1. Exeeni Yehova okhanle awe oopaka wira omaliherye yootthuna awe?

YEHOVA pooti wiikhaliha khula etthu oniphavela awe wira omalelihe yoolakela awe. Mwa ntakiheryo, Yehova onniikhaliha Mwiixuttihi, Namalipiha ni Namalaleya. Tthiri iya inamuna vakhaani sa itthu sinceene Yehova oniikhaliha awe. (Yes. 48:17; 2 aKor. 7:6; aGal. 3:8) Nave Yehova onnaaruma apinaatamu wira omalelihe yoolakela awe. (Math. 24:14; 28:19, 20; 2 aKor. 1:3, 4) Nave-tho Yehova pooti onvaha khula mutthu a hiyo ankhili ni owerya nimphavela ahu wira nimaliherye yoolakela awe. Inamuna iya sotheene sinnooniherya ele nsina na Yehova nintaphulela aya, ntoko asomi anceene anikupali aya.

2. (a) Xeeni atthu akina anhoverya aya akhala wira Yehova onimwaarumeela? (b) Mwaha ola ninrowa othokorerya exeeni?

² Tthiri otheene ahu ninniphavela orummwa ni Yehova, masi atthu akina annihoverya akhala wira Yehova onimwaarumeela. Mwaha wa xeeni? Mwaha woowi anuupuwela wira khanwerya ovara itthu yaaphavela aya mwaha wa wuuluvala, owereyasiwa, mikhalelo saya aahiiso itthu ansuwela aya. Atthu akina anuupuwela wira annivara itthu sinceene, nto anoona wira khivanreerela ovara itthu sikina. Mwaha ola, ninrowa woona itthu Yehova onnivaha awe wira nimalelihe yoolakela awe. Nuumala-vo, ninrowa othokorerya matakiheryo a mBiibiliyani anooniherya wira Yehova aahaavaha arumeyi awe alopwana ni athiyana ophavela ni owerya woovara ele oniphavela awe. Wanikisa waya, ninrowa woona moota nikhanle ahu oomweemererya Yehova oniruma ovara yootthuna awe.

3. Moovarihana ni aFilipi 2:13, moota xeeni Yehova onnivaha awe ophavela ovara muteko awe?

³ Mmusome aFilipi 2:13. * Yehova onoowerya onivaha ophavela  ovara muteko awe. Onipaka sai eyo? Woonasa wene, pooti omphwanya mutthu mmulokoni oniphavela okhaliheriwa wira opake etthu. Wala axitokweene pooti osoma ewarakha enihimya wira efiliyaali ennaaphavela atthu okhaliherya muttetthe ahu wala mittetthe sikina. Itthu iyo pooti oniiriha wiikoha so: ‘Kihaana opaka exeeni wira kikhaliherye?’ Aahiiso hiyo pooti ovahiwa muteko wooxankiha nihinsuwela ahu ovara oratteene. Nuumala osoma soolepa mBiibiliyani, hiyo pooti wiikoha so: ‘Kinrowa ovarihela sai muteko yoolepa ela wira kaakhaliherye atthu akina?’ Muhiliyale wira Yehova khonnikhanyererya opaka etthu. Masi vaavo nnuupuwela ahu wira nihaana opaka etthu, Yehova pooti onikhaliherya onivahaka otthuna woopaka etthu eyo.

4. Moota xeeni Yehova onnivaha awe ikuru wira nivare muteko awe?

⁴ Nave Yehova pooti onivaha ikuru wira nivare muteko awe. (Yes. 40:29) Moota xeeni? Owo pooti onivaha munepa awe wootteela wira onikhaliherye olokiherya itthu ninsuwela ahu. (Okhum. 35:30-35) Ohiya-vo, Yehova onnirumeela mutthenkeso awe wira oniixuttihe ovara miteko nnoona ahu wira ti sooxankiha. Moonaka wira khamunwerya ovara muteko awe, nvekeleke nikhaliheryo. Nave, munvekeleke Yehova, Tiithi ahu oovaha “owerya . . . wulupalexa”. (2 aKor. 4:7; Luka 11:13) MBiibiliyani aakhala matakiheryo manceene anooniherya moota Yehova aakhalihenrye awe alopwana ni athiyana aavahaka ophavela ni ikuru wira avare muteko awe. Vaavo ninrowa ahu othokoreryaka matakiheryo awo, muupuweleke moota Yehova okhanle awe oowoorumeelani wira nvare muteko yaavanre aya.

