1. Etthu xeeni Yehova opanke awe wa khula mmosa a hiyo?

YEHOVA oomuthanla khula mmosa a hiyo wira nimukokhoreleke. (Yoh. 6:44) Nkahaya muupuwele ele eyo enitaphulela aya. Yehova ohaavarerya atthu ibilyau sinceene olumwenku wotheene, masi ooweha etthu ya faita nyuwo murina anyu. Nyuwo mookhalana murima wooloka wira mumphenteke. (1 Wah. 28:9) Yehova onnoosuwelani ni onnoophentani vanceene. Tthiri ti voohakalaliha osuwela eyo!

2. Yesu onikhalihenrye sai osuwela moota Yehova onimuthokorerya awe khula mmosa a hiyo?

² Yehova onnoothokoreryani vanceene ni onnaathokorerya anna ni arokora otheene owaamini. Wira ooniherye eyo, Yesu aahimulikanyiha Yehova ni makampusi. Akhala wira makampusi onnikhalana ipwittipwitthi 100 erimeela emosa, etthu xeeni onipaka awe? Owo ‘onoohiya iye 99 omwaako, onarowa ophavelasa ele emosa erimenle’. Nuumala makampusi owo ophwanya epwittipwitthi eyo, owo khonrowa onanariwa mwaha wa etthu yiirinhe epwittipwitthi eyo orimeela, masi owo onoohakalala vanceene. Nlikanyiho nna ninniixuttiha exeeni? Yehova onnivaha efaita yinceene khula epwittipwitthi. Yesu aahimmye wira: “Tiithi aka ori wiirimu, khoniphavela wira hata mmosa a acikhaani ala, orimeele”.—Math. 18:12-14.

3. Mwaha ola, ninrowa waakhula makoho xeeni?

³ Tthiri khuuvo mutthu oniphavela omukhulumula munna wala murokora. Nto nihaana opaka exeeni wira nihaakhumulihe atthu akina? Nihaana opaka exeeni akhala wira mutthu mukina oopaka wala oohimya etthu eniwereyale? Mwaha ola, ninrowa waakhula makoho awo. Masi wanipacerya, nrowe naasuwele “acikhaani ala” anihimmwa Matheyo ekapiitulu 18.

4. Tani ari “acikhaani ala”?

⁴ “Acikhaani ala” anihimmwa atthareli otheene a Yesu. Moohicikha iyaakha arina aya awo “anamwane acikhaani”, mwaha woowi anniphavela wiixuttihiwa ni Yesu. (Math. 18:3) Nnaamwi ari ene a  ilapo soovirikana, a makhalelo oovirikana, miyoonelo soovirikana ni omutthu woovirikana, otheene aya annimwaamini Yesu Kristu. Nto Yesu onnaaphenta vanceene.—Math. 18:6; Yoh. 1:12.

5. Yehova onoonela sai vaavo atthu akina anaariipiha aya murima wala waakhumuliha arumeyi awe?

⁵ Yehova onnaavaha efaita yinceene “acikhaani” otheene. Wira nisuwele oratteene moonelo wa Yehova, nkahaya nwuupuwele anamwane. Hiyo ninnaavaha efaita yinceene anamwane. Nave ninniimananiha waakhapelela mwaha woowi ninnisuwela wira awo kharina ikuru sinceene, kharina sookumanana sinceene ni kharina ankhili ntoko atthu aalupale. Hiyo ninniriipiwa murima vaavo nninweha ahu mutthu mukina omuhasulaka mukhwaawe. Vannitepa oriipiha murima akhala wira mutthu owo onihasuliwa mwaana. Mwa enamuna emosaru, Yehova oniphavela onikhapelela. Nto, onniriipiwa murima vaavo atthu akina anaawereiha aya murima arumeyi awe wala anaakhumuliha aya!—Yes. 63:9; Mar. 9:42.

6. Moovarihana ni 1 aKorinto 1:26-29, atthu a olumwenku ola aniwoonela sai awiixutti a Yesu?

⁶ Mwa enamuna xeeni ekina awiixutti a Yesu ari aya ntoko “acikhaani”? Atthu xeeni olumwenku ola onaathokorerya awe okhala a faita yinceene? Olumwenku ola onnaavaha efaita yinceene, atthu oothaaciri, oovuwa ni arina okhulupale. Awiixutti a Yesu kharina itthu iyo. Nto atthu a olumwenku ola, aniwoona okhala “acikhaani” ni khanaavaha efaita. (Mmusome 1 aKorinto 1:26-29.) Masi Yehova khonaathokorerya mwa enamuna eyo.

