MWAHA ONITHOKORERIWA 41
Nvikanihe Ororomeleya Okathi wa “Maxakha Malupale”
“Nyuwo munimurumela Muluku, mwaphenteke Apwiya. Awo anasuka ale aniwiwelela”.—ESAL. 31:24.
NSIPO 129 Nimphavela Ovilela
ELE NINROWA AHU WIIXUTTA *
1-2. (a) Moohipisa makhulupale a mulaponi anrowa olaleya exeeni? (b) Makoho xeeni ninreerela ahu waakhula?
NKAHAYA muupuwele ahooleli a mulaponi ahimmye ene niinaano wira “nokhalana murettele” ni ovareleleya. Woonasa wene awo anrowa wiittottopaka wira aawerya wiiriha olumwenku okhala wooloka. Nto awo anrowa ophavelaka owiiriha atthu wuupuwelaka wira ahooleli a mulaponi aawerya omaliha mixankiho sa molumwenkuni. Masi ahooleli awo khanrowa owerya omaliha itthu sinrowa okhumelela muhoolo mwaya! Nthowa xeeni? Moovarihana ni eprofesia ya mBiibiliyani okathi ene yowo “t’unìraya warwele opweteya nananoru, . . . vano awo khanwerya otthyawa”.—1 aTes. 5:3.
2 Masi aakhala makoho ootthuneya anireerela waakhuliwa, makoho ene taala: Exeeni enrowa wiiraneya okathi wa “maxakha malupale”? Yehova onrowa onivekela opaka exeeni? Ninrowa wiilokiherya sai niinaano-va wira nivikanihe ororomeleya okathi wa maxakha maalupale?—Math. 24:21.
EXEENI ENROWA WIIRANEYA OKATHI WA “MAXAKHA MALUPALE”?
3. Moovarihana ni Wisupulula 17:5, 15-18, Muluku onrowa ompwetexa sai “Babilonia Mulupale”?
3 Mmusome Wisupulula 17:5, 15-18. “Babilonia Mulupale” onrowa opwetexiwa! Ntoko nilavunle ahu, okathi owo ahooleli a mulaponi khanrowa owerya omaliha mixankiho sinrowa okhumelela. Mwaha wa xeeni? Mwaha woowi, “Muluku [onrowa] òhela mmurimani mwaya otthuna wo wira itthu” onuupuwela awe. Muupuwelo xeeni owo? Muupuwelo woopwetexa mutthenkeso wa itiini sowootha ohela muhina itiini sotheene siniihimya okhala maKristau. * Muluku onrowa ohela muupuwelo awe vamurimani va “manyaka mulokó” a “nxeni noxerya”. Nto “nxeni noxerya” ninthoonyerya Nações Unidas, vano “manyaka mulokó” anthoonyerya iguvernu sinimukhaliherya Nações Unidas. (Wis. 17:3, 11-13; 18:8) Okathi anamalamulela awo oowerya anrowa aya otuphela etiini yoowootha, nnoosuwela wira maxakha maalupale aapacerya. Owo onrowa okhala okathi wooxankiha onrowa waaphwanya atthu a elapo yotheene.
4. (a) Itthu xeeni woonasa wene sinrowa owiiriha anamalamulela opwetexa itiini sowootha? (b) Woonasa wene, atthu ale yiirela mpantta itiini iyo anrowa opaka exeeni?
4 Hiyo khaninsuwela etthu enrowa owiiriha anamalamulela ompwetexa Babilonia Muulupale. Woonasa wene, awo anrowa ohimyaka wira itiini sinnikhoottiherya okumiherya murettele moolumwenkuni ni sinnihonona itthu anapoliitika anipaka aya. Nave pooti ohimyaka wira itiini sinniithukumanyerya mihakhu ni mireerelo sinceene. (Wis. 18:3, 7) Nave, vanikhala ntoko wira okathi itiini sowootha sinrowa aya opwetexiwa, khanrowa opwetexiwa atthu otheene yeettela itiini iyo. Nto pooti wira makhulupale makina a mulaponi khanrowa wiirelaka mpantta mitthenkeso sa etiini. Nuumala itiini sotheene sowootha opwetexiwa, atthu ale yiirela mpantta itiini iyo animoona wira ahooleli aya khawenrye opaka ele yaaleihenrye aya. Eyo pooti owiiriha okhootta wira yaaniirela mpantta itiini iyo.
