1. Etthu xeeni apinaatamu anireerela aya opaka wira aphwanye ohakalala weekeekhai?

 OHAKALALA weekeekhai mukhalelo ninreerela ahu okhalana okumi ahu wootheene. Olavulaka sa ohakalala weekeekhai, Yesu ori vamwaako aahimmye so: “Oohakalala taale anisuwela wira ahaana omusuwela Muluku”. (Math. 5:3) Nto masu ala anooniherya wira vanniweryaneya okhalana ohakalala weekeekhai okumi ahu wootheene. Mwaha wa xeeni? Okhala wira Yesu aanisuwela wira apinaatamu ootheene apattuxiwe ni yoophavela ya “omusuwela Muluku”, niire so, omukokhorela Yehova Muluku yoowo ori Mpattuxa aya. Yehova “Muluku oohakalala”, nto ale animukokhorela tthiri anoowerya okhala oohakalala. — 1 Tim. 1:11.

2-3. (a) Moovarihana ni moolumo a Yesu, tani akhanle oophwanya ohakalala weekeekhai? (b) Etthu xeeni ninrowa ahu othokorerya mwaha ola? Ni mwaha wa xeeni?

² Niireke vanniweryaneya ohakalala nrina ene mixankiho? Aayo. Moone ele Yesu aahimmye awe. Owo aahimmye so ale “ariipiwe murima” mwaha woowiivaha nthowa ni soottheka saya aahiiso mwaha wa mixankiho anikumana aya, anoowerya okhala oohakalala. Nave-tho Yesu aahihimya etthu emosaru okathi aalavula awe sa ale “anlupatthiwa mwaha wa exariya” ni ale ‘aniveehiwa’ mwaha wookhala atthareli a Kristu. (Math. 5:4, 10, 11) Masi vaniweryaneya sai okhala oohakalala hata nikumanaka mixankiho iyo?

³ Yesu aaphavela oniixuttiha wira nnoowerya okhala oohakalala hata siniphwanyaka mixankiho. Masi wira niphwanye ohakalala weekeekhai nihaana omusuwela Muluku, omwaattamela ni okhala  mpatthani awe. (Yak. 4:8) Nto ninrowa owerya sai opaka eyo? Mwaha ola nnooweha itthu tthaaru sinrowa onikhaliherya ophwanya ohakalala weekeekhai.

4. Etthu xeeni yoopacerya ninreerela ahu opaka wira niphwanye ohakalala weekeekhai? (Esalimo 1:1-3)

⁴ ETTHU YOOPACERYA: wira nikhalane ohakalala weekeekhai nihaana osomaka nuulumo na Muluku. Yesu aahilikanyiha nuulumo na Muluku ni eyoolya. Apinaatamu ni inama ahaana olyaaka eyoolya khula nihiku wira akhale akumi. Masi hiyo apinaatamu ninwerya osoma paahi nuulumo na Muluku. Nto nihaana opakaka eyo. Ti nthowa naya Yesu aahimmye awe so: “mutthu khonikhala mukumi mwaha wa ephaawu paahi, masi onikhala mukumi ni khula nuulumo ninkhuma wa Yehova”. (Math. 4:4) Nto niheemererye hata niviraka nihiku nimosa nihimusomme Biibiliya. Nasaalimo mmosa aahimmye wira “òreriwa t’ale . . . Ansiveliwa n’ikano s’Apwiya, antthokelela ikano iyo othana n’uhiyu”. — Musome Esalimo 1:1-3.

5-6. (a) Exeeni nniixutta ahu mBiibiliyani? (b) Omusoma Biibiliya onrowa onikhaliherya sai?

⁵ Moophenta, Yehova oonivaha malakiheryo yaawo ari mBiibiliyani annikhaliherya okhalana okumi wooloka ni woohakalaliha. Mwa ntakiheryo omurumeelaka Biibiliya, Yehova onnihimya etthu emwiirinhe onipattunxa, moota womwaattamela ni moota wooleveleliwa soottheka sahu. Nave nihiixutta nlipelelo noohakalaliha onrowa awe onivaha muhoolo. (Yer. 29:11) Okathi nimmusoma ahu Biibiliya ninniixutta ikeekhai iyo siri mbiibiliyani nave ninnihakalala vanceene.

⁶ Biibiliya ookhalana miruku sinceene sinrowa onikhaliherya khula nihiku. Nto vaavo nneettela ahu miruku iyo ninniphwanya ohakalala weekeekhai. Okathi muniriipiwa anyu murima  mwaha wa mixankiho sanyu, mmusomeke Biibiliya ni muupuweleleke ele munisoma anyu. Yesu aahimmye so: “oohakalala taale aniiwa nuulumo na Muluku aneettela!” — Luka 11:28.

