1. Xeeni nikhanle ahu oomulikanyiha Satana ni mulipa-ooxaya?

MULIPA-OOXAYA, orina yoolakela emosa, ovara wala wiiva etthu oniphavela awe. Nto wira ophwanye ele oniphavela awe, onnirumeela miraakho wala matapha oovirikana ntoko siisaale apatthani oowootha a Yobi yaahimmye aya. (Yobi 18:8-10) Etthu xeeni mulipa-ooxaya onipaka awe wira iirihe enama orowa vantaphani vawe? Owo onnisoma makhalelo a enama eyo. Opuro xeeni enrowa aya? Etthu xeeni enama eyo ensiveliwa aya? Etthu xeeni yaarowa wiiriha waakuva ohomphwa enama eyo? Satana ori ntoko mulipa-ooxaya. Owo onnisoma itthu sinnisivela ni makhalelo ahu. Onniweha mapuro ninrowa ahu ni itthu sinnisivela. Nuumala-vo, owo onnireya muraakho awe olipelelaka wira nnoomorela. Hata vari siiso, Biibiliya onninlipiherya wira hata nimorelaka muraakho mmosa wa Satana nnoowerya okhuma. Nave Biibiliya, onniniixuttiha moota wookhootta miraakho sa Satana.

2. Miraakho xeeni miili sinimukhumela saana Satana?

² Sookhala miraakho miili sinimukhumela saana Satana. Miraakho sene tiiya: Wiixinnuwiha ni ohiphiyeriwa. * Mwa iyaakha imilyau sinceene sivinre, Satana onnirumeela sootteettheya sahu. Owo ori ntoko mulipa-ooxaya ipalame, yoowo onivaha ehelelo wira ipalame iyo simorele vamuraakhoni wala vantthavini vawe. (Esal. 91:3) Masi hiyo pooti ohivariwa ni Satana mwaha woowi Yehova onninooniherya miraakho Satana onirumeela awe.—2 aKor. 2:11.

3. Xeeni Yehova orumme awe olempwa mBiibiliyani sowiiraneya sa atthu akina?

³ Yehova onniniixuttiha moota nikhanle ahu ookhootta omorela muraakho wa wiixinnuwiha ni ohiphiyeriwa. Enamuna emosa onirumeela awe wira oniixuttihe, ori onooniherya sowiiraneya sa atthu  akina. Mwaha ola, nnimoona matakiheryo vakhaani a atthu awo. Nyuwo, munimoona wira Satana oowerya waahapuxa hata atthu yaale apacenrye khalai omurumeela Yehova. Niireke eyo enooniherya wira khaninwerya owanana wiixinnuwiha ni ohiphiyeriwa? Nnaari. Yehova ooruma olempwa sowiiraneya iyo mBiibiliyani wira “sinlopole hiyo”. (1 aKor. 10:11) Maana Yehova onnisuwela wira sowiiraneya pooti onikhaliherya okhootta wala ohimorela miraakho sa Diabo.

4. Etthu xeeni ekhanle oonikhumelela akhala wira nnimwiixinnuwiha?

⁴ Satana oniphavela wira nikhaleke atthu oowiixinnuwiha. Owo onnisuwela wira akhala wira nnooxinttiwa ni wiixinnuwiha ninrowa okhalaka ntoko yena ni khaninrowa ophwanya okumi woohimala. (Mir. 16:18) Murummwa Paulo ohimmye wira mutthu ohaana wiimananiha “wira ohiixinnuwihe ni ohiphukeliwe ntoko Diabo ophukeliwe awe”. (1 Tim. 3:6, 7) Eyo pooti omwiiraneela khula mmosa a hiyo moohicikha akhala wira niixuntte ekeekhai niinaano wala nipacenrye khalai omurumeela Yehova.

