1. Itthu xeeni siniwiiriha arumeyi akina a Yehova waaphwanya omeekha?

ANAMUNCEENE a hiyo, okathi mukina onniniphwanya omeekha. Akina omeekha aya onnaakuva ovira, masi akina onniviriha okathi munceene. Hiyo pooti okhala ni atthu anceene, masi hata vari siiso, omeekha pooti oniphwanya. Anna ni arokora akina onnaavila olimalela muloko musya. Akina anikhuma imusi sowiiraana, nto nuumala othaama, omeekha onnaaphwanya. Nave aakhala akina yinkheliwe oviriha okathi ari ni mmusi aya yamphentexa aya vanceene okhwiiye. Nave-tho akina, otepexa wene ale yiixuntte niinaano ekeekhai, onnaaphwanya omeekha vaavo anlupatthiwa aya ni amusi ni apatthani aya ahikhanle maKristau.

2. Mwaha ola, ninrowa waakhula makoho xeeni?

² Yehova onnisuwela itthu sotheene sinniiraneela. Owo onnisuwela moonelo ahu vaavo omeekha onniphwanya aya ni oniphavela onikhaliherya owanana muxankiho owo. Masi Yehova onnikhaliherya sai? Etthu xeeni nikhanle ahu oopaka wira niikhaliherye mmansihu? Etthu xeeni nikhanle ahu oopaka wira naakhaliherye atthu akina a mmulokoni owanana omeekha? Mwaha ola, nnooweha waakhuliwa wa makoho awo.

3. Yehova oonihenrye sai wira aanimuthokorerya Eliya?

³ Yehova oniphavela wira arumeyi awe otheene ahakalaleke. Nave owo ori vakhiviru wa khula mmosa a hiyo ni onnisuwela vaavo hiyo ninkhulumuwa ahu. (Esal. 145:18, 19) Nwehe moota Yehova oonihenrye awe wira aanimuthokorerya ni anninvaha efaita profeta Eliya. Profeta ole oororomeleya aakhala okathi wooxankiha wa nloko na aIsarayeli. Arumeyi anceene a Yehova yaanilupatthiwa okathi ole. Nto Eliya aanitepa olupatthiwa  ni awanani oowerya a Yehova. (1 Mam. 19:1, 2) Ohiya-vo, Eliya uupuwela wira profeta aahanle a Yehova aari yena paahi. Nto eyo yaanimukhulumula vanceene. (1 Mam. 19:10) Moohipisa, Muluku aahipaka etthu wira omukhaliherye Eliya. Yehova aahiruma nlaikha wira nimooniherye Eliya wira khaakhanle mekhawe, maana yaahikhala aIsarayeli akina yaamurumeela Muluku moororomeleya!—1 Mam. 19:5, 18.

4. Marko 10:29, 30, onooniherya sai wira Yehova onnimuthokorerya khula mmosa a hiyo?

⁴ Yehova onnisuwela wira akina a hiyo nooleva itthu sikina wira nimukokhoreleke. Pooti wira amusi ni apatthani ahu yaawo ahiniimukokhorela Yehova aahiya onikhaliherya. Nto mwaha wooxanka, hiyo pooti opaka nikoho nimosaru Pedru ampakenle awe Yesu iiraka: “Hiyo-va, noohiya itthu sotheene nnoottharani. Exeeni enrowa ahu ophwanya?” (Math. 19:27) Mooreerela murima, Yesu aahaalipiherya awiixutti awe wira anna a mmulokoni yaarowa okhala ntoko amusi aya. (Mmusome Marko 10:29, 30.) Tiithi a wiirimu Yehova, ooleiherya waakhaliherya atthu otheene animukokhorela. (Esal. 9:11) Nrowe niwehe itthu vakhaani munreerela anyu opaka wira nwanane omeekha.

5. Xeeni vari aya vooloka wuupuwela moota Yehova onookhaliheryaaweni?

⁵ Muupuweleke moota Yehova onookhaliheryaaweni. (Esal. 55:23) Akhala wira munoopaka eyo, enimookhaliheryani okhalana moonelo wooloka voohimya sa muxankiho anyu. Murokora oohitheliwa oniitthaniwa Carol, * yoowo amusi awe ahinimukokhorela Yehova onihimya so: “Kuupuwelaka moota Yehova okikhalihenrye awe okathi wa mixankiho, eyo ennikikupaliha wira nkikhanle mekhaka. Nave ennikikhaliherya woona wira okathi wotheene Yehova onrowa okikhaliheryaka”.