7. Munrowa ottottela sai mureerelo okathi munimusoma anyu Biibiliya?

⁷ Okathi munimusoma anyu Biibiliya nweheke etthu muniixutta anyu. Mwa ntakiheryo, niireke yootoko owiiraneelani ela? Mutthu waapeya eyoolya yoowoosivelani. Masi okhala wira muri ooriipiwa murima ni ooxankiheya, nyuwo muhinoona osiva okathi munilyanyu eyoolya eyo. Nto nuumala olya, nyuwo munnoona wira mwalya moowaakuvasa ni munninyoonyiwa mwaha woosuwela wira khamuttottenle mureerelo okathi mwalya anyu eyoolya ele yowoosivelani. Niireke mootoko omusoma Biibiliya moowaakuveya moona wira khamwiixuntte etthu? Okathi munimusoma anyu Biibiliya, mwiimananiheke oweha itthu siniromoliwa, owiriyana masu a atthu aniromoliwa mpantta munisoma anyu ni wuupuwelela mpantta munisoma anyu. Nto wiimananiha opaka itthu iyo onimoophwanyihani ohakalala.

8. Niireke “murumeyi oororomeleya ni ankhili” onnivara muteko ovahiwe awe ni Yesu? (Nwehe enoota.)

⁸ Yesu oomuthanla “murumeyi oororomeleya ni ankhili” wira onivaheke iliivuru seiyo sinnikhaliherya olipiha ompatthani ahu ni Yehova. Tthiri murumeyi owo onnipaka eyo. * (Math. 24:45) Nto malakiheryo, murumeyi oororomeleya onnivaha awe anikumiha mbiibiliyani. (1 aTes. 2:13) Nave malakiheryo awo anninikhaliherya osuwela muupuwelo wa Yehova. Nto ti nthowa naya ninsoma ahu irevista Owehaweha ni Nvenye! ni osoma myaha siri musaitini mwahu jw.org. Ohiya-vo, ninniimananiha olokiherya mithukumano sa eriyari ya esumana ni sa wuumalani wa esumana. Ni oweha eprograma ya khula mweeri ya JW Broadcasting^®. Akhala wira nnimwiimananiha omusoma Biibiliya eyo enoonikhaliherya owerya opaka etthu ya nenli ninreerela ahu opaka wira niphwanye ohakalala weekeekhai.

9. Etthu xeeni ya nenli ninreerela ahu opaka wira niphwanye ohakalala weekeekhai?

⁹ ETTHU YANENLI: wira niphwanye ohakalala weekeekhai nihaana wiiwelela malamulo a Yehova. Nasalimo mmosa aalempe so: “Óreriwa t’ale anattittimiha Apwiya n’uwova, yale anettela iphiro saya”. (Esal. 128:1) Omoova Yehova ontaphulela exeeni? Omoova Yehova ontaphulela omuttittimiha ni murima ahu wootheene ni osyaka opaka itthu sinimunanara. (Mir. 16:6) Nto ti nthowa naya nniiwelela ahu malamulo awo ari mbiibiliyani voohimya sa ele eri yooloka ni yoohiloka. (2 aKor. 7:1) Tthiri nnookhala atthu oohakalala vakhala wira ninniphenta itthu Yehova oniphenta awe ni onyokha itthu oninyokha awe. — Esal. 37:27; 97:10; aRom. 12:9.

10. Moovarihana ni aRoma 12:2, muritti xeeni ootheene ahu nirina ahu?

¹⁰ Mmusome aRoma 12:2. Mutthu pooti osuwela wira Yehova ookhalana ediretu yoothanla ele eri yooloka ni yoohiloka, masi owo ohaana ophavela ni murima awe wootheene wiiwelela malamulo a Muluku. Mwa ntakiheryo, mutthu pooti osuwela wira kuvernu ookhalana ediretu ni opaka malamulo wira atthu ale aneettiha mikukutta mustaraatani atthareke. Masi mutthu owo ohinaphavela otthara malamulo awo akumiheriwe ni kuvernu. Nto eyo pooti omwiirihaka mutthu owo weettiha vanceene mukukutta awe. Moolikanasa, mweettelo ahu onimooniherya vakhala wira ninniphavela wiiwelela malamulo a Yehova. (Mir. 12:28) Nave eyo, ti itthu yaamwiirinhe Davidi, yoowo iiwelela sooruma sa Yehova, ohimya so: “Nyuwo mokithonyerya ephiro y’ekumi: mukhalaka ni miyo, munnikitteliha  murima vancene; kikhalaka ni nyuwo, kinnipuha mahiku othene”. — Esal. 16:11.

