalaleerya?” Ele yaahikiiriha oweha wira ni miyo kanwerya ovara muteko ole, nto kaahiphavela okhaliherya opuro woothowa anamalaleerya. — Math. 24:14.

Kaahithaamela wEdgefield, oCarolina wa osuuli. Muloko wa muttetthe ole, waarina anamalaleerya 4 paahi. Nto nuumala miyo ophiya nummeru naahincerereya para 5. Mithukumano naapaka vasaala owannyawe munna mmosa. Khula mweeri, kaaniviriha iwoora 100 kilaleeryaka. Kaanikhalela nthiti ohoolela muteko woolaleerya ni olavula myaha okathi wa mithukumano sa mmulokoni. Masi mootikiniha, vaavo kaatepa aka okhalela nthiti miteko iyo, nave omusuwela waka Yehova waanincerereya.

Muthiyana mmosa kaamusomiha aka Biibiliya, aahikhalana empereesa enaavitha atthu ookhwa waattamela epooma ele. Mooreerela murima aahikeemererya onvarela muteko iwoora vakhaani khula nihiku, nave-tho aahineemererya orumeela enupa awe yaamukhaani ntoko Empa ya Omwene.

Munna Jolly Jeffries, mwanawe munna aakisominhe Biibiliya, aahithaama oBrooklyn, oNova York onaarwa epooma kaakhala aka, nuumala-vo nnaavara hoothe muteko wa opioneero. Enupa ahu yaari ekaaro yaamukhaani yaalikana ni ekontentoore anna yaanoolinhe aya.

Osuuli, anamuteko yaakhela musurukhu vakhaani paahi. Khula nihiku naakhela itoolare piili aahiiso tthaaru (olelo-va waarowa okhala 195 mts). Nihiku nimosa kaahikuxa musurukhu kaahalanne aka ni kaahirowa othuma eyoolya mulooxa. Ewoora kaakhumme aka, kaahimphwanya mulopwana mmosa aakikonhe so: “Munniphavela muteko? Kinimoolivakani etoolare emosa khula ewoora (olelo-va waarowa okhala 65 mts”. Ni aahikeemiherya oviriha mahiku mararu kilimpariki opuro waarowa otekiwa inupa. Kaahoona wira Yehova aanikikhaliherya mwaha wa okhala muttetthe wa Edgefield. Mwaakha wa 1958, kaahimurowela Kongresu a olumwenku wootheene aapakiwe esidade ya oNova York.

Nihiku na nenli na Kongresu yaahiiraneya etthu yootepexa otteeliha murima. Kaahikumana ni Ruby Wadlington, yoowo aarumeela ntoko pioneera ookilaatheya oGallatin, oTennessee. Okhala wira oowanli ahu naaphavela okhala mamisionaario naahirowela muthukumano wa oGileadi waapakiwe Kongresu ole. Nto ovinre ene okathi naahipacerya oleepelana ikarta. Nuumala-vo, kaahilattuliwa orowa olavula mwaha wa atthu ootheene oGallatin. Kaahittottela mureerelo okathi ole, nto kaahimuurya wira nithelane. Nuumala-vo kaahithaamela muloko wa Ruby ni naahithelena mwaakha wa 1959.

Okathi kaarina aka iyaakha 23, kaahithanliwa okhala murumeyi a muloko wa oGallatin (vano onisuweliwa okhala mutokweene onuuraaniha nikhuuru na  axitokweene). Munna Charles Thompson muloko aapacenrya awe oxukurya ntoko mutokweene a esirkwitu waari muloko ahu. Yena aanisuwela itthu sinceene, masi hata vari siiso aahikivekela wira kimuleele itthu anna yareerela aya okhaliheriwa ni itthu yaapanke aya axitokweene akina a esirkwitu wira yaakhaliherye anna awo. Ele yaahikiixuttiha wira, kihinatthi ophuka mwaha wala muxankiho, vannireerela toko okohererya itthu sootheene wira kisuwele saana.

Maio a 1964, kaahilattuliwa orowela Exikola ya mweeri mmosa ya Orummwa wa Omwene yaapakiwe South Lansing oNova York. Anna yaahoolela exikola ele, yaahikikhaliherya wiixutta itthu sinceene voohimya sa Yehova ni ophavela omwaattamela.

