KHULA mwaakha, atthu anivikana imilyau 6 annirowa etakhwa ya oShima, ePenínsula ya oJapão. Awo annirowa opuro oniitthaniwa Santuário Muulupale a Ise, weiwo onikokhoreliwa muluku muthiyana a etiini xintoísmo, Amaterasu Omikami, mwa iyaakha ikonto piili sivinre. Wanipacerya, atthu awo anniireeriha, vaavo aninyawa aya ni orapiha eyano. Moottharelana anneemela ohoolo wa santuário haiden (okokhorela exiri); nuumala-vo annimukokhorela santuário, omana makuphi, ni onvekela muluku owo muthiyana. * Etiini xintoísmo khenaakhoottiherya atthu aya weettela itiini sikina; nto maBudista makina aneettela eKristau, nave akina khanoona otthekeya waya opaka soolema sa exintoismo va santuário ola.

Itiini sinceene sookhalana isantuário *, nto anamunceene annixukurya isantuário iyo. Ilapo sinceene sinihimmwa okhala sa eKristau, sookhalana isantuário ni ikerexa sinceene seiyo onikokhoreliwa awe Yesu, Maria, ni masanto. Nave-tho, sookhala isantuário mapuro yaale atthu anihimya aya wira sihiiraneya “miiriirya” sa Biibiliya sa vano, aahiiso mapuro yaale anipwehiwa itthu sa khalai sa etiini. Anamunceene annirowa opuro owo mwaha woowi anikupali wira mavekelo aya anirowa owiriyaniwa akhala wira anoopaka ari ene “nipuro noowaarya”. Akina anneetta ikiloomo sinceene wira ephiye opuro ori santuário aphavelaka wooniherya wira anniluttuweliwa ni etiini aya.

Niireke mavekelo aniwiriyaniwa paahi akhala wira anipakiwa vasantuário? Niireke Muluku onnisiveliwa ni ale anirowa opuro ori santuário? Nto niireke maKristau ahaana olompaka mapuro awo? Waakhuliwa wa makoho awo onoonikhaliherya osuwela akhala wira nihaana olompaka mapuro awo, ni enamuna yooloka ya okokhorela onimusivela Muluku.

Ovaanela wa Yesu ni muthiyana muSamariya onnooniherya moonelo wa Muluku voohimya sa mapuro oowaarya aahiiso, isantuário. Nihiku nimosa Yesu orowaka oSamariya aaheemela muttetthe mmosa waari ehime wiitthaniwa Sikari. Owo aahipacerya ovaanela ni muthiyana aarwiiye orika maasi. Evaanelaka siisaale, muthiyana ole aahilavula voohimya sa ovirikana waakhanle eriyari ya aYuda ni aSamariya. Nto muthiyana owo aahimmye so: “Axitith’ihu aSamariya yahimukokhorela Muluku vamwako vava: vano nyuwo aYuda munihimya wira nipuro n’omukokhorela Muluku t’oYerusalemu pahi”.​—Yohani 4:5-9, 20.

Mwaako muthiyana ole aahimya awe, Garizimi, oniphwanyaneya ikiloomo 50 mpantta onikela nsuwa  oYerusalemu. Opuro owo aSamariya yaahikhalana etemplo yapaka aya ifesta ntoko Paasikha. Masi, Yesu khaathokorenrye ovirikana iwo wa maloko, nto aamulenle so muthiyana ole: “Nyuwo muthiyana, mukikupali miyo: onophiya okathi ohinrowanyu wakokhorela Atithi, nnákhala vamwako va, nnákhala o Yerusalemu”. (Yohani 4:21) Tthiri moolumo ale yaari ootikiniha vanceene maana yaalavuliwe ni muYuda! Nto xeeni omukokhorela Muluku otemplo wa oYerusalemu waarowa aya omala-mala?

Yesu aahilavula-tho wira: “Onophiya okathi-okathi ene ti yola: wophiya tthiri onìraya alipa-òkokhorela èkekhai yakokhoreleke Atithi yettihiwaka n’iroho [munepa] y’ekekhai. Atithi annaphavela atthu antthuna wakokhorela siso”. (Yohani 4: 23) Mwa iseekulu sinceene, aYuda yaakupali wira etemplo yoovuwa ya oYerusalemu naari nipuro aakokhoreliwa Muluku mwa ekeekhai. Awo yaanirowa otemplo ikwaha 3 vamwaakhani wira yanvahe mukuttho Muluku aya, Yehova. (Okhuma 23:14-17) Masi Yesu aahimmye wira itthu sotheene samuturukeya nto “alipa-òkokhorela èkekhai” yaarowa okokhorelaka “yettihiwaka n’iroho [munepa] y’ekekhai”.