11-12. (a) Xeeni ninreerela ahu okhalana ephoole okathi sinniphwanya aya mixankiho wala ninriipiwa ahu murima? (b) aFilipi 4:8 onrowa onikhaliherya sai osuwela othanla matthekulelo ahu?

¹¹ Ootheene ahu ikwaha sikina sinniniphwanya mixankiho ni ninniriipiwa murima. Nto okathi itthu iyo sinnikhumelela aya, ninniimananiha opaka itthu sikina wira niliyale mixankiho sahu. Eyo etthu yooloka masi nihaana okhalana ephoole wira okathi owo nihipake itthu sinrowa omunanara Yehova. — aEef. 5:10-12, 15-17.

¹² Epaphelo aalepenle awe aFilipi, murummwa Paulo aahaatumererya makristau awo ohihiya wuupuwelela itthu sootheene siri “saxariya,  . . . sooloka, . . . soophenteya, ni sookhalela”. (Mmusome aFilipi 4:8.) Ekeekhai wira okathi murummwa Paulo aalepa awe masu ala, owo khaalavula sa matthekulelo paahi, masi ele aalempe awe eniiriheke hiyo othanla matthekulelo ooloka. Mmananihe opaka ela: muhinatthi othanla muusika oowiriyana, efilme yowaasistiri, eliivuru yoosoma aahiiso xooku munrowa anyu omweetta nwehe vakhala wira onnivarihana ni mikhalelo siniromoliwa aFilipi 4:8. Opaka eyo enimookhaliheryani osuwela vakhala wira matthekulelo munithanla anyu annimusivela Muluku aahiiso nnaari. Nto nimphavela wira okumi ahu ovarihaneke ni malamulo maalupale a Yehova. (Esal. 119:1-3) Opaka eyo enamuna yooloka yoophwanya ohakalala weekeekhai. — Mit. 23:1.

13. Etthu xeeni ya neeraru enrowa onikhaliherya ophwanya otteeliwa murima weekeekhai? (Yohani 4:23, 24)

¹³ ETTHU YANEERARU: Nweheke vakhala wira munnipweha opuro woopacerya omukokhorela wanyu Yehova mookumini mwanyu. Okhala wira Yehova tonipattunxe nto owo onnireerela okokhoreliwa. (Wiis. 4:11; 14:6, 7) Masi etthu nikhanle ahu ohela nipuro noopacerya mookumini mwahu ori omukokhorela wahu Yehova mwa enamuna oniphavela awe, eyo piiyo, ‘Neettihiwaka ni munepa ni ekeekhai’. (Mmusome Yohani 4:23, 24.) Eyo enitaphulela wira omukokhorela wahu Yehova, ohaana weettihiwaka ni munepa woowaarya wa Muluku ni okhala moovarihana ni ikeekhai siri mbiibiliyani. Nave omukokhorela wahu Yehova ohaana okhala opuro woopacerya mookumini mwahu, hata nikhalaka elapo muteko ahu onikhoottihiwa aya. Anna ni arokora anivikana 100, aatthukweliwa mukhatteya mwaha wookhala aNamoona a Yehova paahi *. Hata vari siiso, awo annitteeliwa murima apakaka ele aniwerya aya wira amusome Biibiliya, ovekela, ni ovaanela ni atthu akina voohimya sa Omwene wa Muluku. Okathi ninveehiwa ahu aahiiso olupatthiwa, ninnihakalala mwaha woosuwela wira Yehova ori ni hiyo ni onrowa onitthuvela. — Yak. 1:12; 1 Ped. 4:14.

14. Exeeni yaamwiiranenle munna mmosa oTajikistao ni mwaha wa xeeni?

¹⁴ Soowiiraneya sa anna a olelo-va, sinnooniherya wira itthu tthaaru niixuntte ahu sinoonikhaliherya ophwanya ohakalala weekeekhai, moohicikha mixankiho sinniphwanya. Nkahaya nwehe etthu yaamukhumelenle Jovidon Bobojonov yoowo orina iyaakha 19 ni onikhala oTajikistao. Mwaha wookhootta orowa etoropa, nihiku 4 a outubro 2019, munna Jovidon aahirweeliwa owannyawe ni mapoliisia otthukweliwa mukhatteya myeeri sinceene ni aathokoreriwa ntoko mutthu aapanke ekrime. Othokoreriwa nno moohixariya waahisuweliwa ilapo sinceene. Owo aahimaniwa vanceene ni atoropa okhanyereriwaka owara ikuwo sa atoropa ni okhanyereriwaka olapha wira orowe etoropa. Nuumala-vo, owo aahiphukeliwa ni aahiroihiwa mapuro yaavariwa muteko wookhanyereriwa, masi moohakalaliha, muhooleli a elapo ele aahimulevelela ni aahiruma wira otaphuliwe. Okathi  saamukhumelela aya itthu iye, Jovidon khaahiiye okhala oororomeleya. Owo aawenrye sai opaka eyo? Mwaha woowi owo khaaliyala waataana wawe ni Yehova.