5. Moovarihana ni Musuweli 7:16, 20, mutthu aarowa wooniherya sai wira toowiixinnuwiha?

⁵ Wiixinnuwiha enamuna emosa ya wiitthuna. Satana onniimananiha wira nikhale atthu oowiitthuna, owo oniphavela wira niimananiheke wiisiveliha ohiya omusiveliha Yehova, otepexa wene okathi wa mixankiho. Mwa ntakiheryo, niireke mootoko wootheriwa etthu? Wala mootoko othokoreriwa moohixariya? Satana vammusivela vanceene woowehani munvahaka nthowa Yehova wala axinninyu. Satana oniphavela wira muupuweleke wira murette aya ori ophuka muxankiho owo muttharaka murima anyu ohiya otthara malakiheryo a Yehova ari mBiibiliyani.—Mmusome Musuweli 7:16, 20.

6. Yowiiraneya ya murokora a Holanda, ewiixuttinheni exeeni?

⁶ Nwehe etthu yaamukhumelenle murokora a Holanda, owo aahinyoonyiheya mwaha wa soovonya sa anna ni arokora. Murokora ole uupuwela wira khaarowa owerya ovilela muxankiho ole. Owo onihimya so: “Miyo koona wira kiri mekhaka ni nkaawerya oturuka moonelo aka. Nave kaahimuleela iyaka wira naahaana othaamela muloko mukina”. Nuumala-vo, murokora ole  aahiweha eprograma ya JW Broadcasting^® ya mweeri wa Março, 2016. Eprokrama ele yaahivaha malakiheryo a moota woothokorerya soovonya sa atthu akina. Murokora ole onihimya so: “Miyo kaahoona wira kaahaana okhala mutthu oowiiyeviha ni owehexexa soovonya saka ohiya omananiha waaturuka anna ni arokora a mmulokoni. Eprokrama ele yaahikikhaliherya onwehexexa Yehova ni okhulupale awe”. Niireke mooweha etthu nniixutta ahu? Okathi ninnkhalana ahu mixankiho nihaana onwehexexa Yehova. Munvekeleke Yehova mmuxonttelaka wira ookhaliheryeni waathokorerya atthu akina ntoko owo onaathokorerya awe. Ori ene wiirimu, Yehova onniweha soovonya sa atthu otheene, masi hata vari siiso, owo onnaalevelela ni murima wotheene. Nave oniphavela wira nyuwo mpakeke etthu emosaru.—1 Yoh. 4:20.

7. Etthu xeeni yaamwiiranenle Mwene Oziya?

⁷ Mwaha wa wiixinnuwiha, Mwene Oziya a oYuda khaawiriyanne miruku aavahiwe awe ni atthu akina ni aahipaka etthu aaheemereriwa awe opaka. Owo aanikhumela saana, aahixintta ikhotto sinceene, aahiteka ipa sinceene ni aahikhalana imatta sinceene. Nto “Muluku [eekeekhai] ahimureriha”. (2 Wah. 26:3-7, 10) Masi Biibiliya onihimya wira “mwaha w’owerya wawe, murim’awe wahisareya wisona, khumpwetexa”. Yehova aahihimya oratteene wira anamukuttho paahi ti yeemereriwa ovaha erupani otemplo. Masi Oziya aahipaka etthu aheemereriwa awe opaka, owo aahikela mutemplo wira ovahe erupani. Yehova khaasiveliwe mwaha wa wiixinnuwiha wa Oziya ni aahimphwanyiha makuttula wala makokho. Oziya aahikhalana makuttula mpakha okhwa wawe.—2 Wah. 26:16-21.

8. Moovarihana ni 1 aKorinto 4:6, 7, etthu xeeni enrowa onikhaliherya ohiixinnuwiha?

⁸ Niireke wiixinnuwiha pooti onihapuxa ntoko waamuhapunxe aya Mwene Oziya? Nwehe yowiiraneya ya José. Owo aanimweetta nakoso amphwanyiha musurukhu munceene ni aarumeela ntoko mutokweene. Nave aanilavula myaha okathi wa asembeleya ni konkresu. Okathi mukina mutokweene a esirkwiitu aaninvekela miruku, masi José onihimya so: “Miyo kaanitepa ororomela itthu kaasuwela aka ni sookumanana saka. Tthiri nkaamuroromela Yehova nnakhala vakhaani. Miyo koona wira kaari mutthu oolipa, nto eyo yaanikiiriha ohiwiriyana miruku ni soolopola Yehova aakivaha awe”. Nto José aahipaka etampi yuulupale ni aahikumihiwa mmulokoni. Nuuvira iyaakha sinceene aahittikiheriwa mmulokoni. Olelo-va, José onihimya so: “Yehova ookiixuttiha wira etthu ya faita khahiyo iparakha nrina ahu, masi opaka ele onnivekela awe”. Nihikhala-khale niliyalaka wira itthu sotheene ninsuwela ahu ni iparakha  nrina ahu, soovaha sinikhuma wa Yehova. (Mmusome 1 aKorinto 4:6, 7.) Akhala wira nnimwiixinnuwiha, Yehova khonrowa onirumeela.