5. Yehova oleihenrye opaka exeeni okathi wa maxakha maalupale ni nthowa xeeni?
5 Biibiliya khonihimya okathi onrowa ovira Babilonia Muulupale opwetexiwaka. Masi ninnisuwela wira onrowa okhala okathi vakhaani. (Wis. 18:10, 21) Yehova ooleiherya ‘ovukula mahiku awo’ mwaha “w’atthu . . . òthanliwa” ni wira etiini yekeekhai yoopowe. (Mar. 13:19, 20) Nto Yehova oniphavela wira nipakeke exeeni okathi owo, niire so, okathi anrowa aya opacerya maxakha maalupale ni wanikisa wa Armagedoni?
NVIKANIHE OKHALIHERYA OKOKHORELA WEKEEKHAI
6. Ohiirela mpantta etiini yowootha onihela muhina exeeni?
6 Ntoko niwenhe ahu mwaha ovinre, Yehova oniphavela wira ale animukokhorela ahiireleke mpantta etiini yoowootha. Masi opaka eyo, khontaphulela ohiya paahi itthu sinivarihana ni etiini yoowootha. Nihaana wiimananiha ovikaniha okhaliherya okokhorela wekeekhai, eyo piiyo, omukokhorela Yehova paahi. Nrowe niwehe inamuna piili soopaka eyo.
Hata okathi wooxankiha nihikhala-khale nicompaka mithukumano (Nwehe ettima 7) *
7. (a) Ninrowa wooniherya sai wira ninnikhaliherya moolipa murima malamulo a xariya a Yehova? (b) Moovarihana ni aHéberi 10:24, 25, xeeni mithukumano siri aya sootepa otthuneya?
7 Enamuna yoopacerya, nihaana okhaliherya moolipa murima ele Yehova onihimya awe wira ti yooloka voohimya sa orupihana. Nihikhala-khale neemereryaka muupuwelo wa olumwenku ola voohimya sa orupihana. Mwa ntakiheryo, hiyo khanneemererya khula enamuna ya orupihana woohiloka, eyo enihela muhina orupihana alopwanaru wala athiyanaru ni inamuna sikina sa orupihana woohiirya. (Math. 19:4, 5; aRom. 1:26, 27) Ya nenli, ovikaniha omukokhorela Yehova ni maKristau makhwiihu. Ninnipaka eyo vaavo ninrowa ahu Empa ya Omwene, ipa sa anna ni mapuro oowiipitheya. Moohicikha ele enrowa oniiraneela, khaninkhala-khala nihiyaka othukumana wira nimukokhorele Yehova. Tthiri nihaana othukumana otepexa wene ‘vavo vanòna [ahu] wira nihiku n’Apwiya nri vakhiviru’.—Mmusome aHéberi 10:24, 25.
8. Woonasa wene, muhupi ninlaleya ahu onrowa oturukeya sai muhoolo?
8 Woonasa wene, okathi wa maxakha maalupale muhupi ninrowa ahu olaleyaka onooturukeya. Olelo-va, ninlaleya ihapari sooreera sa Omwene ni waapaka awiixutti. Masi okathi wa maxakha maalupale, pooti wira muhupi ninrowa ahu olaleyaka onrowa okhala wootepa owereya ntoko maluku a epula ya maralala. (Wis. 16:21) Woonasa wene, okathi owo ninrowa olaleyaka wira moohipisa olumwenku wa Satana onoopwetexiwa. Waphiya okathi owo, nnoosuwela muhupi ene ninrowa ahu olaleyaka ni moota nikhanle ahu oolaleya. Niireke ninrowa olaleyaka ntoko ninlaleya ahu mwa iyaakha 100 sivinre? Wala ninrowa orumeelaka inamuna sikina? Hiyo khaninsuwela ninrowa owehaka okathi ene yoowo. Moohicikha enamuna ninrowa ahu olaleyaka, vanikhala wira nnookhalana eparakha ya olaleya moolipa murima muhupi wa ophukela wa Yehova!—Ezek. 2:3-5.
9. Atthu anceene anrowa woonela sai muhupi ninrowa ahu olaleyaka, nto nikupaliki exeeni?
9 Vannooneya wira muhupi ninrowa ahu olaleyaka onimwaanyoonya atthu anceene. Nto awo animwiimananiha onihiiha olaleya muhupi owo. Nto vanrowa otthuneyaka omuroromela Yehova ni murima wotheene. Olelo-va, Yehova onninikhaliherya olaleya ihapari sooreera. Tthiri ninnikupali ni murima wotheene wira muhoolo Muluku onoonivaha ikuru wira nipake khula etthu onrowa awe onivekela.—Mik. 3:8.