5. Enamuna Yehova aamurumenle awe Moise wira owoopole aIsarayeli enniixuttiha exeeni?

⁵ Yehova aahimukhaliherya Moise owoopola aIsarayeli. Masi okathi xeeni Yehova aamurumenle awe Moise? Khahiyo waari okathi yoole Moise oona awe wira anwerya opaka eyo mwaha woowi “ahixuttihiwa osuwela wothene w’atthu a wEjitu”. (Mit. 7:22-25) Masi Yehova aahimurumeela Moise nuumala omukhaliherya okhala mutthu oowiiyeviha ni oomaala. (Mit. 7:30, 34-36) Nave Yehova aahinvaha Moise olipa murima wira alavule ni mwene ootepa owerya a wExiitu. (Okhum. 9:13-19) Enamuna Yehova aamurumenle awe Moise enniixuttiha exeeni? Enniixuttiha wira Yehova onnaarumeela atthu ale aniimananiha otakiha mikhalelo sawe ni aniroromela ikuru sawe.​—aFil. 4:13.

6. Enamuna Yehova aamurumenle awe Barizilayi wira omukhaliherye Davidi enniixuttiha exeeni?

⁶ Iyaakha sinceene muhoolo mwaya, Yehova aahimurumeela Barizilayi wira omukhaliherye Mwene Davidi. Vaavo aamutthyawa awe mwanawe iihaniwa Absalomi, Davidi ni atthu awe yaahivoliwa etala “ni ntthona, khukhulumuwa” vanceene. Barizilayi yoowo ahaareere wuuluvala aahileva okumi awe ni wa atthu akina aarina awe wira omukhaliherye Davidi. Tthiri Barizilayi khuupuwela wira Yehova khaarowa omurumeela mwaha woowi aahuuluvala. Ohiya-vo, aahikuxa itthu aarina awe wira aakhaliherye atthu akina. (2 Sam. 17:27-29) Ntakiheryo na Barizilayi ninniixuttiha exeeni? Ninniixuttiha wira hata nuuluvanle ene, Yehova pooti onirumeela wira naakhaliherye anna ni arokora oothoiwa anikhala muttetthe ahu wala elapo ahu. (Mir. 3:27, 28; 19:17) Akhala wira khaninwerya waakhaliherya mmansihu, hiyo pooti ovaha musurukhu ahu wira naakhaliherye anna ni arokora oothoiwa ni aphwanyiwe ehasara yaawo anikhala ottaiwene.​—2 aKor. 8:14, 15; 9:11.

7. Yehova aamurumenle sai Simeyoni ni osuwela eyo ennilipiha sai?

⁷ Yehova aahimuleiherya mulopwana oowuuluvala aakhala oYerusalemu iihaniwa Simeyoni  wira khaarowa okhwa ohinwenhe Mesiya. Yooleiherya eyo, yaahimulipiha vanceene Simeyoni, mwaha woowi waahivira okathi munceene omulipelelaka Mesiya. Tthiri Yehova aahimutthuvela mwaha wa ovilela ni waamini. Nihiku nimosa, Simeyoni “ahirowa mpani mwa Muluku, ùpuxeriwe [ene] n’eroho yowarya”. Mpaani mme mwa Muluku, aahinweha mwaana iihaniwa Yesu, nto Yehova aahimurumeela Simeyoni ohimya vahinatthi wira mwaana ole aarowa okhala Kristu. (Luka 2:25-35) Nnaamwi vakhalaka ntoko wira Simeyoni aakhwiiye ohinatthi opacerya muteko woolaleerya wa Yesu, Simeyoni aahixukhurela vanceene orumeeliwa ni Yehova ni muhoolo onrowa woona itthu sinceene sinrowa okhumelela! Maana elapo esya, mulopwana ole oororomeleya onimoona moota olamulelo wa Yesu onrowa aya waaphwanyiha mareeliho apinaatamu otheene. (Maph. 22:18) Nave hiyo ninnixukhurela iparakha sotheene Yehova onnivaha awe mmutthenkesoni mwawe.