6. 1 Pedru 5:9, 10, onrowa waalipiha sai ale aniwanana omeekha?

⁶ Muupuweleke moota Yehova onaakhaliherya awe anna ni arokora aniwanana omeekha. (Mmusome 1 Pedru 5:9, 10.) Munna oniihaniwa Hiroshi yoowo ori mwekeekhaini mekhawe okhuma khalai, onihimya so: “Mmulokoni,  vannikhweya woona wira otheene ahu nookhalana mixankiho. Osuwela wira otheene ahu ninniimananiha wira nimukokhoreleke Yehova ennaalipiha atthu akina ari mekhaya mwekeekhaini ntoko miyo”.

7. Ovekela onrowa wookhaliheryani sai?

⁷ Mwiimananiheke ovekela, omusoma Biibiliya ni orowela mithukumano. Eyo enihela muhina omuleela Yehova moonelo anyu. (1 Ped. 5:7) Nwehe etthu ohimmye awe mwali mmosa Namoona a Yehova oniihaniwa Massiel. Okhala wira mweemusini mwawe yena paahi taathanlale omukokhorela Yehova, okathi mukina waanimphwanya omeekha. Owo onihimya so: “Etthu yuulupale yaakikhalihenrye ovilela omeekha waari onvekela Yehova. Maana Yehova aari Tiithi eekeekhai mookumini mwaka. Miyo kaaninvekela ikwaha sinceene khula nihiku kimuleelaka moonelo aka”.

8. Osoma Nuulumo na Muluku ni wuupuwelela onrowa wookhaliheryani sai?

⁸ Musomeke Nuulumo na Muluku khula nihiku ni muupuweleleke sowiiraneya sinooniherya wira Yehova onnoophentani. Murokora Bianca yoowo onivilela khula nihiku moolumo onilavuleliwa awe ni amusi awe, ohimmye so: “Osoma ni wuupuwelela sowiiraneya sa mBiibiliyani sa arumeyi a Yehova, yaawo yaarina muxankiho ntoko muxankiho aka onnikikhaliherya vanceene”. Anna ni arokora akina, annihela mmuru soolepa soomaaliha ntoko Esalimo 27:10 ni Yesaya 41:10. Akina, anoona wira waawiriyana audio a Biibiliya ookravariwa ni iliivuru sikina ninrumeela ahu okathi wa mithukumano, onnaakhaliherya ovilela omeekha.

9. Moota xeeni orowela mithukumano onrowa aya wookhaliheryani?

⁹ Mwiimananiheke ohicompela mithukumano. Maana sinimoolipihani ni sinimookhaliheryani waasuwela oratteene anna ni arokora. (aHeeb. 10:24, 25) Massiel yoowo nimulavunle ahu ohimmye so: “Nnaamwi kuuliwaka muru, kaahilakela orowela mithukumano sotheene ni okomentari. Eyo yaahikikhaliherya woona wira kinniirela mpantta muloko”.

10. Xeeni vari aya vooloka waapaka apatthani anna ni arokora a mmulokoni?

¹⁰ Mwaapakeke opatthani anna a mmulokoni yaawo anrowa owiixuttihani itthu sooloka ni woovahani ntakiheryo nooloka. Awo pooti okhala oowuuluvala ni a makhalelo oovirikana. Biibiliya onihimya wira: “Ankhili anetta n’atthu òwuluvala”. (Yobi 12:12) Nave, atthu oowuuluvala pooti wiixutta itthu sinceene ni amiravo a mmulokoni. Davidi aari mmiravo namulikanyiha ni Yonathani. Masi hata vaari siiso, eyo khiyaakhoottihenrye okhala apatthani ooloka. (1 Sam. 18:1) Musuweleke wira, Davidi ni Yonathani yaanikhaliheryana  mukina ni mukhwaawe ohihiya omukokhorela Yehova hata yaarina mixankiho sinceene. (1 Sam. 23:16-18) Murokora oniihaniwa Irina yoowo ori Namoona a Yehova mekhawe mweemusini mwawe, onihimya so: “Anna ni arokora a mmulokoni pooti okhala anamuyari ahu ni axinnihu niyaraniwa ahu erukulu emosa. Yehova pooti owiiriha okhala emusi nimphavela ahu”.