MWIILOKIHERYE MWAHA WA OTUPHELIWA ATTHU A MULUKU
10. Moovarihana ni Luka 21:25-28, atthu anceene anrowa okhala sai okathi wa maxakha maalupale?
10 Mmusome Luka 21:25-28. Okathi wa maxakha maalupale atthu anrowa woovaka. Nto itthu sotheene yuupuwela aya wira sooloka moolumwenkuni sinrowa ohononeya. Awo anrowa ‘oxanka’ yoovaka wira anrowa wiiviwa okathi wootepa oxankiha wa makhalelo a apinaatamu. (Sof. 1:14, 15) Okathi owo pooti wira makhalelo anooxankiha vanceene, mixankiho iyo sinimwaaphwanya arumeyi a Yehova. Nto okhala wira khanniirela mpantta olumwenku, nnookhalana mixankiho sinceene. Woonasa wene khaninrowa okhalana mireerelo.
11. (a) Xeeni Anamoona a Yehova anrowa aya oxeereliwa maitho? (b) Xeeni vahinreerela aya woova maxakha maalupale?
11 Okathi owo, atthu yeettela etiini yoowootha animoona wira Anamoona a Yehova annivikaniha weettela etiini aya. Eyo enimwaanyoonya vanceene. Nkahaya muupuwele manyaku-nyaku anrowa okhumelela, atthu anrowa olaleyaka munternetini ni redes sociais. Atthu anceene, anamalamulela ni Satana anrowa oninyokha mwaha woowi etiini ahu tenrowa ohala ehipwetexiwe. Awo animoona wira khawenrye omaleliha yoolakela aya ya opwetexa itiini sotheene siri valaponi. Nto eyo enoowiiriha onixeerela maitho. Okathi anrowa aya opaka eyo, awo anrowa okhala Gogi oMagogi. * Nto animwaatuphela arumeyi a Yehova. (Ezek. 38:2, 14-16) Okhala wira khaninsuwela itthu sotheene sinrowa oniiraneela, woonasa wene hiyo pooti opacerya oxanka. Masi yookhala etthu ninkupali ahu ni murima wotheene. Etthu ene tiila: Khivanreerela woova maxakha maalupale. Maana Yehova onoonivaha malakiheryo anrowa onikhaliherya woopowa. (Esal. 34:20) Okathi owo, hiyo ninrowa “ovenxa muru” mwaha woowi ‘wopoliwa wahu onrowa okhala vakhiviru’. *
12. Okhuma khalai, “murumeyi òroromeleya ni ànkhili” onipaka exeeni wira onikhaliherye wiilokiherya?
12 Okhuma khalai, “murumeyi òroromeleya ni ànkhili” onninikhaliherya wira nivikanihe ororomeleya okathi wa maxakha maalupale. (Math. 24:45) Owo onnipaka eyo mwa inamuna soovirikana, masi nkahaya muupuwele enamuna emosa, eyo piiyo, akongresu a 2016 mpakha 2018. Myaha saalavuliwa khula kongresu saahittittimiherya moota woolipiha mikhalelo ninreerela ahu okhalana wira noopowe nihiku na Yehova. Nrowe nuupuwele vakhaani mikhalelo iyo.
MULIPIHE OROROMELEYA, OVILELA NI OLIPA WANYU MURIMA
Mwiilokiherye niinano-va wira moopowe okathi wa “maxakha malupale” (Nwehe ittima 13-16) *
13. Ninrowa olipiha sai ororomeleya wahu? Xeeni vari aya vootthuneya opaka eyo niinaano-va?
13 Ororomeleya: Kongresu a 2016 aarina muru waahimya wira “Nvikanihe Omuroromela Yehova!” Kongresu ole oonikhaliherya woona wira naaphavelaka olipiha ororomeleya wahu wa Yehova nihaana olipiha waataana wahu ni yena. Myaha saalavuliwa saahittittimiherya otthuneya waya opaka mavekelo ni omusoma Biibiliya wira nilipihe waataana wahu ni Yehova. Maana omusoma Biibiliya ni ovekela onninikhaliherya oxintta mixankiho. Tthiri vaavo olumwenku wa Satana ontepa aya waattamela wanikisa ororomeleya wahu wa Yehova ni Omwene awe onrowa otepaka weehereriwa. Woonasa wene, ninrowa otepaka oramusiwa mwaha woohiirela mpantta olumwenku. (2 Ped. 3:3, 4) Nto nihaana olipiha niinaano-va ororomeleya wahu wira nivikanihe ororomeleya okathi wa maxakha maalupale.
