Yoolepa ya 1 aKorinto 15:8, Paulo aahimmye so: “Wookiseryani, aahikikhumelela miyo, ntoko mwaana oyarinwe ohinatthi ophiya okathi”. Khalai iliivuru sahu saatthokiherya wira, murummwa Paulo aahimya yoowiiraneya awe okathi anwehale awe Yesu moovuwani mwawe wiirimu. Waalikana ni okhalana eparakha ya oyariwa, aahiiso ohihimuxiwa wira akhaleke wiirimu, ohalaka okathi munceene wira ohihimuwa iwo wiiraneye. Masi nuumala ovarerya saana eversiikulu ela, nooweha wira vannireerela olokiherya wiiwexexa wahu.

Murummwa Paulo aahimya yowoonihiwa awe ya Yesu okathi aarowa awe oDamaasiko. Masi aaphavela ohimya exeeni okathi aalavunle awe wira aayariwe “ohinatthi ophiya okathi”? Nrowe niwehe itthu sikina woonasa wene sikhanle oonikhaliherya wiiwexexa.

Enamuna Paulo aakenle awe ekristau yaari yootutuxerya ni yootikiniha. Akhala wira mwaana onniyariwa ohinatthi ophiya mweeri awe, okhala wene eyo eniiraneya mootutuxerya. Ti etthu yaamwiiranenle Saulo (yoowo muhoolo mwaya aasuweliwa okhala Paulo), okathi aarowa awe oDamaasiko wira aalupatthe makristau. Khaalipelela wira aamunweha Yesu ohihimuxiwe ene. Nto yoowiiraneya ele ya Paulo okela okristau yaamukhumelenle mootutuxerya, nave hata makristau a oDamaasiko khiyaalipelela. Etthu yaamwiiranenle Paulo yaari yootutuxerya ni yoowereya, nuumala-vo maitho awe khiyaawerya-tho woona. — Mit. 9:1-9, 17-19.

Paulo aakenle ekristau “okathi ovinre-ene”. Nttaava na eKereku nuulumo noowi “oyarinwe ohinatthi ophiya okathi”, nave pooti otaphulelaka “mutthu oyariwe okathi ovinre-ene”. Biibiliya Waataana wa Naanaano, onitaphulela so: “Ntoko mutthu oyariwe okathi ovinre-ene”. Okathi Paulo aakenle awe ekristau, iira Yesu otthikenle ene wiirimu. Atthu Paulo aaromonle awe iversiikulu sivinre, yanwenhe Yesu nuumala ohihimuxiwa masi ohinatthi ohokolowela wiirimu. (1 aKor. 15:4-8) Nto Paulo aavahiwe paahi eparakha yonweha Yesu, nuumala owo otthikela wiirimu. Mwa moonelo awe vaakhala wira eyo yiiraneyale “okathi ovinre-ene”.

Paulo aahilavula sa yena moowiiyeviha. Asomi akina anihimya wira moolumo orumenle awe, anooniherya wira aamwiiphukela aahiiso uupuwela wira khaaphwanela waakhela eparakha ele. Akhala wira ti siiso, eyo enooniherya wira Paulo aaneemererya wira khaaphwanelela okhala murummwa. Hata mwaneene aalavunle so: “Tthiri, miyo ka mwaamukhaanixa waavikana arummwa otheene, nave nkiniphwanela wiihaniwa murummwa, maana kaanilupattha muloko wa Muluku”. — 1 aKor. 15:9, 10.

Nto vanikhala wira murummwa Paulo aahimya itthu tthaaru: (1) enamuna yootutuxerya Yesu aamukhumelenle awe, (2) mwaha wookela ekristau okathi ovinre ene, ni (3) aixoona wira khaaphwanela okhala murummwa. Khaninsuwela saana etthu aaphavela awe ohimya, masi ninnikupalixa wira aanivaha efaita yowoonihiwa ya Yesu. Tthiri yaari yoowoonihiwa eyo, yaamukupalinhe Paulo wira Yesu aahivenya mookhwaani. Moohaanyiherya okathi Paulo aalaleya awe voohimya sa ohihimuwa wa Yesu, aanaaleela atthu yowoonihiwa ele. — Mit. 22:6-11; 26:13-18.