11. Muhaana opaka exeeni wira mukhalane apatthani eekeekhai?

¹¹ Waapaka apatthani asya khivanikhweya otepexa wene akhala wira mwa mutthu oowuuliwa muru. Murokora oowuuliwa muru oniihaniwa Ratna yoowo iixuntte ekeekhai nnaamwi aalupatthiwa onihimya so: “Tthiri kaahoona wira kaahaana okhaliheriwa ni anna ni arokora a mmulokoni”. Pooti woovilani waaleela atthu akina moonelo anyu. Masi musuweleke wira ovaanela mootaphuwa onninikhaliherya okhalana apatthani eekeekhai. Apatthani anyu anniphavela wookhaliheryani ni woolipihani. Masi nyuwo muhaana owooniherya moota akhanle aya oopaka eyo.

12. Olaleerya onrowa wookhaliheryani sai waapaka apatthani eekeekhai?

¹² Enamuna emosa yuulupale enrowa wookhaliheryani waapaka apatthani, ori wiirela mpantta muteko woolaleerya ni anna ni arokora akina. Carol nimulavunle ahu wanipacerya onihimya so: “Wiirela mpantta muteko woolaleerya ni miteko sikina sa omunepani wookikhaliherya waapaka apatthani eekeekhai. Mwa iyaakha sinceene, Yehova onnaaruma apatthani aka awo wira okikhaliherye”. Ti vooloka wiimananiha okhala apatthani a anna ni arokora oororomeleya. Tthiri Yehova onnaaruma apatthani ahu awo wira onikhaliherye owanana mixankiho sahu ntoko omeekha.—Mir. 17:17.

13. Muritti xeeni khula mutthu mmulokoni orina awe?

¹³ Otheene ahu nookhalana muritti wookhaliherya muloko okhala nipuro noophenta ni na murettele wira ohikhale mutthu onoona wira ori mekhawe. (Yoh. 13:35) Moolumo ahu ni miteko sahu, pooti waakhaliherya atthu akina! Nwehe etthu murokora mmosa ohimmye awe oriki: “Nuumala wiixutta ekeekhai, anna ni arokora a mmulokoni ari ntoko amusi aka. Kinoona wira nkaarowa owerya okhala Namoona a Yehova kihikhaliheriwe ni anna ni arokora awo”. Muhaana opaka exeeni wira mwaakhaliherye ale ari mekhaya mwekeekhaini woona wira anniirela mpantta muloko?

14. Muhaana opaka exeeni wira mukhale mpatthani aya atthu ale yiixuntte ekeekhai niinaano?

¹⁴ Mwiimananiheke waapaka opatthani ale yiixuntte ekeekhai niinaano. Nihaana owaakhela ni murima wotheene ale a niinaano mmulokoni. (aRom. 15:7) Masi nihaana opaka itthu sikina, ohiya paahi waakoha wira: ‘Sai ehaali anyu?’ Nuuvira okathi, nihaana okhalana ni olipiha ompatthani ahu ni atthu awo. Mwiimananiheke oweha mixankiho arina aya masi muhaapakeleke makoho ookhulumula. Musuweleke wira atthu akina onnaaxankiha vanceene ohimya moonelo aya. Nto wira ahimye moonelo aya muhaana waapakela makoho a ankhili, ooreerela murima ni waawiriyana moopixa murima vaavo anaakhula aya. Masi muhaakhanyereryeke waakhula wala olavula. Nyuwo pooti waakoha so: ‘Mwiixuntte sai ekeekhai?’

15. Anna ni arokora arina sookumanana sinceene, anrowa waakhaliherya sai atthu akina mmulokoni?

¹⁵ Vaavo anna arina sookumanana sinceene otepexa wene axitokweene anaathokorerya aya atthu akina, muloko wotheene onnilipa. Murokora oniihaniwa Melissa yoowo  ohuuwale mwekeekhaini ni maama awe paahi, ohimmye so: “Kinnaaxukhurela vanceene anna yaawo mwa iyaakha sinceene yaari ntoko paapa aka. Awo yaahooniherya wira yaanikithokorerya saana ni yaaniviriha okathi ari ene ni miyo. Khula okathi kaaphavela aka ovaanela naawo, yaanikiwiriyana”. Mauricio mmiravo yoowo wamphwannye omeekha nuumala ole aamusomiha Biibiliya ohiya ekeekhai, onihimya so: “Axitokweene yaahooniherya wira yaanikithokorerya, nto eyo yaahikikhaliherya vanceene. Awo yaamakela ovaanela ni miyo, yaanilaleerya ni miyo, yaanikileela itthu yiixuntte aya okathi yaamusoma aya Biibiliya ni naanipaka hoothe itthu sikina soohakalaliha”. Olelo-va, Melissa ni Mauricio anivara muteko wa Muluku wa okathi wotheene.