7. Yehova oniphavela wira niwooneleke sai anna ni arokora?

⁷ Yehova onnaaphenta vanceene arumeyi awe otheene, akhale ale apacenrye khalai omukokhorela wala ale yiixuntte ekeekhai niinaano. Nto okhala wira Yehova onnaavaha efaita anna ni arokora otheene, hiyo nave nihaana waavaha efaita. Tthiri hiyo nimphavela waaphenta “anna a olumwenku wotheene”, ohiya waathanla. (1 Ped. 2:17) Nto nihaana opaka sotheene ninwerya ahu wira naakhapelele ni waathokorerya saana. Akhala wira noomuriipiha murima mutthu, nihaana osyaka wuupuwela wira khiivo etthu yootakhala ekhumelenle wala wuupuwelaka wira mutthu owo waakuva onanariwa aahiiso oveeheya ni ohaana wiixutta ohiya itthu sikina siviraka. Etthu xeeni ekhanle oomuriipiha wala onwereiha murima mutthu? Mwaha wa enamuna ahuuwale aya, anna ni arokora akina anuupuwela wira kharina efaita yinceene, nto waakuva oveeheya wala oriipiwa murima. Anna ni arokora akina yiixuntte niinaano ekeekhai, nto khanatthi wiixutta waalevelela atthu akina vaavo anivonya aya. Moohicikha etthu ene enaawereiha murima wala enaariipiha murima anna ni arokora awo, nihaana opaka marukunuxo ni okhaliha murettele. Nave mutthu oowaakuva oveeheya, ohaana opaka marukunuxo iixuttaka ohaakuva oveeheya, iira siiso, eyo enoomukhaliherya okhalana murettele ni okhalana waataana wooloka ni atthu akina.

8. Moonelo xeeni woohiloka aYuda yaarina aya waavanre awiixutti a Yesu?

⁸ Etthu xeeni yaamwiirinhe Yesu waalavula acikhaani ala? Etthu yaamwiirinhe, okhala wira awiixutti awe yaahimukoha wira: “Ti pani ori muulupalexa Moomweneni wa wiirimu?” (Math. 18:1) AYuda anceene a okathi ole, yaanivaha efaita yinceene okhala muulupale wala okhalana okhulupale mmuttettheni. Olavulaka sa mwaha awo, musomi mmosa ohimmye so: “Alopwana yaakhala okathi ole, yaaniimananiha mpakha okhwa aphavelaka ottittimihiwa, okhalana mweettelo wooloka, ovuwa, weemereriwa ni atthu akina ni ottittimihiwa vanceene”.

9. Awiixutti a Yesu yaahaana opaka exeeni?

⁹ Yesu aanisuwela wira awiixutti awe yaahaana wiimananiha vanceene wira ahixinttaneke, mweettelo yoowo waavahiwa efaita yinceene ni soolema sa aYuda. Yesu aahaaleela awiixutti awe wira: “Ole ori muulupalexa eriyari anyu, okhaleke ntoko mwaamukhaani. Ole ori muhooleli, okhaleke ntoko ole onirumeela”. (Luka 22:26)  Vaavo nnaathokorerya ahu atthu akina okhala aalupale ‘wiivikana mmansihu’ hiyo ninniixoona okhala “mwaamukhaani”. (aFil. 2:3) Nto vaavo nniithokorerya ahu mwa enamuna eyo, ninnisyaka waakhumuliha atthu akina.

10. Miruku xeeni Paulo ovanhe awe ninreerela ahu ovarexexa?

¹⁰ Anna ni arokora otheene taalupale onivikana hiyo mwa inamuna soovirikana. Nto vannikhweya oweha eyo akhala wira ninniweha mikhalelo sooloka arina aya. Nihaana ovarexexa miruku murummwa Paulo aavanhe awe anna ni arokora a muloko wa oKorinto oriki: “Exeeni erina anyu enookupalihani wira mwa mukhulupale waavikana akina? Kiira itthu sotheene murina anyu nvahiwe ni Muluku? Akhala wira Muluku toovanheni itthu sotheene, xeeni muniittottopa anyu okhalaka ntoko mphwannye ni ikuru sanyu?” (1 aKor. 4:7) Akhala wira nnoona wira nimphavela ohimmwa wala nniixoona okhalana efaita yinceene waavikana atthu akina, nihaana wiivaha ephoole. Nto akhala wira munna onnisuwela olavula oratteene myaha wala murokora onnisuwela opaceriha soosoma sa Biibiliya, okathi wotheene owo ohaana onvuwiha Yehova.

