1. Yehova onnihiya nipakaka exeeni?

YEHOVA onninihiya nithanlaka moota ninrowa ahu orumeela okumi ahu. Hata vari siiso, onniniixuttiha moota woopaka soothanla sooloka. Nave onninikhaliherya okhumela saana nuumala opaka yoothanla. (Esal. 119:173) Vaavo nintepa ahu ovarihela muteko malakiheryo a Nuulumo na Muluku, soothanla sahu sinrowa okhala sooloka.​—aHéb. 5:14.

2. Itthu xeeni sikhanle ookhumelela nalakela opaka yoothanla?

² Hata nipakaka yoothanla mwa miruku, pooti okhalana mixankiho sa moota woomaliherya etthu nipacerinhe ahu. Nwehe matakiheryo vakhaani: Mmiravo mmosa onnilakela omusoma Biibiliya otheene. Nto isumana soopacerya, owo onnikhumela saana, masi muhoolo mwaya onnihiyererya. Murokora mmosa onnilakela orumeela ntoko pioneera ookilaatheya masi khula okathi onanteerya mweeri oniphavela awe opacerya. Vano nikhuuru na axitokweene ninniiwanana waaxukurya anna otheene a mmulokoni, masi nuuvira myeeri sinceene ahinapaka ele yaalakenle aya. Hata sowiiraneya iyo siri ene soovirikana, yookhala etthu sinlikana aya. Etthu ene tiila: Khavarihenle muteko yoothanla aya. Khalai, maKristau yaakhala oKorinto yaahikhalana muxankiho ntoko wa anna awo. Nto mwaha ola, ninrowa woona etthu nikhanle ahu oowiixutta ni ntakiheryo na aKorinto.

3. Yoothanla xeeni aKorinto yaapanke aya, masi exeeni yaakhumelenle?

³ Mwaakha 55 nuumala Kristu orwa, maKristau a oKorinto yaahipaka yoothanla yootthuneya. Awo yaahisuwela wira anna a oYerusalemu ni oYudeya yaanihaawa ni yaahithoiwa vanceene, nto miloko sikina saanithukumanya musurukhu wira yaakhaliherye. Okhala wira yaari ooreera murima ni oovaha, aKorinto yaaphavela waakhaliherya annaya, nto yaahimukoha murummwa Paulo moota yaakhanle aya oowaakhaliherya. Owo aahaavaha malakiheryo  a moota woovaha misonkheryo saya ni aahimuruma Tito orowa okhaliherya othukumanya misonkheryo iyo. (1 aKor. 16:1; 2 aKor. 8:6) Masi, nuuvira myeeri vakhaani, Paulo aahoona wira aKorinto khiyaapacenrye othukumanya misonkheryo saya. Mwaha wa yeeyo, vaakhala ntoko wira khivaarowa oweryaneya Paulo oroiha misonkheryo saya oYerusalemu vamosa ni misonkheryo sa miloko sikina.​—2 aKor. 9:4, 5.

4. Yoolepa ya 2 aKorinto 8:7, 10, 11, murummwa Paulo aatumerenrye aKorinto opaka exeeni?

⁴ Musuwele wira aKorinto yaahipaka yoothanla yooloka. Nave murummwa Paulo aahaattottopela vanceene mwaha wa waamini waya woolipa ni ovaha waya. Hata vaari siiso, Paulo aahaatumererya omaliherya ele yaapacerinhe aya. (Mmusome 2 aKorinto 8:7, 10, 11.) Yowiiraneya ya aKorinto, enniixuttiha wira maKristau oororomeleya pooti waaxankiha ovarihela muteko yoothanla apanke aya.