9. Ohiphiyeriwa waamwiirinhe Satana ni Eva opaka exeeni?

⁹ Vaavo nnuupuwela ahu voohimya sa ohiphiyeriwa, woonasa wene nimmuupuwela Satana Diabo. Pooti wira Satana aahikhalana iparakha sinceene sa faita. Maana owo aari nlaikha na Yehova. Masi Satana khaaphiyeriwa, maana aaniphavela itthu sikina. Satana aaphavela wira okokhoreliweke, etthu yeeyo eri ya Yehova paahi. Satana oniphavela wira nikhale ntoko yena nihiphiyeriwaka wala ohakalala ni itthu nrina ahu. Ekwaha yoopacerya Satana aarumeelale awe muraakho owo, waari okathi yoole aavaanela awe ni Eva. Moophenta, Yehova aahinvaha Eva ni iyawe soolya sinceene soosiva. Awo yanwerya olya mihokorokho ‘sotheene sari mmatta’ ohiya muhokorokho mmosa paahi. (Maph. 2:16) Hata vaari siiso, Satana aahimwiiriha Eva ophavela olya muhokorokho aakhoottihiwe awe. Masi Eva khaaphiyeriwa ni khaavaha efaita itthu aarina awe, maana aaniphavela itthu sikina. Hiyo ninnisuwela etthu yaakhumelenle moottharelana. Eva aahipaka etampi, nuumala-vo aahikhwa.—Maph. 3:6, 19.

10. Mwene Davidi aamorenle sai muraakho wa ohiphiyeriwa?

¹⁰ Mwaha wa ohiphiyeriwa, Mwene Davidi aahiliyala itthu sotheene sooloka Yehova anvanhe awe ntoko mihakhu, ovuwa ni waaxintta awanani awe okathi wa ekhotto. Davidi aanisuwela wira itthu aavahiwa awe ni Muluku khisaareere waatta ni ‘khawerya’ okontari. Nave aanixukhurela itthu iyo aavahiwa awe. (Esal. 40:6) Masi waahiphiya okathi Davidi aaliyanle awe itthu sotheene aavahiwa awe ni Yehova. Owo khaaphiyeriwa itthu aarina awe, maana aaniphavela itthu sikina. Nnaamwi Davidi aarina athiyana anceene, Davidi aahipacerya osiveliwa ni mwaara a mulopwana mukina. Muthiyana owo aari Bathi-Xeba iyawe iihaniwa Uriya muHiti. Mwaha wa ohiphiyeriwa, Davidi aahirupa ni Bati-Xeba aahimurupaliha. Etthu Davidi aapanke awe, yaari yoohiloka. Masi hata vaari siiso, Davidi aahipaka-tho etthu ekina yootakhala, owo aahimwiiviha Uriya! (2 Sam. 11:2-15) Etthu xeeni Davidi uupuwela awe? Niireke uupuwela wira Yehova khaaweha etthu ele aapaka awe? Nnaamwi Davidi aavirinhe okathi munceene omukokhorelaka Yehova ni ari oororomeleya, owo aahimorela ntapha na ohiphiyeriwa, nto eyo yaahimukumiherya mixankiho sinceene. Moohakalaliha, Davidi aaheemererya, aahihimya etampi awe ni aahittharuwa ni murima wotheene. Moohaanyiherya,  Davidi aahixukhurela vanceene oleveleliwa ni Yehova!—2 Sam. 12:7-13.

