Paulo aalempe so: “Okhala wira kaaneettela Nlamulo, miyo kookhwela Nlamulo, wira kimukhalele mukumi Muluku”.—aGal. 2:19.

Etthu Paulo aalempe awe yaanivarihana ni eponto yuulupale aatthokiherya awe vaavo aalepenle awe miloko sa eprovinsia ya oRoma ya oGalasia. MaKristau makina a muloko ole yaanihapuxiwa ni awiixuttihi oowootha. Alopwana awo yiixuttiha wira, wira mutthu oopowe aahaana wiiwelela Nlamulo na Moise, otepexa wene winnuwihiwa. Masi Paulo aanisuwela oratteene wira Muluku khaavekela maKristau wira yaahaana winnuwihiwa. Otthokiheryaka oratteene mwaha ole, Paulo aahooniherya wira mwiixuttiho ole waari wowoothiwa ni aahilipiha waamini waya anna ni arokora mukuttho wa Yesu Kristu.—aGal. 2:4; 5:2.

Biibiliya onnihimya oratteene wira mutthu okhwiiye khonisuwela etthu. Nto khiivo etthu eniiraneya ekhanle oomukumiherya mixankiho. (Mus. 9:5) Vaavo Paulo aahimmye awe wira “kookhwela Nlamulo”, owo aaphavela ohimya wira Nlamulo na Moise khinaarina owerya mookumini mwawe. Ohiya-vo, owo aanikupali ni murima wotheene wira waamini wawe mukuttho wowoopola waanimukhaliherya ‘omukhalela mukumi Muluku’.

Oturukeya iwo wa makhalelo a Paulo waahiiraneya mwaha wa “weettela Nlamulo”. Nave Paulo aahitthokiherya wira “mutthu onnithokoreriwa okhala naxariya mwaha wa omwaamini Yesu Kristu”. (aGal. 2:16) Ekeekhai wira Nlamulo naahipaka etthu ya faita yinceene. Paulo aahaatthokiherya aGalasia wira: “Nlamulo naakumiheriwe wira sooniheriwe itthu soohiloka atthu yaapaka aya, mpakha orwa osuulu, yoowo waamaneliwe natiri”. (aGal. 3:19) Tthiri Nlamulo naahooniherya oratteene wira apinaatamu oohimalela khaniwerya weettela moomalela Nlamulo. Nave waahaana ovahiwa mukuttho woomalela ni wa mahiku otheene. Nlamulo nne naahipakiwa wira naaroihe atthu wa “osuulu”, eyo piiyo, wa Kristu. Nto mutthu aamini mukuttho wa Yesu aanikhalihiwa naxariya ni Muluku. (aGal. 3:24) Paulo aahikhalihiwa naxariya mwaha woowi Nlamulo naahimukhaliherya omweemererya ni omwaamini Yesu. Paulo ‘ahikhwela Nlamulo’ ni aahikhalihiwa ‘mukumi ni Muluku’. Tthiri Nlamulo khinaarina owerya mookumini mwa Paulo, masi Muluku taarina owerya.

Paulo aahihimya etthu emosaru okathi aalepenle awe ekarta awe aRoma. “Axinnaka, vamosa-ru, erutthu ya Kristu yoowoopolani weettela Nlamulo na Moise . . . Nootaphuliwa otthara Nlamulo, okhala wira nlo khanniwerya-tho onikhoottiherya etthu”. (aRom. 7:4, 6) Yoolepa ela ni aGalasia 2:19, sinnooniherya wira Paulo khahiyo aalavula okhwa mwaha woophukeliwa okhala anatampi ni Nlamulo. Ohiya-vo, Paulo aalavula voohimya sa woopoliwa. Nto Nlamulo khinaarina owerya mookumini mwa Paulo ni atthu akina ntoko Paulo. Maana awo yahoopoliwa mwaha wowaamini mukuttho wa Yesu Kristu.