Nwehe moota Biibiliya onaakhula awe makoho awo.

Miteko 24:15, onihimya wira: ‘Anoohihimuxiwa anaxariya ni ale ahikhanle anaxariya’. Anaxariya taale yaamwiiwelela Yehova ahinatthi okhwa, nto masina aya aalempwa muliivuruni mwa okumi. (Mal. 3:16) Nto ale ahikhanle anaxariya atthu yaale akhwiiye aahiixuttihiwe voohimya sa Yehova, nto ti nthowa naya masina aya ahilempwale aya muliivuruni mwa okumi.

Yohani 5:28, 29, onnihimya ikrupu simosaru siniromoliwa Miteko 24:15. Yesu aahimmye wira “ale avanre miteko sooreera” anoohihimuxiwa wira ‘yaakhele okumi woohimala’ ni “ale avanre miteko sootakhala anrowa ophukeliwa ni olamuliwa”. Anaxariya ti yaale avanre miteko sooreera ahinatthi okhwa. Awo anoohihimuxiwa wira aphwanye okumi, okhala wira masina aya aalempwa muliivuruni mwa okumi. Masi ale ahikhanle anaxariya ti yaale apanke itthu sootakhala ahinatthi okhwa. Nto awo anrowa ohihimuxiwa wira aphukeliwe okhala wira masina aya nlelo khalempwale muliivuruni mwa okumi. Maana awo ahaana oviriha okathi aphukeliwaka aahiiso owehiwa vakhala wira anoorowa wiiwelela. Okathi owo, awo anookhalana eparakha yoowiixuttihiwa voohimya sa Yehova wira masina aya alempwe muliivuruni mwa okumi.

Wiisuupulula 20:12, 13, onnitthokiherya wira atthu ootheene anrowa ohihimuxiwa, ahaana wiiwelela ‘itthu silempwale murooluni-mmo’, eyo piiyo, malamulo masya Muluku onrowa awe okumiherya elapo esya. Nto ale ahinrowa wiiwelela anoopwetexiwa. — Yes. 65:20.

Daniyeli 12:2, onihimya wira ale akhwiiye anoovenya wira ‘aphwanye ekumi ehinimala akina wira aphwanye wuliwa muru n’utakhaliwa ohinimala’. Eversiikulu ela ennihimya ele enrowa wiiraneya wanikisa wa ophukeliwa waalipa-ookhwa. Niire so, ophwanya “okumi woohimala”. Nave akina ‘otakhaliwa ohinimala’. Nto wanikisa wa iyaakha ekonto emosa, akina anoophwanya okumi woohimala nave akina anrowa opwetexiwa. — Wiis. 20:15; 21:3, 4.

Niwehe ntakiheryo nna. Mukhalelo wa ikrupu iya piili sinrowa ohihimuxiwa, pooti olikanyihiwa ni ikrupu piili sa atthu aniphavela okhala elapo ekina. Anaxariya annilikanyihiwa ni ale anivahiwa ediretu yoovara muteko ni ophwanya opuro wookhala. Nto eyo enniwiiriha osuweliwaka ni atthu akina ni okhalaka ootaphuwa. Moovirikana ni-vo, ale ahikhanle anaxariya annilikanyihiwa ni ale anivahiwa ediretu yookhala elapo ekina mahiku vakhaani aahiiso oxukurya. Okhala wira anamurwa, awo aahaana wooniherya wira anniphwanela weemereriwa okhala elapo ele aronwe aya. Mwa enamuna emosa-ru, ale ahikhanle anaxariya anrowa ohihimuxiwa, ahaana weemererya malamulo a Yehova ni wooniherya okhala atthu a xariya wira avikanihe okhala mparayiisu. Moohicikha ediretu avahiwe aya okathi anikela aya elapo ekina, anamurwa akina pooti weemereriwa okhala mahiku ootheene elapo eyo nave anamurwa akina pooti ottikiheriwa elapo aya. Etthu enrowa owiiriha woomoliwa elapo eyo aahiiso ohoomoliwa mwaha wa mweettelo aya wala makhalelo aya. Mwa enamuna emosa-ru, etthu enrowa owiiriha ale anrowa ohihimuxiwa okhala elapo esya aahiiso opwetexiwa, mwaha wa waamini waya ni mweettelo aya.

Yehova khahiyo Muluku paahi oomoriwa ikharari, masi-tho Muluku a xariya. (Otum. 32:4; Esal. 33:5) Owo onimooniherya ophenta wawe aahihimuxa aka anaxariya ni ale ahikhanle a xariya. Nave, Yehova onoorowa ophavela wira atthu ootheene yiiweleleke sooruma sawe voohimya sa ele eri yooloka ni yoohiloka. Nto atthu yaale paahi anrowa omphentaka ni omwiiwelela aka, tanrowa weemereriwa ovikaniha okhala elapo esya.