Muthukumano ole, waahikumiheriwa mutthenkeso musya wiitthaniwa Liga das Nações. Yoolakela yuulupale ya mutthenkeso ole, waari “otumererya wiiraana ilapo sotheene sa moolumwenkuni ni okumiherya murettele ni ovareleleya”. Atthu anceene a itiini sowootha yaahimukhaliherya Liga das Nações. Vano Conselho Federal das Igrejas de Cristo ya wAmérica, yaahimmye wira “muthukumano ole yaari epoliitika ya Omwene wa Muluku valaponi”. Nto wira yooniherye okhaliherya waya mutthenkeso ole, awo yaahaaruma atthu aya orowa wiirela mpantta muthukumano wa Conferência de Paz de Paris. Mmosa a atthu ale yaarummwale aahimmye wira muthukumano ole “waahipaceriha makhalelo masya a mulaponi”.

Tthiri yaahipacerya makhalelo masya, makhalelo awo khiyaakumiheriwe ni apinaatamu yiirenle mpantta ekonferensia ele. Mwakha wa 1919, waahipaceriha makhalelo masya a muteko woolaleerya, maana Yehova aahaavaha arumeyi awe ikuru wira alaleerye ovikana khalai. Masi, eyo ehinatthi wiiraneya, yaahaana okhumelela etthu yuulupale yaarowa oturuka mukhalelo wa Anamasoma a Biibiliya.

Othanliwa wa matiretoore a Watch Tower Bible and Tract Society waarowa okhala Esaabadu 4 a Janero a 1919. Okathi ole, Joseph Franklin Rutherford taahoolela atthu a Yehova. Mooriipiha murima, Munna Rutherford ni anna akina 7 moohixariya yaahitthukweliwa mukhatteya epooma ya wAtlanta, oGeórgia, wEstados Unidos da América. Nto naanikhumelela nikoho nna: Niireke anna ale yaatthukweliwe mukhatteya yaahaana otthikela othanliwa? Wala waarowa oloka waarantteliha?

Ori ene mukhatteya, Munna Rutherford aahixanka voohimya sa mukhalelo wa muhoolo wa mutthenkeso. Owo aanisuwela wira anna akina yuupuwela wira vaamuloka omuthanla mutthu mukina wira okhale presitenti a mutthenkeso. Okhala wira aanisuwela eyo, Munna Rutherford aahaalepela ewarakha atthu otheene yaakhanle nihiku na mwaathanle. Owo aahimmye wira mutthu aareerela okhala presitenti  a mutthenkeso aari munna Evander Joel Coward. Ewarakha ele, Rutherford aahimuhimya Coward okhala munna “oomaala”, “a ankhili” ni “aimananiha ovara muteko wa Apwiya”. Masi, anna anceene yaarina muupuwelo mukina, awo yoona wira vaamureerela omuhiyererya mwaathanle ole mpakha ovira myeeri 6. Nto maadevogado yaawaakiha anna ale yaatthukweliwe yaaheemererya eyo. Vaavo yaatepa aya onyakulihana voohimya sa etthu yoopaka, anna akina yaahinyoonyiheya.

Muhoolo mwaya yaahikhumelela etthu, moovarihana ni Richard Harvey Barber yaakhalihenrye ophukiwa mwaha ole wooxankiha. Munna mmosa aakhanle opuro ole aahipacerya olavula oriki: “Ekeekhai wira nkinsuwela malamulo, masi miyo koosuwela ele entaphulela aya ororomeleya. Nave kinnisuwela ele entaphulela aya ororomeleya wa Muluku. Enamuna yuulupale nikhanle ahu oowooniherya ororomeleya wahu wa Muluku, ori otthikela omuthanla Munna Rutherford okhala presitenti a mutthenkeso”.​—Esal. 18:26.

Alexander Hugh Macmillan yoowo aatthukweliwe mukhatteya, muhoolo mwaya aahihimya etthu yiiraneyale nihiku na mwaathanle ole. Munna Rutherford aahimana exiri ya ekhatteya khuhimya so: “Mukumiherye ota moono anyu”. Munna Rutherford aahinvahererya ewarakha. Nuumala woona ewarakha ele yaamukhaani, Macmillan aahisuwela etthu ewarakha ele yaahimya aya. Eyo yaalempwale so: “RUTHERFORD WISE VAN BARBER ANDERSON BULLY, MADIRETOORE MARARU ANNOOPHENTANI OTHEENE ANYU”. Moolumo ale yooniherya wira matiretoore otheene yaahitthikela othanliwa, nto Joseph Rutherford ni William Van Amburgh yanvikaniha ovara miteko saya. Tthiri Munna Rutherford anvikaniha okhala presitenti a mutthenkeso.

Nlelo anna ale ari ene mukhatteya, Anamasoma a Biibiliya yiira yaavekelaka atthu waasinari epaphelo yaavekela wira anna ale ataphuliwe. Vaatthuneya olipa murima wira yaavekele atthu yahaakhanle Anamasoma a Biibiliya waasinari epaphelo ele, masi moohakalaliha anna ni arokora ale yaahiwerya waaphwanya atthu 700.000 yaasinanri epaphelo ele. Sihinatthi ipaphelo iye saasinariwe oroihiwa, Munna Rutherford ni anna akina yaahitaphuliwa 26 a Março a 1919.

Okathi aakheliwe awe owaani, Munna Rutherford aahilavula mwaha. Owo aahimmye so: “Kinnikupali ni murima wotheene wira itthu sinikhumelenle soonikhaliherya wiilokiherya mwaha wa mixankiho suulupale sinrowa okhumelela muhoolo. . . . Wiimananiha wanyu khahiyo waari paahi waakumiha anninyu mukhatteya. Mwaha woowi khahiyo yaari yoolakela anyu yuulupale . . . Maana wiimananiha wanyu wookhaliherya olaleya Ekeekhai, nto atthu otheene yiirenle mpantta anootthuveliwa vanceene”.