14. (a) Exeeni enrowa owiiraneela anna anaahoolela arumeyi a Muluku valaponi? (b) Xeeni okathi owo onrowa aya otthuneyaka ororomeleya?
14 Olelo-va, Nikhuuru Noolamulela ninnaakhapelela atthu a Muluku valaponi. Masi okathi wa maxakha maalupale anna awo khanrowa okhala valaponi. Mwaha woowi, maKristau otheene oowoottihiwa anrowa wiiraka ari ene wiirimu wira yakhaliherye okathi wa ekhotto ya Armagedoni. (Math. 24:31; Wis. 2:26, 27) Eyo enooniherya wira Nikhuuru Noolamulela khaninrowa okhala valaponi. Masi hata vari siiso, muttitthi muulupale onrowa okhala wootthokiheya. Nto okathi owo, anna a ipwittipwitthi sikina arina sookumanana sinceene tanrowa waahoolelaka atthu a Muluku valaponi. Okathi eyo enrowa aya wiiraneya, nihaana wooniherya ororomeleya wahu wa Yehova, mwaha woowi ninrowa ottharaka malakiheryo anrowa aya ovahiwaka ni Muluku. Woopowa wahu onrowa olipaka ni otthara wahu malakiheryo aya!
15. Exeeni enrowa onikhaliherya olipiha ovilela wahu ni xeeni vanireerela aya opaka eyo niinaano-va?
15 Ovilela: Kongresu a 2017 aarina muru waahimya wira “Muhikhulumuwe!” Kongresu ole aahilipiha yoolakela ahu ya ovilela okathi nneehereriwa ahu. Naahoona wira ovilela khonlipa paahi okathi itthu sineetta aya saana. Nnoowerya olipiha ovilela wahu akhala wira ninnimuroromela Yehova ni murima wotheene. (aRom. 12:12) Nto nihikhala-khale niliyalaka yooleiherya ya Yesu eni: “Vano, ale anrowa okhalela nthiti [ovilela] mpakha womaliheryani, animòpowa”. (Math. 24:13) Yooleiherya ela enooniherya wira nihaana ovikaniha ororomeleya hata nrina ene mixankiho. Akhala wira olelo-va nnoovilela khula muxankiho, nnootepa okhala atthu oolipa okathi anrowa aya opacerya maxakha maalupale.
16. Ninrowa okhalana sai olipa murima wekeekhai? Ninrowa olipiha sai niinaano-va olipa wahu murima?
16 Olipa murima: Kongresu a 2018 aarina muru waahimya wira “Mulipihe Murima”! Kongresu ole aahinuupuxerya wira olipa murima, khonlipa ni mikhalelo sahu. Ntoko siisaale nintthuneya ahu omuroromela Yehova wira nikhale atthu oovilela, nihaana omuroromela Yehova wira nikhalane olipa murima wekeekhai. Ninrowa olipiha sai omuroromela wahu Yehova? Nihaana omusoma Biibiliya khula nihiku ni wuupuwelela moota Yehova aawooponle awe arumeyi awe khalai. (Esal. 68:21; 2 Ped. 2:9) Vaavo ninrowa ahu otupheliwa okathi wa maxakha maalupale, nihaana omuroromela Yehova ovikana khalai. (Esal. 112:7, 8; aHéb. 13:6) Akhala wira nnoolipiha niinaano-va omuroromela wahu Yehova, nnookhala oolipa murima okathi ninrowa ahu otupheliwa ni Gogi. *
MULIPELELEKE WOOPOLIWA WANYU
Moohipisa, Yesu ni anakhotto awe a wiirimu anrowa owana ekhotto ya Armagedoni wira yaapwetexe awanani a Muluku! (Nwehe ettima 17)
17. Xeeni vahinreerela ahu omoova Armagedoni? (Nwehe elatarato ya ekaapa.)
17 Ntoko nilavunle ahu mwaha ovinre, anamunceene a hiyo niyariwe okathi wa mahiku ookiserya. Nave ninnikupali wira nnimoopowa okathi wa maxakha maalupale. Ekhotto ya Armagedoni onrowa okhala naamwalane a olumwenku ola wootakhala. Masi khanikhanle oowoova! Mwaha wa xeeni? Mwaha woowi, eyo enrowa okhala ekhotto ya Yehova, nto hiyo khaninrowa owana. (Mir. 1:33; Ezek. 38:18-20; Zak. 14:3) Okathi Yehova onrowa awe ohimya, Yesu Kristu onrowa waahoolela anakhotto a Muluku. Tthiri Kristu onrowa okhala ni maKristau oowoottihiwa anikhuma valaponi ni ikonto sinceene sa malaikha. Otheene aya anrowa owana ni Satana, malaikha awe ootakhala ni anakhotto awe valaponi.—Dan. 12:1; Wis. 6:2; 17:14.