11. Moovarihana ni aEefeso 5:3, 4, etthu xeeni enrowa onikhaliherya ohimorela ntapha na ohiphiyeriwa?

¹¹ Yowiiraneya ya Davidi, enniixuttiha exeeni? Wira nihimorele muraakho wa ohiphiyeriwa, nihaana oxukhurela itthu sotheene Yehova onnivaha awe. (Mmusome aEefeso 5:3, 4.) Nihaana ohakalala ni itthu nirina ahu. Vaavo nimmusomiha ahu mutthu Biibiliya, hiyo ninnimutumererya khula nihiku wuupuwela itthu Yehova oninvaha awe ni oxukhurela itthu iyo. Akhala wira naxikola ahu onoopaka eyo esumana ntero, owo onoovekela mahiku 7 itthu soovirikana. (1 aTes. 5:18) Niireke nyuwo munnipaka eyo? Wuupuwelela itthu sooloka Yehova onoopakelaweni, eyo enimookhaliheryani okhala mutthu ooxukhuru. Nto akhala wira munookhala mutthu ooxukhuru, nyuwo munoohakalalaka ni itthu murina anyu. Akhala wira munoohakalalaka ni itthu murina anyu, khamunrowa omorela ntapha na ohiphiyeriwa.

12. Ohiphiyeriwa waamwiirinhe Yuda Isikaryoti opaka exeeni?

¹² Ohiphiyeriwa waahimwiiriha Yuda Isikaryoti onvariha Yesu. Masi wanipacerya Yuda khahiyo aari mutthu ootakhala. (Luka 6:13, 16) Musuweleke wira Yesu aahimuthanla Yuda wira okhale murummwa awe. Woonasa wene, Yuda aanisuwela itthu sinceene ni aari mutthu oororomeleya, maana owo taakhapelela ekaaxa ya musurukhu yaarumeeliwa ni arummwa ni Yesu. Awo yaanirumeela musurukhu wa ekaaxa eyo wira aliveryeke itthu sikina okathi yaalaleerya aya. Musurukhu waaheliwa ekaaxa ele, onoolikana ni musurukhu ninvaha ahu olelo-va wira nikhaliherye muteko onivariwa olumwenku wotheene. Nuuvira okathi, Yuda aahipacerya wiiya musurukhu waaheliwa ekaaxa ele, nnaamwi aamwiiwale Yesu ikwaha sinceene aalopolaka atthu voohimya sa ohiphiyeriwa. (Mar. 7:22, 23; Luka 11:39; 12:15) Yuda khiiwelenle yoolopola eyo ya Yesu.

13. Okathi xeeni Yuda oonihenrya awe wira aari mutthu oohiphiyeriwa?

¹³ Ohiphiyeriwa wa Yuda, waahooneya oratteene ohalaka okathi vakhaani wira Yesu iiviwe. Yesu ni awiixutti awe omuhela muhina Maria ni Marta aahilattuliwa etthoko ya namakokho. Nlelo alyaaka, Maria aahivenya ni aahitthela muru wa Yesu makhura oowunkhela a musurukhu munceene. Yuda ni awiixutti akina khiyaasiveliwe. Woonasa wene awiixutti akina yuupuwela wira musurukhu ole waahaana orumeeliwa wira okhaliherye muteko woolaleerya. Masi Yuda aarina muupuwelo mukina. Yuda “aari latarau”, nto aaphavela wiiya musurukhu ole waaheliwa mukaaxani. Muhoolo mwaya, mwaha wa ohiphiyeriwa, Yuda aahinvariha Yesu oliviwaka musurukhu waathumaniwa epottha.—Yoh. 12:2-6; Math. 26:6-16; Luka 22:3-6.