8. Yehova onrowa onirumeela sai ntoko aamurumenle awe Baarnaba?

⁸ Eseekulu yoopacerya, mulopwana oovaha iihaniwa Yosefe aaheemererya vootthuna wawe orumeeliwa ni Yehova. (Mit. 4:36, 37) Woonasa wene, okhala wira aanisuwela waamaaliha atthu akina, arummwa yaahinvaha nsina noowi Baarnaba nenno nintaphulela “mutthu onalipiha murima akhw’awe”. Mwa ntakiheryo, nuumala Saulo okhala muKristau, anna ni arokora anceene yaanimoova mwaha woowi Saulo aanaalupattha ale yaamwaamini Yesu. Masi Baarnaba aahaalipiha anna ale ni aahimukhaliherya Saulo, nto Saulo aahixukhurela vanceene oreereliwa murima. (Mit. 9:21, 26-28) Muhoolo mwaya axitokweene a oYerusalemu yaaphavela waalipiha anna ni arokora yaakhala ottaiwene ntoko Antiyokiya wa oSiria. Nto tani aareerela orowa waalipiha anna ale? Baarnaba. Tthiri awo yaahipaka yoothanla yooloka! Biibiliya onihimya wira Baarnaba aahaatumererya “othene aya wira ekhaleleke nthiti owettelaka Apwiya ni murim’aya wothene”. (Mit. 11:22-24) Olelo-va, Yehova pooti onikhaliherya waalipiha anna ni arokora. Mwa ntakiheryo, Yehova pooti onikhaliherya waalipiha ale akhweliwe. Aahiiso, pooti oniiriha omuxukurya wala omulikarela mutthu oniwereiwa aahiiso oriipiwe murima wira nimulipihe. Niireke munoomweemererya Yehova woorumeelani ntoko aamurumenle awe Baarnaba?​—1 aTes. 5:14.

9. Enamuna Yehova aamukhaliherya awe Vasily okhala mutokweene ooloka enniixuttiha exeeni?

⁹ Yehova aahimukhaliherya munna oniihaniwa Vasily okhala mutokweene oowiixuttihiwa saana. Okathi Vasily aathanliwe awe okhala mutokweene aarina iyaakha 26. Nto uupuwela wira khaarowa owerya waakhaliherya anna ni arokora momunepani otepexa wene ale arina mixankiho. Masi, aahiixuttihiwa ni axitokweene yaarina sookumanana sinceene ni aahirowela exikola ya Orummwa wa Omwene. Vasily aahiimananiha vanceene wira olokiherye mikhalelo sawe. Mwa ntakiheryo owo aahipaka elista ya itthu saamukhaani aaphavela awe opaka. Vaavo aapaka awe itthu iyo, owo aanitepa oxintta woova wawe. Vasily onihimya so: “Etthu yaakoopiha khalai vano ennikihakalaliha vanceene. Vaavo Yehova onkikhaliherya awe ophwanya yoolepa yoomaaliha wira kaakhaliherye anna ni arokora mmulokoni, kinnihakalala vanceene”. Akhala wira munoomutakiha Vasily ni omweemererya Yehova woorumeelani, owo onimoovahani ophavela ni ikuru wira nvare miteko sawe mmulokoni.