Okhuma Janeiro a 1965, miyo ni Ruby naahilattuliwa oxukuryaka miloko. Nto naahithanleliwa muttetthe muulupale waahela muhina oKnoxville, oTennessee, mpakha oRichmond, oVirgínia. Nave saahela muhina miloko sa oCarolina wa oNorte, oKentucky ni oVirgínia Ocidental. Kaaxekurya paahi miloko sa anooriipe maana okathi ole, nlelo wEstados Unidos anooriipe yaathukumana anooripe-ru nave akunya yaathukumana akunya-ru. Anna a ipooma iye yaari oohaawa, nave naahiixutta waavaha atthu akina itthu naarina ahu. Nto nuuvira okathi muteko ole wa osirkwiitu waahikiixuttiha etthu yuulupale: “Okhala munna. Ohirowela mithukumano ntoko patarau aahiiso xeefi. Maana mutthu onoowerya waakhaliherya anna akhala wira anna anoomuthokoreryaka ntoko munna aya”.

Okathi naaxukurya ahu muloko mmosa, Ruby aahipacerya omusomiha Biibiliya muthiyana aarina mwanawe mmosa mwaamuthiyana a eyaakha emosa. Okathi mmulokoni ahaakhala awe mutthu wira omusomiheke Biibiliya, Ruby aanimusomiha orumeela aka ikarta. Nto ekwaha naatthikenle ahu oxukurya muloko ole, muthiyana ole aahirowela mithukumano sootheene. Okathi arokora anli mapioneera a vameekha aya yaathaamenle aya muloko ole, yaahivikaniha omusomiha muthiyana ole nto nuuvira okathi vakhaani, aahipatisiwa. Nuuvira iyaakha 30, mwaakha wa 1995 niri ene oBetheli ya oPatterson, aahirwa murokora mmosa mmiravo olavula ni Ruby, murokora ole aarwale aari mwaana a muthiyana yoole aasomihiwa Biibiliya ni Ruby. Murokora ole ni iyawe yiira asomaka eturma 100 ya exikola ya oGileadi.

Esirkwiitu ahu ya nenli naathanleliwe ahu yaari eriyari ya epooma ya oFlórida. Okathi ole naaniphavela othuma ekaaro. Nto moohipisa nahiphwanya yaatumihiwa musurukhu vakhaani. Masi nuuvira esumana emosa paahi, mutooro aya waahihononeya nto khanaarina musurukhu wira nalokihe. Nuumala-vo, naahimulikarela munna mmosa wira onikhaliherye. Munna ole aahimuruma namuteko awe wira orwe olokihe ekaaro ahu, nave kheemerenye wira nimulive. Munna ole aahimmye so: “Khamumprisari okiliva etthu”. Nave aahinivaha-tho musurukhu. Nto eyo yaahikooniherya moota Yehova onaakhapelela awe arumeyi awe ni yaahikiixuttiha wira kihaana okhala mutthu oovaha.

Khula okathi naaxukurya ahu miloko naamaka owanyeya axinna. Nto eyo yaahinikhaliherya waapaka apatthani ooloka. Nookhala nihiku kaalepa aka erelatooriyu ya mmulokoni nto kihiya vasulu va maakina aka oolepa. Nto okathi kaathikenle aka wira kimalihe olepa erelatooriyo ele, kahoona wira mwaana arina iyaakha 3 a etthoko ele ya anna naamanke ahu, aahilepakasa. Nto khula okathi kaakumana aka ni munna ole, kaanimuupuxerya etthu ele aapanke awe ori ene mwaana.

Mwaakha wa 1971, kaahithanliwa orumeela ntoko mutokweene ooweetteetta a edistritu epooma ya oNova York. Masi hiyo khanaalipelela wira naamwaakhela eparakha ele. Okathi naapacenrye ahu yoothanleliwa ele, miyo kaarina iyaakha 34. Nave kaapacenrye okhala mutokweene a edistritu nooriipe para edistritu ele. Nto anna ootheene yaahikaakhela mooreerela murima.

Okhala wira kaari mutokweene a edistritu, khula asembeleya yaapakiwa wuumalani wa esumana, kaanikhalana eparakha ya wiixuttiha sa Yehova. Axitokweene anceene a esirkwitu yaanisuwela itthu sinceene okivikana miyo. Mmosa a axitokweene awo, taalavunle mwaha wa opatiso nihiku kaapatisiwaka. Mutokweene mukina iitthaniwa Theodore Jaracz, yoowo muhoolo mwaya aaathanliwe wiirela mpantta Nikhuuru Noolamulela. Nave yaahikhala axitokweene akina yaasuwela itthu sinceene ni yaarumeela oBetheli ya oBrooklyn. Okathi kaakhala aka ni axitokweene a isirkwiitu ni anna yaarumeela oBetheli, awo yaanikihiya ootaphuwa. Kinnixukhurela vanceene moota anna awo yaakithokorerya aya. Nave kaaniwerya woona wira anna ale yaari axitokweene oophenta, yaaroromela Nuulumo na Muluku ni yaakhaliherya mutthenkeso wa Yehova ni murima aya wootheene. Nto ntakiheryo  naya na wiiyeviha naahikikhaliherya okhala mutokweene a edistritu ooloka.