5. Mwaha ola, ninrowa waakhula makoho xeeni?

⁵ Ntoko aKorinto, pooti onivila ovarihela muteko yoothanla ahu. Mwaha wa xeeni? Okhala wira naatthu oohimalela, ninnihiyererya itthu wira nipakeke okathi mukina. Nave itthu nahaalipelela ahu pooti oniiriha ohipaka itthu naalakenle ahu opaka. (Mus. 9:11; aRom. 7:18) Exeeni enrowa onikhaliherya osuwela akhala wira nihaana oturuka yoothanla naapanke ahu? Exeeni enrowa onikhaliherya omaliherya ele naapacenrye ahu? Nrowe niwehe.

6. Okathi xeeni ninreerela ahu oturuka yoothanla ahu?

⁶ Soothanla sikina sootthuneya khasinweryaneya oturuka. Mwa ntakiheryo, hiyo ninnivarexexa yoothanla ahu ya omurumeela Yehova, ni noolakela ororomeleya ni ole nithelanne ahu. (Math. 16:24; 19:6) Soothanla sikina naapanke ahu nihaana ovarerya-tho. Mwaha wa xeeni? Mwaha woowi makhalelo anniturukeya. Itthu xeeni sinrowa onikhaliherya opaka soothanla sooloka mwa miruku?

7. Nihaana ovekela exeeni, ni nthowa xeeni?

⁷ Mwaavekeleke ankhili. Yehova aahimuupuxerya Yakobo olepa so: “Akhalá mwa nyuwo ohirina ankhili, anvekele Muluku: onovahiwa, okhala wira Muluku onnavaha atthu othene ni murimène, ahùlumelaka”. (Yak. 1:5) Khuuvo mutthu onsuwela itthu sotheene ni mikhalelo sotheene. Tivonto, muhaana omuroromela Yehova okathi munipaka anyu soothanla ni okathi onireerela aya ovarerya soothanla mwaapanke anyu. Mwiira siiso, Yehova onimookhaliheryani opaka soothanla sooloka.

8. Etthu xeeni ninreerela ahu ovekela ni nthowa xeeni?

⁸ Mutokoseke saana mwaha owo. Mutokoseke Nuulumo na Muluku, musomeke iliivuru sinikumiheriwa ni mutthenkeso wa Yehova ni nvaaneleke ni atthu munaaroromela anyu. (Mir. 20:18) Otokosa mwaha owo ti vootthuneya nihinatthi opaka soothanla voohimya sa muteko, othaamela elapo ekina ni othanla enamuna ya osoma onrowa wookhaliheryani ovara miteko sa Yehova ntoko olaleerya.

9. Xeeni vari aya vooloka ororomeleya mmensihu?

⁹ Mutokoseke mathowa aniwiirihani opaka yoothanla eyo. Khahiyo wira Yehova onvaha efaita paahi soothanla sahu, masi onnivaha efaita etthu enniiriha opaka yoothanla. (Mir. 16:2) Muhiliyale wira Yehova oniphavela wira nroromeleyeke mwa itthu sotheene. Tivonto, okathi munipaka anyu soothanla muroromeleyeke mmensinyu, atthu akina ni etthu enwiirihani opaka yoothanla eyo. Akhala wira khaninroromeleya pooti onivila omaliherya etthu naapacenrye ahu. Mwa ntakiheryo, munna mmiravo pooti othanla okhala pioneero ookilaatheya. Nuuvira okathi owo onnikhalana muxankiho wa omaleliha iwoora, nto onnipacerya ohisiveliwa muteko woolaleerya. Pooti uupuwelaka wira etthu yaamwiiriha okhala pioneero, aaphavela omusiveliha Yehova. Masi etthu yekeekhai yaamwiiriha okhala pioneero aaphavela waasiveliha anamuyari awe ni atthu akina onaattittimiha awe vanceene mmulokoni.

10. Exeeni mutthu onireerela awe opaka wira opake marukunuxo?

 ¹⁰ Vano nkahaya mmuupuwele mulipa onisomihiwa Biibiliya, yoowo oniphavela ohiya ompaha soona. Wanipacerya, iimananihaka vanceene onniwerya ohimpaha soona esumana emosa wala piili. Vano nihiku nimosa onnitthikela ompaha soona. Wanikisa waya onniwerya ohiya ompaha soona! Nto omphenta wawe Yehova ni ophavela omusiveliha onnimukhaliherya oxintta yoolema ele yoohiloka.​—aKol. 1:10; 3:23.