10. Abigayili aapanke exeeni? Ntakiheryo nawe ninniixuttiha exeeni?

¹⁰ Davidi ni alopwana awe oororomeleya yaanilupatthiwa ni Mwene Sawuli, nto yaaniphavela  okhaliheriwa. Vano alopwana ale a Davidi yaahirowa onvekela yoolya mulopwana oothaaciri mwIsarayeli iihaniwa Nabali. Awo yaanoona oreerela orowa onvekela yoolya mwaha woowi yaahikhapelela inama sa Nabali moothakoni. Masi okhala wira Nabali aari oowiitthuna, owo aahikhootta waavaha. Eyo yaahimwiiriha Davidi onanariwa vanceene onaphavela omwiiva Nabali ni alopwana otheene a etthoko awe. (1 Sam. 25:3-13, 22) Masi mwaarawe Nabali iihaniwa Abigayili aari ankhili ni ooreera. Moolipa murima aahirowa omuxonttela Davidi wira ohikhalane nthowa na ephome vaavo aarowa awe omwiiva Nabali ni atthu otheene eetthoko awe. Mooreerela murima Abigayili aahinvaha miruku Davidi wira ororomeleke okhaliheriwa ni Yehova. Moolumo oowiiyeviha ni miteko sa ankhili sa Abigayili saahinvara murima Davidi. Tthiri eyo yaahimukhaliherya Davidi woona wira Abigayili aarummwale ni Yehova. (1 Sam. 25:23-28, 32-34) Abigayili aahikhalana mikhalelo saamukhalihenrye orumeeliwa ni Yehova. Moolikanasa, arokora ooreera murima ni ankhili pooti orumeeliwa ni Yehova wira alipihe itthoko saya ni atthu akina mmulokoni.​—Mir. 24:3; Tito 2:3-5.

11. Anamwane aaxithiyana a Xalumi yaapanke exeeni? Olelo-va tani anaatakiha anamwane aaxithiyana a Xalumi?

¹¹ Iseekulu sinceene muhoolo mwaya, anamwane aaxithiyana a Xalumi yaahirumeeliwa ni Yehova wira akhaliherye otthikela otekiwa ixiri sa oYerusalemu. (Neh. 2:20; 3:12) Nnaamwi paapa aya aari mukhulupale, anamwane aaxithiyana a Xalumi yaahivara muteko wooxankiha ni wowoopiha. (Neh. 4:9-12) Tthiri awo yaahivirikana ni atthu ooTekowa, yaawo yaakhoottale “ovara muteko warummwaya”. (Neh. 3:5) Nkahaya muupuwele ohakalala yaaphwannye aya anamwane aaxithiyana a Xalumi vaavo saamalihiwe aya otekiwa ixiri sa oYerusalemu mahiku 52 paahi! (Neh. 6:15) Mahiku ala, arokora oowiivahererya annihakalala vaavo aninvarela aya Muluku miteko soovirikana ntoko, oteka ni olokiherya ipa sa Omwene. Wira muteko okhumele saana, ti vootthuneya osuwela ovara miteko, okhala atthu oohakalala ni ororomeleya.

12. Yehova onrowa onirumeela sai ntoko amurumenle awe Tabitha?

¹² Yehova aahimwiiriha Tabitha owiirela ‘sorera atthu othene ni àkhaliheryaka alipa-òthoiwa’ otepexa wene athiyana anaamukhweli. (Mit. 9:36) Okhala wira aari ooreera murima ni oovaha, okathi akhwiiye awe yaahinla ni oriipiwa murima vanceene. Nkahaya muupuwele moota atthu ale yaatthampe aya okathi murummwa Pedru aamuhihimunxe awe Tabitha. (Mit. 9:39-41) Ntakiheryo na Tabitha ninniixuttiha exeeni? Ninniixuttiha wira, hata nri ene amiravo wala nuuluvanle ene aahiiso nri ene alopwana wala athiyana nnoowerya opaka itthu wira naakhaliherye anna ni arokora.​—aHéb. 13:16.