11. Nlikanyiho na Yesu na mwene ni epottha, ninniixuttiha exeeni?

¹¹ Nuumala Yesu waalopola wira ahaakhumuliheke atthu akina, owo aahilavula nlikanyiho na mwene ni epottha awe. Mwene ole aahilevelela epottha awe musurukhu munceene aakomphe awe, yoowo ahaarowa awe owerya oliva. Muhoolo mwaya epottha ele khiyaawenrye omulevelela mutthu mukina, yoowo aamukophenle musurukhu vakhaani paahi. Nuumala mwene ole osuwela eyo, aahiruma wira eriheliwe mukhatteya epottha ele yootakhala murima. Nlikanyiho nna na Yesu ninniixuttiha exeeni? Yesu aahimmye so: “Ti siiso Tiithi aka a wiirimu, onrowa awe owiirihani, vakhala wira khamunimulevelela munninyu ni murima wotheene”.—Math. 18:21-35.

12. Itthu xeeni sikhanle ookhumelela akhala wira ninnikhootta waalevelela atthu akina?

¹² Etthu epottha ele yaapanke aya yaahikumiherya mixankiho ohiya yena paahi, masi-tho atthu akina. Woopacerya, epottha ele yaahooniherya wira khiyaarina ophenta ni yaahikumiherya mixankiho epottha ekina. Epottha ele yootakhala yaahiruma ‘owaleliwa mukhatteya, mpakha ophiya okathi aarowa awe oliva musurukhu aakopheliwe awe’. Wa nenli, owo aahiriipiha murima ipottha sikina. Maana “okathi arumeyi akhwaawe voonale aya etthu ele yiiraneyale, yaahiriipiwa murima vanceene”. Mwa enamuna emosaru, itthu nimpaka ahu ni ninhimya ahu pooti waakumiherya mixankiho atthu akina. Akhala wira munna wala murokora onniniirela etthu eniwereyale nnakhootta omulevelela, etthu xeeni enrowa okhumelela? Yoopacerya, vaavo nihimmulevelela ahu, hiyo ninnimuriipiha murima, maana ninnooniherya wira khannimphenta. Ya nenli, hiyo nnimwaaxankiha anna ni arokora akina a mmulokoni, nuumala woona wira ninnikhootta okhaliha murettele ni mutthu owo.

13. Ntakiheryo na Crystal ninniixuttiha exeeni?

¹³ Vaavo nnaalevelela ahu anna ni arokora, ninniiphwanyiha mireerelo ni ninnaaphwanyiha mireerelo atthu akina. Eyo ti etthu yaamukhumelenle pioneera yoowo ninrowa ahu omwiitthanaka Crystal. Murokora mmosa a mmulokoni aahipaka etthu yanwereyale vanceene. Crystal onihimya so: “Okathi mukina moolumo awe yaanikiwereiha murima vanceene vanakhala ntoko wira kaahommwa ni mwaalo. Vaavo naarowa ahu olaleerya nkaaphavela nnakhala owela ekaaro emosa ni murokora ole. Nto kaahipacerya ohiluttuweliwa olaleerya ni ohakalala waka waahivukuwa”. Crystal uupuwela wira aahikhalana mathowa ooloka yaamwiiriha onyoonyiheya. Moohakalaliha, murokora ole khaapwehale mathowa vamurimani ni khiyaamwiirinhe okhala mutthu ootakhala. Moowiiyeviha aahivarihela muteko malakiheryo a mBiibiliyani aaphwannye  awe mwaha waahimya wira: “Perdoe de coração”, yoowo waakumiheriwe erevista A Sentinela ya 15 a Outubro ya 1999. Nto aahimulevelela ni murima wotheene murokora ole. Crystal onihimya so: “Vano kihoona wira otheene ahu ninniimananiha owara omutthu wa niinaano ni Yehova onninlevelela ni murima wotheene khula nihiku. Nuumala omulevelela vaakhala ntoko wira kaaruliwe muritti woolemela vanceene. Nto kootthikela okhala mutthu oohakalala”.

14. Moovarihana ni Matheyo 18:21, 22, muxankiho xeeni murummwa Pedru aarina awe? Etthu xeeni enrowa onikhaliherya akhala wira nnookhalana muxankiho Pedru aarina awe?