Mwaakha wa 1974, Nikhuuru Noolamulela naahaathanla anna akina wira yarumeeleke ntoko axitokweene a edistritu. Nto miyo kaathanliwe wira katthikele orumeela ntoko mutokweene a esirkwiitu, ekwaha ela kaarumeela elapo ya oCarolina wa oSuuli. Moohakalaliha ekwaha ela khinaakhanle-tho nlamulo naakhoottiherya anooripe ni akunya othukumana hoothe. Nto anna ni arokora a esirkwiitu ele yaaniwerya othukumana hoothe mmulokoni. Nto eyo yaari etthu yoohakalaliha.

Mwaakha wa 1976, kaahithanliwa wira karumeeleke osirkwiitu, oGeorgia epooma ya wAtlanta ni oColumbus. Mpakha olelo-va, kinnuupuwela okathi ole kaalavulaka mwaha wa masikho a anamwane 5 a anooriipe yaakhinye mwaha woopahiwa empa aya. Nto maama aya anamwane ale aahiroihiwa ospitaali mwaha wa makhwatta aarina awe. Anna anceene anooriipe ni akunya yaahirowa ospitaali iwo wira yaamaalihe anamuyari aya. Vano kaahoona wira anna ale yaaniphentana vanceene. Tthiri ophentana siiso onnakhaliherya arumeyi a Yehova ovilela mixankiho sootepa owereya.

Mwaakha wa 1977, naahilatuliwa wira nakhaliherye eprojeto emosa oBetheli ya oBrooklyn myeeri vakhaani. Eprojeto ele ehaleelaka omala anna a Nikhuuru Noolamulela yaahinikoha miyo ni Ruby akhala wira naniphavela orumeela oBetheli. Nto naaheemererya nlattulo nne.

Miyo kaahivara edepartamento ya muteko iyaa kha 24. Nto owo muteko muulupale okhala wira anna ahaana ophuka myaha sooxankiha. Nuuvira iyaakha, anna a Nikhuuru Noolamulela, yaahikumiherya malakiheryo anikhuma mBiibiliyani a moota woovara muteko owo. Malakiheryo awo annikhaliherya edepartamento ya muteko waakhula makoho oovila, nave annirumeeliwa wira yiixuttihiwe axitokweene a isirkwiitu, a mmulokoni ni mapioneero. Tthiri wiixuttihiwa iwo onnaakhaliherya anna anceene olipiha waataana waya ni Yehova nave onnikhaliherya mutthenkeso.

Okhuma mwaakha wa 1995 mpakha 2018, kooxukurya iBetheli sinceene ntoko munna orummwale ni Nikhuuru Noolamulela, yoowo khalai iitthaniwa mutokweene a muttetthe. Miyo kaanithukumana ni anna a ekomisau ya ofiliyaali, mabeteliita ni mamisionaario wira kaalipihe ni waakhaliherya oxintta mixankiho saya. Nave anna awo yaninilipiha vanceene okathi yaanileelaya soowiiraneya sa mookumini mwaya. Ntakiheryo nimosa, okathi naaxukurya ahu elapo ya oRuwanda mwaakha wa 2000. Naahihakalala vanceene waaweha moota anna ni emusi ya oBetheli yaawenrye aya woopowa okathi yiiviwa aya atthu anceene mwaakha wa 1994. Anna anceene ahaayeleela apatthani aya ni amusi. Masi hata vari siiso, awo khiyaahiyale waamini, okhalana nlipelelo ni ohakalala.

Olelo-va nookhalana iyaakha sinivikana 80. Nto iyaakha iya 20 sookiserya, kiniirela mpantta ekomisau ya efiliyaali ya wEstados Unidos. Nkinasome wuniversidade, masi kihiixuttihiwa saana onvikana mutthu osomme wuniversidade. Kiireso kihiixutihiwa ni Yehova orumeela aka mutthenkeso awe. Nto mwaha wa wiixuttihiwa iwo, miyo kinniwerya owiixuttiha atthu akina ikeekhai sa mBiibiliyani seiyo sinrowa waakhaliherya mahiku ootheene. (2 aKor. 3:5; 2 Tim. 2:2) Kaahikhalana eparakha ya woona moota Biibiliya oturunke awe okumi wa atthu anceene ni okhalana waataana wooloka ni Yehova. (Yak. 4:8) Miyo ni mwaaraka Ruby, ninnittottela mureerelo khula eparakha ninkhalana ahu wira naatumererye anna ovaha efaita eparakha ya wiixutta sa Yehova ni owiixuttiha atthu akina ikeekhai sa mBiibiliyani. Tthiri, eyo teri eparakha yuulupale murumeyi a Yehova onkhalana awe!