13. Murokora oowuuliwa muru oniihaniwa Ruth aarumeeliwe sai ni Yehova, ni onihimya exeeni?

¹³ Murokora oowuuliwa muru oniihaniwa Ruth aaniphavela okhala misionaaria. Vaavo aari awe mwali, owo aanirowa empa ni empa onaavaha atthu ifolyeeto moowaakuveya. Owo onihimya so: “Waanikisivela vanceene muteko ole woolaleerya kaavara aka”. Tthiri waalaleerya atthu Omwene wa Muluku empa ni empa waanimuxankiha vanceene. Nnaamwi aari oowuuliwa muru, Ruth aahikhala pioneera ookilaatheya orina ene iyaakha 18. Mwaakha wa 1946, aahilattuliwa Exikola ya oGileadi, nto muhoolo mwaya aahirumeela oHawaí ni oJapão. Yehova aahimurumeela murokora ole olaleya ihapari sooreera ilapo iyo. Nuuvira iyaakha 80 olaleeryaka, Ruth onihimya so: “Okathi wotheene Yehova onnikivaha ikuru. Owo ookikhaliherya oxintta  wuuliwa waka muru. Tthiri kinnikupali ni murima wotheene wira Yehova onnimurumeela khula mutthu onimuroromela”.

14. Moovarihana ni aKolosi 1:29, naaphavelaka orumeeliwa ni Yehova nihaana opaka exeeni?

¹⁴ Okhuma khalai, Yehova onnaarumeela arumeyi awe mwa inamuna soovirikana. Nto Yehova onrowa wookhaliheryani opaka exeeni? Onimookhaliheryani opaka khula etthu oniphavela awe, masi itthu sotheene sinlipa ni wiimananiha wanyu. (Mmusome aKolosi 1:29.) Akhala wira munimweemererya orumeeliwa ni Yehova, owo onimookhaliheryani okhala namalaleerya ooluttuweliwa, mwiixuttihi oolokexa, waalipiha atthu akina, osuwela ovara saana miteko, mpatthani oolokexa, wala khula etthu oniphavela awe wira omaliherye yootthuna awe.

15. Moovarihana ni 1 Timótheyo 4:12, 15, olelo-va amiravo aahaana omuxonttela Yehova wira aakhaliherye opaka exeeni?

¹⁵ Ankhi nyuwo amiravo oopatisiwa? Musuweleke wira mutthenkeso wa Yehova onnaaphavela amiravo arina ikuru wira akhalane iparakha ntoko okhala murummwa oorumeela. Miloko sinceene aakhala axitokweene anceene waavikana arummwa oorumeela. Niireke nyuwo amiravo munniphavela okhalana miritti sinceene mmulokoni? Okathi mukina anna akina anihimya so: “Kinnihakalala okhala namalaleerya paahi”. Akhala wira nyuwo munuupuwela siiso, mmuxontteleke Yehova wira ookhaliheryeni okhalana mikhalelo sinrowa wookhaliheryani okhala murummwa oorumeela ni opaka itthu sotheene wira mmurumeeleke. (Mus. 12:1) Xontte anna, muhiliyale wira ninniphavela okhaliheriwa ni nyuwo!​—Mmusome 1 Timótheyo 4:12, 15.

16. Etthu xeeni ninreerela ahu onvekela Yehova ni nthowa xeeni?

¹⁶ Yehova pooti wookhaliheryani opaka khula etthu oniphavela awe wira omaliherye yootthuna awe. Nto munvekeleke ophavela ovara muteko awe ni mmuxontteleke wira oovaheeni ikuru muniphavela anyu. Hata muri ene mmiravo wala muuluvanle ene, murumeeleke okathi anyu, ikuru ni itthu munisuwela anyu wira munvuwihe Yehova. (Mus. 9:10) Nto vaavo munivahiwa anyu iparakha mmutthenkesoni mwa Yehova, muhaakuveleke okhootta muupuwelaka wira khamunrowa owerya ovara saana itthu munivekeliwa anyu. Tthiri eparakha yuulupale opaka itthu sotheene ninwerya ahu wira ninvuwihe Tiithi ahu oophenta Yehova.