11. Xeeni vari aya vooloka soolukama sahu okhala sooluluwanya?

¹¹ Mukhalaneke soolukama sooluluwanya. Akhala wira soolukama sanyu ti sooluluwanya, eyo enimookhaliheryani omaliha ele mpacenrye anyu. Mwa ntakiheryo, woonasa wene nyuwo moolakela omusoma Biibiliya moohihiyererya. Masi mwaahikhalane programa ooluluwanya, woonasa wene khamunrowa omaliherya yoolakela anyu. * Nwehe ntakiheryo nikina: Nkahaya nwuupuwele axitokweene animpaka palano a waaxukurya anna ikwaha sinceene. Masi nuuvira okathi ahinapaka ele yaalakenle aya. Wira yoothanla ekhumele saana, axitokweene ahaana wiikoha so: “Niireke ninnaasuwela anna ni arokora anireerela oxukuriwa? Niireke noothanla nihiku ni okathi ene ninrowa ahu waaxukurya?”

12. Woonasa wene etthu xeeni ninreerela ahu opaka, ni nthowa xeeni?

¹² Mweemereryeke makhalelo anyu. Khuuvo mutthu orina okathi, musurukhu ni ikuru wira opake khula etthu oniphavela awe. Nto nihaana okhalana moonelo wooloka, weemererya makhalelo ahu ni okhalana naakilili. Moona wira moopaka yoothanla muhiniwerya anyu, muhooveleleke oturuka yoothanla eyo. (Mus. 3:6) Vano, nuupuwele wira moovarerya yoothanla anyu ni moopaka marukunuxo mwaareerela anyu, nto munoona wira muhaana ovarihela muteko yoothanla anyu. Exeeni enrowa wookhaliheryani omaleliha ele mpacenrye anyu? Nrowe niwehe itthu 5 sinrowa wookhaliheryani.

13. Munrowa owerya sai okhalana ikuru soovarihela muteko yoothanla anyu?

¹³ Nvekeleke ikuru wira mpake ele mulakenle anyu. Muluku onoowerya woovahani “owerya” woovarihela muteko yoothanla anyu. (aFil. 2:13, Waataana wa Naanaano) Munvekeleke Yehova wira oovaheeni munepa wootteela onrowa wookhaliheryani okhalana ikuru muniphavela anyu. Moonaka wira Yehova onoopisa waakhula nivekelo nanyu, mutthikeleke ovekela. Yesu aahimmye so: “Nvekeleke: [munepa wootteela] munovahiwa”.​—Luka 11:9, 13.

14. Malakiheryo ari Miruku 21:5, anrowa wookhaliheryani sai ovarihela muteko yoothanla anyu?

¹⁴ Mumpakeke palano. (Musome Miruku 21:5.) Wira nwerye omaliherya khula etthu munipacerya anyu, muhaana ompaka palano. Moottharelana, muhaana wiimananiha omutthara saana palano anyu. Mulepeke khula etthu enrowa wookhaliheryani ovarihela muteko wira mmalelihe yoothanla anyu. Mwiimananiheke okawanya miteko suulupale khukhala saamukhaani. Mwiira siiso, vanimookhweelani okelela ohoolo. Mwa ntakiheryo, Paulo aahaaleela aKorinto wira khula nihiku noopacerya na esumana “mutthu ti mutthu asukeke vaté vawe musurukhu onweryawe ovukulanya”. Opaka eyo khiwaarowa otthuneya ovaha misonkheryo saya ekwaha emosa paahi nuumala Paulo ophiya. (1 aKor. 16:2) Okawanya muteko muulupale khukhala miteko saamukhaani, pooti wookhaliheryani omaleliha soothanla sanyu.