15. Moota xeeni munna Jovidon, aawenrye awe olipiha waataana wawe ni Yehova okathi aari awe mukhatteya?

¹⁵ Okathi aari awe mukhatteya, munna Jovidon aanilipiha waataana wawe ni Yehova, hata ahaarina Biibiliya wala iliivuru sikina sinimutthokiherya Biibiliya. Aawenrye sai opaka eyo? Okhala wira okathi anna ni arokora yaarowa aya omuxukurya yaanikuxa eyoolya nto yaanihela yoolepa ya nihiku murupa yaahela aya eyoolya. Nto owo, aaniwerya omusoma Biibiliya ni omuupuwelela khula nihiku. Nuumala otaphuliwa mukhatteya, munna Jovidon aahaavaha miruku anna ni arokora nlelo yahaatonko oviriha muxankiho ntoko ole, owo ahimmye so: “Murumeeleke otaphuwa wanyu wira muncererye osuwela wanyu, mmusomaka Biibiliya ni iliivuru sikina sinimutthokiherya Biibiliya”.

16. Okathi aari awe mukhatteya, itthu xeeni munna Jovidon uupuwelela awe?

¹⁶ Munna Jovidon aahiimananiha vanceene okhala moovarihana ni malamulo a Yehova. Okathi aari awe mukhatteya owo khuupuwela itthu soohiloka masi aamuupuwela Yehova ni itthu oniphavela awe. Munna Jovidon vaanimusivela vanceene oweha itthu sooreera Yehova opattunxe awe. Khula voosiisu, owo aanivenya  ni onaawiriyana axipalame yiipaka. Ohiyu, owo vaanimusivela oweha mweeri ni itheneeri. Owo onihimya so: “Kaanihakalala vanceene ni kaanilipa okathi kaaweha aka soopattuxiwa iye sa Yehova”. Vakhala wira nnooxukhurelaka khula etthu Yehova onnivaha awe, eyo enooniphwanyiha ohakalala weekeekhai nave nakhalana ohakalala weekeekhai nnoophwanya ikuru wira nivilele mixankiho sahu.

17. Moota xeeni 1 Pedru 1:6, 7, onrowa awe omukhaliherya mutthu orina mixankiho saaphwannye munna Jovidon?

¹⁷ Nave munna Jovidon aanihela nipuro noopacerya omukokhorela wawe Yehova. Okhala wira owo aanisuwela wira ti wa faita okhala oororomeleya ohoolo wa Muluku eekeekhai. Yesu aahimmye wira: “Mmukokhoreleke Yehova Muluku anyu, ni mmurumeeleke yoowo paahi”. (Luka 4:8) Maxeefi ni atoropa yaaphavela wira munna Jovidon ohiye etiini awe, ohiya opaka eyo, munna Jovidon aaninvekela Yehova khula nihiku ni khula ohiyu ni murima awe wootheene onvekelaka wira omukhaliherye ohoova ni ohihiya waamini wawe. Nnaamwi athokoreriwe moohixariya, Jovidon khaahiyale ororomeleya wawe. Nnaamwi aakumihiwe owannyawe, omaniwa ni otthukweliwa, vano owo ookhalana waamini woolipa okhala wira oowerya oxintta sooweeha. — Mmusome 1 Pedru 1:6, 7.

18. Exeeni ninreerela ahu opaka wira nihihiye ohakalala ohakalala weekeekhai?

¹⁸ Yehova onnisuwela itthu nimphavela ahu wira niphwanye ohakalala weekeekhai. Akhala wira nnootthara itthu tthaaru nimanle ahu wiixutta siniphwanyiha ohakalala weekeekhai, hiyo nnoophwanya ohakalala weekeekhai hata siniphwanyaka mixankiho. Nuumala-vo, nyuwo munoowerya ohimya so: “Noreriwa nloko Muluku aya akhanle Apwiya [Yehova]”. — Esal. 144:15.