16-17. Nihaana opaka exeeni wira naakhaliherye atthu akina?

¹⁶ Mwaakhaliheryeke ni miteko. (aGal. 6:10) Leo yoowo onirumeela ntoko misionaario elapo yoottaivela ari amusi awe onihimya so: “Okhala wene, etthu mutthu oniphavela awe ori opakeliwa etthu enooniherya oreereliwa murima hata ekhalaka etthu yaamukhaani okathi wooreerela. Kinnuupuwela nihiku kampanke aka asitenti ni ekaaro aka. Nuumala ophiya owaani, miyo nkaareere oxanka. Nuumala-vo, anamathelana amosa yaahikilattula orowa olya owannyeya. Miyo nkinuupuwela etthu naalyiiye ahu, masi nkinliyala moota yaakiwiriyanne aya oratteene. Nuumala-vo, miyo kaahikhala saana!”

¹⁷ Otheene ahu, sinninsivela mithukumano suulupale ntoko asembeleya ni akonkresu mwaha woowi okathi wa mithukumano iyo ninnikhalana eparakha ya okhala ni ovaanela ni anna ni arokora. Masi Carol nimulavunle ahu wanipacerya onihimya so: “Okathi wa asembeleya ni akonkresu onnikixankiha vanceene”. Mwaha wa xeeni? Owo onihimya so: “Ekeekhai wira kaakhala eriyari ya anna ni arokora anceene, masi koona wira khula mutthu aari ni emusi awe, nto okathi ene yoowo waanikiphwanya omeekha”. Atthu akina, vannaavila omurowela konkresu ni asembeleya nuumala okhweliwa ole yaathelanne aya. Niireke nyuwo munnimusuwela mutthu orina muxankiho owo? Munoonela sai omulattula orowa onweha konkresu ni asembeleya ni emusi anyu?

18. Voohimya sa owaakhela aletto, ninrowa ovarihela sai muteko malakiheryo ari 2 aKorinto 6:11-13?

 ¹⁸ Nviriheke okathi muri ene naawo. Nviriheke okathi muri ene ni anna ni arokora a makhalelo oovirikana otepexa wene ale waaphwannye omeekha. Nto nihaana waatthukulela vanceene murima ahu anna ni arokora awo. (Mmusome 2 aKorinto 6:11-13.) Melissa nimulavunle ahu wanipacerya, onihimya wira: “Okathi wotheene waaninsivela vaavo anna yaanilattula aya owannyeya wala weetta mukwaha ni emusi aya”. Niireke ookhala munna wala murokora a mmulokoni mwaakhanle anyu oomulattula owannyu wala oviriha okathi muri ene nuuwo?

19. Okathi xeeni ori aya wootepexa oloka oviriha okathi ni anna ni arokora?

¹⁹ Okathi mukina anna ni arokora pooti ophavelaka wira nivirihe okathi nitthekulaka naawo. Mwa ntakiheryo, anna akina vannaaxankiha okhala vamosa ni amusi aya ahikhanle Anamoona a Yehova mahiku a iferiyado. Akina anniriipiwa murima vaavo nimphiya aya nihiku aakhwiiye awe ole yamphenta aya vanceene. Nto vaavo ninviriha ahu okathi niri ene ni anna ni arokora mahiku awo ooxankiha, ninniwooniherya wira ‘ninnaathokorerya vanceene’ ni ninnaavaha efaita.—aFil. 2:20.

20. Moolumo a Yesu ari Matheyo 12:48-50, anrowa onikhaliherya sai okathi onniphwanya aya omeekha?

²⁰ Ntoko niwenhe ahu, sookhala itthu sinceene siniwiiriha maKristau makina waaphwanya omeekha. Masi nihikhala-khale niliyalaka wira Yehova onnisuwela moonelo ahu. Okathi wootheene owo onninikhaliherya nave onnaaruma anna ni arokora wira anikhaliherye. (Mmusome Matheyo 12:48-50.) Nto wira nimooniherye Yehova wira ninnimuxukhurela mwaha woonivaha muloko, nihaana wiimananiha waakhaliherya anna ni arokora. Moohicikha moota munoonela anyu okathi mukina, muhikhala-khale muliyalaka wira khamukhanle mekhinyu, Yehova ori ni nyuwo!