15. Nuumala ompaka palano, muhaana opaka exeeni?

¹⁵ Omulepa palano anyu onookhweiherya omaliherya soothanla sanyu. (1 aKor. 14:40) Mwa ntakiheryo, nikhuuru na axitokweene ninnaakhela  malakiheryo wira ahaana omuthanla mutokweene mmosa wira olepeke soothanla sotheene nikhuuru nimpaka aya. Mutokweene owo othanliwe onnilepa nsina na mutokweene onrowa ovara muteko owo ni nihiku onrowa awe omaliha. Okathi axitokweene anitthara aya malakiheryo awo, anookhumela saana vaavo anivarihela aya muteko soothanla saya. (1 aKor. 9:26) Mwiimananiheke opaka etthu emosaru mookumini mwanyu! Mwa ntakiheryo, mpakeke elista ya itthu muniphavela anyu ovara vanihikuni. Moottharelana mulepeke miteko iyo moovarihana ni okathi munrowa anyu ovara. Opaka eyo enimookhaliheryani omaliherya ele mpacerinhe anyu ni opaka eyo onnivukula okathi munceene.

16. Etthu xeeni yootepa otthuneya ninreerela ahu ovarihela muteko enttittimiheriwa aRoma 12:11?

¹⁶ Mwiimananiheke. Wira mutthu omutthare palano ni ommaliherya onitthuneya wiimananiha vanceene. (Mmusome aRoma 12:11.) Murummwa Paulo aahimuleela Timootheyo wira aahaana ‘othokorerya osoma’ ni ‘okhalela nthiti’ wiixuttiha saana. Miruku iya sinnivareleya muteko ni khula yoolukama ya omunepani.​—1 Tim. 4:13, 16.

17. Moota xeeni aÉfeso 5:15, 16, onrowa awe onikhaliherya opaka ele naalakenle ahu?

¹⁷ Murumeeleke mwa miruku okathi anyu. (Mmusome aÉfeso 5:15, 16.) Muthanle nihiku ni okathi munrowa anyu ovara yoothanla anyu ni muhiturukeke okathi owo. Musyakeke olipelela okathi munuupuwela anyu wira ti wooreerela ovara muteko owo. Pooti wira khonikhala-khala okhalaka okathi wooreerela, maana makhalelo anniturukeya. (Mus. 11:4) Muheemererye itthu sihirina efaita yinceene siwiiyeryakani okathi mwaarowa anyu ovara itthu sootepa otthuneya. (aFil. 1:10) Vaaweryaneyaka, nvareke muteko owo okathi munoona anyu wira atthu akina khanrowa owunteerihani. Mwaaleeleke atthu akina wira okathi owo, yookhala munrowa anyu opaka. Akhala wira ti siiso, mmuttipiheke selulari anyu ni musomeke mihupi okathi mukina. *

18-19. Exeeni enrowa wookhaliheryani ohihiya yoothanla yooloka mpanke anyu hata mukumanaka mixankiho?

¹⁸ Muupuweleke sookhumelela sooloka. Sookhumelela sa yoothanla ahu onlikana ni ophiya nipuro naarowa ahu. Naaphavelaka ophiya ninrowa ahu, nihaana ovikaniha mukwaha ahu hata ephiro ettiiwaka aahiiso vatthuneyaka ovira ephiro ekina. Mwa enamuna emosaru, akhala wira munimuupuwela itthu sinrowa okhumelela mwaha wa yoothanla anyu, nyuwo khamunrowa ohiya yoothanla anyu vaavo munrowa anyu okumanana mixankiho wala ovira ephiro ekina.​—aGal. 6:9.

¹⁹ Muhiliyale wira khahiyo vookhweya opaka soothanla sooloka ni ovarihela muteko. Masi mukhaliheriwaka ni Yehova, nyuwo munookhalana ankhili ni ikuru wira mmalihe ele mpacerinhe anyu.