14. Anamathelana amosa yaavarihenle sai muteko etthu nniixutta ahu Luka 16:13?

¹⁴ Yesu aahiwuupuxerya arummwa ekeekhai ela yuulupale: “Nyuwo khamunwerya onvarela muteko Muluku, vamosa ni Mihakhu”. (Mmusome Luka 16:13.) Ekeekhai eyo kheturukeyale. Nwehe moota anamathelana amosa a oRoménia yaavarihenle aya muteko malakiheryo ala a Yesu. Awo yaahivahiwa eparakha ya ovara muteko okathi vakhaani elapo yoothaaciri. Anamathelana ale anihimya so: “Hiyo naahikopha musurukhu munceene obanko, nto naahaana oliva. Wanipacerya nuupuwela wira muteko ole naavahiwe ahu yaari mareeliho yaakhuma wa Yehova”. Masi waahikhala muxankiho mmosa. Weemererya ovara muteko ole, khiyaarowa okhalanaka okathi wira avareke miteko sa Yehova. Nto anamathelana ale yaahisoma mwaha waakumiheriwe erevista A Sentinela 15 ya Agosto a 2008 yeeyo yaarina mwaha oni: “Mantenha a lealdade com um coração unificado”. Nto eyo yaahaakhaliherya opaka yoothanla. Awo anihimya so: “Akhala wira etthu yaarowa oniiriha ovara muteko elapo ekina yaari ophwanya musurukhu munceene, eyo yaarowa wooniherya wira khinaavaha efaita waataana wahu ni Yehova. Hiyo naanikupali ni murima wotheene wira mukhalelo ahu wa omunepani waamuhononeya”. Nto anamathelana ale yaahikhootta muteko ole. Etthu xeeni yaakhumelenle moottharelana? Amulopwana aahiphwanya muteko mukina elapo awe, yoowo aaliviwa awe  musurukhu waphiyerya oliverya itthu saathowa. Amuthiyana onihimya so: “Ntata na Yehova khahiyo nookhuveya”. Anamathelana ale, annihakalala omuthanla Yehova okhala Pwiya aya ohiya musurukhu.

15. Etthu xeeni ennikupaliha wira vanniweryaneya okhootta miraakho sa Satana?

¹⁵ Etthu xeeni ninreerela ahu opaka akhala wira noomorela muraakho wa wiixinnuwiha ni ohiphiyeriwa? Hata vari siiso, hiyo khanirimenle maana pooti okhuma! Murummwa Paulo ohimmye wira: Ale avariwe ni miraakho sa ‘Diabo [anoowerya] woopowa’. (2 Tim. 2:26) Eyo ti etthu aapanke awe Davidi. Owo aahiwiriyana vaavo aattaruxiwe awe ni Natani ni aahittharuwa ni murima wotheene. Nto eyo yaahimukhaliherya otthikela okhalana waataana wooloka ni Yehova. Muhikhala-khale muliyalaka ela: ‘Yehova ookhalana ikuru sinceene onvikana Satana’. Nto akhala wira nnimweemererya okhaliheriwa ni Yehova nnoowerya okhootta khula muraakho Diabo onrowa awe onireya.

16. Etthu xeeni enrowa onikhaliherya ohimorela miraakho sa Satana?

¹⁶ Etthu enrowa onikhaliherya ohimorela miraakho sa Satana ori okhootta miraakho wala matapha awe otheene. Masi nnoowerya opaka eyo nikhaliheriwaka ni Muluku. Hata vari siiso, nihiikhuraane! Maana hata atthu yaale akhumme khalai omurumeela Yehova pooti opacerya wiixinnuwiha wala ohiphiyeriwa. Nto khula nihiku munvekeleke Yehova oweha muupuwelelo wala itthu sikina munipaka anyu saarowa owiirihani opaka itthu soohiloka. (Esal. 139:23, 24) Muhikhala-khale mweemereryaka ohapuxiwa ni wiixinnuwiha ni ohiphiyeriwa!

17. Etthu xeeni enrowa omwiiraneela nwanani ahu Diabo?

¹⁷ Soovira iyaakha sinceene Satana opakaka itthu ntoko mulipa-ooxaya. Masi moohipisa, owo onootthukiwa nuumala-vo onimwiiviwa. (Wiis. 20:1-3, 10) Tthiri, hiyo ninnilipelela ophiya nihiku nlo. Nto, nilipelelaka ophiya nihiku nno, mwiimananiheke wira muhimorele miraakho sa Satana. Mpakeke sotheene muniwerya anyu wira muhimorele miraakho sa Satana. Nave, mwiimananiheke ‘omukhootta Diabo, nto Diabo owo, onimootthyawani’.—Yak. 4:7.