¹⁴ Hiyo ninnisuwela wira waalevelela atthu akina etthu yootepexa oloka nikhanle ahu oopaka. Masi hata vari siiso, pooti onivila vanceene waalevelela atthu akina. Murummwa Pedru vaanimuxankiha okathi mukina waalevelela atthu akina. (Mmusome Matheyo 18:21, 22.) Etthu xeeni enrowa onikhaliherya waalevelela atthu akina? Yoopacerya, muupuweleleke moota Yehova onoolevelelaaweni. (Math. 18:32, 33) Hata nihiphwanelelaka oleveleliwa, Yehova onninlevelela ni murima wotheene. (Esal. 103:8-10) Okathi omosaru nihaana wuupuwela wira “nihaana ophentana mukina ni mukhwaawe”. Nto khuuvo mutthu okhanle oothanla akhala wira pooti olevelela wala nnaari. Mwaha woowi okathi wotheene nihaana waalevelela anna ni arokora. (1 Yoh. 4:11) Ya nenli, muupuweleleke itthu sinikhumelela vaavo nnaalevelela ahu atthu akina. Nyuwo munnimukhaliherya mutthu ole ootthekenleni, munnikhaliherya muloko okhala wowiiraana, munnikhapelela waataana wanyu ni Yehova ni munnirula muritti woolemela, maana munoohakalalaka. (2 aKor. 2:7; aKol. 3:14) Munvekeleke ole oniphavela wira naaleveleleke atthu akina. Nto muhikhala-khale mmweemereryaka Satana omaliha murettele nrina ahu ni anna ni arokora. (aEef. 4:26, 27) Nikhaliheriwaka ni Yehova nnoowerya osyaka omorela miraakho sa Satana.

15. Moovarihana ni aKolosi 3:13, nihaana opaka exeeni akhala wira munna wala murokora oopaka etthu eniwereyale?

¹⁵ Akhala wira munna wala murokora a  mmulokoni oopaka etthu yoowereyaleni, muhaana opaka exeeni? Mwiimananiheke okhaliha murettele. Nave munvekeleke Yehova mmuleelaka moota munoonela anyu muxankiho owo. Ohiya-vo, munvekeleke Yehova wira ookhaliheryeni oweha mikhalelo sooloka mutthu owo orina awe, mikhalelo seiyo sinimwiiriha Yehova omphenta mutthu owo. (Luka 6:28) Akhala wira munoona wira khamuniwerya oliyala etthu mwiireliwe anyu, muupuweleke enamuna yooloka ya ovaanela ni munna wala murokora owo. Ohiya-vo, okathi wotheene ti vooloka wuupuwela wira munna wala murokora owo khahiyo oroolakelela opaka etthu eniwereyale vanceene. (Math. 5:23, 24; 1 aKor. 13:7) Nto okathi munivaanela anyu, mwiimananiheke omooniherya wira khahiyo oroolakela. Masi ankhi akhala wira mutthu owo khoniphavela okhaliha murettele? Muhihiye ‘onvilela’. Nave nvikaniheke ompixerya murima munna wala murokora owo. (Mmusome aKolosi 3:13.) Etthu yootepexa oloka, muhikhala-khale mpwehaka mathowa vamurimani, maana opaka eyo pooti ohonona waataana wanyu ni Yehova. Nto muheemererye nnaakhala etthu emosa yookhumulihakani. Akhala wira munoopaka eyo, nyuwo munimooniherya wira munnimphenta Yehova ovikana itthu sotheene.—Esal. 119:165.

16. Muritti xeeni otheene ahu nrina ahu?

¹⁶ Hiyo ninnihakalala vanceene omukokhorela Yehova ntoko “nikoto nimosa” ni “makampusi mmosa”! (Yoh. 10:16) Eliivuru Mutthenkeso Onipaka Otthuna wa Yehova epaaxina 165 enihimya wira: “Okhala wira munnittottela mureerelo wiiraana iwo, muritti anyu okhaliherya olipiha wiiraana iwo”. Nto ‘nihaana wiimananiha waathokorerya anna ni arokora ntoko Yehova onaathokorerya awe’. Tthiri Yehova onninivaha efaita otheene ahu. Nto niireke nyuwo munnaavaha efaita anna ni arokora? Musuweleke wira Yehova onniweha ni onnivaha efaita itthu sotheene munipaka anyu wira mwaakhaliherye ni waathokorerya saana anna ni arokora.—Math. 10:42.

17. Otheene ahu nihaana opaka exeeni?

¹⁷ Hiyo ninnaaphenta vanceene anna ni arokora. Tivonto nilakenle ahu “ohipaka etthu yaarowa ovukula waamini wa munna aahiiso ommoroxa”. (aRom. 14:13) Ninnaathokorerya anna ni arokora okhala aalupale onivikana hiyo ni ninnaalevelela ni murima wotheene. Nto muhikhala-khale mweemereryaka okhumulihiwa ni atthu akina. Ohiya-vo, “niphaveleke itthu sinikumiherya murettele ni itthu sinikhaliherya olipihana mukina ni mukhwaawe”.—aRom. 14:19.