Mikhalelo sotheene saavarihana ni ophukeliwa wa anna ale sinnooniherya wira Yehova taahoolela myaha iye. Nihiku 14 a Maio, 1919, etribunaali yaawaakiha anna ale yaahimmye so: “Atthu ala khaphukeliwe mwa xariya, awo ahaana otaphuliwa maana kharina nthowa”. Anna ale yaahootheriwa opaka ikrime suulupale. Vaakhanle wira yaarooleveleliwa wala ehukhumu aya yaaroovukuliwa, awo yanvikaniha okhalana nthowa. Nto okhala wira khiyaarina nthowa, khuuvo  mutthu aawerya owootherya. Nto Mphuki Rutherford khaayeleelale iparakha sawe sa okhala mphuki, tthiri nuumala otaphuliwa mukhatteya owo ahaakhaliherya arumeyi a Yehova oSuprema Corte ya wEstados Unidos.

Munna Macmillan onnuupuwela so: “Hiyo khinaarowa okilaathi nnaikhuraana paahi, nlipelelaka okathi Apwiya yaarowa aya onikuxa wira nakhaleke wiirimu. Masi naahoona wira naahaana opaka etthu wira nisuwele yootthuna ya Apwiya”.

Masi anna ale yaarumeela oBetheli khiyaawerya otthikela ovara muteko yaavara aya okhuma khalai. Mwaha wa xeeni? Mwaha woowi okathi anna ale yaatthukweliwe aya mukhatteya, ikaruma naarumeela ahu wira nimpirimiriki iliivuru saahinyaanyiwa. Nto eyo yaahinikhulumula vanceene, nave anna akina yaaniikoha akhala wira muteko woolaleerya waahimala.

Niireke yaahikhala atthu yaaphavela muhupi wa Omwene waalaleiwa ni Anamasoma a Biibiliya? Wira aakhule nikoho nne, Munna Rutherford aahilavula mwaha. Nto yaahilattuliwa atthu anceene. Vano munna Macmillian aahihimya wira: “Akhala wira khonrwa mutthu, muteko woolaleerya woomala”.

Mwaha ole waarowa olavuliwa Ettiminku 4 a Maio a 1919, hata ahaareere owereiwa, Munna Rutherford aahilavula oLos Angeles, oCalifórnia mwaha waarina muru oni: “Nlipelelo na Apinaatamu Ooriipiwa Murima”. Opuro waalavuliwa mwaha, yaahikhala atthu 3.500, nto atthu anceene khiyaawenrye ovolowa mwaha woothowa opuro. Nihiku naattharelana, atthu yaavikana 1.500 yaahiwiriyana mwaha ole. Vano anna ale yaahoona waakhuliwa wa nikoho nle, maana nlelo yaahikhala atthu anceene yaaphavela owiriyana muhupi wa Omwene.

Ele anna ale yaapanke aya muhoolo mwaya, yookhaliherya muteko woolaleerya wa Anamoona a Yehova mpakha olelo-va.

Erevista Owehaweha ya 1 a Agosto, 1919 ya Enkelexi yaahihimya wira aamukhala kongresu wanipacerya  wa mweeri wa Setembro oCedar Point, Ohio. Mmiravo mmosa Namasoma a Biibiliya a oMissouri iihaniwa Clarence B. Beaty ohimmye so: “Atthu otheene yaaniphavela omurowela kongresu ole”. Tthiri anna ni arokora yaavikana 6.000 yaahimurowela kongresu ole, moohaanyiherya khinaalipelela wira yaamoorwa atthu anceene. Etthu ekina yaahaareere ohakalaliha kongresu ole okhala wira yaahipatisiwa atthu 200 Ntthiya Erie naattamenle epooma ele.

5 a Setembro a 1919, nihiku na neethanu (5) na kongresu, Munna Rutherford aahilavula mwaha waarina muru oni: “Anamuteko Akhwiihu”. Olavulaka mwaha ole, munna ole aahikumiherya erevista esya yiihaniwa The Golden Age. * Yoolakela ya erevista ele waari “waavaha ihapari sooreera sa niinaano, etthokiheryaka moota Biibiliya onooniherya awe nthowa naya sinikhumelela aya itthu iyo”.

Anamasoma otheene a Biibiliya yaahitumereriwa olaleerya moolipa murima arumeelaka erevista ele esya. Ewarakha yaavaha malakiheryo a moota wootthokiha muteko yaahimmye so: “Khula mutthu iivaherenrye [opatisiwe] ohaana wuupuwela wira eparakha yuulupale orina awe, nto ohaana ottottela mureerelo eparakha eyo wira aalaleerye atthu anceene”. Anna anceene yaaheemererya nlattulo nne! Mweeri wa Dezembro mwaakha ene yoole, anamalaleerya ale a Omwene ooluttuweliwa yaahaaphwanya atthu 50.000 yailepinhe wira yaakheleke erevista ele.

Wanikisa wa mwaakha wa 1919, arumeyi a Yehova yaari ootthokiheya ni oosareya ikuru. Ohiya-vo, iprofesia sinceene saahiiraneya. Nto weehereriwa ni oreerihiwa wa atthu a Muluku waalavuliwe vahinatthi Malakhiya 3:1-4, waahimala, vano arumeyi a Yehova yaahikumihiwa “oBabilonia Wulupale” ni Yesu aahimuthanla “murumeyi òroromeleya ni ànkhili”. * (Wis. 18:2, 4; Math. 24:45) Tthiri Anamasoma a Biibiliya yaari oolikana ene wira yaakhele muteko Yehova aarowa awe waavaha.