Etemplo ele yaatekiwe opuro wowooneya. Masi, “eroho” aahiiso munepa ni ekeekhai khenooneya, ni kherina nipuro naya. Tthiri Yesu ooniherya wira maKristau eekeekhai khiyaarowa okokhorelaka opuro omosa paahi, itthu sinipakiwa, aahiiso olipaka ni etthu ya werutthuni, wala opuro, ntoko Mwaako Garizimi, etemplo ya oYerusalemu, aahiiso mapuro makina oowaarya.

Okathi ole Yesu aavaanela awe ni muthiyana ole, nave-tho aahihimya wira “okathi” wa marukunuxo awo voohimya sa moota woomukokhorela Muluku, “onophiya”. Eyo yaarowa wiiraneya silini? Eyo yiiraneyale okathi yoole Yesu orweela wa mukuttho awe, aamalinhe awe okokhorela wa aYuda weiwo waattharihela Nlamulo na Moise. (aRoma 10:4) Tivonto Yesu aahimmye awe wira: “Okathi ene ti yola”. Xeeni ohalaka ohimya siiso? Mwaha woowi owo aari Mesiya ni aathukumanya atthareli yaawo yaarowa wiiwelelaka yooruma owo aalavunle awe oriki: “Muluku Munepa, nto ale animukokhorela ahaana omukokhorela ni munepa ni ekeekhai”. (Yohani 4:24, Tradução do Novo Mundo) Ontaphulelani okokhorela ni “munepa ni ekeekhai”?

Okathi Yesu aalavunle awe sa omukokhorela Muluku ni munepa, khahiyo aahimya osareya munepa, aahiiso enamuna ekina yoohakalaliha ya okokhorela. Owo aalavula sa weettihiwa ni munepa wootteela, (aahiiso ikuru soowerya sa Muluku) yoowo  onnikhaliherya wiiwexexa Nuulumo na Muluku. (1 aKorinto 2:9-12) Yesu aahirumeela nuulumo noowi “èkekhai” ophavelaka ottittimiherya sowiixuttiha sekeekhai sa Biibiliya. Ohiya orowa opuro wa vameekhaaya, okokhorela wahu onirowa weemereriwa ni Muluku akhala wira onoovarihana ni ele Biibiliya eniixuttiha awe ni weettihiwaka ni munepa wootteela wa Muluku.

MaKristau yooneleke sai orowa ni olompa opuro ori santuário? Moovarihana ni ele Yesu aahimmye awe wira anamakokhorela eekeekhai yaarowa okokhorelaka ni munepa ni ekeekhai, nto ti vookhalela ohimya wira olompa vasantuário aahiiso nipuro nikina “noowaarya” khonimusivela Tiithi ahu a Wiirimu. Biibiliya onninleela moonelo wa Muluku voohimya sa okokhorela ilatarato ni amuluku eethiru. Owo onihimya so: “Muhuluwe wakokhorela amuluku èthiru” ni “mwipasope n’amuluku èthiru”. (1 aKorinto 10:14; 1 Yohani 5:21) Ti maana aya maKristau eekeekhai anisyaka aya okokhorela opuro onooniwa okhala woowaarya aahiiso onivarihana ni amuluku eethiru. Wuupuwelela masu a Yesu voohimya sa isantuário, onniwiiriha maKristau eekeekhai okhootta olompa mapuro awo.

Masi, eyo khentaphulela wira Nuulumo na Muluku ninnikhoottiha othanla opuro wooreerela opakaka mavekelo, osoma, aahiiso wuupuwelela. Opuro wa mithukumano woophwanelela ni woomaaleleya onnikhaliherya wiixutta ni ovaanela myaha sa omunepani. Nave khahiyo vootthekeya opaka ekampa wira nimuupuwelele mutthu okhwiiye. Eyo pooti okhala enamuna ya wooniherya wira ninnuupuwela niphento nawe. Masi othokorerya mapuro awo ntoko mapuro oowaarya aahiiso okokhorela ilatarato, wala itthu sa faita sihiiwale ni amuharoiye khonivarihana ni moolumo a Yesu.

Nto nyuwo khamunitthuneya orowa osantuário wira Muluku aakhule mavekelo anyu. Muhuupuwele wira Muluku onoohakalala ni nyuwo, aahiiso wooreelihani mwaha woorowa opuro ori isantuário. Biibiliya onnileela wira Yehova Muluku ti “Mwanene wirimu n’ilapo ya vathí; owo khankhala empa etekiwe n’atthu”. Masi hiyo pooti onvekela yena ni onooniwiriyana khula opuro niri ahu, maana owo “khankhala ottaiwene ni hiyo”.​—Miteko 17:24-27.