18. (a) Yehova oleihenrye exeeni? (b) Wisupulula 7:9, 13-17, onookupalihani exeeni?
18 Yehova ooleiherya wira: “Iyuma sothene sipakeliwe wolupatthani khasinvara-tho muteko”. (Yes. 54:17) “Muttitthi mulupalexa” wa arumeyi oororomeleya a Yehova anrowa otthapaka vaavo anrowa aya woopowa okathi wa maxakha maalupale! Nuumala-vo, awo anrowa ovikaniha omurumeela Yehova. (Mmusome Wisupulula 7:9, 13-17.) Biibiliya onninivaha mathowa manceene annikhaliherya woona wira nnimoopowa muhoolo! Nave noosuwela wira Yehova ‘onnasuka ale animwiwelela’. (Esal. 31:24) Otheene ale animphenta ni anivaha efaita yootthuna ya Yehova anrowa otthapaka vaavo nsina nawe ninrowa aya otteelihiwa ni omala-mala itthu sotheene Muluku onootheriwa awe.—Ezek. 38:23.
19. Nlipelelo xeeni nookuxa murima nrina ahu na muhoolo?
19 Nkahaya muupuwele moota yaarowa aya okhala moolumo ari 2 Timótheyo 3:2-5 vaakhanle wira anlavula mikhalelo sa atthu anrowa okhalaka elapo esya ehinlamuleliwa ni Satana. (Nwehe ekaaxa eni: “ Mikhalelo sa Atthu Elapo Esya”.) Munna George Gangas, * yoowo aari a Nikhuuru Noolamulela aahimmye so: “Onrowa okhala woohakalaliha okathi atthu otheene anrowa aya okhala anna ni arokora! Moohipisa nyuwo munrowa okhalaka elapo esya. Tthiri munrowa okhalaka mpakha okathi Yehova onrowa awe okhalaka. Eyo enooniherya wira munrowa okhalaka mahiku otheene”. Tthiri nla nlipelelo nookuxa murima!
NSIPO 122 Nikhaleke Oowiilipiha, ni Oohittikinyeya!
^ etti. 5 Noosuwela wira moohipisa apinaatamu animwaaphwanya “maxakha malupale”. Exeeni enrowa owiiraneela arumeyi a Yehova okathi owo? Yehova onrowa onivekela opaka exeeni? Mikhalelo xeeni ninreerela ahu okhalana wira nivikanihe ororomeleya wahu okathi wa maxakha maalupale? Mwaha ola, ninrowa waakhula makoho awo.
^ etti. 3 MOOLUMO OOTTHOKIHERIWA: Itiini siniihimya okhala maKristau, itiini seiye sihiniwiixuttiha atthu omukokhorela Yehova ntoko oniphavela awe.
^ etti. 11 MOOLUMO OOTTHOKIHERIWA: Nuulumo noowi Gogi a oMagogi (wala Gogi) onihimmwa wiiraana wa egrupu ya atthu anrowa waatuphela arumeyi a Muluku okathi wa maxakha maalupale.
^ etti. 11 Akhala wira muniphavela osuwela itthu sinrowa okhumelela mpakha ekhotto ya Armagedoni, xontte nwehe muru 21 wa eliivuru Omwene wa Muluku Onnilamulela! Nave wira moone itthu sikina sa otuphela wa Gogi a oMagogi ni moota Yehova onrowa awe waakhapelela arumeyi awe okathi wa Armagedoni, nwehe eliivuru A Adoração Pura de Jeová É Restaurada!, muru 17 ni 18.
^ etti. 16 Kongresu a 2019, orina muru onihimya wira ‘Ophenta Khonimala-tho’! Ophenta iwo onninooniherya wira nnoowerya okhala oovareleleya nikhapeleliwaka ni Yehova.—1 aKor. 13:8.
^ etti. 19 Nwehe mwaha oni: “Suas obras o seguirão”, A Sentinela de 1 a Dezembro, 1994.
^ etti. 65 OTTHOKIHERIWA WA EFOOTU: Okathi wa maxakha maalupale, moolipa murima egrupu yaamukhaani ya Anamoona a Yehova annipaka muthukumano wa mmulokoni mutakhwani.
^ etti. 67 OTTHOKIHERIWA WA EFOOTU: Muttitthi muulupale wa arumeyi oororomeleya a Yehova onrowa otthapaka nuumala woopowa okathi wa maxakha maalupale!
